Shashi Tharoor Vs Mallikarjun Kharge: ਕਾਂਗਰਸ ਪ੍ਰਧਾਨ ਦੇ ਅਹੁਦੇ ਲਈ ਚੋਣ ਵਿਚ ਪਾਰਟੀ ਨੇਤਾਵਾਂ ਮਲਿਕਾਰਜੁਨ ਖੜਗੇ ਅਤੇ ਸ਼ਸ਼ੀ ਥਰੂਰ ਵਿਚਾਲੇ ਮੁਕਾਬਲੇ ਲਈ ਮੰਚ ਤਿਆਰ ਹੈ। ਹਾਲਾਂਕਿ ਕੇਰਲ ਦੇ ਕਾਂਗਰਸੀ ਨੇਤਾਵਾਂ 'ਚ ਇਸ ਗੱਲ ਨੂੰ ਲੈ ਕੇ ਮਤਭੇਦ ਬਣਦੇ ਨਜ਼ਰ ਆ ਰਹੇ ਹਨ ਕਿ ਇਨ੍ਹਾਂ ਦੋਹਾਂ ਨੇਤਾਵਾਂ 'ਚੋਂ ਕਿਸ ਨੂੰ ਅਹੁਦੇ ਲਈ ਸਮਰਥਨ ਦਿੱਤਾ ਜਾਵੇ।
ਜਿੱਥੇ ਕੇਰਲ ਵਿਧਾਨ ਸਭਾ 'ਚ ਵਿਰੋਧੀ ਧਿਰ ਦੇ ਨੇਤਾ ਵੀਡੀ ਸਤੀਸ਼ਨ ਸਮੇਤ ਕੁਝ ਸੀਨੀਅਰ ਨੇਤਾਵਾਂ ਨੇ ਖੜਗੇ ਦਾ ਖੁੱਲ੍ਹ ਕੇ ਸਮਰਥਨ ਕੀਤਾ ਹੈ, ਉਥੇ ਹੀ ਲੋਕ ਸਭਾ ਮੈਂਬਰ ਹਿਬੀ ਈਡਨ ਵਰਗੇ ਕੁਝ ਨੌਜਵਾਨ ਨੇਤਾਵਾਂ ਨੇ ਥਰੂਰ ਦਾ ਸਮਰਥਨ ਕੀਤਾ ਹੈ।
ਵੀਡੀ ਸਤੀਸ਼ਨ ਨੇ ਖੜਗੇ ਦੇ ਸਮਰਥਨ 'ਚ ਇਹ ਗੱਲ ਕਹੀ
ਕੋਚੀ ਵਿੱਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਸਤੀਸ਼ਨ ਨੇ ਕਿਹਾ ਕਿ ਉਨ੍ਹਾਂ ਸਮੇਤ ਸੂਬਾਈ ਆਗੂ ਅਤੇ ਵਰਕਰ ਖੜਗੇ ਦੀ ਸਫ਼ਲਤਾ ਲਈ ਕੰਮ ਕਰਨਗੇ। ਉਨ੍ਹਾਂ ਕਿਹਾ ਕਿ ਉਹ ਉਸ ਸ਼ਾਨਦਾਰ ਪਲ ਦੀ ਉਡੀਕ ਕਰ ਰਹੇ ਹਨ ਜਦੋਂ ਕੋਈ ਦਲਿਤ ਆਗੂ ਕਾਂਗਰਸ ਦਾ ਪ੍ਰਧਾਨ ਬਣੇਗਾ। ਉਨ੍ਹਾਂ ਕਿਹਾ ਕਿ ਖੜਗੇ ਨੂੰ ਸਾਰੇ ਸੀਨੀਅਰ ਨੇਤਾਵਾਂ ਨਾਲ ਸਲਾਹ-ਮਸ਼ਵਰਾ ਕਰਨ ਤੋਂ ਬਾਅਦ ਨਾਮਜ਼ਦ ਕੀਤਾ ਗਿਆ ਹੈ, ਇਸ ਲਈ ਖੜਗੇ ਦਾ ਸਮਰਥਨ ਕੀਤਾ ਜਾਵੇਗਾ। ਖੜਗੇ ਦੀ 80 ਸਾਲ ਦੀ ਉਮਰ ਨੂੰ ਲੈ ਕੇ ਕੀਤੀ ਜਾ ਰਹੀ ਆਲੋਚਨਾ ਨੂੰ ਰੱਦ ਕਰਦੇ ਹੋਏ ਸਤੀਸ਼ਨ ਨੇ ਕਿਹਾ ਕਿ ਉਹ ਤਜਰਬੇਕਾਰ ਨੇਤਾ ਹਨ ਅਤੇ ਉਮਰ ਕੋਈ ਮਾਇਨੇ ਨਹੀਂ ਰੱਖਦੀ। ਸਤੀਸ਼ਨ ਨੇ ਇਹ ਵੀ ਕਿਹਾ ਕਿ ਰਾਜ ਦੇ ਕੁਝ ਨੇਤਾਵਾਂ ਵੱਲੋਂ ਥਰੂਰ ਦੀ ਹਮਾਇਤ ਨਾਲ ਕੇਰਲ ਕਾਂਗਰਸ ਵਿੱਚ ਦਰਾਰ ਨਹੀਂ ਆਵੇਗੀ।
ਥਰੂਰ ਦੇ ਸਮਰਥਨ 'ਚ ਕੌਣ?
ਵਿਧਾਇਕ ਰਮੇਸ਼ ਚੇਨੀਥਲਾ ਨੇ ਥਰੂਰ ਨੂੰ ਆਪਣਾ ਚੰਗਾ ਦੋਸਤ ਦੱਸਦੇ ਹੋਏ ਕਿਹਾ ਕਿ ਦਲਿਤ ਵਿਅਕਤੀ ਨੂੰ ਕਾਂਗਰਸ ਪ੍ਰਧਾਨ ਬਣਾਉਣਾ ਸਮੇਂ ਦੀ ਲੋੜ ਹੈ ਅਤੇ ਖੜਗੇ ਇਕ ਤਜਰਬੇਕਾਰ ਨੇਤਾ ਹਨ। ਹਾਲਾਂਕਿ ਲੋਕ ਸਭਾ ਮੈਂਬਰ ਹਿਬੀ ਈਡਨ ਨੇ ਉਨ੍ਹਾਂ ਦੇ ਸਮਰਥਨ 'ਚ ਆਪਣੇ ਫੇਸਬੁੱਕ ਪੇਜ 'ਤੇ ਥਰੂਰ ਦੀ ਤਸਵੀਰ ਪੋਸਟ ਕੀਤੀ ਹੈ।
ਕੇਰਲ ਸਟੂਡੈਂਟ ਯੂਨੀਅਨ (ਕੇਐਸਯੂ) ਦੇ ਨੇਤਾ ਕੇਐਮ ਅਭਿਜੀਤ ਨੇ ਵੀ ਸੋਸ਼ਲ ਮੀਡੀਆ 'ਤੇ ਥਰੂਰ ਦਾ ਸਮਰਥਨ ਕੀਤਾ। ਦੱਸ ਦੇਈਏ ਕਿ ਝਾਰਖੰਡ ਦੇ ਸਾਬਕਾ ਮੰਤਰੀ ਕੇਐਨ ਤ੍ਰਿਪਾਠੀ ਦਾ ਨਾਮਜ਼ਦਗੀ ਪੱਤਰ ਸ਼ਨੀਵਾਰ (1 ਅਕਤੂਬਰ) ਨੂੰ ਰੱਦ ਕਰ ਦਿੱਤਾ ਗਿਆ ਸੀ ਅਤੇ ਹੁਣ ਇਸ ਦੌੜ ਵਿੱਚ ਸਿਰਫ਼ ਥਰੂਰ ਅਤੇ ਖੜਗੇ ਹੀ ਬਚੇ ਹਨ।