Elon Musk Plans to cut Twitter Jobs: ਜਦੋਂ ਤੋਂ ਟਵਿੱਟਰ ਦੇ ਨਵੇਂ ਮਾਲਕ ਐਲੋਨ ਮਸਕ ਨੇ ਇਸ ਸੋਸ਼ਲ ਮੀਡੀਆ ਕੰਪਨੀ ਦੀ ਵਾਗਡੋਰ ਸੰਭਾਲੀ ਹੈ, ਨਿੱਤ ਨਵੇਂ ਫੈਸਲਿਆਂ ਦੀਆਂ ਖ਼ਬਰਾਂ ਸਾਹਮਣੇ ਆਉਂਦੀਆਂ ਰਹਿੰਦੀਆਂ ਹਨ। ਹਾਲਾਂਕਿ ਹੁਣ ਇੱਕ ਅਜਿਹੀ ਖਬਰ ਆਈ ਹੈ ਜੋ ਟਵਿਟਰ ਦੇ ਕਰਮਚਾਰੀਆਂ ਲਈ ਮੁਸੀਬਤ ਖੜੀ ਕਰ ਸਕਦੀ ਹੈ। ਇਹ ਖ਼ਬਰ ਟਵਿੱਟਰ ਵਿੱਚ ਛਾਂਟੀ ਨਾਲ ਸਬੰਧਤ ਹੈ।
ਕੀ ਹੈ ਐਲੋਨ ਮਸਕ ਦੀ ਯੋਜਨਾ?
ਐਲੋਨ ਮਸਕ ਟਵਿੱਟਰ ਇੰਕ ਵਿਚ ਲਗਭਗ 3700 ਲੋਕਾਂ ਦੀ ਛਾਂਟੀ ਕਰਨ ਦੀ ਯੋਜਨਾ ਬਣਾ ਰਿਹਾ ਹੈ, ਜਿਸ ਨਾਲ ਇਸ ਸੋਸ਼ਲ ਮੀਡੀਆ ਕੰਪਨੀ ਦੇ ਕਰਮਚਾਰੀਆਂ ਦੀ ਗਿਣਤੀ ਲਗਭਗ ਅੱਧੀ ਹੋ ਜਾਵੇਗੀ। ਇਹ ਹੈਰਾਨ ਕਰਨ ਵਾਲੀ ਖਬਰ ਅਜਿਹੇ ਸਮੇਂ 'ਚ ਆਈ ਹੈ ਜਦੋਂ ਐਲੋਨ ਮਸਕ 44 ਬਿਲੀਅਨ ਡਾਲਰ ਦੇ ਟਵਿਟਰ ਐਕਵਾਇਰ ਸੌਦੇ ਨੂੰ ਪੂਰਾ ਕਰਨ ਲਈ ਪੈਸੇ ਦੀ ਵਸੂਲੀ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਬਲੂਮਬਰਗ 'ਤੇ ਪ੍ਰਕਾਸ਼ਿਤ ਖਬਰ ਮੁਤਾਬਕ ਟਵਿਟਰ 'ਤੇ ਛਾਂਟੀ ਦੀ ਇਹ ਖਬਰ ਮਾਮਲੇ ਦੀ ਜਾਣਕਾਰੀ ਰੱਖਣ ਵਾਲੇ ਲੋਕਾਂ ਤੋਂ ਆਈ ਹੈ।
ਇਸ ਮਾਮਲੇ ਤੋਂ ਜਾਣੂ ਲੋਕਾਂ ਨੇ ਦੱਸਿਆ ਕਿ ਐਲੋਨ ਮਸਕ ਸ਼ੁੱਕਰਵਾਰ, 4 ਨਵੰਬਰ ਤੋਂ ਪ੍ਰਭਾਵਿਤ ਸਟਾਫ ਨੂੰ ਸੂਚਿਤ ਕਰਨਾ ਸ਼ੁਰੂ ਕਰ ਦੇਣਗੇ। ਇਸ ਤੋਂ ਇਲਾਵਾ ਐਲੋਨ ਮਸਕ ਨੇ ਵੀ ਆਪਣਾ ਇਰਾਦਾ ਜ਼ਾਹਰ ਕੀਤਾ ਹੈ ਕਿ ਉਹ ਕੰਪਨੀ ਦੇ ਮੌਜੂਦਾ ਕੰਮ ਨੂੰ ਕਿਸੇ ਵੀ ਥਾਂ ਤੋਂ ਬਦਲਣਾ ਚਾਹੁੰਦਾ ਹੈ ਅਤੇ ਕਰਮਚਾਰੀਆਂ ਨੂੰ ਦਫਤਰ ਵਿਚ ਰਿਪੋਰਟ ਕਰਨ ਲਈ ਕਿਹਾ ਹੈ। ਹਾਲਾਂਕਿ ਇਸ ਵਿੱਚ ਕੁਝ ਅਪਵਾਦ ਹੋ ਸਕਦੇ ਹਨ।
ਐਲੋਨ ਮਸਕ ਤੇ ਟੀਮ ਕਈ ਪਹਿਲੂਆਂ 'ਤੇ ਕਰ ਰਹੇ ਨੇ ਵਿਚਾਰ
ਟਵਿੱਟਰ ਦੇ ਸੈਨ-ਫ੍ਰਾਂਸਿਸਕੋ ਸਥਿਤ ਹੈੱਡਕੁਆਰਟਰ 'ਤੇ ਐਲੋਨ ਮਸਕ ਅਤੇ ਉਸਦੀ ਟੀਮ ਨੌਕਰੀਆਂ ਵਿੱਚ ਕਟੌਤੀ ਅਤੇ ਹੋਰ ਨੀਤੀਗਤ ਤਬਦੀਲੀਆਂ ਦੇ ਸਬੰਧ ਵਿੱਚ ਕਈ ਪਹਿਲੂਆਂ 'ਤੇ ਵਿਚਾਰ ਕਰ ਰਹੇ ਹਨ ਅਤੇ ਕੰਮ ਕਰ ਰਹੇ ਹਨ। ਇਸ ਤਹਿਤ ਕੰਪਨੀ ਦੇ ਕਰਮਚਾਰੀਆਂ ਦੀ ਗਿਣਤੀ ਘਟਾਉਣ 'ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ। ਇਸੇ ਤਰ੍ਹਾਂ ਦੱਸਿਆ ਜਾ ਰਿਹਾ ਹੈ ਕਿ ਛਾਂਟੀ ਕੀਤੇ ਜਾਣ ਵਾਲੇ ਮੁਲਾਜ਼ਮਾਂ ਨੂੰ 60 ਦਿਨਾਂ ਦੀ ਤਨਖਾਹ ਦਿੱਤੀ ਜਾਵੇਗੀ।
ਟਵਿੱਟਰ ਕਰਮਚਾਰੀਆਂ ਨੂੰ ਕਰਨ ਲਈ ਕਿਹਾ ਵਾਧੂ ਕੰਮ
ਟਵਿੱਟਰ ਦੇ ਮੈਨੇਜਰ ਨੇ ਕੰਪਨੀ ਦੇ ਕਰਮਚਾਰੀਆਂ ਨੂੰ ਵੱਧ ਤੋਂ ਵੱਧ ਸਮਾਂ ਕੰਮ ਕਰਨ ਲਈ ਕਿਹਾ ਹੈ। ਟਵਿਟਰ ਹੁਣ ਬਲੂ ਟਿੱਕ ਲਈ ਹਰ ਯੂਜ਼ਰ ਤੋਂ 8 ਡਾਲਰ ਭਾਵ 660 ਰੁਪਏ ਪ੍ਰਤੀ ਮਹੀਨਾ ਚਾਰਜ ਕਰੇਗਾ। ਇਸ ਫੀਚਰ ਨੂੰ ਲਾਂਚ ਕਰਨ ਦੀਆਂ ਤਿਆਰੀਆਂ ਜ਼ੋਰਾਂ 'ਤੇ ਹਨ ਅਤੇ ਇਸ ਕੰਮ ਲਈ ਇੱਥੋਂ ਦੇ ਇੰਜੀਨੀਅਰਾਂ ਨੂੰ ਵਾਧੂ ਕੰਮ ਕਰਨ ਲਈ ਕਿਹਾ ਗਿਆ ਹੈ।
ਕਰੋ ਹਫ਼ਤੇ ਦੇ ਸੱਤ ਦਿਨ ਕੰਮ
ਟਵਿੱਟਰ ਦੇ ਮੈਨੇਜਰ 'ਤੇ ਦਬਾਅ ਪਾਇਆ ਗਿਆ ਹੈ ਕਿ ਉਨ੍ਹਾਂ ਨੂੰ ਨਵੰਬਰ ਦੀ ਸ਼ੁਰੂਆਤ 'ਚ ਯਾਨੀ 07 ਨਵੰਬਰ ਤੱਕ ਬਲੂ ਟਿੱਕ ਪੇਡ ਫੀਚਰ ਨੂੰ ਲਾਂਚ ਕਰਨਾ ਹੋਵੇਗਾ। ਇਸ ਦੇ ਲਈ ਚਾਹੇ ਉਨ੍ਹਾਂ ਨੂੰ ਹਫ਼ਤੇ ਦੇ ਸੱਤੇ ਦਿਨ ਕੰਮ ਕਰਨਾ ਪਵੇ, ਚਾਹੇ 12-12 ਘੰਟੇ ਕੰਮ ਕਰਨਾ ਪਵੇ।