Make-Up Increase Risk of Asthma: ਜ਼ਿਆਦਾ ਮੇਕਅਪ ਕਰਨ ਵਾਲੀਆਂ ਔਰਤਾਂ ਲਈ ਖਤਰੇ ਦੀ ਘੰਟੀ ਹੈ। ਸੁੰਦਰ ਦਿਖਣ ਲਈ ਬਹੁਤ ਸਾਰਾ ਮੇਕਅੱਪ, ਲਿਪਸਟਿਕ-ਬਲੱਸ਼ ਤੇ ਨਕਲੀ ਨਹੁੰ ਵਾਲੀਆਂ ਔਰਤਾਂ ਲਈ ਵੱਡੀਆਂ ਸਮੱਸਿਆਵਾਂ ਖੜ੍ਹੀਆਂ ਹੋ ਸਕਦੀਆਂ ਹਨ?
ਇੱਕ ਤਾਜ਼ਾ ਅਧਿਐਨ ਦੀ ਰਿਪੋਰਟ ਵਿੱਚ ਮੇਕਅੱਪ ਦੀਆਂ ਸ਼ੌਕੀਨਾਂ ਨੂੰ ਚੇਤਾਵਨੀ ਦਿੱਤੀ ਗਈ ਹੈ। ਬ੍ਰਿਟੇਨ ਵਿੱਚ ਕੀਤੇ ਗਏ ਅਧਿਐਨ ਵਿੱਚ ਵਿਗਿਆਨੀਆਂ ਦੀ ਇੱਕ ਟੀਮ ਨੇ ਕਿਹਾ ਹੈ ਕਿ ਨਿਯਮਤ ਮੇਕਅੱਪ ਦਮੇ ਦੇ ਜੋਖਮ ਨੂੰ ਵਧਾ ਸਕਦਾ ਹੈ। ਖੋਜ ਨੇ ਲਿਪਸਟਿਕ, ਆਈਸ਼ੈਡੋ ਤੇ ਮਸਕਾਰਾ ਵਰਗੇ ਉਤਪਾਦਾਂ ਦੀ ਵਰਤੋਂ ਕਰਨ ਵਾਲਿਆਂ ਵਿੱਚ ਪੁਰਾਣੀਆਂ ਸਾਹ ਸਬੰਧੀ ਸਮੱਸਿਆਵਾਂ ਦੇ ਜੋਖਮ ਬਾਰੇ ਸੁਚੇਤ ਕੀਤਾ ਹੈ।
ਖੋਜ ਮੁਤਾਬਕ ਦਮੇ ਵਰਗੀਆਂ ਸਾਹ ਸਬੰਧੀ ਸਮੱਸਿਆਵਾਂ ਇਕੱਲੇ ਯੂਕੇ ਵਿੱਚ 5.4 ਮਿਲੀਅਨ (54 ਲੱਖ ਤੋਂ ਵੱਧ) ਲੋਕਾਂ ਨੂੰ ਪ੍ਰਭਾਵਿਤ ਕਰਦੀਆਂ ਹਨ। ਜੇਕਰ ਅਸੀਂ ਅੰਕੜਿਆਂ 'ਤੇ ਨਜ਼ਰ ਮਾਰੀਏ ਤਾਂ ਪਤਾ ਲੱਗਦਾ ਹੈ ਕਿ ਭਾਰਤ ਵਿੱਚ ਵੀ ਸਾਹ ਸਬੰਧੀ ਬਿਮਾਰੀਆਂ ਦਾ ਖ਼ਤਰਾ ਵੱਧ ਰਿਹਾ ਹੈ। ਸਾਲ 2023 ਵਿੱਚ ਕ੍ਰੋਨਿਕ ਅਬਸਟਰਕਟਿਵ ਪਲਮਨਰੀ ਡਿਜ਼ੀਜ਼ (COPD) ਦੇ ਅੰਦਾਜ਼ਨ 55 ਮਿਲੀਅਨ (5.5 ਕਰੋੜ) ਤੇ 35 ਮਿਲੀਅਨ (3.5 ਕਰੋੜ) ਦਮੇ ਦੇ ਮਰੀਜ਼ ਰਿਪੋਰਟ ਕੀਤੇ ਗਏ ਸਨ।
ਸਿਹਤ ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਨ੍ਹਾਂ ਸਾਹ ਦੀਆਂ ਬਿਮਾਰੀਆਂ ਨੂੰ ਵਧਾਉਣ ਲਈ ਹਵਾ ਪ੍ਰਦੂਸ਼ਣ ਤੇ ਹੋਰ ਵਾਤਾਵਰਣਕ ਸਥਿਤੀਆਂ ਵਰਗੇ ਕਈ ਕਾਰਕ ਜ਼ਿੰਮੇਵਾਰ ਹੋ ਸਕਦੇ ਹਨ। ਇਸ ਅਧਿਐਨ ਵਿੱਚ ਮੇਕਅਪ ਉਤਪਾਦਾਂ ਨੂੰ ਵੀ ਇਸ ਲਈ ਜ਼ਿੰਮੇਵਾਰ ਪਾਇਆ ਗਿਆ ਹੈ।
ਸਿਹਤ 'ਤੇ ਮੇਕਅਪ ਉਤਪਾਦਾਂ ਦਾ ਪ੍ਰਭਾਵ
ਖੋਜਕਰਤਾਵਾਂ ਨੇ ਲਗਪਗ 40,000 ਲੋਕਾਂ ਦਾ ਅਧਿਐਨ ਕੀਤਾ ਤੇ ਇਹ ਸਮਝਣ ਦੀ ਕੋਸ਼ਿਸ਼ ਕੀਤੀ ਕਿ ਮੇਕਅਪ ਉਤਪਾਦ ਸਿਹਤ ਨੂੰ ਕਿਵੇਂ ਪ੍ਰਭਾਵਤ ਕਰਦੇ ਹਨ? ਅਧਿਐਨ ਰਿਪੋਰਟ ਵਿੱਚ ਪਾਇਆ ਗਿਆ ਕਿ ਜੋ ਔਰਤਾਂ ਨਕਲੀ ਨਹੁੰ, ਕਿਊਟੀਕਲ ਕਰੀਮ, ਬਲੱਸ਼ ਤੇ ਲਿਪਸਟਿਕ ਦੀ ਵਰਤੋਂ ਕਰਦੀਆਂ ਹਨ, ਉਨ੍ਹਾਂ ਵਿੱਚ ਦਮੇ ਦਾ ਖ਼ਤਰਾ 47 ਪ੍ਰਤੀਸ਼ਤ ਵੱਧ ਹੋ ਸਕਦਾ ਹੈ। ਹਫ਼ਤੇ ਵਿੱਚ ਪੰਜ ਜਾਂ ਵੱਧ ਵਾਰ ਬਲੱਸ਼ ਤੇ ਲਿਪਸਟਿਕ ਲਗਾਉਣ ਨਾਲ ਇਹ ਖ਼ਤਰਾ 18 ਪ੍ਰਤੀਸ਼ਤ ਵੱਧ ਸਕਦਾ ਹੈ।
ਨੁਕਸਾਨਦੇਹ ਰਸਾਇਣ ਬਿਮਾਰੀਆਂ ਦੇ ਜੋਖਮ ਨੂੰ ਵਧਾ ਰਹੇ
ਉਧਰ, ਅਮਰੀਕਾ ਸਥਿਤ ਨੈਸ਼ਨਲ ਹਾਰਟ-ਲੰਗ ਐਂਡ ਬਲੱਡ ਇੰਸਟੀਚਿਊਟ ਦੇ ਖੋਜਕਰਤਾਵਾਂ ਦਾ ਕਹਿਣਾ ਹੈ ਕਿ ਖੋਜ ਤੋਂ ਇਹ ਤਾਂ ਸਪੱਸ਼ਟ ਨਹੀਂ ਕਿ ਇਨ੍ਹਾਂ ਉਤਪਾਦਾਂ ਨੇ ਜੋਖਮ ਵਧਾਇਆ ਹੈ ਪਰ ਇਹ ਯਕੀਨੀ ਤੌਰ 'ਤੇ ਕਿਹਾ ਜਾ ਸਕਦਾ ਹੈ ਕਿ ਮੇਕਅਪ ਵਿੱਚ ਮੌਜੂਦ ਆਮ ਰਸਾਇਣ ਸਿਹਤ 'ਤੇ ਡੂੰਘਾ ਪ੍ਰਭਾਵ ਪਾ ਸਕਦੇ ਹਨ। ਕੁਝ ਉਤਪਾਦਾਂ ਵਿੱਚ ਮੌਜੂਦ ਰਸਾਇਣ ਇਮਿਊਨ ਸਿਸਟਮ ਨੂੰ ਕਮਜ਼ੋਰ ਵੀ ਕਰ ਸਕਦੇ ਹਨ, ਜਦੋਂ ਕਿ ਕੁਝ ਹੋਰਾਂ ਵਿੱਚ ਮੌਜੂਦ ਰਸਾਇਣ ਜਿਵੇਂ ਪੌਲੀਫਲੂਓਰੋਆਕਲਾਈਲ ਪਦਾਰਥ (ਜਿਸ ਨੂੰ ਪੀਐਫਏ ਕਿਹਾ ਜਾਂਦਾ ਹੈ), ਪੈਰਾਬੇਨਸ, ਫਥਾਲੇਟਸ ਤੇ ਫਿਨੋਲ ਸਰੀਰ ਦੇ ਹਾਰਮੋਨਲ ਸੰਤੁਲਨ ਨੂੰ ਵਿਗਾੜ ਸਕਦੇ ਹਨ। ਖੋਜਕਰਤਾਵਾਂ ਨੇ ਕਿਹਾ 'ਸਾਡੀਆਂ ਖੋਜਾਂ ਨਿੱਜੀ ਦੇਖਭਾਲ ਉਤਪਾਦਾਂ ਦੇ ਮਾੜੇ ਪ੍ਰਭਾਵਾਂ ਤੇ ਉਨ੍ਹਾਂ ਵਿੱਚ ਮੌਜੂਦ ਤੱਤਾਂ 'ਤੇ ਮੁੜ ਵਿਚਾਰ ਕਰਨ ਲਈ ਧਿਆਨ ਖਿੱਚਦੀਆਂ ਹਨ।
ਦਮਾ, ਖੰਘ, ਘਰਘਰਾਹਟ ਵਰਗੀਆਂ ਸਮੱਸਿਆਵਾਂ ਵਧ ਰਹੀਆਂ
ਇਹ ਰਿਪੋਰਟ ਵਾਤਾਵਰਣ ਅੰਤਰਰਾਸ਼ਟਰੀ ਜਰਨਲ ਵਿੱਚ ਪ੍ਰਕਾਸ਼ਿਤ ਕੀਤੀ ਗਈ ਹੈ। ਇਸ ਅਧਿਐਨ ਵਿੱਚ 41 ਵੱਖ-ਵੱਖ ਕਿਸਮਾਂ ਦੇ ਸੁੰਦਰਤਾ ਉਤਪਾਦਾਂ ਬਾਰੇ 12 ਸਾਲਾਂ ਵਿੱਚ ਇਕੱਠੇ ਕੀਤੇ ਡੇਟਾ ਦੀ ਵਰਤੋਂ ਕੀਤੀ ਗਈ। ਖੋਜ ਦੇ ਅੰਤ ਵਿੱਚ 1,774 ਔਰਤਾਂ (ਲਗਪਗ 4 ਪ੍ਰਤੀਸ਼ਤ) ਨੂੰ ਸ਼ੁਰੂਆਤੀ ਦਮਾ ਹੋਣ ਦਾ ਪਤਾ ਲੱਗਿਆ। ਭਾਗੀਦਾਰਾਂ ਵਿੱਚ ਖੰਘ, ਘਰਘਰਾਹਟ, ਛਾਤੀ ਵਿੱਚ ਜਕੜਨ ਤੇ ਸਾਹ ਚੜ੍ਹਨ ਵਰਗੀਆਂ ਸਮੱਸਿਆਵਾਂ ਵੇਖੀਆਂ ਗਈਆਂ।
ਖੋਜਕਰਤਾਵਾਂ ਨੇ ਕਿਹਾ, ਨਿੱਜੀ ਦੇਖਭਾਲ ਉਤਪਾਦਾਂ ਵਿੱਚ ਮੌਜੂਦ EDCs (ਐਂਡੋਕ੍ਰਾਈਨ-ਵਿਘਨ ਪਾਉਣ ਵਾਲੇ ਰਸਾਇਣ) ਦਮੇ ਦੇ ਜੋਖਮ ਨੂੰ ਵਧਾ ਸਕਦੇ ਹਨ। ਜੇਕਰ ਸਾਡੇ ਖੋਜਾਂ ਦੀ ਪੁਸ਼ਟੀ ਲੋਕਾਂ ਦੇ ਵੱਖ-ਵੱਖ ਸਮੂਹਾਂ 'ਤੇ ਹੁੰਦੀ ਹੈ, ਤਾਂ ਇਹ ਭਵਿੱਖ ਵਿੱਚ ਦਮੇ ਦੇ ਜੋਖਮ ਨੂੰ ਘਟਾਉਣ ਦਾ ਰਸਤਾ ਖੋਲ੍ਹਣ ਵਿੱਚ ਮਦਦ ਕਰ ਸਕਦਾ ਹੈ। ਨਿੱਜੀ ਦੇਖਭਾਲ ਉਤਪਾਦਾਂ ਵਿੱਚ ਵਰਤੇ ਜਾਣ ਵਾਲੇ ਰਸਾਇਣਾਂ 'ਤੇ ਪਾਬੰਦੀ ਲਗਾ ਕੇ ਜਾਂ ਉਨ੍ਹਾਂ ਵਿੱਚ ਜ਼ਰੂਰੀ ਬਦਲਾਅ ਕਰਕੇ, ਅਸੀਂ ਵੱਡੀ ਗਿਣਤੀ ਵਿੱਚ ਲੋਕਾਂ ਨੂੰ ਸਾਹ ਦੀਆਂ ਸਮੱਸਿਆਵਾਂ ਤੋਂ ਬਚਾ ਸਕਦੇ ਹਾਂ।
ਮਾਹਿਰ ਕੀ ਕਹਿੰਦੇ ਹਨ?
ਅਸਥਮਾ-ਫੇਫੜਿਆਂ ਦੀ ਸੰਸਥਾ ਯੂਕੇ ਵਿੱਚ ਖੋਜ ਤੇ ਨਵੀਨਤਾ ਦੀ ਨਿਰਦੇਸ਼ਕ ਡਾ. ਸਮੰਥਾ ਵਾਕਰ ਕਹਿੰਦੀ ਹੈ, 'ਅਸੀਂ ਜਾਣਦੇ ਹਾਂ ਕਿ ਔਰਤਾਂ ਮਰਦਾਂ ਨਾਲੋਂ ਦਮੇ ਤੋਂ ਜ਼ਿਆਦਾ ਪੀੜਤ ਹੁੰਦੀਆਂ ਹਨ ਤੇ ਉਨ੍ਹਾਂ ਦੇ ਹਸਪਤਾਲ ਵਿੱਚ ਦਾਖਲ ਹੋਣ ਦੀ ਸੰਭਾਵਨਾ ਵੀ ਜ਼ਿਆਦਾ ਹੁੰਦੀ ਹੈ, ਪਰ ਇਹ ਸਪੱਸ਼ਟ ਨਹੀਂ ਕਿ ਅਜਿਹਾ ਕਿਉਂ ਹੁੰਦਾ ਹੈ? ਸਾਡਾ ਮੰਨਣਾ ਹੈ ਕਿ ਔਰਤਾਂ ਦੇ ਸਰੀਰ ਵਿੱਚ ਹਾਰਮੋਨਲ ਅਸੰਤੁਲਨ ਇਸ ਦਾ ਇੱਕ ਵੱਡਾ ਕਾਰਨ ਹੋ ਸਕਦਾ ਹੈ। ਮੇਕਅਪ ਉਤਪਾਦ ਇਸ ਖ਼ਤਰੇ ਨੂੰ ਹੋਰ ਵੀ ਵਧਾ ਰਹੇ ਹਨ। ਇਸ ਵਿਸ਼ੇ 'ਤੇ ਹੋਰ ਖੋਜ ਦੀ ਲੋੜ ਹੈ ਤਾਂ ਜੋ ਅਸੀਂ ਸਮਝ ਸਕੀਏ ਕਿ ਔਰਤਾਂ ਨੂੰ ਸਿਹਤਮੰਦ ਕਿਵੇਂ ਰੱਖਣਾ ਹੈ?