Deep Sidhu Reena Rai: ਮਰਹੂਮ ਪੰਜਾਬੀ ਐਕਟਰ ਦੀਪ ਸਿੱਧੂ ਦੀ ਪ੍ਰੇਮਿਕਾ ਰੀਨਾ ਰਾਏ ਇੰਨੀਂ ਦਿਨੀਂ ਕਾਫੀ ਸੁਰਖੀਆਂ ਬਟੋਰ ਰਹੀ ਹੈ। ਹਾਲ ਹੀ ‘ਚ ਉਹ ਪਾਕਿਸਤਾਨੀ ਵੈੱਬ ਸੀਰੀਜ਼ ‘ਸੇਵਕ: ਦ ਕਨਫੈਸ਼ਨਜ਼’ ਦਾ ਵਿਰੋਧ ਕਰ ਨਫਰਤ ਕਰਨ ਵਾਲਿਆਂ ਦੇ ਨਿਸ਼ਾਨੇ ‘ਤੇ ਆ ਗਈ ਸੀ। ਰੀਨਾ ਰਾਏ ਵੱਲੋਂ ਵੈੱਬ ਸੀਰੀਜ਼ ਨੂੰ ਬੈਨ ਕਰਨ ਦੀ ਮੰਗ ਕੀਤੀ ਗਈ ਤਾਂ ਲੋਕਾਂ ਨੇ ਉਲਟਾ ਉਸ ਨੂੰ ਸਵਾਲਾਂ ਦੇ ਕਟਹਿਰੇ ‘ਚ ਲਿਆ ਖੜਾ ਕਰ ਦਿੱਤਾ। ਹਰ ਕੋਈ ਉਸ ਕੋਲੋਂ ਇਹੀ ਪੁੱਛ ਰਿਹਾ ਸੀ ਕਿ ਉਹ ਦੀਪ ਦੀ ਮੌਤ ਤੋਂ ਬਾਅਦ ਅਮਰੀਕਾ ਕਿਉਨ ਚਲੀ ਗਈ? ਕਿਉਂ ਉਸ ਨੇ ਐਕਸੀਡੈਂਟ ਵਾਲੀ ਘਟਨਾ ‘ਤੇ ਚੁੱਪੀ ਨਹੀਂ ਤੋੜੀ? ਕਿਉਂ ਉਹ ਸਾਹਮਣੇ ਆ ਕੇ ਦੀਪ ਬਾਰੇ ਗੱਲ ਨਹੀਂ ਕਰ ਰਹੀ?
ਹੁਣ ਇਨ੍ਹਾਂ ਸਾਰੇ ਸਵਾਲਾਂ ਦਾ ਰੀਨਾ ਰਾਏ ਨੇ ਜਵਾਬ ਦਿੱਤਾ ਹੈ। ਰੀਨਾ ਰਾਏ ਨੇ ਸੋਸ਼ਲ ਮੀਡੀਆ ‘ਤੇ ਕੁੱਝ ਪੋਸਟਾਂ ਸ਼ੇਅਰ ਕੀਤੀਆਂ ਹਨ, ਜਿਨ੍ਹਾਂ ਵਿੱਚ ਉਸ ਨੇ ਦੱਸਿਆ ਹੈ ਕਿ ਆਖਰ ਉਹ ਕਿਉਂ ਦੀਪ ਸਿੱਧੂ ਦੇ ਆਖਰੀ ਪਲਾਂ ਬਾਰੇ ਨਹੀਂ ਬੋਲ ਰਹੀ। ਉਸ ਨੇ ਆਪਣੇ ਇੰਸਟਾਗ੍ਰਾਮ ਦੀ ਸਟੋਰੀ ‘ਤੇ ਇਹ ਪੋਸਟਾਂ ਸ਼ੇਅਰ ਕੀਤੀਆਂ ਹਨ। ਪਹਿਲੀ ਪੋਸਟ ‘ਚ ਰੀਨਾ ਨੇ ਕਿਹਾ, ‘ਜਦੋਂ ਸਭ ਨੇ ਮੇਰੇ ਕੋਲੋਂ ਉਹ ਸਵਾਲ ਪੁੱਛਿਆ ਤਾਂ ਇਹ ਮੈਨੂੰ ਉਸੇ ਸਮੇਂ ‘ਚ ਲੈ ਗਿਆ, ਜਦੋਂ ਮੈਂ ਤੇ ਦੀਪ ਉਸ ਪਲ ‘ਚ ਇਕੱਠੇ ਸੀ। ਮੈਂ ਸੱਚ ਬੋਲਣ ਲਈ ਹੁਣ ਹੋਰ ਇੰਤਜ਼ਾਰ ਨਹੀਂ ਕਰ ਸਕਦੀ। #ਸਬਰ। ਕਿਉਂਕਿ ਹੁਣ ਮੇਰੀ ਵਾਰੀ ਹੈ। ਹੁਣ ਸਭ ਨੂੰ ਜਵਾਬ ਦੇਣ ਦਾ ਸਮਾਂ ਆ ਗਿਆ ਹੈ।’
ਇੱਕ ਹੋਰ ਪੋਸਟ ‘ਚ ਰੀਨਾ ਰਾਏ ਦੀਪ ਸਿੱਧੂ ਦੀ ਫੋਟੋ ਨੂੰ ਚੁੰਮਦੀ ਹੋਈ ਨਜ਼ਰ ਆ ਰਹੀ ਹੈ। ਇਸ ਦੇ ਨਾਲ ਹੀ ਉਸ ਨੇ ਇੱਕ ਭਾਵੁਕ ਸੰਦੇਸ਼ ਵੀ ਲਿਖਿਆ ਹੈ। ਰੀਨਾ ਨੇ ਕਿਹਾ, ‘ਤੁਸੀਂ ਸਭ ਮੈਨੂੰ ਕਹਿ ਰਹੇ ਹੋ ਕਿ ਮੇਰੇ ਇੱਕ ਖਰੋਚ ਵੀ ਨਹੀਂ ਆਈ। ਜਦਕਿ ਮੈਂ ਸਰੀਰਕ ਤੌਰ ‘ਤੇ ਨਹੀਂ ਭਾਵਨਾਤਮਕ ਤੌਰ ‘ਤੇ ਜ਼ਖਮੀ ਹੋਈ ਸੀ। ਮੇਰੀ ਰੂਹ ਖਤਮ ਹੋ ਗਈ ਸੀ।’
ਇੱਕ ਹੋਰ ਪੋਸਟ ‘ਚ ਰੀਨਾ ਨੇ ਕਿਹਾ, ‘ਮੈਂ ਸਿਰਫ ਦੀਪ ਨੂੰ ਚਾਹੁੰਦੀ ਸੀ। ਮੈਂ ਕਦੇ ਆਪਣਾ ਦਰਦ ਬਿਆਨ ਨਹੀਂ ਕੀਤਾ, ਕਿਉਂਕਿ ਮੈਨੂੰ ਸਮਝ ਨਹੀਂ ਆਇਆ ਕਿ ਮੈਂ ਆਪਣਾ ਦਰਦ ਕਿਵੇਂ ਬਿਆਨ ਕਰਾਂ।’
ਕਾਬਿਲੇਗ਼ੌਰ ਹੈ ਕਿ ‘ਸੇਵਕ: ਦ ਕਨਫੈਸ਼ਨਜ਼’ ਇੱਕ ਪਾਕਿਸਤਾਨੀ ਵੈੱਬ ਸੀਰੀਜ਼ ਹੈ। ਇਸ ਵਿੱਚ ਭਾਰਤ ਦੀ ਖਰਾਬ ਛਵੀ ਨੂੰ ਦਿਖਾਇਆ ਗਿਆ ਹੈ। ਇਸ ਦੇ ਨਾਲ ਨਾਲ ਇਸ ਵਿੱਚ ਹਿੰਦੂਆਂ ਵੱਲੋਂ ਮੁਸਲਿਮਾਂ ਨਾਲ ਧੱਕੇਸ਼ਾਹੀ ਦੀ ਕਹਾਣੀ ਦੱਸੀ ਗਈ ਹੈ। ਇਸ ਤੋਂ ਇਲਾਵਾ ਇਸ ਸੀਰੀਜ਼ ‘ਚ ਕੁੱਝ ਐਪੀਸੋਡ ‘ਚ ਦੀਪ ਸਿੱਧੂ ਤੇ ਰੀਨਾ ਰਾਏ ਦੀ ਪ੍ਰੇਮ ਕਹਾਣੀ ਵੀ ਦਿਖਾਈ ਗਈ ਹੈ। ਇਸ ਸੀਰੀਜ਼ ‘ਚ ਦੀਪ ਸਿੱਧੂ ਦੇ ਕਿਰਦਾਰ ਨੂੰ ਜੀਤ ਸਿੱਧੂ ਦੇ ਰੂਪ ‘ਚ ਦਿਖਾਇਆ ਗਿਆ ਹੈ। ਜੀਤ ਇੱਕ ਕਲਾਕਾਰ ਹੈ, ਜੋ ਆਪਣੇ ਲੋਕਾਂ ਨੂੰ ਬਹੁਤ ਪਿਆਰ ਕਰਦਾ ਹੈ ਅਤੇ ਉਨ੍ਹਾਂ ਦੇ ਹੱਕਾਂ ਲਈ ਲੜਾਈ ਲੜਦਾ ਹੈ। ਪਰ ਇੱਕ ਸਾਜਸ਼ ਦੇ ਤਹਿਤ ਉਸ ਦਾ ਕਤਲ ਕਰ ਦਿੱਤਾ ਜਾਂਦਾ ਹੈ ਤੇ ਕਤਲ ਨੂੰ ਐਕਸੀਡੈਂਟ ਦਾ ਰੂਪ ਦਿੱਤਾ ਜਾਂਦਾ ਹੈ। ਇਹ ਸੀਰੀਜ਼ ਭਾਰਤ ‘ਚ ਬੈਨ ਕਰ ਦਿੱਤੀ ਗਈ ਹੈ।