ਅਮਰੀਕਾ ਵੱਲੋਂ 50 ਫੀਸਦੀ ਟੈਰਿਫ ਵਾਰ ਕਾਰਨ ਪੰਜਾਬ ਦੀ ਇੰਡਸਟਰੀ ਨੂੰ 30 ਹਜ਼ਾਰ ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ ਹੈ। ਇਸਦਾ ਅਸਰ ਵੀ ਹੁਣ ਸਾਹਮਣੇ ਆਉਣਾ ਸ਼ੁਰੂ ਹੋ ਗਿਆ ਹੈ। ਕਈ ਉਦਯੋਗਪਤੀਆਂ ਦੇ ਆਰਡਰ ਰੁਕ ਗਏ ਹਨ। ਸਿਰਫ਼ 7 ਇੰਡਸਟਰੀਅਲ ਸੈਕਟਰ ਨੂੰ ਹੀ 20 ਹਜ਼ਾਰ ਕਰੋੜ ਦਾ ਨੁਕਸਾਨ ਹੋਇਆ ਹੈ, ਜਿਵੇਂ ਕਿ ਕੱਪੜਾ, ਮਸ਼ੀਨ ਟੂਲਜ਼, ਫਾਸਟਨਰਸ, ਆਟੋ ਪਾਰਟਸ, ਖੇਡ ਤੇ ਚਮੜੇ ਦੀ ਇੰਡਸਟਰੀ ਅਤੇ ਖੇਤੀ ਉਪਕਰਨ। ਇਨ੍ਹਾਂ ਉਦਯੋਗਾਂ ਨਾਲ ਜੁੜੇ ਇੰਡਸਟਰੀ ਮਾਲਕਾਂ ਨੇ ਕਿਹਾ ਕਿ ਅਮਰੀਕਾ ਵੱਲੋਂ ਭਾਰਤ ‘ਤੇ ਵਧੇ ਟੈਰਿਫ ਦਾ ਸਿੱਧਾ ਲਾਭ ਗੁਆਂਢੀ ਦੇਸ਼ਾਂ ਪਾਕਿਸਤਾਨ, ਬੰਗਲਾਦੇਸ਼ ਅਤੇ ਚੀਨ ਨੂੰ ਹੋਵੇਗਾ।
ਪੰਜਾਬ ਦੇ ਕੱਪੜਾ ਉਦਯੋਗ ‘ਤੇ ਪੈ ਰਿਹਾ ਸਭ ਤੋਂ ਵੱਧ ਅਸਰ
ਅਮਰੀਕਾ ਦੇ ਟੈਰਿਫ ਵਾਰ ਦਾ ਸਭ ਤੋਂ ਵੱਧ ਅਸਰ ਪੰਜਾਬ ਦੇ ਕੱਪੜਾ ਉਦਯੋਗ ‘ਤੇ ਪੈ ਰਿਹਾ ਹੈ। ਲੁਧਿਆਣਾ ਦੀ ਹੌਜਰੀ ਇੰਡਸਟਰੀ ਨੂੰ ਹੀ ਲਗਭਗ 8 ਹਜ਼ਾਰ ਕਰੋੜ ਰੁਪਏ ਦਾ ਨੁਕਸਾਨ ਹੋਣ ਦਾ ਅੰਦਾਜ਼ਾ ਹੈ। ਸਭ ਤੋਂ ਘੱਟ ਨੁਕਸਾਨ ਖੇਤੀਬਾੜੀ ਦੇ ਸਾਜ਼ੋ-ਸਾਮਾਨ ਬਣਾਉਣ ਵਾਲੀ ਇੰਡਸਟਰੀ ਨੂੰ ਲਗਭਗ 200 ਕਰੋੜ ਦਾ ਹੈ। ਉਦਯੋਗਪਤੀਆਂ ਦਾ ਕਹਿਣਾ ਹੈ ਕਿ ਇਸ ਨਾਲ ਨਾ ਸਿਰਫ ਭਾਰਤ ਸਗੋਂ ਅਮਰੀਕਾ ਵਿੱਚ ਵੀ ਸਮਾਨ ਮਹਿੰਗਾ ਹੋਵੇਗਾ।
ਟੈਰਿਫ ਕਰਕੇ ਰੁਕੇ ਆਰਡਰ
ਪੰਜਾਬ ਦੀ ਸਭ ਤੋਂ ਵੱਡੀ ਖੇਡ ਇੰਡਸਟਰੀ ਏ.ਐਮ. ਇੰਟਰਨੈਸ਼ਨਲ ਦੇ ਮਾਲਕ ਮੁਕੁਲ ਵਰਮਾ ਨੇ ਕਿਹਾ ਕਿ ਅਮਰੀਕਾ ਖੇਡ ਉਤਪਾਦਾਂ ਲਈ ਵੱਡਾ ਬਜ਼ਾਰ ਹੈ, ਇਸ ਮੁਸ਼ਕਲ ਵੇਲੇ ਕੇਂਦਰ ਸਰਕਾਰ ਨੂੰ ਹਸਤਖੇਪ ਕਰਨਾ ਚਾਹੀਦਾ ਹੈ। ਪੰਜਾਬ ਹਰ ਸਾਲ ਲਗਭਗ 54 ਹਜ਼ਾਰ ਕਰੋੜ ਦਾ ਨਿਰਯਾਤ ਕਰਦਾ ਹੈ, ਜਿਸ ਵਿੱਚੋਂ 20 ਹਜ਼ਾਰ ਕਰੋੜ ਦਾ ਨਿਰਯਾਤ ਸਿਰਫ਼ ਅਮਰੀਕਾ ਨੂੰ ਹੁੰਦਾ ਹੈ। ਟੈਰਿਫ ਦੇ ਕਾਰਨ ਕਈ ਕਲਾਇੰਟਾਂ ਨੇ ਆਪਣੇ ਆਰਡਰ ਰੋਕ ਦਿੱਤੇ ਹਨ।
ਹੋ ਸਕਦੀ ਕਰਮਚਾਰੀਆਂ ਦੀ ਛਾਂਟੀ
ਜਲੰਧਰ ਦੀ ਖੇਡ ਇੰਡਸਟਰੀ 'ਤੇ ਅਮਰੀਕੀ ਟੈਰਿਫ ਦਾ ਵੱਡਾ ਅਸਰ ਪੈ ਸਕਦਾ ਹੈ। ਏਐਮ ਇੰਟਰਨੈਸ਼ਨਲ ਦੇ ਮਾਲਕ ਮੁਕੁਲ ਵਰਮਾ ਦੇ ਮੁਤਾਬਕ, ਅਮਰੀਕਾ ਖੇਡ ਉਤਪਾਦਾਂ ਲਈ ਸਭ ਤੋਂ ਵੱਡਾ ਬਾਜ਼ਾਰ ਹੈ। 50% ਟੈਰਿਫ ਕਾਰਨ ਮੈਨੂਫੈਕਚਰਿੰਗ ਯੂਨਿਟਾਂ ਤੇ ਕਰਮਚਾਰੀਆਂ ਦੀ ਛਾਂਟੀ ਹੋਣ ਦਾ ਖਤਰਾ ਹੈ। ਦੂਜੇ ਪਾਸੇ, ਪਾਕਿਸਤਾਨ ਦੀ ਖੇਡ ਇੰਡਸਟਰੀ ਵੱਡੀ ਹੋਣ ਅਤੇ ਘੱਟ ਟੈਰਿਫ ਕਾਰਨ ਉਸਨੂੰ ਇਸਦਾ ਲਾਭ ਮਿਲ ਸਕਦਾ ਹੈ।
ਜਲੰਧਰ ਦੇਸ਼ ਦਾ ਚੌਥਾ ਵੱਡਾ ਲੈਦਰ ਕਲੱਸਟਰ ਹੈ, ਜਿੱਥੇ ਕਰੀਬ 59 ਛੋਟੇ–ਵੱਡੇ ਕਾਰਖ਼ਾਨੇ ਸਾਲਾਨਾ 50 ਹਜ਼ਾਰ ਟਨ ਉਤਪਾਦਨ ਕਰਦੇ ਹਨ। ਲੈਦਰ ਫੈਡਰੇਸ਼ਨ ਪੰਜਾਬ ਦੇ ਪ੍ਰਧਾਨ ਅਮਨਦੀਪ ਸਿੰਘ ਨੇ ਕਿਹਾ ਕਿ ਅਮਰੀਕੀ ਟੈਰਿਫ ਵਾਰ ਨਾਲ ਉਦਯੋਗ ਨੂੰ ਵੱਡਾ ਨੁਕਸਾਨ ਹੋ ਰਿਹਾ ਹੈ। ਅਮਰੀਕਾ ਨੂੰ ਦੇਸ਼ ਦੇ ਕੁੱਲ ਲੈਦਰ ਨਿਰਯਾਤ ਦਾ 17 ਫੀਸਦੀ ਭੇਜਿਆ ਜਾਂਦਾ ਹੈ, ਪਰ ਪਾਕਿਸਤਾਨ ਤੇ ਬੰਗਲਾਦੇਸ਼ ਵਿਚ ਘੱਟ ਟੈਕਸ ਹੋਣ ਕਰਕੇ ਭਾਰਤੀ ਉਦਯੋਗ ਪਿੱਛੇ ਰਹਿ ਰਿਹਾ ਹੈ।
ਪੰਜਾਬ ਤੋਂ ਹਰ ਸਾਲ ਅਮਰੀਕਾ ਨੂੰ 315 ਮਿਲੀਅਨ ਡਾਲਰ ਦਾ ਬਾਸਮਤੀ ਚਾਵਲ ਭੇਜਿਆ ਜਾਂਦਾ ਹੈ। ਬਾਸਮਤੀ ਰਾਈਸ ਮਿਲਰਜ਼ ਐਂਡ ਐਕਸਪੋਰਟ ਐਸੋਸੀਏਸ਼ਨ ਦੇ ਵਾਇਸ ਪ੍ਰੇਜ਼ੀਡੈਂਟ ਰਣਜੀਤ ਸਿੰਘ ਜੋਸਨ ਅਨੁਸਾਰ ਦੇਸ਼ ਦੇ ਕੁੱਲ ਬਾਸਮਤੀ ਨਿਰਯਾਤ ‘ਚੋਂ 70 ਫੀਸਦੀ ਪੰਜਾਬ ਤੋਂ ਹੁੰਦਾ ਹੈ। ਪਰ ਅਮਰੀਕਾ ਵੱਲੋਂ 50 ਫੀਸਦੀ ਡਿਊਟੀ ਲੱਗਣ ਨਾਲ ਮਾਰਕੀਟ ‘ਤੇ ਸਿੱਧਾ ਅਸਰ ਪਵੇਗਾ, ਜਦਕਿ ਪਾਕਿਸਤਾਨ ਨੇ ਪਿਛਲੇ ਸਾਲ 7 ਲੱਖ ਟਨ ਬਾਸਮਤੀ ਨਿਰਯਾਤ ਕੀਤਾ ਸੀ ਅਤੇ ਇਸ ਵਾਰ ਉੱਥੇ 12 ਲੱਖ ਟਨ ਉਤਪਾਦਨ ਦੀ ਉਮੀਦ ਹੈ।
ਅਮਰੀਕਾ ਵੱਲੋਂ ਲਗੇ ਟੈਰਿਫ ਕਾਰਨ ਲੁਧਿਆਣਾ ਦੀ ਟੈਕਸਟਾਈਲ ਸਮੇਤ ਹੋਰ ਉਦਯੋਗਾਂ ਨੂੰ ਵੱਡਾ ਨੁਕਸਾਨ ਹੋਵੇਗਾ। ਵਰਲਡ ਐਮਐਸਐਮਈ ਫੋਰਮ ਦੇ ਪ੍ਰਧਾਨ ਬਦੀਸ਼ ਜਿੰਦਲ ਨੇ ਕਿਹਾ ਕਿ ਇਸ ਦੇ ਪਿੱਛੇ ਚੀਨ ਦੀ ਸਾਜ਼ਿਸ਼ ਹੈ, ਜੋ ਭਾਰਤ-ਅਮਰੀਕਾ ਰਿਸ਼ਤਿਆਂ ਨੂੰ ਖਰਾਬ ਕਰਨਾ ਚਾਹੁੰਦਾ ਹੈ। ਉਨ੍ਹਾਂ ਦੱਸਿਆ ਕਿ ਭਾਰਤ ਸਰਕਾਰ ਨੂੰ ਅਮਰੀਕਾ ਨਾਲ ਗੱਲਬਾਤ ਕਰਨੀ ਬਹੁਤ ਜ਼ਰੂਰੀ ਹੈ, ਨਹੀਂ ਤਾਂ ਸਾਡੇ ਉਦਯੋਗਾਂ ਨੂੰ ਹੋਰ ਵੱਡਾ ਨੁਕਸਾਨ ਹੋ ਸਕਦਾ ਹੈ।