Marriage Scam: ਛੜਿਆਂ ਦੀ ਵੱਡੀ ਫੌਜ, 5 ਕਰੋੜ ਮਰਦ ਨਹੀਂ ਕਰਵਾ ਸਕਣਗੇ ਵਿਆਹ, ਵਿਦੇਸ਼ਾਂ ਤੋਂ ਖਰੀਦੀਆਂ ਜਾ ਰਹੀਆਂ ਕੁੜੀਆਂ
Marriage Scam: ਗੁਆਂਢੀ ਮੁਲਕ ਚੀਨ ਵਿੱਚ ਛੜਿਆਂ ਦੀ ਵੱਡੀ ਫੌਜ ਬਣ ਗਈ ਹੈ। ਚੀਨ ਵਿੱਚ ਕਰੋੜਾਂ ਮਰਦਾਂ ਨੂੰ ਵਿਆਹ ਲਈ ਔਰਤਾਂ ਨਹੀਂ ਮਿਲ ਰਹੀਆਂ। ਇਸ ਲਈ ਦੂਜੇ ਮੁਲਕਾਂ ਤੋਂ ਔਰਤਾਂ ਖਰੀਦੀਆਂ ਜਾ ਰਹੀਆਂ ਹਨ। ਇਸ ਨਾਲ ਹੀ...
Marriage Scam: ਗੁਆਂਢੀ ਮੁਲਕ ਚੀਨ ਵਿੱਚ ਛੜਿਆਂ ਦੀ ਵੱਡੀ ਫੌਜ ਬਣ ਗਈ ਹੈ। ਚੀਨ ਵਿੱਚ ਕਰੋੜਾਂ ਮਰਦਾਂ ਨੂੰ ਵਿਆਹ ਲਈ ਔਰਤਾਂ ਨਹੀਂ ਮਿਲ ਰਹੀਆਂ। ਇਸ ਲਈ ਦੂਜੇ ਮੁਲਕਾਂ ਤੋਂ ਔਰਤਾਂ ਖਰੀਦੀਆਂ ਜਾ ਰਹੀਆਂ ਹਨ। ਇਸ ਨਾਲ ਹੀ ਵਿਆਹ ਦੇ ਨਾਮ ਉਪਰ ਵੱਡੇ ਘੁਟਾਲੇ ਹੋਣੇ ਸ਼ੁਰੂ ਹੋ ਗਏ ਹਨ। ਛੜੇ ਆਨਲਾਈਨ ਔਰਤਾਂ ਲੱਭ ਰਹੇ ਹਨ। ਇਸ ਦੌਰਾਨ ਹੀ ਔਨਲਾਈਨ ਡੇਟਿੰਗ ਤੇ ਝੂਠੇ ਵਿਆਹ ਪ੍ਰਸਤਾਵਾਂ ਜ਼ਰੀਏ ਠੱਗੀ ਮਾਰੀ ਜਾ ਰਹੀ ਹੈ। ਸਰਕਾਰ ਨੇ ਲੋਕਾਂ ਨੂੰ ਚੇਤਾਵਨੀ ਜਾਰੀ ਕੀਤੀ ਹੈ।
ਇੱਕ ਰਿਪੋਰਟ ਅਨੁਸਾਰ 2020 ਤੋਂ 2050 ਤੱਕ ਚੀਨ ਵਿੱਚ ਲਗਪਗ 3 ਤੋਂ 5 ਕਰੋੜ ਆਦਮੀ ਕਦੇ ਵਿਆਹ ਨਹੀਂ ਕਰਵਾ ਸਕਣਗੇ। ਇਸ ਕਾਰਨ ਬਹੁਤ ਸਾਰੇ ਲੋਕ ਵਿਦੇਸ਼ਾਂ ਤੋਂ ਦੁਲਹਨਾਂ ਲਿਆਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਇਸ ਲਈ ਉਹ ਤਸਕਰਾਂ ਦੀ ਮਦਦ ਲੈਂਦੇ ਹਨ। ਉਹ ਬੰਗਲਾਦੇਸ਼, ਨੇਪਾਲ, ਮਿਆਂਮਾਰ, ਵੀਅਤਨਾਮ ਤੇ ਕੰਬੋਡੀਆ ਵਰਗੇ ਗਰੀਬ ਦੇਸ਼ਾਂ ਦੀਆਂ ਔਰਤਾਂ ਤੇ ਕੁੜੀਆਂ ਨੂੰ ਚੀਨ ਲੈ ਜਾਂਦੇ ਹਨ। ਤਸਕਰ ਇਨ੍ਹਾਂ ਔਰਤਾਂ ਨੂੰ ਚੰਗੀ ਨੌਕਰੀ, ਬਿਹਤਰ ਜ਼ਿੰਦਗੀ ਜਾਂ ਵਿਆਹ ਦੇ ਬਹਾਨੇ ਚੀਨ ਲਿਆਉਂਦੇ ਹਨ ਪਰ ਉੱਥੇ ਉਨ੍ਹਾਂ ਨੂੰ ਜ਼ਬਰਦਸਤੀ ਵਿਆਹ ਜਾਂ ਜਿਨਸੀ ਸ਼ੋਸ਼ਣ ਲਈ ਵੇਚ ਦਿੱਤਾ ਜਾਂਦਾ ਹੈ। 2019 ਦੀ ਹਿਊਮਨ ਰਾਈਟਸ ਵਾਚ ਦੀ ਰਿਪੋਰਟ ਅਨੁਸਾਰ ਮਿਆਂਮਾਰ-ਚੀਨ ਸਰਹੱਦ 'ਤੇ ਘੱਟ ਸੁਰੱਖਿਆ ਕਰਮਚਾਰੀਆਂ ਕਾਰਨ ਤਸਕਰਾਂ ਨੂੰ ਹੁਲਾਰਾ ਮਿਲਿਆ ਹੈ।
ਦਰਅਸਲ ਬੰਗਲਾਦੇਸ਼ ਵਿੱਚ ਚੀਨੀ ਦੂਤਾਵਾਸ ਨੇ ਆਪਣੇ ਨਾਗਰਿਕਾਂ ਨੂੰ ਚੇਤਾਵਨੀ ਜਾਰੀ ਕੀਤੀ ਹੈ। ਚੇਤਾਵਨੀ ਵਿੱਚ ਬੰਗਲਾਦੇਸ਼ ਵਿੱਚ ਰਹਿਣ ਵਾਲੇ ਚੀਨੀ ਨਾਗਰਿਕਾਂ ਨੂੰ ਔਨਲਾਈਨ ਡੇਟਿੰਗ ਤੇ ਝੂਠੇ ਵਿਆਹ ਪ੍ਰਸਤਾਵਾਂ ਤੋਂ ਬਚਣ ਦੀ ਸਲਾਹ ਦਿੱਤੀ ਗਈ ਹੈ। ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਵਿਆਹ ਲਈ ਵਿਦੇਸ਼ੀ ਪਤਨੀ ਖਰੀਦਣ ਬਾਰੇ ਸੋਚਣਾ ਵੀ ਗਲਤ ਹੈ। ਚੀਨ ਵਿੱਚ ਮਰਦਾਂ ਤੇ ਔਰਤਾਂ ਦੇ ਅਨੁਪਾਤ ਵਿੱਚ ਬਹੁਤ ਵੱਡਾ ਅੰਤਰ ਹੈ। 2020 ਦੀ ਮਰਦਮਸ਼ੁਮਾਰੀ ਅਨੁਸਾਰ ਪ੍ਰਤੀ 105 ਪੁਰਸ਼ਾਂ ਪਿੱਛੇ 100 ਔਰਤਾਂ ਹਨ। ਅੰਕੜੇ ਮੁਤਾਬਕ 10-14 ਸਾਲ ਦੀ ਉਮਰ ਸਮੂਹ ਵਿੱਚ ਇਹ ਅਨੁਪਾਤ ਪ੍ਰਤੀ 118 ਮਰਦਾਂ ਪਿੱਛੇ 100 ਔਰਤਾਂ ਹਨ। ਇਸ ਅਸਮਾਨਤਾ ਦੇ ਕਾਰਨ ਚੀਨ ਵਿੱਚ ਬਹੁਤ ਸਾਰੇ ਮਰਦ ਵਿਆਹ ਨਹੀਂ ਕਰਵਾ ਪਾ ਰਹੇ। ਇਸ ਕਾਰਨ ਬਹੁਤ ਸਾਰੇ ਲੋਕ ਸਮਗਲਰਾਂ ਦੇ ਜਾਲ ਵਿੱਚ ਫਸ ਕੇ ਆਪਣਾ ਪੈਸਾ ਗੁਆ ਰਹੇ ਹਨ। ਚੀਨ ਨੇ ਇਸ ਧੋਖਾਧੜੀ ਨੂੰ ਰੋਕਣ ਲਈ ਐਡਵਾਈਜ਼ਰੀ ਜਾਰੀ ਕੀਤੀ ਹੈ।
ਮੀਡੀਆ ਰਿਪੋਰਟਾਂ ਮੁਤਾਬਕ ਸੋਸ਼ਲ ਮੀਡੀਆ 'ਤੇ ਵਿਆਹ ਦੇ ਬਹੁਤ ਸਾਰੇ ਇਸ਼ਤਿਹਾਰ ਅਕਸਰ ਧੋਖਾਧੜੀ ਵਾਲੇ ਹੁੰਦੇ ਹਨ। ਇਨ੍ਹਾਂ ਵਿੱਚ ਇੱਕ ਵਿਦੇਸ਼ੀ ਦੁਲਹਨ ਦਾ ਵਾਅਦਾ ਕੀਤਾ ਜਾਂਦਾ ਹੈ ਪਰ ਅਸਲ ਵਿੱਚ ਵਿਆਹ ਨਹੀਂ ਹੁੰਦਾ। ਲੋਕ ਦੁਲਹਨ ਪ੍ਰਾਪਤ ਕੀਤੇ ਬਿਨਾਂ ਹੀ ਧੋਖੇਬਾਜ਼ਾਂ ਨੂੰ ਪੈਸੇ ਦੇ ਦਿੰਦੇ ਹਨ। ਬੀਜਿੰਗ ਨਿਊਜ਼ ਦੀ ਇੱਕ ਰਿਪੋਰਟ ਅਨੁਸਾਰ ਪਿਛਲੇ ਸਾਲ ਕੁਝ ਸੋਸ਼ਲ ਮੀਡੀਆ ਪੋਸਟਾਂ ਨੇ ਲਾਓਸ ਦੀ ਇੱਕ ਨੌਜਵਾਨ ਕੁੜੀ ਨਾਲ ਵਿਆਹ ਕਰਨ ਲਈ 2 ਲੱਖ ਯੂਆਨ (ਲਗਪਗ 24 ਲੱਖ ਰੁਪਏ) ਦੀ ਮੰਗ ਕੀਤੀ ਸੀ। ਕੁਝ ਲੋਕ ਇਸ ਧੋਖਾਧੜੀ ਵਿੱਚ ਫਸ ਗਏ।
ਪਿਛਲੇ ਸਾਲ ਚੀਨ ਦੇ ਸ਼ੈਂਡੋਂਗ ਸੂਬੇ ਦੀ ਇੱਕ ਅਦਾਲਤ ਨੇ ਦੋ ਲੋਕਾਂ ਨੂੰ ਮਨੁੱਖੀ ਤਸਕਰੀ ਦਾ ਦੋਸ਼ੀ ਪਾਇਆ। ਉਹ ਇੱਕ ਗੈਰ-ਕਾਨੂੰਨੀ ਸਰਹੱਦ ਪਾਰ ਵਿਆਹ ਏਜੰਸੀ ਚਲਾ ਰਹੇ ਸਨ ਤੇ ਲੋਕਾਂ ਨਾਲ ਲੱਖਾਂ ਯੂਆਨ ਦੀ ਧੋਖਾਧੜੀ ਕੀਤੀ ਸੀ। ਇੱਕ ਚੀਨੀ ਵਿਅਕਤੀ ਪਾਕਿਸਤਾਨ ਗਿਆ ਤੇ ਵਿਆਹ ਦੇ ਝੂਠੇ ਵਾਅਦਿਆਂ ਦਾ ਸ਼ਿਕਾਰ ਹੋ ਕੇ 1 ਲੱਖ ਯੂਆਨ (ਲਗਪਗ 12 ਲੱਖ ਰੁਪਏ) ਗੁਆ ਦਿੱਤੇ। ਇੱਕ ਪਾਕਿਸਤਾਨੀ ਔਰਤ ਨੂੰ ਵਿਆਹ ਲਈ ਚੀਨ ਲਿਆਂਦਾ ਗਿਆ। ਬਾਅਦ ਵਿੱਚ ਉਸ ਨੇ ਏਜੰਟਾਂ ਤੇ ਪੈਸੇ ਦੇ ਕੇ ਉਸ ਨਾਲ ਵਿਆਹ ਕਰਨ ਵਾਲੇ ਵਿਅਕਤੀ ਵਿਰੁੱਧ ਸ਼ਿਕਾਇਤ ਕੀਤੀ। ਸਾਰਿਆਂ ਨੂੰ ਮਨੁੱਖੀ ਤਸਕਰੀ ਦੇ ਦੋਸ਼ਾਂ ਵਿੱਚ ਗ੍ਰਿਫਤਾਰ ਕੀਤਾ ਗਿਆ।
ਮੀਡੀਆ ਰਿਪੋਰਟਾਂ ਮੁਤਾਬਕ ਤਸਕਰ ਆਪਣੇ ਆਪ ਨੂੰ ਵਿਆਹ ਏਜੰਟ ਜਾਂ ਨੌਕਰੀ ਦੇਣ ਵਾਲੇ ਕਹਿੰਦੇ ਹਨ। ਉਹ ਪਿੰਡਾਂ ਤੇ ਗਰੀਬ ਖੇਤਰਾਂ ਵਿੱਚ ਜਾਂਦੇ ਹਨ ਤੇ ਕੁੜੀਆਂ ਨੂੰ ਫਸਾਉਂਦੇ ਹਨ। ਇਸ ਤੋਂ ਬਾਅਦ ਉਹ ਉਨ੍ਹਾਂ ਨੂੰ ਚੀਨ ਲੈ ਜਾਂਦੇ ਹਨ ਤੇ ਵੇਚ ਦਿੰਦੇ ਹਨ। ਬਹੁਤ ਸਾਰੇ ਚੀਨੀ ਮਰਦ ਜੋ ਕਿਸਾਨ ਜਾਂ ਮਜ਼ਦੂਰ ਹਨ, ਇਕੱਲੇ ਰਹਿੰਦੇ ਹਨ ਤੇ ਦੁਲਹਨ ਲੈਣ ਲਈ ਇਨ੍ਹਾਂ ਤਸਕਰਾਂ ਦੇ ਸੰਪਰਕ ਵਿੱਚ ਆਉਂਦੇ ਹਨ। ਇਨ੍ਹਾਂ ਔਰਤਾਂ ਨੂੰ 5,000 ਤੋਂ 20,000 ਡਾਲਰ ਵਿੱਚ ਵੇਚਿਆ ਜਾਂਦਾ ਹੈ। ਇਹ ਸੌਦੇ 'ਵਿਆਹ' ਦੇ ਨਾਮ 'ਤੇ ਕੀਤੇ ਜਾਂਦੇ ਹਨ, ਪਰ ਇਨ੍ਹਾਂ ਵਿੱਚ ਕੋਈ ਅਸਲ ਸਹਿਮਤੀ ਨਹੀਂ ਹੁੰਦੀ।
ਚੀਨ ਪਹੁੰਚਣ ਤੋਂ ਬਾਅਦ ਇਨ੍ਹਾਂ ਔਰਤਾਂ ਦੇ ਕਾਗਜ਼ਾਤ ਖੋਹ ਲਏ ਜਾਂਦੇ ਹਨ। ਇਨ੍ਹਾਂ ਨੂੰ 5 ਤੋਂ 20 ਹਜ਼ਾਰ ਡਾਲਰ (4 ਲੱਖ ਤੋਂ 20 ਲੱਖ ਰੁਪਏ) ਵਿੱਚ ਵੇਚਿਆ ਜਾਂਦਾ ਹੈ। ਇਸ ਤੋਂ ਬਾਅਦ ਔਰਤਾਂ ਨੂੰ ਚੀਨ ਦੇ ਕਿਸੇ ਦੂਰ-ਦੁਰਾਡੇ ਪਿੰਡ ਵਿੱਚ ਭੇਜ ਦਿੱਤਾ ਜਾਂਦਾ ਹੈ। ਉੱਥੇ ਉਨ੍ਹਾਂ ਦਾ ਵਿਆਹ ਕੀਤਾ ਜਾਂਦਾ ਹੈ। ਕਈ ਵਾਰ ਉਨ੍ਹਾਂ ਨਾਲ ਬਲਾਤਕਾਰ ਕੀਤਾ ਜਾਂਦਾ ਹੈ। ਉਨ੍ਹਾਂ ਨੂੰ ਬੱਚੇ ਪੈਦਾ ਕਰਨ ਲਈ ਵੀ ਮਜਬੂਰ ਕੀਤਾ ਜਾਂਦਾ ਹੈ। ਜੇਕਰ ਇਹ ਔਰਤਾਂ ਭੱਜਣ ਦੀ ਕੋਸ਼ਿਸ਼ ਕਰਦੀਆਂ ਹਨ ਤਾਂ ਚੀਨੀ ਪੁਲਿਸ ਉਨ੍ਹਾਂ ਨੂੰ ਗੈਰ-ਕਾਨੂੰਨੀ ਪ੍ਰਵਾਸੀ ਮੰਨਦੀ ਹੈ ਤੇ ਉਨ੍ਹਾਂ ਨੂੰ ਸਜ਼ਾ ਦਿੰਦੀ ਹੈ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
