Air India CEO Resigns: ਏਅਰ ਇੰਡੀਆ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ (ਸੀ.ਈ.ਓ.) ਕੈਂਪਬੈਲ ਵਿਲਸਨ ਨੇ ਅਸਤੀਫਾ ਦੇ ਦਿੱਤਾ ਹੈ। ਹਾਲਾਂਕਿ, ਉਹ ਏਅਰਲਾਈਨ ਦੇ ਸੀ.ਈ.ਓ. ਵਜੋਂ ਸੇਵਾ ਨਿਭਾਉਂਦੇ ਰਹਿਣਗੇ, ਜਦੋਂ ਤੱਕ ਕੋਈ ਨਵਾਂ ਵਿਅਕਤੀ ਨਹੀਂ ਆ ਜਾਂਦਾ। ਹਿੰਦੁਸਤਾਨ ਟਾਈਮਜ਼ (ਐਚ.ਟੀ.) ਨੇ ਮਾਮਲੇ ਤੋਂ ਜਾਣੂ ਲੋਕਾਂ ਦੇ ਹਵਾਲੇ ਨਾਲ ਕਿਹਾ ਕਿ ਉਨ੍ਹਾਂ ਦਾ ਅਸਤੀਫਾ ਪਿਛਲੇ ਹਫ਼ਤੇ ਹੋਈ ਬੋਰਡ ਮੀਟਿੰਗ ਵਿੱਚ ਸਵੀਕਾਰ ਕਰ ਲਿਆ ਗਿਆ ਸੀ। ਵਿਲਸਨ ਦੇ ਸਤੰਬਰ 2026 ਤੱਕ ਇਸ ਅਹੁਦੇ 'ਤੇ ਬਣੇ ਰਹਿਣ ਦੀ ਉਮੀਦ ਹੈ।
2022 ਵਿੱਚ ਸ਼ੁਰੂ ਹੋਏ ਸਫਰ ਦਾ ਹੋਇਆ ਅੰਤ
ਕੰਪਨੀ ਇਸ ਸਮੇਂ ਇੱਕ ਨਵੇਂ CEO ਦੀ ਭਾਲ ਕਰ ਰਹੀ ਹੈ। ਬੋਰਡ ਇਸ ਸਮੇਂ ਕਈ ਹੋਰ ਗਲੋਬਲ ਏਅਰਲਾਈਨਾਂ ਦੇ ਮੁਖੀਆਂ ਨਾਲ ਵਿਚਾਰ ਵਟਾਂਦਰਾ ਕਰ ਰਿਹਾ ਹੈ। ਉਮੀਦ ਹੈ ਕਿ ਕੰਪਨੀ ਜਲਦੀ ਹੀ ਆਪਣਾ ਨਵਾਂ ਸੀਈਓ ਲੱਭ ਲਵੇਗੀ।
ਵਿਲਸਨ ਸਤੰਬਰ 2022 ਵਿੱਚ ਪੰਜ ਸਾਲਾਂ ਦੇ ਇਕਰਾਰਨਾਮੇ 'ਤੇ ਏਅਰ ਇੰਡੀਆ ਵਿੱਚ ਸ਼ਾਮਲ ਹੋਏ ਸੀ। ਉਸ ਸਾਲ ਤੋਂ ਥੋੜ੍ਹੀ ਦੇਰ ਪਹਿਲਾਂ ਏਅਰਲਾਈਨ ਦਾ ਨਿੱਜੀਕਰਨ ਕੀਤਾ ਗਿਆ ਸੀ। ਉਨ੍ਹਾਂ ਦਾ ਕਾਰਜਕਾਲ ਜੁਲਾਈ 2027 ਵਿੱਚ ਖਤਮ ਹੋਣਾ ਸੀ।
ਏਅਰ ਇੰਡੀਆ ਵਿੱਚ ਸ਼ਾਮਲ ਹੋਣ ਤੋਂ ਪਹਿਲਾਂ ਵਿਲਸਨ ਨੇ ਸਿੰਗਾਪੁਰ ਏਅਰਲਾਈਨਜ਼ (SIA) ਵਿੱਚ ਲਗਭਗ 26 ਸਾਲ ਸੇਵਾ ਕੀਤੀ। ਉਹ ਮੂਲ ਰੂਪ ਵਿੱਚ ਨਿਊਜ਼ੀਲੈਂਡ ਤੋਂ ਹੈ। ਏਅਰ ਇੰਡੀਆ ਵਿੱਚ ਰਹਿੰਦਿਆਂ ਉਸ ਨੇ ਕੰਪਨੀ ਲਈ ਇੱਕ ਪੰਜ ਸਾਲਾਂ ਦਾ ਰੋਡਮੈਪ 'Vihaan.AI' ਤਿਆਰ ਕੀਤਾ। ਇਸਦਾ ਉਦੇਸ਼ ਏਅਰਲਾਈਨ ਦੀ ਸੇਵਾ ਨੂੰ ਬਿਹਤਰ ਬਣਾਉਣਾ ਅਤੇ ਇਸਦੇ ਨੈੱਟਵਰਕ ਦਾ ਵਿਸਤਾਰ ਕਰਨਾ ਸੀ।
ਏਅਰ ਇੰਡੀਆ ਇਸ ਸਮੇਂ ਆਪਣੇ ਸਭ ਤੋਂ ਚੁਣੌਤੀਪੂਰਨ ਸਮੇਂ ਵਿੱਚੋਂ ਗੁਜ਼ਰ ਰਹੀ ਹੈ। ਕੈਂਪਬੈਲ ਦੇ ਅਸਤੀਫ਼ੇ ਦਾ ਕਾਰਨ ਕੰਪਨੀ ਦੇ ਵਧਦੇ ਘਾਟੇ ਅਤੇ ਸੰਚਾਲਨ ਸੰਬੰਧੀ ਮੁਸ਼ਕਲਾਂ ਦੱਸਿਆ ਜਾ ਰਿਹਾ ਹੈ। ਹਾਲੀਆ ਰਿਪੋਰਟਾਂ ਦੇ ਅਨੁਸਾਰ 2024-25 ਵਿੱਚ ਏਅਰ ਇੰਡੀਆ ਦੇ ਘਾਟੇ ਵਿੱਚ ਕਮੀਂ ਆਉਣ ਦੀ ਬਜਾਏ ਵਾਧਾ ਹੋਣ ਦਾ ਅਨੁਮਾਨ ਹੈ। ਕੰਪਨੀ ਕਰਜ਼ੇ ਦੇ ਦਬਾਅ ਦਾ ਵੀ ਸਾਹਮਣਾ ਕਰ ਰਹੀ ਹੈ। ਇਸ ਤੋਂ ਇਲਾਵਾ, ਜੂਨ 2025 ਵਿੱਚ ਅਹਿਮਦਾਬਾਦ ਵਿੱਚ ਹੋਏ ਭਿਆਨਕ ਜਹਾਜ਼ ਹਾਦਸੇ ਤੋਂ ਬਾਅਦ ਏਅਰਲਾਈਨ ਸਖ਼ਤ ਰੈਗੂਲੇਟਰੀ ਜਾਂਚ ਦੇ ਅਧੀਨ ਹੈ।