Home Loan News : ਆਪਣਾ ਘਰ ਬਣਾਉਣਾ ਹਰ ਕਿਸੇ ਦਾ ਸੁਪਨਾ ਹੁੰਦਾ ਹੈ। ਪਰਿਵਾਰ ਨਾਲ ਸੁੱਖ-ਸ਼ਾਂਤੀ ਨਾਲ ਰਹਿਣ ਲਈ ਲੋਕ ਦਿਨ-ਰਾਤ ਮਿਹਨਤ ਕਰਦੇ ਹਨ। ਕਈ ਵਾਰ ਇਸ ਸੁਪਨੇ ਨੂੰ ਪੂਰਾ ਕਰਨ ਲਈ ਬੈਂਕ ਤੋਂ ਹੋਮ ਲੋਨ ਵੀ ਲੈਣਾ ਪੈਂਦਾ ਹੈ। ਲੋਨ ਲੈਣਾ ਤਾਂ ਆਸਾਨ ਹੁੰਦਾ ਹੈ, ਪਰ ਇਸ ਤੋਂ ਪਹਿਲਾਂ ਕੁਝ ਮਹੱਤਵਪੂਰਨ ਗੱਲਾਂ ਦਾ ਧਿਆਨ ਰੱਖਣਾ ਬਹੁਤ ਜ਼ਰੂਰੀ ਹੈ, ਤਾਂ ਜੋ ਤੁਹਾਨੂੰ ਨੁਕਸਾਨ ਦੀ ਬਜਾਏ ਵੱਡੀ ਬਚਤ ਹੋ ਸਕੇ।
ਬੈਂਕ ਤੋਂ ਇਹ ਸਵਾਲ ਜ਼ਰੂਰ ਪੁੱਛੋ
ਜੇਕਰ ਤੁਸੀਂ ਵੀ ਆਪਣਾ ਘਰ ਬਣਾਉਣ ਦੀ ਯੋਜਨਾ ਬਣਾ ਰਹੇ ਹੋ ਅਤੇ ਹੋਮ ਲੋਨ ਲੈਣ ਵਾਲੇ ਹੋ ਤਾਂ ਸਿਰਫ਼ ਵਿਆਜ ਦਰ (Interest Rate) ਦੇਖ ਕੇ ਫ਼ੈਸਲਾ ਕਰਨਾ ਵੱਡੀ ਗਲਤੀ ਹੋ ਸਕਦੀ ਹੈ।
ਲੋਨ ਲੈਣ ਤੋਂ ਪਹਿਲਾਂ ਬੈਂਕ ਨੂੰ ਇਹ ਸਵਾਲ ਜ਼ਰੂਰ ਪੁੱਛੋ:
"ਕੀ ਇਸ ਹੋਮ ਲੋਨ 'ਤੇ ਪ੍ਰੀ-ਪੇਮੈਂਟ (Prepayment) ਜਾਂ ਪਾਰਟ-ਪੇਮੈਂਟ (Part Payment) ਦੀ ਸੁਵਿਧਾ ਹੈ? ਅਤੇ ਕੀ ਇਸ 'ਤੇ ਕੋਈ ਵਾਧੂ ਚਾਰਜ ਲੱਗੇਗਾ?"
ਇਹ ਇੱਕ ਸਵਾਲ ਹੀ ਤੁਹਾਡੇ ਲੰਬੇ ਸਮੇਂ ਵਿੱਚ ਲੱਖਾਂ ਰੁਪਏ ਬਚਾ ਸਕਦਾ ਹੈ।
ਕਿਵੇਂ ਹੋਵੇਗੀ ਲੱਖਾਂ ਦੀ ਬਚਤ?
ਹੋਮ ਲੋਨ ਆਮ ਤੌਰ 'ਤੇ 20 ਤੋਂ 30 ਸਾਲ ਲਈ ਲਿਆ ਜਾਂਦਾ ਹੈ। ਇਸ ਦੌਰਾਨ ਤੁਸੀਂ ਬੈਂਕ ਨੂੰ ਵਿਆਜ ਦੇ ਰੂਪ ਵਿੱਚ ਕਈ ਵਾਰ ਮੂਲ ਰਕਮ ਤੋਂ ਵੀ ਵੱਧ ਪੈਸੇ ਅਦਾ ਕਰ ਦਿੰਦੇ ਹੋ ਪਰ ਜੇ ਤੁਹਾਡੀ ਆਮਦਨ ਵਧਣ 'ਤੇ ਤੁਸੀਂ ਸਮੇਂ-ਸਮੇਂ 'ਤੇ ਲੋਨ ਦੀ ਕੁਝ ਰਕਮ ਪਹਿਲਾਂ ਹੀ ਜਮ੍ਹਾਂ ਕਰਵਾ ਦਿੰਦੇ ਹੋ ਤਾਂ ਤੁਹਾਡੇ ਉੱਤੇ ਵਿਆਜ ਦਾ ਬੋਝ ਕਾਫ਼ੀ ਘੱਟ ਹੋ ਸਕਦਾ ਹੈ।
25 ਲੱਖ ਰੁਪਏ ਦੀ ਬਚਤ ਦਾ ਹਿਸਾਬ
ਮੰਨ ਲਓ ਤੁਸੀਂ 50 ਲੱਖ ਰੁਪਏ ਦਾ ਹੋਮ ਲੋਨ 20 ਸਾਲ ਲਈ 8.5% ਵਿਆਜ ਦਰ 'ਤੇ ਲਿਆ ਹੈ। ਤੁਹਾਡੀ ਮਹੀਨਾਵਾਰ EMI ਲਗਭਗ 43,400 ਰੁਪਏ ਬਣੇਗੀ। ਪੂਰੇ ਲੋਨ ਦੌਰਾਨ ਤੁਸੀਂ ਲਗਭਗ 54 ਲੱਖ ਰੁਪਏ ਵਿਆਜ ਦੇ ਰੂਪ ਵਿੱਚ ਅਦਾ ਕਰ ਸਕਦੇ ਹੋ। ਹੁਣ ਮੰਨ ਲਓ ਕਿ ਲੋਨ ਦੇ 5ਵੇਂ ਸਾਲ ਤੁਸੀਂ 10 ਲੱਖ ਰੁਪਏ ਦੀ ਪਾਰਟ-ਪੇਮੈਂਟ ਕਰ ਦਿੰਦੇ ਹੋ। ਇਸ ਤੋਂ ਬਾਅਦ ਜਾਂ ਤਾਂ ਤੁਹਾਡੀ EMI ਘੱਟ ਹੋ ਸਕਦੀ ਹੈ ਜਾਂ ਲੋਨ ਦੀ ਮਿਆਦ ਘੱਟ ਹੋ ਸਕਦੀ ਹੈ। ਇਸ ਤਰ੍ਹਾਂ ਤੁਹਾਡਾ ਕੁੱਲ ਵਿਆਜ ਲਗਭਗ 25 ਲੱਖ ਰੁਪਏ ਤੱਕ ਘੱਟ ਹੋ ਸਕਦਾ ਹੈ। ਭਾਵ, ਇੱਕ ਸਹੀ ਫ਼ੈਸਲਾ ਤੁਹਾਨੂੰ ਵੱਡੀ ਬਚਤ ਕਰਵਾ ਸਕਦਾ ਹੈ।
ਇਹ ਫਾਇਦਾ ਕਦੋਂ ਮਿਲੇਗਾ?
ਇਹ ਫਾਇਦਾ ਤੁਹਾਨੂੰ ਉਦੋਂ ਹੀ ਮਿਲੇਗਾ ਜੇਕਰ ਬੈਂਕ ਪ੍ਰੀ-ਪੇਮੈਂਟ ਜਾਂ ਪਾਰਟ-ਪੇਮੈਂਟ ਦੀ ਸੁਵਿਧਾ ਦੇਵੇ ਅਤੇ ਇਸ 'ਤੇ ਕੋਈ ਵਾਧੂ ਚਾਰਜ ਨਾ ਲਵੇ। ਇਸ ਲਈ ਹੋਮ ਲੋਨ ਲੈਣ ਤੋਂ ਪਹਿਲਾਂ ਬੈਂਕ ਤੋਂ ਇਹ ਜਾਣਕਾਰੀ ਜ਼ਰੂਰ ਲਵੋ , ਪਾਰਟ-ਪੇਮੈਂਟ ਕਦੋਂ ਅਤੇ ਕਿੰਨੀ ਵਾਰ ਕੀਤੀ ਜਾ ਸਕਦੀ ਹੈ? ਘੱਟੋ-ਘੱਟ ਪਾਰਟ-ਪੇਮੈਂਟ ਦੀ ਰਕਮ ਕਿੰਨੀ ਹੋਵੇਗੀ? ਕੀ ਇਸ 'ਤੇ ਕੋਈ ਵਾਧੂ ਚਾਰਜ ਲੱਗੇਗਾ? ਲੋਨ ਫਲੋਟਿੰਗ (Floating Rate) ਵਿਆਜ ਦਰ 'ਤੇ ਹੈ ਜਾਂ ਫਿਕਸਡ (Fixed Rate) 'ਤੇ?
ਆਮ ਤੌਰ 'ਤੇ ਕਈ ਬੈਂਕ ਫਲੋਟਿੰਗ ਰੇਟ ਵਾਲੇ ਹੋਮ ਲੋਨ 'ਤੇ ਪ੍ਰੀ-ਪੇਮੈਂਟ ਚਾਰਜ ਨਹੀਂ ਲੈਂਦੇ, ਜਦਕਿ ਫਿਕਸਡ ਰੇਟ ਵਾਲੇ ਲੋਨ ਵਿੱਚ ਕੁਝ ਮਾਮਲਿਆਂ 'ਚ ਵਾਧੂ ਫੀਸ ਲੱਗ ਸਕਦੀ ਹੈ। ਇਸ ਲਈ ਲੋਨ ਲੈਣ ਤੋਂ ਪਹਿਲਾਂ ਸਾਰੀਆਂ ਸ਼ਰਤਾਂ ਧਿਆਨ ਨਾਲ ਸਮਝਣਾ ਬਹੁਤ ਜ਼ਰੂਰੀ ਹੈ।