ਬੀਤੇ ਦਿਨੀਂ ਬੁਢਲਾਡਾ ਤੋਂ ਵਿਧਾਇਕ ਪ੍ਰਿੰਸੀਪਲ ਬੁੱਧਰਾਮ ਨੂੰ ਆਪ ਪੰਜਾਬ ਦਾ ਕਾਰਜਕਾਰੀ ਪ੍ਰਧਾਨ ਬਣਾਇਆ ਗਿਆ ਹੈ। ਉੱਥੇ ਹੀ ਨਵੀਂ ਜ਼ਿੰਮੇਵਾਰੀ ਮਿਲਣ ‘ਤੇ ਪ੍ਰਿੰਸੀਪਲ ਬੁੱਧਰਾਮ ਨੇ ਕਿਹਾ ਕਿ ਸਾਨੂੰ ਪਾਰਟੀ ਨੇ ਨਵੀਂ ਜ਼ਿੰਮੇਵਾਰੀ ਦਿੱਤੀ ਹੈ। ਅਸੀਂ ਪੰਜਾਬ ਦੇ ਹਰ ਜ਼ਿਲ੍ਹੇ ਵਿੱਚ ਜਾਵਾਂਗੇ ਅਤੇ ਵਰਕਰਾਂ ਨੂੰ ਮਿਲਾਂਗੇ। ਇਸ ਦੇ ਨਾਲ ਹੀ ਉਨ੍ਹਾਂ ਕਿਹਾ ਕਿ ਸੰਗਠਨ ਨੂੰ ਮਜ਼ਬੂਤ ਕਰਨ ਲਈ ਕਿਸ ਨੂੰ ਕਿਹੜੀ ਜ਼ਿੰਮੇਵਾਰੀ ਦੇਣੀ ਹੈ, ਇਸ ‘ਤੇ ਕੰਮ ਕਰਾਂਗੇ।
ਔਰਤਾਂ ਨੂੰ 2027 ਤੋਂ ਪਹਿਲਾਂ ਮਿਲਣਗੇ 1000 ਰੁਪਏ
ਪੰਜਾਬ ਦੀਆਂ ਔਰਤਾਂ ਨੂੰ 2027 ਤੋਂ ਪਹਿਲਾਂ 1000 ਰੁਪਏ ਮਿਲਣੇ ਸ਼ੁਰੂ ਹੋ ਜਾਣਗੇ। ਸਾਡੀ ਪਾਰਟੀ ਵੱਲੋਂ ਜਿਹੜੇ ਵੀ ਚੋਣ ਵਾਅਦੇ ਕੀਤੇ ਗਏ ਸੀ, ਉਨ੍ਹਾਂ ਨੂੰ ਅਸੀਂ 5 ਸਾਲਾਂ ਦੇ ਅੰਦਰ-ਅੰਦਰ ਪੂਰਾ ਕਰਾਂਗੇ। ਕਾਰਜਕਾਰੀ ਪ੍ਰਧਾਨ ਬੁੱਧਰਾਮ ਨੇ ਕਿਹਾ ਕਿ ਪਾਰਟੀ ਨੇ ਪਹਿਲੇ ਸਾਲ ਵਿੱਚ ਹੀ ਕਈ ਚੋਣ ਵਾਅਦੇ ਪੂਰੇ ਕੀਤੇ ਹਨ ਅਤੇ ਛੇਤੀ ਹੀ ਔਰਤਾਂ ਨੂੰ ਹਜ਼ਾਰ ਰੁਪਏ ਦੇਣ ਵਾਲਾ ਵਾਅਦਾ ਵੀ ਪੂਰਾ ਕੀਤਾ ਜਾਵੇਗਾ। ਕੇਂਦਰ ਨੇ ਸਾਡੇ ਫੰਡ ਬੰਦ ਕਰ ਦਿੱਤੇ ਹਨ, ਜਿਵੇਂ ਹੀ ਫੰਡ ਜਾਰੀ ਹੁੰਦਾ ਹੈ, ਉਵੇਂ ਹੀ ਵਾਅਦਾ ਵੀ ਜਲਦੀ ਤੋਂ ਜਲਦੀ ਪੂਰਾ ਕੀਤਾ ਜਾਵੇਗਾ ਅਤੇ 2027 ਤੋਂ ਪਹਿਲਾਂ ਔਰਤਾਂ ਨੂੰ ਇੱਕ ਹਜ਼ਾਰ ਰੁਪਈਆ ਜ਼ਰੂਰ ਮਿਲੇਗਾ।
ਕੇਂਦਰ ਸਰਕਾਰ ‘ਤੇ ਸਾਧਿਆ ਨਿਸ਼ਾਨਾ
ਕੇਂਦਰ ਸਰਕਾਰ ਸਾਡੇ ਨਾਲ ਸਹੀ ਢੰਗ ਨਾਲ ਕੰਮ ਨਹੀਂ ਕਰ ਰਹੀ। ਉਨ੍ਹਾਂ ਨੇ ਸਾਡੇ ਬਹੁਤ ਸਾਰੇ ਫੰਡ ਰੋਕ ਲਏ ਹਨ, ਭਾਵੇਂ ਇਹ ਸਾਡੇ ਆਰਡੀਐਫ ਦੇ ਪੈਸੇ ਹਨ ਜਾਂ ਸਾਡੀ ਮਾਰਕੀਟ ਫੀਸ ਦੇ ਪੈਸੇ ਹੋਣ। ਸਾਡੇ ਪੈਸੇ ਰੁਕੇ ਹੋਏ ਹਨ, ਜਿਸ ਕਾਰਨ ਪੰਜਾਬ ਵਿੱਚ ਹੋਣ ਵਾਲੇ ਕੰਮ ਵੀ ਰੁਕੇ ਹੋਏ ਹਨ। ਜਿਵੇਂ ਹੀ ਇਹ ਪੈਸਾ ਜਾਰੀ ਹੋਵੇਗਾ, ਉਵੇਂ ਹੀ ਇਹ ਪੈਸਾ ਆਮ ਲੋਕਾਂ 'ਤੇ ਲਾਇਆ ਜਾਵੇਗਾ।
ਇਹ ਵੀ ਪੜ੍ਹੋ: Panchayat Land : ਪੰਚਾਇਤੀ ਜ਼ਮੀਨ ਨੱਪਣ ਵਾਲਿਆਂ ਦੀ ਖੈਰ ਨਹੀਂ, ਅੱਜ ਇਸ ਜਿਲ੍ਹੇ ਤੋਂ ਛੁੱਡਵਾਇਆ 170 ਕਰੋੜ ਰੁਪਏ ਦਾ ਕਬਜ਼ਾ
ਦਲਿਤ ਸੀਐਮ
ਸਾਡੀ ਪਾਰਟੀ ਨੇ 2017 'ਚ ਚੋਣ ਵਾਅਦਾ ਕੀਤਾ ਸੀ ਕਿ ਜੇਕਰ ਅਸੀਂ ਚੋਣ ਜਿੱਤਦੇ ਹਾਂ ਤਾਂ ਪੰਜਾਬ 'ਚ ਦਲਿਤ ਚਿਹਰੇ ਨੂੰ ਡਿਪਟੀ ਸੀ.ਐੱਮ. ਦੇ ਤੌਰ 'ਤੇ ਲੈ ਕੇ ਆਵਾਂਗੇ, ਪਰ 2022 ਦੀਆਂ ਚੋਣਾਂ 'ਚ ਅਜਿਹਾ ਕੁਝ ਨਹੀਂ ਕੀਤਾ ਗਿਆ। ਹੁਣ ਜੇਕਰ ਤੁਸੀਂ ਸਾਡੀ ਸਰਕਾਰ 'ਚ ਦੇਖੋ ਤਾਂ ਦੂਜੇ ਨੰਬਰ 'ਤੇ ਹਰਪਾਲ ਚੀਮਾ ਸਾਡੀ ਕੈਬਨਿਟ ਵਿੱਚ ਮੰਤਰੀ ਹਨ ਜੋ ਕਿ ਦਲਿਤ ਚਿਹਰਾ ਹਨ ਅਤੇ ਸਾਡੀ ਪਾਰਟੀ ਉਸ ਲਈ ਕੰਮ ਕਰ ਰਹੀ ਹੈ।
ਹਰਿਆਣਾ ‘ਚ ਪ੍ਰਦਰਸ਼ਨ ਕਰ ਰਹੇ ਕਿਸਾਨਾਂ ‘ਤੇ ਬੋਲੇ ਪ੍ਰਿੰਸੀਪਲ ਬੁੱਧਰਾਮ
ਹਰਿਆਣਾ ਦੀ ਸਰਕਾਰ ਨੇ ਪਹਿਲਾਂ ਵੀ ਤਿੰਨ ਕਾਲੇ ਕਾਨੂੰਨ ਬਣਾਉਣ ਦਾ ਕੰਮ ਕੀਤਾ ਸੀ, ਉਸ ਵਿੱਚ ਵੀ ਉਨ੍ਹਾਂ ਨੇ ਕਿਸਾਨਾਂ ਦਾ ਸਾਥ ਨਹੀਂ ਦਿੱਤਾ ਅਤੇ ਅੱਜ ਵੀ ਉੱਥੇ ਉਹੀ ਕੁਝ ਹੋ ਰਿਹਾ ਹੈ, ਜਿਸ ਕਾਰਨ ਕਿਸਾਨਾਂ ਨੂੰ ਰੋਸ ਪ੍ਰਦਰਸ਼ਨ ਕਰਨਾ ਪੈ ਰਿਹਾ ਹੈ।
ਪੰਜਾਬ ਗਵਰਨਰ ਨੂੰ ਲੈ ਕੇ ਬੋਲੇ ਪ੍ਰਿੰਸੀਪਲ ਬੁੱਧਰਾਮ
ਅੱਜ ਤੋਂ ਪਹਿਲਾਂ ਅਸੀਂ ਕਿਸੇ ਗਵਰਨਰ ਨੂੰ ਅਜਿਹਾ ਕੰਮ ਕਰਦਿਆਂ ਨਹੀਂ ਦੇਖਿਆ, ਜਿਵੇਂ ਦਾ ਪੰਜਾਬ ਦੇ ਗਵਰਨਰ ਕਰ ਰਹੇ ਹਨ। ਜਿੱਥੇ ਭਾਜਪਾ ਦੀ ਸਰਕਾਰ ਹੈ, ਕੀ ਉੱਥੇ ਦੇ ਗਵਰਨਰ ਅਜਿਹਾ ਕੰਮ ਕਰ ਰਹੇ ਹਨ। ਇਦਾਂ ਸਿਰਫ਼ ਪੰਜਾਬ ਵਿੱਚ ਹੀ ਹੋ ਰਿਹਾ ਹੈ, ਕੋਈ ਵੀ ਗਵਰਨਰ ਪਿੰਡ-ਪਿੰਡ ਜਾ ਕੇ ਪ੍ਰੈਸ ਨਾਲ ਗੱਲਬਾਤ ਨਹੀਂ ਕਰਦਾ ਹੈ। ਰਾਜਪਾਲ ਕੋਲ ਜਿਹੜੇ ਅਧਿਕਾਰ ਹਨ, ਉਨ੍ਹਾਂ ਦੀ ਵਰਤੋਂ ਕਰਨੀ ਚਾਹੀਦੀ ਹੈ। ਕੇਂਦਰ ਨਾਲ ਕੰਮ ਕਰਨਾ ਬੰਦ ਕਰ ਦਿਓ ਅਤੇ ਪੰਜਾਬ ਸਰਕਾਰ ਨੂੰ ਸਹੀ ਢੰਗ ਨਾਲ ਕੰਮ ਕਰਨ ਦਿਓ।
ਇਹ ਵੀ ਪੜ੍ਹੋ: NSA - ਪ੍ਰਧਾਨ ਮੰਤਰੀ ਬਾਜੇਕੇ ਪਹੁੰਚਿਆ ਹਾਈਕੋਰਟ, ਚਾਰ ਮਹੀਨੇ ਕੇਸ ਨੂੰ ਕੀਤਾ ਸਟੱਡੀ, ਹੁਣ ਲਾਈ ਪਟੀਸ਼ਨ ਤੇ ਰੱਖੀ ਆਹ ਮੰਗ