Inderjit Nikku Announces His First EP: ਪੰਜਾਬੀ ਗਾਇਕ ਇੰਦਰਜੀਤ ਨਿੱਕੂ ਦੇ ਦਿਨ ਪੂਰੀ ਤਰ੍ਹਾਂ ਬਦਲ ਗਏ ਹਨ। ਇੱਕ ਸਮਾਂ ਸੀ ਜਦੋਂ ਗਾਇਕ ‘ਤੇ ਮਾੜਾ ਵਕਤ ਆਇਆ। ਇਸ ਦੌਰਾਨ ਨਿੱਕੂ ਇੰਨੇ ਨਿਰਾਸ਼ ਹੋ ਗਏ ਕਿ ਉਹ ਬਾਬਿਆਂ ਦੇ ਦਰਬਾਰ ਤੱਕ ਚਲੇ ਗਏ। ਇੱਥੋਂ ਉਨ੍ਹਾਂ ਦਾ ਇੱਕ ਵੀਡੀਓ ਖੂਬ ਵਾਇਰਲ ਹੋਇਆ ਸੀ। ਇਸੇ ਵਾਇਰਲ ਵੀਡੀਓ ਨੇ ਨਿੱਕੂ ਦੀ ਕਿਸਮਤ ਨੂੰ ਰਾਤੋ ਰਾਤ ਪਲਟ ਦਿੱਤਾ ਸੀ।
ਕਿਸੇ ਵੇਲੇ ਇੰਦਰਜੀਤ ਨਿੱਕੂ ਕੋਲ ਕੋਈ ਕੰਮ ਨਹੀਂ ਸੀ, ਪਰ ਅੱਜ ਨਿੱਕੂ ਕੋਲ ਵਿਹਲ ਨਹੀਂ ਹੈ। ਹਾਲ ਹੀ ‘ਚ ਇੰਦਰਜੀਤ ਨਿੱਕੂ ਦੇ ਕਈ ਗਾਣੇ ਰਿਲੀਜ਼ ਹੋਏ ਅਤੇ ਉਹ ਆਸਟਰੇਲੀਆ ‘ਚ ਲਾਈਵ ਕੰਸਰਟ ਵੀ ਕਰਕੇ ਆਏ ਹਨ। ਹੁਣ ਗਾਇਕ ਨੇ ਆਉਂਦੇ ਹੀ ਆਪਣੀ ਪਹਿਲੀ ਈਪੀ ਯਾਨਿ ਮਿੰਨੀ ਐਲਬਮ ਦਾ ਐਲਾਨ ਕਰ ਦਿੱਤਾ ਹੈ। ਦੱਸ ਦਈਏ ਕਿ ਇਹ ਨਿੱਕੂ ਦੀ ਪਹਿਲੀ ਈਪੀ ਹੈ, ਜਿਸ ਨੂੰ ਪੰਜਾਬੀ ਗੀਤਕਾਰ ਤੇ ਨਿਰਮਾਤਾ-ਨਿਰਦੇਸ਼ਕ ਬੰਟੀ ਬੈਂਸ ਪ੍ਰੋਡਿਊਸ ਕਰ ਰਹੇ ਹਨ। ਇਸ ਈਪੀ ਦਾ ਨਾਂ ‘3 ਏਐਮ ਇਨ ਮੋਹਾਲੀ’ ਹੈ। ਇਸ ਦੇ ਪੋਸਟਰ ਨੂੰ ਇੰਦਰਜੀਤ ਨਿੱਕੂ ਨੇ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ ‘ਤੇ ਸ਼ੇਅਰ ਕੀਤਾ ਹੈ। ਫਿਲਹਾਲ ਐਲਬਮ ਦੀ ਰਿਲੀਜ਼ ਡੇਟ ਦਾ ਐਲਾਨ ਨਹੀਂ ਕੀਤਾ ਗਿਆ ਹੈ।
ਕਾਬਿਲੇਗ਼ੌਰ ਹੈ ਕਿ ਇੰਦਰਜੀਤ ਨਿੱਕੂ ਤਕਰੀਬਨ ਡੇਢ ਦਹਾਕੇ ਤੱਕ ਪੰਜਾਬੀ ਇੰਡਸਟਰੀ ‘ਤੇ ਰਾਜ ਕਰਦੇ ਰਹੇ ਹਨ। ਉਨ੍ਹਾਂ ਨੇ ਆਪਣੀ ਗਾਇਕੀ ਦੀ ਪਹਿਲੀ ਪਾਰੀ ‘ਚ ਇੰਡਸਟਰੀ ਨੂੰ ਜ਼ਬਰਦਸਤ ਹਿੱਟ ਗੀਤ ਦਿੱਤੇ। ਪਰ ਇੱਕ ਸਮਾਂ ਉਨ੍ਹਾਂ ‘ਤੇ ਅਜਿਹਾ ਆਇਆ, ਜਦੋਂ ਨਾ ਤਾਂ ਉਨ੍ਹਾਂ ਕੋਲ ਕੋਈ ਕੰਮ ਸੀ ਤੇ ਨਾ ਹੀ ਕੋਈ ਸਟੇਜ ਸ਼ੋਅ। ਇਸ ਦੌਰਾਨ ਨਿੱਕੂ ਕਾਫੀ ਗਰੀਬੀ ਦੇ ਦੌਰ ‘ਚੋਂ ਗੁਜ਼ਰੇ ਹਨ। ਪਰ ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਨਿੱਕੂ ਦੀ ਕਿਸਮਤ ਰਾਤੋ ਰਾਤ ਪਲਟ ਗਈ। ਉਹ ਮੁੜ ਤੋਂ ਪੰਜਾਬੀ ਇੰਡਸਟਰੀ ਦੇ ਸਟਾਰ ਬਣ ਗਏ। ਹੁਣ ਉਹ ਜਲਦ ਹੀ ਆਪਣੀ ਈਪੀ ਲੈਕੇ ਆ ਰਹੇ ਹਨ। ਫੈਨਜ਼ ਨਿੱਕੂ ਦੀ ਇਸ ਪੋਸਟ ਤੋਂ ਬਾਅਦ ਕਾਫੀ ਐਕਸਾਇਟਡ ਹਨ।