ਵਿਸ਼ਵ ਸਰਦਾਰੀ ਲਈ ਭਿੜਨਗੇ ਪੰਜ ਮਹਾਂਰਥੀ
ਸਪੇਨ: ਬਰਾਜ਼ੀਲ ਵਾਂਗ ਸਪੇਨ ਵੀ 2014 ਦੇ ਖ਼ਰਾਬ ਪ੍ਰਦਰਸ਼ਨ ਦੀ ਨਿਰਾਸ਼ਾ ਤੋਂ ਖਹਿੜਾ ਛੁਡਾਉਣ ਦੀ ਕੋਸ਼ਿਸ਼ ਕਰੇਗਾ। ਪਿਛਲੀ ਵਾਰ ਉਹ ਨਾਕਆਊਟ ਪੜਾਅ ਤੋਂ ਬਾਹਰ ਹੋ ਗਿਆ ਸੀ। ਦੋ ਸਾਲ ਵਿੱਚ ਜੁਲੇਨ ਲੋਪੇਟੇਗੁਈ ਦੇ ਕੋਚ ਰਹਿੰਦਿਆਂ ਸਪੇਨ ਨੇ ਇੱਕ ਵੀ ਮੈਚ ਨਹੀਂ ਹਾਰਿਆ। ਸਪੇਨ ਨੇ ਗਰੁੱਪ ‘ਬੀ’ ਦੇ ਪਹਿਲੇ ਮੈਚ ਵਿੱਚ ਪੁਰਤਗਾਲ ਨਾਲ ਖੇਡਣਾ ਹੈ। ਟੀਮ ਵਿੱਚ ਸੱਤ ਖਿਡਾਰੀ ਅਜਿਹੇ ਹਨ, ਜੋ ਯੂਰੋ-2016 ਵਿੱਚ ਟੀਮ ਦਾ ਹਿੱਸਾ ਸਨ, ਜਿਸ ਨੂੰ ਇਟਲੀ ਨੇ 2-0 ਗੋਲਾਂ ਨਾਲ ਹਰਾਇਆ ਸੀ।
ਜਰਮਨੀ: ਮੌਜੂਦਾ ਚੈਂਪੀਅਨ ਜਰਮਨੀ ਨੂੰ ਵੱਡੇ ਮੈਚਾਂ ਦੀ ਟੀਮ ਮੰਨਿਆ ਜਾਂਦਾ ਹੈ, ਪਰ ਉਸ ਦਾ ਅਭਿਆਸ ਮੈਚਾਂ ਦੌਰਾਨ ਪ੍ਰਦਰਸ਼ਨ ਚੰਗਾ ਨਹੀਂ ਰਿਹਾ। ਜੋਕਿਮ ਲੋਵ ਦੀ ਟੀਮ ਲਗਾਤਾਰ ਪੰਜ ਮੈਚਾਂ ਵਿੱਚ ਜਿੱਤ ਦਰਜ ਨਹੀਂ ਕਰ ਸਕੀ ਤੇ ਸਾਊਦੀ ਅਰਬ ਖ਼ਿਲਾਫ਼ ਉਸ ਨੂੰ 2-1 ਗੋਲਾਂ ਨਾਲ ਜਿੱਤ ਦਰਜ ਕਰਨ ਵਿੱਚ ਕਾਫ਼ੀ ਮੁਸ਼ੱਕਤ ਕਰਨੀ ਪਈ। ਗੋਲਕੀਪਰ ਮੈਨੂਅਲ ਨੂਯੇਰ ਸਤੰਬਰ ਮਗਰੋਂ ਸੱਟ ਲੱਗਣ ਦੇ ਡਰ ਕਾਰਨ ਕਾਫੀ ਘੱਟ ਖੇਡਿਆ ਹੈ। ਜਰਮਨ ਟੀਮ ਹਾਲਾਂਕਿ ਪਿਛਲੇ ਚਾਰ ਵਿਸ਼ਵ ਕੱਪ ਵਿੱਚ ਸੈਮੀ ਫਾਈਨਲ ਤਕ ਪਹੁੰਚੀ ਹੈ ਤੇ ਇਸ ਵਾਰ ਵੀ ਉਸ ਦੇ ਇਰਾਦੇ ਅਜਿਹੇ ਹੀ ਹੋਣਗੇ।
ਫਰਾਂਸ: ਫਰਾਂਸ ਨੇ ਆਪਣੇ ਦੋਸਤਾਨਾ ਮੈਚ ਵਿੱਚ ਅਮਰੀਕਾ ਨਾਲ 1-1 ਗੋਲ ਦਾ ਡਰਾਅ ਖੇਡਿਆ ਸੀ, ਜਿਸ ਤੋਂ ਦਿਦਿਯੇਰ ਡੈਸਚੈਂਪਸ ਨੂੰ ਅਹਿਸਾਸ ਹੋਇਆ ਹੋਵੇਗਾ ਕਿ ਅਜੇ ਕਾਫੀ ਕੁਝ ਠੀਕ ਕਰਨਾ ਬਾਕੀ ਹੈ। ਆਇਰਲੈਂਡ ਤੇ ਇਟਲੀ ਨੂੰ ਅਗਲੇ ਮੈਚਾਂ ਵਿੱਚ ਫਰਾਂਸ ਨੇ ਹਰਾਇਆ, ਜਿਸ ਦੌਰਾਨ ਪੌਲ ਪੋਗਬਾ ਦਾ ਪ੍ਰਦਰਸ਼ਨ ਸ਼ਾਨਦਾਰ ਰਿਹਾ। ਫਰਾਂਸ ਵੀ ਆਖ਼ਰੀ ਚਾਰ ਦਾਅਵੇਦਾਰਾਂ ਵਿੱਚ ਸ਼ੁਮਾਰ ਹੈ।
ਰੂਸ ਦੀ ਰਾਜਧਾਨੀ ਮਾਸਕੋ ਵਿੱਚ 14 ਜੂਨ ਤੋਂ ਫੁਟਬਾਲ ਦਾ ਮਹਾਕੁੰਭ ਸ਼ੁਰੂ ਹੋ ਰਿਹਾ ਹੈ। ਇਸ ਦੌਰਾਨ ਫੁਟਬਾਲ ਦੇ ਸਭ ਤੋਂ ਵੱਡੇ ਖ਼ਿਤਾਬ ਲਈ 32 ਟੀਮਾਂ ਭਿੜਨਗੀਆਂ। ਇਨ੍ਹਾਂ ਵਿੱਚੋਂ ਪੰਜ ਟੀਮਾਂ (ਬਰਾਜ਼ੀਲ, ਜਰਮਨੀ, ਸਪੇਨ, ਫਰਾਂਸ ਤੇ ਅਰਜਨਟੀਨਾ) ਖ਼ਿਤਾਬ ਦੀਆਂ ਮਜ਼ਬੂਤ ਦਾਅਵੇਦਾਰ ਹਨ। ਇਨ੍ਹਾਂ ਟੀਮਾਂ ’ਤੇ ਸਾਰਿਆਂ ਦੀਆਂ ਨਜ਼ਰਾਂ ਰਹਿਣਗੀਆਂ।
ਬਰਾਜ਼ੀਲ: ਜਰਮਨੀ ਨੇ ਪਿਛਲੀ ਵਾਰ 2014 ਦੌਰਾਨ ਬਰਾਜ਼ੀਲ ਦਾ ਉਸ ਦੀ ਧਰਤੀ ’ਤੇ ਖ਼ਿਤਾਬ ਜਿੱਤਣ ਦਾ ਸੁਪਨਾ 7-1 ਗੋਲਾਂ ਨਾਲ ਹਰਾ ਕੇ ਤੋੜ ਦਿੱਤਾ ਸੀ। ਪੈਂਟਾ ਯਾਨੀ ਪੰਜ ਵਾਰ ਦੀ ਚੈਂਪੀਅਨ ਬਰਾਜ਼ੀਲ ਕੋਲ ਹੁਣ ਇੱਕ ਹੋਰ ਮੌਕਾ ਹੈ ਕਿਉਂਕਿ ਕੋਚ ਟਿਟੇ ਨੇ ਟੀਮ ਨੂੰ ਹਾਰ ਦੀ ਨਿਰਾਸ਼ਾ ਤੋਂ ਕੱਢ ਕੇ ਮੁੜ ਚੈਂਪੀਅਨ ਬਣਨ ਦੀ ਉਮੀਦ ਜਗਾਈ ਹੈ। ਡਾਨੀ ਐਲਵਜ਼ ਦੇ ਜ਼ਖ਼ਮੀ ਹੋਣ ਨਾਲ ਟੀਮ ਦਾ ਸੰਤੁਲਨ ਵਿਗੜਿਆ ਹੈ, ਪਰ ਨੇਮਾਰ ਮੁੜ ਫਿੱਟ ਹੋ ਗਿਆ ਹੈ ਤੇ ਦੋਸਤਾਨਾ ਮੈਚਾਂ ਵਿੱਚ ਉਸ ਨੇ ਗੋਲ ਵੀ ਕੀਤਾ ਹੈ। ਮੈਨਚੈਸਟਰ ਸਿਟੀ ਦਾ ਗੈਬਰੀਅਲ ਜੀਸਸ ਵੀ ਫਾਰਮ ਵਿੱਚ ਹੈ।
ਅਰਜਨਟੀਨਾ: ਕੁਆਲੀਫਾਇੰਗ ਦੌਰ ਵਿੱਚ ਖ਼ਰਾਬ ਪ੍ਰਦਰਸ਼ਨ ਮਗਰੋਂ ਅਰਜਨਟੀਨਾ ਦੀ ਟੀਮ ਰੂਸ ਪਹੁੰਚੀ ਹੈ। ਪਿਛਲੇ ਹਫ਼ਤੇ ਯੇਰੂਸ਼ਲਮ ਵਿੱਚ ਅਭਿਆਸ ਮੈਚ ਰੱਦ ਹੋਣ ਕਾਰਨ ਉਸ ਨੂੰ ਅਭਿਆਸ ਮੈਚ ਵੀ ਨਸੀਬ ਨਹੀਂ ਹੋਇਆ। ਟੀਮ ਜ਼ਿਆਦਾਤਰ ਲਾਇਨਲ ਮੈਸੀ ’ਤੇ ਨਿਰਭਰ ਹੈ, ਜੋ ਅਜੇ ਤੱਕ ਵਿਸ਼ਵ ਕੱਪ ਨਾ ਜਿੱਤਣ ਦਾ ਦਾਗ਼ ਧੋਣਾ ਚਾਹੇਗਾ।