#DisrespectOfARRahman trends on Twitter: ਆਸਕਰ ਵਿਨਿੰਗ ਕੰਪੋਜ਼ਰ ਏ.ਆਰ. ਰਹਿਮਾਨ ਦਾ ਕੰਸਰਟ ਪੁਣੇ ਵਿੱਚ ਅੱਧ ਵਿਚਾਲੇ ਰੋਕ ਦਿੱਤਾ ਗਿਆ। ਪੁਣੇ 'ਚ ਜਦੋਂ ਏ.ਆਰ.ਰਹਿਮਾਨ ਸਟੇਜ 'ਤੇ ਪਰਫਾਰਮ ਕਰ ਰਹੇ ਸਨ ਤਾਂ ਇਸ ਦੌਰਾਨ ਪੁਲਸ ਆਈ ਅਤੇ ਏ.ਆਰ ਰਹਿਮਾਨ ਦਾ ਗੀਤ ਤੁਰੰਤ ਬੰਦ ਕਰ ਦਿੱਤਾ ਗਿਆ। ਦਰਅਸਲ, ਪੁਣੇ ਪੁਲਿਸ ਨੇ ਰਹਿਮਾਨ ਨੂੰ 10 ਵਜੇ ਦੀ ਸਮਾਂ ਸੀਮਾ ਦਿੱਤੀ ਸੀ। ਏ.ਆਰ.ਰਹਿਮਾਨ ਦੇ ਪ੍ਰਸ਼ੰਸਕ ਕੰਸਰਟ ਨੂੰ ਅੱਧ ਵਿਚਾਲੇ ਰੋਕਣ ਤੋਂ ਬਾਅਦ ਗੁੱਸੇ 'ਚ ਆ ਗਏ ਹਨ। ਇਸ ਦੇ ਨਾਲ ਹੀ ਟਵਿੱਟਰ 'ਤੇ #DisrespectofARRahman ਟ੍ਰੈਂਡ ਕਰ ਰਿਹਾ ਹੈ।
ਇਕ ਟਵਿੱਟਰ ਯੂਜ਼ਰ ਨੇ ਲਿਖਿਆ ਕਿ ਕਿਸੇ ਵੀ ਕਲਾਕਾਰ ਨਾਲ ਅਜਿਹਾ ਨਹੀਂ ਹੋਣਾ ਚਾਹੀਦਾ, ਮੈਂ ਕਾਨੂੰਨ ਦਾ ਸਨਮਾਨ ਕਰਦਾ ਹਾਂ ਪਰ ਕਈ ਵਾਰ ਕਿਸੇ ਗਾਇਕ ਨੂੰ ਗਾਉਂਦੇ ਸਮੇਂ ਟਾਈਮ ਦਾ ਪਤਾ ਨਹੀਂ ਲੱਗਦਾ, ਇਸ ਲਈ ਪੁਲਿਸ ਨੂੰ ਸਟੇਜ ਦੇ ਪਿੱਛੇ ਜਾ ਕੇ ਮੈਨੇਜਰ ਨੂੰ ਦੱਸਣਾ ਚਾਹੀਦਾ ਸੀ। ਇਸ ਤੋਂ ਇਲਾਵਾ ਏ ਆਰ ਰਹਿਮਾਨ ਦਾ ਸਮਰਥਨ ਕਰਦੇ ਹੋਏ ਇਕ ਹੋਰ ਯੂਜ਼ਰ ਨੇ ਲਿਖਿਆ ਕਿ ਜੇਕਰ ਇਸ ਤਰ੍ਹਾਂ ਦੇ ਟੈਲੇਂਟ ਨਾਲ ਇਸ ਤਰ੍ਹਾਂ ਦਾ ਸਲੂਕ ਕੀਤਾ ਜਾ ਰਿਹਾ ਹੈ ਤਾਂ ਇਹ ਬੇਹੱਦ ਨਿੰਦਣਯੋਗ ਹੈ।
ਕੀ ਹੈ ਪੂਰਾ ਮਾਮਲਾ
ਦਰਅਸਲ ਏ.ਆਰ ਰਹਿਮਾਨ ਐਤਵਾਰ ਨੂੰ ਪੁਣੇ ਦੇ ਰਾਜਾ ਬਹਾਦੁਰ ਮਿੱਲ ਇਲਾਕੇ 'ਚ ਆਪਣਾ ਸ਼ੋਅ ਕਰ ਰਹੇ ਸਨ, ਜਦੋਂ ਪੁਲਿਸ ਵਾਲੇ ਸਟੇਜ 'ਤੇ ਆਏ ਅਤੇ ਉਨ੍ਹਾਂ ਨੂੰ ਪ੍ਰੋਗਰਾਮ ਰੋਕਣ ਲਈ ਕਿਹਾ। ਪੁਲਿਸ ਨੇ ਸਪੱਸ਼ਟੀਕਰਨ ਦਿੰਦਿਆਂ ਕਿਹਾ ਕਿ ਰਾਤ ਦੇ 10 ਵੱਜ ਚੁੱਕੇ ਸਨ ਅਤੇ ਰਹਿਮਾਨ ਨੇ ਆਪਣਾ ਲਾਈਵ ਪ੍ਰੋਗਰਾਮ ਬੰਦ ਨਹੀਂ ਕੀਤਾ ਸੀ। ਨਾਲ ਹੀ, ਪੁਲਿਸ ਨੇ ਦੱਸਿਆ ਕਿ 10 ਵਜੇ ਤੋਂ ਬਾਅਦ ਪ੍ਰੋਗਰਾਮ ਕਰਨ ਲਈ ਪ੍ਰਬੰਧਕਾਂ ਤੋਂ ਇਜਾਜ਼ਤ ਨਹੀਂ ਲਈ ਗਈ ਸੀ, ਜਿਸ ਤੋਂ ਬਾਅਦ ਕੰਸਰਟ ਨੂੰ ਅੱਧ ਵਿਚਕਾਰ ਰੋਕ ਦਿੱਤਾ ਗਿਆ ਸੀ। ਦੂਜੇ ਪਾਸੇ ਏ ਆਰ ਰਹਿਮਾਨ ਨੇ ਵੀ ਇਸ ਕੰਸਰਟ ਦੀਆਂ ਕੁਝ ਤਸਵੀਰਾਂ ਸੋਸ਼ਲ ਮੀਡੀਆ 'ਤੇ ਸ਼ੇਅਰ ਕੀਤੀਆਂ ਹਨ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਫੋਟੋਆਂ ਦੇ ਨਾਲ ਲਿਖਿਆ- ਬੀਤੀ ਰਾਤ ਮਿਲੇ ਪਿਆਰ ਅਤੇ ਉਤਸ਼ਾਹ ਲਈ ਤੁਹਾਡਾ ਧੰਨਵਾਦ। ਇਹ ਇੱਕ ਸ਼ਾਨਦਾਰ ਕੰਸਰਟ ਸੀ।