ਭਲਵਾਨ ਨਰਸਿੰਘ ਯਾਦਵ ਪਹੁੰਚੇ ਥਾਣੇ

ਨਰਸਿੰਘ ਦਾ ਕਹਿਣਾ ਹੈ ਕਿ ਉਸ ਦੇ ਰੂਮ ਪਾਰਟਨਰ ਤੇ ਮੈੱਸ ‘ਚ ਕੰਮ ਕਰਨ ਵਾਲੇ ਕਰਮਚਾਰੀਆਂ ਨੇ ਉਕਤ ਲੜਕੇ ਨੂੰ ਪਛਾਣ ਲਿਆ ਹੈ ਪਰ ਸਾਈ ਸੈਂਟਰ ਇਸ ਮਾਮਲੇ ‘ਚ ਸੱਚ ਸਾਹਮਣੇ ਲਿਆਉਣ ਲਈ ਲੋੜੀਂਦੀ ਸੀਸੀਟੀਵੀ ਵੀਡੀਓ ਫੁਟੇਜ ਨਹੀਂ ਦੇ ਰਿਹਾ ਹੈ। ਡੋਪ ਮਾਮਲੇ ‘ਚ ਫਸਣ ਕਾਰਨ ਦੁਖੀ ਨਰਸਿੰਘ ਨੇ ਕਿਹਾ ਕਿ ਅਜਿਹੀਆਂ ਕਾਰਵਾਈਆਂ ਹੋਣਗੀਆਂ ਤਾਂ ਕਿਵੇ ਕੋਈ ਖਿਡਾਰੀ ਖੇਡੇਗਾ ਤੇ ਦੇਸ਼ ਦਾ ਨਾਮ ਕਰੇਗਾ।

ਸੋਨੀਪਤ: ਡੋਪ ਟੈਸਟ ‘ਚ ਫਸੇ ਹਰਿਆਣਾ ਦੇ ਭਲਵਾਨ ਨਰਸਿੰਘ ਯਾਦਵ ਇਸ ਮਾਮਲੇ ਦੀ ਸ਼ਿਕਾਇਤ ਲੈ ਕੇ ਥਾਣੇ ਜਾ ਪੁੱਜੇ ਹਨ। ਪੁਲਿਸ ਕੋਲ ਦਿੱਤੀ ਸ਼ਿਕਾਇਤ ‘ਚ ਉਸ ਨੇ ਪੂਰੇ ਮਾਮਲੇ ਦੀ ਨਿਰਪੱਖ ਜਾਂਚ ਕਰ ਜਲਦ ਸੱਚ ਸਾਹਮਣੇ ਲਿਆਉਣ ਦੀ ਮੰਗ ਕੀਤੀ ਹੈ। ਉਨ੍ਹਾਂ ਸਾਈ ਸੈਂਟਰ ‘ਤੇ ਸੀਸੀਟੀਵੀ ਕੈਮਰੇ ਹੋਣ ਦੇ ਬਾਵਜੂਦ ਵੀਡੀਓ ਫੁਟੇਜ ਨਾ ਦੇਣ ਦਾ ਇਲਜ਼ਾਮ ਵੀ ਲਾਇਆ ਹੈ।

ਭਲਵਾਨ ਨਰਸਿੰਘ ਮੁਤਾਬਕ ਇਹ ਸਾਜ਼ਿਸ਼ ਉਸ ਨੂੰ ਰੀਓ ਉਲੰਪਿਕ ‘ਚ ਜਾਣ ਤੋਂ ਰੋਕਣ ਲਈ ਰਚੀ ਗਈ ਹੈ। ਮਾਮਲੇ ‘ਚ ਇੱਕ ਲੜਕੇ ਦਾ ਨਾਮ ਵੀ ਸਾਹਮਣੇ ਆਉਣ ਦੀ ਗੱਲ ਕਹੀ ਜਾ ਰਹੀ ਹੈ, ਜਿਸ ਨੇ ਖਾਣੇ ‘ਚ ਕੋਈ ਦਵਾਈ ਮਿਲਾਈ ਸੀ। ਇਸ ਦੇ ਚੱਲਦੇ ਹੀ ਰਾਈ ਪੁਲਿਸ ਥਾਣੇ ‘ਚ ਮਾਮਲੇ ਦੀ ਸ਼ਿਕਾਇਤ ਦਰਜ ਕਰਵਾਉਂਦਿਆਂ ਉਨ੍ਹਾਂ ਉੱਚ ਪੱਧਰੀ ਜਾਂਚ ਕਰਵਾਉਣ ਤੇ ਸੱਚ ਦਾ ਖੁਲਾਸਾ ਕਰਨ ਦੀ ਮੰਗ ਕੀਤੀ ਹੈ।