Christian Oliver Death: ਹਾਲੀਵੁੱਡ ਤੋਂ ਇੱਕ ਦਿਲ ਦਹਿਲਾਉਣ ਵਾਲੀ ਖ਼ਬਰ ਆ ਰਹੀ ਹੈ। ਦਰਅਸਲ, ਮਸ਼ਹੂਰ ਹਾਲੀਵੁੱਡ ਅਦਾਕਾਰ ਕ੍ਰਿਸਟੀਅਨ ਓਲੀਵਰ ਅਤੇ ਉਨ੍ਹਾਂ ਦੀਆਂ ਦੋ ਬੇਟੀਆਂ ਦੀ ਮੌਤ ਹੋ ਗਈ ਹੈ। ਸਥਾਨਕ ਪੁਲਿਸ ਦੀ ਰਿਪੋਰਟ ਦੇ ਅਨੁਸਾਰ, ਅਦਾਕਾਰ ਦਾ ਜਹਾਜ਼ ਟੇਕਆਫ ਤੋਂ ਤੁਰੰਤ ਬਾਅਦ ਕੈਰੇਬੀਅਨ ਸਾਗਰ ਵਿੱਚ ਕਰੈਸ਼ ਹੋ ਗਿਆ। ਰਾਇਲ ਸੇਂਟ ਵਿਨਸੈਂਟ ਅਤੇ ਗ੍ਰੇਨਾਡਾਈਨਜ਼ ਪੁਲਿਸ ਫੋਰਸ ਨੇ ਵੀਰਵਾਰ ਨੂੰ ਇੱਕ ਬਿਆਨ ਜਾਰੀ ਕਰਕੇ ਇੱਕ ਨਿੱਜੀ ਸਿੰਗਲ ਇੰਜਣ ਵਾਲੇ ਜਹਾਜ਼ ਵਿੱਚ ਓਲੀਵਰ ਦੀ ਮੌਤ ਦੀ ਪੁਸ਼ਟੀ ਕੀਤੀ।
ਕ੍ਰਿਸ਼ਚੀਅਨ ਓਲੀਵਰ ਨੇ ਜਾਰਜ ਕਲੂਨੀ ਨਾਲ "ਦਿ ਗੁੱਡ ਜਰਮਨ" ਅਤੇ 2008 ਦੀ ਐਕਸ਼ਨ-ਕਾਮੇਡੀ "ਸਪੀਡ ਰੇਸਰ" ਵਰਗੀਆਂ ਫਿਲਮਾਂ ਵਿੱਚ ਆਪਣੀਆਂ ਭੂਮਿਕਾਵਾਂ ਨਾਲ ਖਾਸ ਪਛਾਣ ਬਣਾਈ।
ਕ੍ਰਿਸ਼ਚੀਅਨ ਓਲੀਵਰ ਸਮੇਤ ਚਾਰ ਦੀਆਂ ਲਾਸ਼ਾਂ ਹੋਈਆਂ ਬਰਾਮਦ
ਰਿਪੋਰਟਾਂ ਮੁਤਾਬਕ ਮਛੇਰਿਆਂ, ਗੋਤਾਖੋਰਾਂ ਅਤੇ ਤੱਟ ਰੱਖਿਅਕਾਂ ਨੇ ਮੌਕੇ ਤੋਂ ਚਾਰ ਲਾਸ਼ਾਂ ਬਰਾਮਦ ਕੀਤੀਆਂ ਹਨ। ਮਰਨ ਵਾਲਿਆਂ ਵਿਚ 51 ਸਾਲਾ ਓਲੀਵਰ, ਉਸ ਦੀਆਂ ਦੋ ਧੀਆਂ ਮਦਿਤਾ (10) ਅਤੇ ਅਨਿਕ (12) ਦੇ ਨਾਲ-ਨਾਲ ਪਾਇਲਟ ਰੌਬਰਟ ਸਾਕਸ ਸ਼ਾਮਲ ਹਨ। ਇਸ ਖਬਰ ਤੋਂ ਬਾਅਦ ਅਦਾਕਾਰ ਦੇ ਪ੍ਰਸ਼ੰਸਕ ਅਤੇ ਸਾਰੇ ਸੈਲੇਬਸ ਸਦਮੇ ਵਿੱਚ ਹਨ।
ਪਰਿਵਾਰ ਨਾਲ ਛੁੱਟੀਆਂ ਮਨਾ ਰਿਹਾ ਸੀ ਓਲੀਵਰ
ਦਿਲ ਦਹਿਲਾ ਦੇਣ ਵਾਲੀ ਘਟਨਾ ਉਦੋਂ ਵਾਪਰੀ ਜਦੋਂ ਓਲੀਵਰ ਦਾ ਜਹਾਜ਼ ਵੀਰਵਾਰ ਨੂੰ ਦੁਪਹਿਰ ਤੋਂ ਥੋੜ੍ਹੀ ਦੇਰ ਬਾਅਦ ਗ੍ਰੇਨਾਡਾਈਨਜ਼ ਦੇ ਇਕ ਛੋਟੇ ਜਿਹੇ ਟਾਪੂ ਬੇਕੀਆ ਤੋਂ ਸੇਂਟ ਲੂਸੀਆ ਜਾ ਰਿਹਾ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਅਭਿਨੇਤਾ ਆਪਣੇ ਪਰਿਵਾਰ ਨਾਲ ਛੁੱਟੀਆਂ ਦਾ ਆਨੰਦ ਮਾਣ ਰਹੇ ਸਨ। ਦਰਅਸਲ, ਹਾਲ ਹੀ ਵਿੱਚ, ਇੰਸਟਾਗ੍ਰਾਮ 'ਤੇ ਇੱਕ ਟ੍ਰੋਪਿਕਲ ਬੀਚ ਦੀ ਤਸਵੀਰ ਸ਼ੇਅਰ ਕਰਦੇ ਹੋਏ, ਓਲੀਵਰ ਨੇ ਕੈਪਸ਼ਨ ਵਿੱਚ ਲਿਖਿਆ, "ਸਵਰਗ ਵਿੱਚ ਕਿਸੇ ਜਗ੍ਹਾ ਤੋਂ ਸ਼ੁਭਕਾਮਨਾਵਾਂ! ਭਾਈਚਾਰੇ ਅਤੇ ਪਿਆਰ ਲਈ… 2024 ਅਸੀਂ ਇੱਥੇ ਆਏ ਹਾਂ!”
ਓਲੀਵਰ ਦਾ ਕਰੀਅਰ
51 ਸਾਲਾ ਜਰਮਨ ਮੂਲ ਦੇ ਅਭਿਨੇਤਾ ਨੇ 2008 ਦੀਆਂ ਫਿਲਮਾਂ "ਸਪੀਡ ਰੇਸਰ" ਅਤੇ "ਦਿ ਗੁੱਡ ਜਰਮਨ" ਸਮੇਤ ਦਰਜਨਾਂ ਮਹੱਤਵਪੂਰਨ ਫਿਲਮਾਂ ਅਤੇ ਟੈਲੀਵਿਜ਼ਨ ਭੂਮਿਕਾਵਾਂ ਨਿਭਾਈਆਂ ਹਨ। ਉਹ 1990 ਦੇ ਦਹਾਕੇ ਦੀ ਲੜੀ "ਸੇਵਡ ਬਾਏ ਦ ਬੈੱਲ: ਦ ਨਿਊ ਕਲਾਸ" ਦੇ ਇੱਕ ਪੂਰੇ ਸੀਜ਼ਨ ਵਿੱਚ, ਬ੍ਰਾਇਨ ਕੈਲਰ ਨਾਮਕ ਇੱਕ ਸਵਿਸ ਟ੍ਰਾਂਸਫਰ ਵਿਦਿਆਰਥੀ ਦੀ ਭੂਮਿਕਾ ਵਿੱਚ ਦਿਖਾਈ ਦਿੱਤਾ।