(Source: Poll of Polls)
Crime News: ਲੁਧਿਆਣਾ 'ਚ ਸੈਰ ਕਰ ਰਹੇ ਵਿਅਕਤੀ ਦੀ ਹੱਤਿਆ; ਸਕੂਟੀ ਸਵਾਰ 2 ਬਦਮਾਸ਼ਾਂ ਨੇ ਪੇਟ 'ਚ ਮਾਰਿਆ ਚਾਕੂ, ਮੋਬਾਇਲ ਤੇ ਨਕਦੀ ਲੁੱਟ ਕੇ ਫਰਾਰ
ਲੁੱਟਖੋਹ ਦੇ ਮਾਮਲੇ ਪੰਜਾਬ ਦੇ ਵਿੱਚ ਦਿਨੋ-ਦਿਨ ਵੱਧਦੇ ਹੀ ਜਾ ਰਹੇ ਹਨ। ਹੁਣ ਬਦਮਾਸ਼ਾਂ ਦੇ ਹੌਸਲੇ ਬੁਲੰਦ ਹੋ ਗਏ ਹਨ ਕਿ ਚੋਰੀ ਦੇ ਨਾਲ-ਨਾਲ ਉਹ ਕਤਲ ਕਰਨ ਤੋਂ ਵੀ ਗੁਰੇਜ਼ ਨਹੀਂ ਕਰਦੇ। ਅਜਿਹਾ ਹੀ ਇੱਕ ਮਾਮਲਾ ਲੁਧਿਆਣਾ ਤੋਂ ਸਾਹਮਣੇ ਆਇਆ ਹੈ...
Ludhiana News: ਪੰਜਾਬ ਦੇ ਲੁਧਿਆਣਾ ਵਿੱਚ ਲੁੱਟਖੋਹ ਦੇ ਮਾਮਲੇ ਰੁਕਣ ਦਾ ਨਾਮ ਨਹੀਂ ਲੈ ਰਹੇ। ਹੁਣ ਬਦਮਾਸ਼ ਦੇ ਹੌਸਲੇ ਇੰਨੇ ਵੱਧ ਗਏ ਨੇ ਸਿਰਫ਼ ਲੁੱਟਖੋਹ ਹੀ ਨਹੀਂ, ਸਿੱਧੀ ਹੱਤਿਆ ਕਰਨ ਤੱਕ ਪਹੁੰਚ ਗਏ ਹਨ। ਬੀਤੀ ਰਾਤ ਪਿੰਡ ਮਹਿਰਬਾਨ ਖੇਤਰ ਦੇ ਗੁੱਜਰ ਭਵਨ ’ਚ ਰਹਿੰਦੇ 45 ਸਾਲਾ ਵਿਅਕਤੀ ਦੀ ਸਕੂਟੀ ਸਵਾਰ ਬਦਮਾਸ਼ਾਂ ਨੇ ਪੇਟ ’ਚ ਚਾਕੂ ਮਾਰ ਕੇ ਹੱਤਿਆ ਕਰ ਦਿੱਤੀ। ਉਥੋਂ ਬਾਅਦ ਬਦਮਾਸ਼ ਉਸਦਾ ਮੋਬਾਇਲ ਅਤੇ ਨਕਦੀ ਲੈ ਕੇ ਫਰਾਰ ਹੋ ਗਏ।
ਜ਼ਖਮੀ ਵਿਅਕਤੀ ਦੀਆਂ ਚੀਕਾਂ ਸੁਣ ਕੇ ਉਸ ਦੀ ਪਤਨੀ ਅਤੇ ਬੱਚੇ ਜਦੋਂ ਤਕ ਉੱਥੇ ਪਹੁੰਚੇ, ਤਦ ਤੱਕ ਬਦਮਾਸ਼ ਮੌਕੇ ਤੋਂ ਭੱਜ ਚੁੱਕੇ ਸਨ। ਲੋਕਾਂ ਦੀ ਮਦਦ ਨਾਲ ਜ਼ਖਮੀ ਨੂੰ ਸਿਵਿਲ ਹਸਪਤਾਲ ਲੈ ਜਾਇਆ ਗਿਆ, ਪਰ ਰਾਸਤੇ ਵਿੱਚ ਹੀ ਉਸ ਦੀ ਮੌਤ ਹੋ ਗਈ। ਮ੍ਰਿਤਕ ਦੀ ਪਹਿਚਾਣ ਤਿਲਕਰਾਜ ਵਜੋਂ ਹੋਈ ਹੈ।
ਬਿਮਾਰ ਚੱਲ ਰਿਹਾ ਸੀ ਤਿਲਕਰਾਜ
ਮ੍ਰਿਤਕ ਤਿਲਕ ਰਾਜ ਦੇ ਬੇਟੇ ਦਾਨਿਸ਼ ਨੇ ਦੱਸਿਆ ਕਿ ਉਹਦੇ ਪਿਤਾ ਪਿਛਲੇ ਲਗਭਗ 2 ਮਹੀਨੇ ਤੋਂ ਬਿਮਾਰੀ ਕਰਕੇ ਘਰ 'ਚ ਹੀ ਰਹਿੰਦੇ ਸਨ। ਵੀਰਵਾਰ ਰਾਤ ਕਰੀਬ 10 ਵਜੇ ਉਹ ਅਤੇ ਉਸ ਦੀ ਮਾਂ ਕਮਲਾ ਦੇਵੀ ਦੇ ਨਾਲ ਸੈਰ ਕਰਨ ਲਈ ਘਰ ਦੇ ਬਾਹਰ ਖੜੇ ਸਨ। ਇਸ ਦੌਰਾਨ ਉਸ ਦੀ ਮਾਤਾ ਕਮਲਾ ਦੇਵੀ ਚਪਲ ਪਹਿਨਣ ਲਈ ਘਰ ਦੇ ਅੰਦਰ ਚਲੀ ਗਈ ਅਤੇ ਪਿਤਾ ਤਿਲਕ ਰਾਜ ਸੈਰ ਕਰਦੇ ਹੋਏ ਘਰ ਤੋਂ ਅੱਗੇ ਨਿਕਲ ਗਏ।
ਥੋੜ੍ਹੀ ਹੀ ਦੂਰੀ 'ਤੇ ਇੱਕ ਸਕੂਟੀ ਸਵਾਰ ਦੋ ਨੌਜਵਾਨਾਂ ਨੇ ਉਨ੍ਹਾਂ ਨੂੰ ਘੇਰ ਲਿਆ ਅਤੇ ਉਨ੍ਹਾਂ ਦੇ ਪੇਟ 'ਚ ਚਾਕੂ ਮਾਰ ਦਿੱਤਾ। ਬਦਮਾਸ਼ ਤਿਲਕ ਰਾਜ ਦਾ ਸੈਮਸੰਗ ਮੋਬਾਇਲ ਅਤੇ ਲਗਭਗ 1200 ਰੁਪਏ ਨਕਦੀ ਲੁੱਟ ਕੇ ਫਰਾਰ ਹੋ ਗਏ।
4 ਮਹੀਨੇ ਪਹਿਲਾਂ ਹਰਿਆਣਾ ਤੋਂ ਲੁਧਿਆਣਾ ਆਇਆ ਸੀ ਤਿਲਕ ਰਾਜ
ਮ੍ਰਿਤਕ ਦੀ ਪਤਨੀ ਕਮਲਾ ਨੇ ਦੱਸਿਆ ਕਿ ਮੇਰੇ ਪਤੀ ਤਿਲਕ ਰਾਜ 4 ਮਹੀਨੇ ਪਹਿਲਾਂ ਹੀ ਹਰਿਆਣਾ ਤੋਂ ਲੁਧਿਆਣਾ ਕੰਮ ਕਰਨ ਆਏ ਸਨ। ਲੁਧਿਆਣਾ ਆਉਣ ਦੇ ਕੁਝ ਸਮੇਂ ਬਾਅਦ ਉਨ੍ਹਾਂ ਦੀ ਤਬੀਅਤ ਖ਼ਰਾਬ ਹੋ ਗਈ, ਜਿਸ ਕਾਰਨ ਉਹ ਉੱਦੋਂ ਤੋਂ ਘਰ 'ਚ ਹੀ ਰਹਿੰਦੇ ਸਨ। ਉਨ੍ਹਾਂ ਦੇ ਤਿੰਨੋ ਪੁੱਤਰ ਵੱਖ-ਵੱਖ ਥਾਵਾਂ 'ਤੇ ਕੰਮ ਕਰਦੇ ਹਨ।
ਰਾਤ ਨੂੰ ਸਾਰੇ ਪਰਿਵਾਰ ਨੇ ਇਕੱਠੇ ਖਾਣਾ ਖਾਧਾ, ਜਿਸ ਤੋਂ ਬਾਅਦ ਮੈਂ ਆਪਣੇ ਪਤੀ ਦੇ ਨਾਲ ਸੈਰ ਕਰਨ ਲਈ ਘਰ ਦੇ ਬਾਹਰ ਨਿਕਲੀ। ਮੇਰੇ ਪੈਰਾਂ 'ਚ ਚਪਲ ਨਹੀਂ ਸੀ। ਮੈਂ ਸਿਰਫ਼ ਚਪਲ ਪਹਿਨਣ ਲਈ ਘਰ ਅੰਦਰ ਗਈ ਸੀ ਕਿ ਓਸ ਵੇਲੇ ਕੁਝ ਦੂਰੀ 'ਤੇ ਸਕੂਟੀ ਸਵਾਰ ਲੁਟੇਰਿਆਂ ਨੇ ਉਨ੍ਹਾਂ ਨੂੰ ਘੇਰ ਲਿਆ ਅਤੇ ਪੇਟ 'ਚ ਚਾਕੂ ਮਾਰ ਕੇ ਹੱਤਿਆ ਕਰ ਦਿੱਤੀ। ਫਿਲਹਾਲ ਤਿਲਕ ਰਾਜ ਦੀ ਲਾਸ਼ ਨੂੰ ਸਿਵਿਲ ਹਸਪਤਾਲ ਦੀ ਮਾਰਚੂਰੀ ਵਿੱਚ ਰੱਖਵਾਇਆ ਗਿਆ ਹੈ। ਅੱਜ ਸ਼ੁੱਕਰਵਾਰ ਮ੍ਰਿਤਕ ਦੇਹ ਦਾ ਪੁਲਿਸ ਪੋਸਟਮਾਰਟਮ ਕਰਵਾਏਗੀ।
ਇਸ ਮਾਮਲੇ ਸਬੰਧੀ ਥਾਣਾ ਮਹਿਰਬਾਨ ਦੇ ਜਾਂਚ ਅਧਿਕਾਰੀ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਮਾਮਲੇ ਦੀ ਸੂਚਨਾ ਮਿਲੀ ਹੈ। ਉਹ ਹਸਪਤਾਲ ਵਿੱਚ ਪਹੁੰਚ ਕੇ ਮ੍ਰਿਤਕ ਦੇ ਪਰਿਵਾਰਿਕ ਮੈਂਬਰਾਂ ਦੇ ਬਿਆਨ ਦਰਜ ਕਰ ਰਹੇ ਹਨ ਅਤੇ ਜਾਂਚ ਦੀ ਕਾਰਵਾਈ ਵਿੱਚ ਜੁਟ ਗਏ ਹਨ। ਦੋਸ਼ੀਆਂ ਨੂੰ ਜਲਦ ਹੀ ਕਾਬੂ ਕਰ ਲਿਆ ਜਾਵੇਗਾ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
