Mahira Khan Wedding: ਪਾਕਿਸਤਾਨੀ ਅਦਾਕਾਰਾ ਮਾਹਿਰਾ ਖਾਨ ਨੇ ਐਤਵਾਰ ਨੂੰ ਆਪਣੇ ਬੁਆਏਫ੍ਰੈਂਡ ਸਲੀਮ ਕਰੀਮ ਨਾਲ ਵਿਆਹ ਕਰ ਲਿਆ ਹੈ। 'ਰਈਸ' 'ਚ ਸ਼ਾਹਰੁਖ ਖਾਨ ਨਾਲ ਨਜ਼ਰ ਆਉਣ ਵਾਲੀ ਅਦਾਕਾਰਾ ਦਾ ਇਹ ਦੂਜਾ ਵਿਆਹ ਹੈ। ਮਾਹਿਰਾ ਨੇ ਵਿਆਹ ਕਰਨ ਦਾ ਫੈਸਲਾ ਕਰਨ ਤੋਂ ਪਹਿਲਾਂ ਕਾਰੋਬਾਰੀ ਨੂੰ ਪੰਜ ਸਾਲ ਤੱਕ ਡੇਟ ਕੀਤਾ। ਪਾਕਿਸਤਾਨੀ ਅਦਾਕਾਰਾ ਦੇ ਵਿਆਹ ਦਾ ਵੀਡੀਓ ਹੁਣ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਿਹਾ ਹੈ।
ਮਾਹਿਰਾ ਖਾਨ ਨੇ ਆਪਣੇ ਬੁਆਏਫ੍ਰੈਂਡ ਨਾਲ ਕੀਤਾ ਦੂਜਾ ਵਿਆਹ
ਮਾਹਿਰਾ ਖਾਨ ਨੇ ਸਲੀਮ ਨਾਲ ਵਿਆਹ ਦੇ ਬੰਧਨ 'ਚ ਬੱਝੇ। ਵਿਆਹ ਦੀ ਪਹਿਲੀ ਵੀਡੀਓ ਮਾਹਿਰਾ ਦੇ ਮੈਨੇਜਰ ਅਨੁਸ਼ੈ ਤਲਹਾ ਖਾਨ ਨੇ ਸ਼ੇਅਰ ਕੀਤੀ ਹੈ। ਵੀਡੀਓ 'ਚ ਮਾਹਿਰਾ ਨੂੰ ਆਪਣੇ ਪਤੀ ਦੇ ਕੋਲ ਦੁਲਹਨ ਦੇ ਪਹਿਰਾਵੇ 'ਚ ਦੇਖਿਆ ਜਾ ਸਕਦਾ ਹੈ। ਇਸ ਦੌਰਾਨ ਮਾਹਿਰਾ ਦਾ ਪਤੀ ਸਲੀਮ ਉਸ ਨੂੰ ਦੁਲਹਨ ਦੇ ਪਹਿਰਾਵੇ 'ਚ ਦੇਖ ਕੇ ਰੋਂਦਾ ਹੋਇਆ ਨਜ਼ਰ ਆਇਆ।
ਦੁਲਹਨ ਦੇ ਪਹਿਰਾਵੇ 'ਚ ਬੇਹੱਦ ਖੂਬਸੂਰਤ ਲੱਗ ਰਹੀ ਸੀ ਮਾਹਿਰਾ
ਮਾਹਿਰਾ ਖਾਨ ਨੇ ਆਪਣੇ ਵੱਡੇ ਦਿਨ 'ਤੇ ਹਲਕੇ ਨੀਲੇ ਰੰਗ ਦਾ ਲਹਿੰਗਾ ਅਤੇ ਚੋਲੀ ਪਹਿਨੀ ਸੀ। ਜਿਸ 'ਤੇ ਉਸ ਨੇ ਮੇਲ ਖਾਂਦੀ ਲੰਬੀ ਚੁੰਨੀ ਕੈਰੀ ਕੀਤੀ ਹੋਈ ਸੀ। ਦੁਲਹਨ ਬਣੀ ਮਾਹਿਰਾ ਕਾਫੀ ਖੂਬਸੂਰਤ ਲੱਗ ਰਹੀ ਸੀ। ਜਦੋਂ ਕਿ ਉਸ ਦੇ ਲਾੜੇ ਸਲੀਮ ਨੇ ਕਾਲੇ ਰੰਗ ਦੀ ਸ਼ੇਰਵਾਨੀ ਪਾਈ ਹੋਈ ਸੀ ਜਿਸ 'ਤੇ ਉਸ ਨੇ ਨੀਲੇ ਰੰਗ ਦੀ ਪੱਗ ਬੰਨ੍ਹੀ ਹੋਈ ਸੀ। ਦੋਵਾਂ ਦੀ ਜੋੜੀ ਇੱਕ-ਦੂਜੇ ਨਾਲ ਕਾਫੀ ਚੰਗੀ ਲੱਗ ਰਹੀ ਸੀ। ਵੀਡੀਓ 'ਚ ਸਲੀਮ ਮਾਹਿਰਾ ਦਾ ਘੁੰਡ ਚੁੱਕਦੇ ਹੋਏ ਅਤੇ ਫਿਰ ਉਸ ਨੂੰ ਗਲੇ ਲਗਾਉਂਦੇ ਨਜ਼ਰ ਆ ਰਹੇ ਹਨ। ਇਸ ਦੌਰਾਨ ਜੋੜੇ ਦੇ ਰਿਸ਼ਤੇਦਾਰ ਅਤੇ ਦੋਸਤ ਤਾੜੀਆਂ ਵਜਾ ਕੇ ਉਨ੍ਹਾਂ ਨੂੰ ਖੁਸ਼ ਕਰਦੇ ਹਨ।
ਮਾਹਿਰਾ ਖਾਨ ਦੇ ਵਿਆਹ ਦਾ ਵੀਡੀਓ ਹੁਣ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਿਹਾ ਹੈ ਅਤੇ ਪ੍ਰਸ਼ੰਸਕ ਇਸ ਜੋੜੀ ਨੂੰ ਵਧਾਈਆਂ ਦੇ ਰਹੇ ਹਨ।
ਮਾਹਿਰਾ ਨੇ ਸਾਲ 2020 ਵਿੱਚ ਸਲੀਮ ਬਾਰੇ ਕੀਤਾ ਸੀ ਖੁਲਾਸਾ
ਤੁਹਾਨੂੰ ਦੱਸ ਦੇਈਏ ਕਿ ਮਾਹਿਰਾ ਨੇ 2020 ਵਿੱਚ ਪਹਿਲੀ ਵਾਰ ਇੱਕ ਗੱਲਬਾਤ ਦੌਰਾਨ ਸਲੀਮ ਬਾਰੇ ਖੁਲਾਸਾ ਕੀਤਾ ਸੀ। ਸਮੀਨਾ ਪੀਰਜ਼ਾਦਾ ਨਾਲ ਰਿਵਾਇੰਡ ਦੌਰਾਨ ਮਾਹਿਰਾ ਨੇ ਕਬੂਲ ਕੀਤਾ ਸੀ ਕਿ ਉਹ ਸਲੀਮ ਨੂੰ ਡੇਟ ਕਰ ਰਹੀ ਹੈ। ਉਸਨੇ ਫੈਸ਼ਨ ਮੋਗਲ ਹਸਨ ਸ਼ਹਿਰਯਾਰ ਯਾਸੀਨ ਨਾਲ ਇੱਕ ਇੰਸਟਾਗ੍ਰਾਮ ਲਾਈਵ ਦੌਰਾਨ ਉਸਦੇ ਬਾਰੇ ਬਹੁਤ ਸਾਰੇ ਵੇਰਵੇ ਸਾਂਝੇ ਕੀਤੇ ਸਨ। ਪਾਕਿਸਤਾਨੀ ਆਊਟਲੈੱਟ ਡਾਨ ਦੀ ਇਕ ਰਿਪੋਰਟ ਮੁਤਾਬਕ ਮਾਹਿਰਾ ਨੇ ਕਿਹਾ, ''ਹਮਸਫਰ 'ਚ ਇਕ ਲਾਈਨ ਹੈ ਜੋ ਮੈਨੂੰ ਖੂਬਸੂਰਤ ਲੱਗਦੀ ਹੈ, ਜਿੱਥੇ ਅਸ਼ਰ ਖੀਰ ਨੂੰ ਕਹਿੰਦਾ ਹੈ, 'ਪਤਾ ਨਹੀਂ ਤੁਮ ਮੁਝੇ ਕਿਸ ਨੇਕੀ ਕੇ ਬਦਲੇ ਮੇਂ ਮਿਲੀ ਹੋ'। ਤੇ ਮੈਂ ਉਨ੍ਹਾਂ ਦੇ ਬਾਰੇ ਵੀ ਇਹੀ ਸੋਚਦੀ ਹਾਂ। ਮੈਂ ਆਪਣੀ ਲਾਈਫ 'ਚ ਜ਼ਰੂਰ ਕੁੱਝ ਚੰਗਾ ਕੀਤਾ ਹੋਵੇਗਾ ਜੋ ਖੁਦਾ ਨੇ ਮੈਨੂੰ ਉਸ ਸ਼ਖਸ ਨਾਲ ਮਿਲਵਾਇਆ।