ਜਿੱਤੇ ਨਹੀਂ ਪਰ ਅਮਿਤ ਮਿਸ਼ਰਾ ਨੇ ਕੀਤਾ ਪ੍ਰਭਾਵਿਤ

ਭਾਰਤ ਅਤੇ ਵੈਸਟ ਇੰਡੀਜ਼ ਵਿਚਾਲੇ ਖੇਡੇ ਗਏ ਦੂਜੇ ਟੀ-20 ਮੈਚ ਮੀਂਹ ਨੇ ਰੁਕਾਵਟ ਪਾਈ ਅਤੇ ਮੈਚ ਰੱਦ ਹੋ ਗਿਆ। ਇਸ ਮੈਚ 'ਚ ਭਾਰਤ ਜਿੱਤ ਵਲ ਵਧਦਾ ਨਜਰ ਆ ਰਿਹਾ ਸੀ। ਪਹਿਲੇ ਮੈਚ 'ਚ 1 ਰਨ ਨਾਲ ਹਾਰਨ ਤੋਂ ਬਾਅਦ ਦੂਜੇ ਮੈਚ 'ਚ ਭਾਰਤ ਅਤੇ ਜਿੱਤ ਵਿਚਾਲੇ ਬਾਰਿਸ਼ ਆ ਗਈ। ਟੀਮ ਇੰਡੀਆ ਨੇ ਸੀਰੀਜ਼ 'ਚ 1-0 ਨਾਲ ਹਾਰ ਦਾ ਸਾਹਮਣਾ ਕੀਤਾ।

ਟੀਮ ਇੰਡੀਆ ਨੇ ਦੂਜੇ ਟੀ-20 'ਚ ਸਿਰਫ ਇੱਕ ਬਦਲਾਅ ਕੀਤਾ ਸੀ। ਸਟੁਅਰਟ ਬਿੰਨੀ ਦੀ ਜਗ੍ਹਾ ਟੀਮ 'ਚ ਅਮਿਤ ਮਿਸ਼ਰਾ ਨੂੰ ਜਗ੍ਹਾ ਮਿਲੀ ਸੀ। ਇਹ ਬਦਲਾਅ ਟੀਮ ਇੰਡੀਆ ਦੇ ਕੰਮ ਆ ਗਿਆ ਅਤੇ ਅਮਿਤ ਮਿਸ਼ਰਾ ਦੇ ਦਮਦਾਰ ਪ੍ਰਦਰਸ਼ਨ ਸਦਕਾ ਭਾਰਤ ਨੇ ਵੈਸਟ ਇੰਡੀਜ਼ ਨੂੰ 143 ਰਨ 'ਤੇ ਹੀ ਰੋਕ ਦਿੱਤਾ।

ਅਮਿਤ ਮਿਸ਼ਰਾ ਨੇ ਦਮਦਾਰ ਸਪੈਲ ਕਰਵਾਇਆ ਅਤੇ 4 ਓਵਰਾਂ 'ਚ 24 ਰਨ ਦੇਕੇ 3 ਵਿਕਟ ਝਟਕੇ। ਅਮਿਤ ਮਿਸ਼ਰਾ ਨੇ ਜਾਨਸਨ ਚਾਰਲਸ, ਡਵੇਨ ਬਰਾਵੋ ਅਤੇ ਕਾਰਲੋਸ ਬਰੈਥਵੇਟ ਨੂੰ ਆਊਟ ਕੀਤਾ।

ਅਮਿਤ ਮਿਸ਼ਰਾ ਦੀ ਦਮਦਾਰ ਗੇਂਦਬਾਜ਼ੀ ਸਾਹਮਣੇ ਵੈਸਟ ਇੰਡੀਜ਼ ਦੇ ਬੱਲੇਬਾਜਾਂ ਦੀ ਕੋਈ ਪੇਸ਼ ਨਹੀਂ ਗਈ ਅਤੇ ਇਹ ਬੱਲੇਬਾਜ ਮਿਸ਼ਰਾ ਸਾਹਮਣੇ ਟਿਕਣ 'ਚ ਨਾਕਾਮ ਰਹੇ। ਵੈਸਟ ਇੰਡੀਜ਼ ਨੇ ਪਹਿਲੇ ਟੀ-20 'ਚ 245 ਰਨ ਬਣਾਏ ਸਨ ਪਰ ਦੂਜੇ ਟੀ-20 'ਚ ਇਹ ਟੀਮ ਵੱਡੇ ਸਕੋਰ ਤਕ ਪਹੁੰਚਣ 'ਚ ਨਾਕਾਮ ਰਹੀ। ਅਮਿਤ ਮਿਸ਼ਰਾ ਤੋਂ ਅਲਾਵਾ ਆਰ. ਅਸ਼ਵਿਨ ਅਤੇ ਜਸਪ੍ਰੀਤ ਭੁਮਰਾ ਨੇ ਵੀ ਪ੍ਰਭਾਵਿਤ ਕੀਤਾ।