Delhi Red Fort Blast : ਦਿੱਲੀ ਦੇ ਲਾਲ ਕਿਲ੍ਹਾ ਧਮਾਕਾ ਮਾਮਲੇ ਵਿੱਚ NIA ਦੀ ਚਾਰਜਸ਼ੀਟ ਵਿੱਚ ਕਈ ਵੱਡੇ ਖੁਲਾਸੇ ਹੋਏ ਹਨ। ਜਾਂਚ ਏਜੰਸੀ ਮੁਤਾਬਕ ਧਮਾਕੇ ਵਿੱਚ ਵਰਤੀ ਗਈ Hyundai i20 ਕਾਰ ਨੂੰ VBIED (ਕਾਰ ਬੰਬ) ਵਜੋਂ ਵਰਤਿਆ ਗਿਆ ਸੀ। ਫੋਰੈਂਸਿਕ ਜਾਂਚ ਵਿੱਚ ਮਲਬੇ ਅਤੇ ਹੋਰ ਸਬੂਤਾਂ ਤੋਂ TATP, ਅਮੋਨੀਅਮ ਨਾਈਟ੍ਰੇਟ ਅਤੇ ਪੋਟਾਸ਼ੀਅਮ ਨਾਈਟ੍ਰੇਟ ਦੀ ਮੌਜੂਦਗੀ ਮਿਲੀ। DNA ਜਾਂਚ ਦੇ ਆਧਾਰ ’ਤੇ NIA ਦਾ ਦਾਅਵਾ ਹੈ ਕਿ ਧਮਾਕੇ ਵੇਲੇ ਕਾਰ ਦੇ ਅੰਦਰ ਉਮਰ ਉਨ ਨਬੀ ਮੌਜੂਦ ਸੀ। ਕਾਰ ਦੇ ਨੇੜਿਓਂ ਇੱਕ ਕਮਾਂਡ ਮਕੈਨਿਜ਼ਮ ਵੀ ਮਿਲਿਆ, ਜਿਸ ’ਤੇ ਵਿਸਫੋਟਕ ਪਦਾਰਥਾਂ ਦੇ ਨਿਸ਼ਾਨ ਮਿਲੇ।
ਚਾਰਜਸ਼ੀਟ ਵਿੱਚ ਨੌਗਾਮ ਥਾਣਾ ਧਮਾਕੇ ਦਾ ਵੀ ਜ਼ਿਕਰ ਹੈ। ਮੁਲਜ਼ਮਾਂ ਦੇ ਕਿਰਾਏ ਦੇ ਟਿਕਾਣੇ ਤੋਂ ਵਿਸਫੋਟਕ ਬਣਾਉਣ ਨਾਲ ਜੁੜੀ ਸਮੱਗਰੀ, ਕੈਮੀਕਲ, ਲੈਬ ਉਪਕਰਣ, ਟਾਈਮਰ ਅਤੇ ਬੈਟਰੀਆਂ ਮਿਲਣ ਦਾ ਦਾਅਵਾ ਕੀਤਾ ਗਿਆ ਹੈ। 14 ਨਵੰਬਰ 2025 ਨੂੰ ਨੌਗਾਮ ਥਾਣੇ ਵਿੱਚ ਹੋਏ ਧਮਾਕੇ ਵਿੱਚ 9 ਪੁਲਿਸਕਰਮੀਆਂ ਦੀ ਮੌਤ ਅਤੇ 29 ਲੋਕਾਂ ਦੇ ਜ਼ਖ਼ਮੀ ਹੋਣ ਦੀ ਗੱਲ ਚਾਰਜਸ਼ੀਟ ਵਿੱਚ ਦਰਜ ਹੈ।
ਜਾਂਚ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ ਜਸੀਰ ਬਿਲਾਲ ਵਾਨੀ ਨੇ YouTube ਅਤੇ ChatGPT ਰਾਹੀਂ ਰਾਕੇਟ ਬਣਾਉਣ ਦੇ ਤਰੀਕੇ ਖੋਜੇ ਸਨ। ਚਾਰਜਸ਼ੀਟ ਮੁਤਾਬਕ ਉਸ ਨੂੰ ਦੋ ਡਰੋਨ ਵੀ ਉਮਰ ਉਨ ਨਬੀ ਨੇ ਦਿੱਤੇ ਸਨ। NIA ਮੁਤਾਬਕ ਘਟਨਾ ਨਾਲ ਜੁੜੇ 73 ਸਬੂਤਾਂ ਦੀ ਜਾਂਚ ਕੀਤੀ ਗਈ। CFSL ਚੰਡੀਗੜ੍ਹ ਅਤੇ NFSU ਗਾਂਧੀਨਗਰ ਦੀ ਜਾਂਚ ਵਿੱਚ TATP ਸਮੇਤ ਹੋਰ ਰਸਾਇਣਾਂ ਦੀ ਮੌਜੂਦਗੀ ਦੀ ਪੁਸ਼ਟੀ ਹੋਈ। ਚਾਰਜਸ਼ੀਟ ਵਿੱਚ TATP ਨੂੰ ਮਾਮਲੇ ਵਿੱਚ ਵਰਤਿਆ ਗਿਆ ਮੁੱਖ ਵਿਸਫੋਟਕ ਦੱਸਿਆ ਗਿਆ ਹੈ।
ਚਾਰਜਸ਼ੀਟ ਮੁਤਾਬਕ ਮੁਲਜ਼ਮਾਂ ਨੇ ਆਪਸੀ ਸੰਪਰਕ ਲਈ Signal ਐਪ ਦੀ ਵਰਤੋਂ ਕੀਤੀ ਅਤੇ ਕੁਝ ਕੋਡ ਨੇਮ ਵੀ ਵਰਤੇ। ਜਾਂਚ ਏਜੰਸੀ ਨੇ ਕਥਿਤ ਤੌਰ ’ਤੇ ਜਿਹਾਦ ਨਾਲ ਸਬੰਧਤ ਦਸਤਾਵੇਜ਼ ਅਤੇ ਇੱਕ ਮੈਨੂਅਲ ਵੀ ਬਰਾਮਦ ਕਰਨ ਦਾ ਦਾਅਵਾ ਕੀਤਾ ਹੈ। ਸ਼ਾਹੀਨ ਸਈਦ ਦੀ ਪੈਨ ਡਰਾਈਵ ਤੋਂ 87 ਤਸਵੀਰਾਂ ਮਿਲਣ ਦੀ ਗੱਲ ਵੀ ਚਾਰਜਸ਼ੀਟ ਵਿੱਚ ਹੈ, ਜਿਨ੍ਹਾਂ ਵਿੱਚ ਮੁਲਜ਼ਮਾਂ ਦੀਆਂ ਹਥਿਆਰਾਂ ਨਾਲ ਤਸਵੀਰਾਂ ਹੋਣ ਦਾ ਦਾਅਵਾ ਕੀਤਾ ਗਿਆ ਹੈ। NIA ਨੇ ਇਨ੍ਹਾਂ ਨੂੰ AGuH ਅਤੇ AQIS ਨਾਲ ਜੁੜਿਆ ਹੋਇਆ ਦੱਸਿਆ ਹੈ।
ਉਮਰ ਉਨ ਨਬੀ ਦੀ 10 ਨਵੰਬਰ ਦੇ ਧਮਾਕੇ ਵਿੱਚ ਮੌਤ ਹੋਣ ਕਾਰਨ ਉਸ ਖ਼ਿਲਾਫ਼ ਲੱਗੇ UAPA, Arms Act ਅਤੇ Explosive Substances Act ਦੇ ਦੋਸ਼ ਕਾਨੂੰਨੀ ਤੌਰ ’ਤੇ ਖ਼ਤਮ (abated) ਕਰ ਦਿੱਤੇ ਗਏ ਹਨ।