Pre-Monsoon in Mumbai: ਐਤਵਾਰ ਨੂੰ ਮੁੰਬਈ ਦੇ ਸਮੁੰਦਰ 'ਚ ਹਾਈ ਟਾਈਡ ਦਾ ਨਜ਼ਾਰਾ ਦੇਖਣ ਨੂੰ ਮਿਲਿਆ। ਲਹਿਰਾਂ ਇੰਨੀਆਂ ਉੱਚੀਆਂ ਹਨ ਕਿ ਗੇਟਵੇ ਆਫ ਇੰਡੀਆ ਨੂੰ ਛੂਹ ਰਹੀਆਂ ਹਨ। ਸਮੁੰਦਰ ਵਿੱਚ ਤੇਜ਼ ਹਵਾਵਾਂ ਦੇ ਨਾਲ ਉੱਚੀਆਂ ਲਹਿਰਾਂ ਦੇਖਣ ਨੂੰ ਮਿਲੀਆਂ ਹਨ। ਇਸ ਦੇ ਮੱਦੇਨਜ਼ਰ ਬੀਐਮਸੀ ਨੇ ਲੋਕਾਂ ਨੂੰ ਤੇਜ਼ ਲਹਿਰਾਂ ਦੌਰਾਨ ਸਮੁੰਦਰੀ ਕਿਨਾਰੇ ਸਾਵਧਾਨ ਰਹਿਣ ਲਈ ਕਿਹਾ ਹੈ।
ਦੱਸ ਦਈਏ ਕਿ ਡਿਜ਼ਾਸਟਰ ਮੈਨੇਜਮੈਂਟ ਸੈੱਲ ਵੱਲੋਂ ਜਾਰੀ ਕੀਤੇ ਗਏ ਅੰਕੜਿਆਂ ਦੇ ਅਨੁਸਾਰ, ਮੁੰਬਈ ਵਿੱਚ ਇਸ ਸਾਲ ਮਾਨਸੂਨ ਦੇ ਚਾਰ ਮਹੀਨਿਆਂ ਵਿੱਚ ਅਰਬ ਸਾਗਰ ਵਿੱਚ 22 ਦਿਨ ਤੇਜ਼ ਲਹਿਰਾਂ ਦੇਖਣ ਨੂੰ ਮਿਲਣਗੀਆਂ। ਉੱਚ ਲਹਿਰਾਂ ਜੂਨ ਤੇ ਜੁਲਾਈ ਵਿੱਚ ਛੇ ਦਿਨ ਤੇ ਅਗਸਤ ਤੇ ਸਤੰਬਰ ਵਿੱਚ ਪੰਜ ਦਿਨਾਂ ਲਈ ਵੇਖੀਆਂ ਜਾਣਗੀਆਂ।
ਬੀਤੀ 19 ਅਪਰੈਲ ਨੂੰ ਸੀਐਸਐਮਟੀ ਵਿਖੇ ਜ਼ਿਲ੍ਹਾ ਆਫ਼ਤ ਪ੍ਰਬੰਧਨ ਅਥਾਰਟੀ ਦੀ ਸਮੀਖਿਆ ਮੀਟਿੰਗ ਦੌਰਾਨ ਇਹ ਗੱਲ ਸਾਹਮਣੇ ਆਈ ਹੈ। ਮੀਟਿੰਗ ਵਿੱਚ ਨਗਰ ਨਿਗਮ ਤੇ ਹੋਰ ਏਜੰਸੀਆਂ ਦੇ ਅਧਿਕਾਰੀਆਂ ਨੂੰ ਪ੍ਰੀ-ਮੌਨਸੂਨ ਦੇ ਚੱਲ ਰਹੇ ਕੰਮਾਂ ਦਾ ਨਿਰੀਖਣ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ।
ਹੁਣ ਕਦੋਂ ਆਵੇਗਾ ਹਾਈ ਟਾਈਡ?
ਰਿਪੋਰਟਾਂ ਅਨੁਸਾਰ 16 ਜੂਨ ਨੂੰ ਦੁਪਹਿਰ 1.35 ਵਜੇ ਅਤੇ 15 ਜੁਲਾਈ ਨੂੰ ਦੁਪਹਿਰ 1.22 ਵਜੇ 4.87 ਮੀਟਰ ਦੀ ਹਾਈ ਟਾਈਡ ਦੀ ਸੰਭਾਵਨਾ ਹੈ। 4.5 ਮੀਟਰ ਤੋਂ ਉੱਪਰ ਦਾ ਜਵਾਰ ਪੱਧਰ ਖ਼ਤਰਨਾਕ ਹੈ, ਕਿਉਂਕਿ ਨੀਵੇਂ ਇਲਾਕਿਆਂ ਵਿੱਚ ਭਾਰੀ ਮੀਂਹ ਨਾਲ ਹੜ੍ਹ ਆ ਸਕਦੇ ਹਨ। ਇਸ ਸਮੇਂ ਸ਼ਹਿਰ ਵਿੱਚ 13-18 ਜੂਨ, 13-18 ਜੁਲਾਈ, ਅਗਸਤ 11-15, ਸਤੰਬਰ 9-13 ਤੱਕ ਸਮੁੰਦਰ ਦੇ ਪੱਧਰ ਵਿੱਚ ਵਾਧਾ ਦੇਖਣ ਨੂੰ ਮਿਲੇਗਾ।
ਪ੍ਰੀ-ਮਾਨਸੂਨ ਐਂਟਰੀ
ਗੋਆ ਤੋਂ ਬਾਅਦ ਦੱਖਣ-ਪੱਛਮੀ ਮਾਨਸੂਨ ਵੀ 11 ਜੂਨ ਨੂੰ ਮੁੰਬਈ ਵਿੱਚ ਦਾਖਲ ਹੋ ਗਿਆ ਹੈ। ਅੱਜ ਮੁੰਬਈ ਵਿੱਚ ਘੱਟੋ-ਘੱਟ ਤਾਪਮਾਨ 25 ਡਿਗਰੀ ਅਤੇ ਵੱਧ ਤੋਂ ਵੱਧ ਤਾਪਮਾਨ 30 ਡਿਗਰੀ ਦੇ ਆਸ-ਪਾਸ ਰਹੇਗਾ। ਅੱਜ ਮੁੰਬਈ ਵਿੱਚ ਵੀ ਹਲਕੀ ਬਾਰਸ਼ ਹੋਵੇਗੀ।