ਕੁਦਰਤਿ ਕੇ ਸਭ ਬੰਦੇ।।
ਸ੍ਰੀ ਮੁਕਤਸਰ ਸਾਹਿਬ:- ਅੱਜ ਮੁਸਲਿਮ ਭਾਈਚਾਰੇ ਵੱਲੋਂ ਦੁਨੀਆ ਭਰ ਵਿੱਚ ਈਦ-ਉਲ-ਫਿਤਰ ਦਾ ਤਿਉਹਾਰ ਮਨਾਇਆ ਜਾ ਰਿਹਾ ਹੈ।
ਮੁਕਤਸਰ ਸਾਹਿਬ ਵਿਖੇ ਮੁਸਲਿਮ ਭਾਈਚਾਰੇ ਦੇ ਸੈਂਕੜੇ ਪਰਿਵਾਰ ਸੁਖੀ ਵਸਦੇ ਹਨ।
ਤਿਉਹਾਰ ਹਰ ਧਰਮ ਦੇ ਵੱਖ-ਵੱਖ ਜ਼ਰੂਰ ਹੁੰਦੇ ਹਨ ਪਰ ਇਨਸਾਨੀਅਨ ਹਰ ਧਰਮ ਦੇ ਇਨਸਾਨਾਂ ਅੰਦਰ ਇੱਕੋ ਜਿਹੀ ਹੁੰਦੀ ਹੈ ਇਸ ਗੱਲ ਦੀ ਮਿਸਾਲ ਪਵਿੱਤਰ ਗੁਰੂ ਨਗਰੀ ਸ੍ਰੀ ਮੁਕਤਸਰ ਸਾਹਿਬ ਦੀ ਜਾਮਾ ਮਸਜਿਦ 'ਚ ਦੇਖਣ ਨੂੰ ਮਿਲੀ ਜਿੱਥੇ ਸਿੱਖ ਭਾਈਚਾਰੇ ਦੇ ਨੌਜਵਾਨਾਂ ਨੇ ਇਕੱਠੇ ਹੋ ਕੇ ਮੁਸਲਿਮ ਭਰਾਵਾਂ ਨੂੰ ਇਫਤਾਰੀ ਦਿੱਤੀ।
ਇਨਾਂ ਨੌਜਵਾਨਾਂ ਨੇ ਜਾਮਾ ਮਸਜਿਦ ਜਾ ਕੇ ਮੁਸਲਿਮ ਭਰਾਵਾਂ ਨੂੰ ਇਫਤਾਰੀ ਭਾਵ ਖਾਣ-ਪੀਣ ਦੇ ਸਮਾਨ ਦੀ ਪਾਰਟੀ ਦਿੱਤੀ।
ਅੱਜ ਈਦ ਦੇ ਪਵਿੱਤਰ ਤਿਉਹਾਰ ਮੌਕੇ ਸਿੱਖ ਵਿਰਸਾ ਕੌਂਸਲ ਦੇ ਨੌਜਵਾਨਾਂ ਨੇ ਮੁਕਤਸਰ ਸਾਹਿਬ ਦੀ ਧਰਤੀ ਦੇ ਵਾਤਾਵਰਨ ਨੂੰ ਸਾਫ ਸੁਥਰਾ ਤੇ ਹਰਾ-ਭਰਾ ਕਰਨ ਦੇ ਮਕਸਦ ਨਾਲ ਜਾਮਾ ਮਸਜਿਦ ਸ੍ਰੀ ਮੁਕਤਸਰ ਸਾਹਿਬ ਪਹੁੰਚ ਕੇ ਲੋਕਾਂ ਨੂੰ 500 ਬੂਟੇ ਵੰਡੇ ਅਤੇ ਈਦ ਦੀਆਂ ਵਧਾਈਆਂ ਦਿੱਤੀਆਂ।
ਸਾਰਿਆਂ ਨੇ ਇਕੱਠੇ ਇੱਕ ਕਤਾਰ ਵਿੱਚ ਬਹਿ ਕੇ ਭੋਜਨ ਛਕਿਆ ਤੇ ਆਪਸੀ ਭਾਈਚਾਰਕ ਸਾਂਝ ਤੇ ਪਿਆਰ ਦਾ ਸੁਨੇਹਾ ਦਿੱਤਾ।
ਸ੍ਰੀ ਮੁਕਤਸਰ ਸਾਹਿਬ ਵਿਖੇ ਅਜਿਹਾ ਸ਼ਾਇਦ ਪਹਿਲੀ ਵਾਰ ਦੇਖਣ ਨੂੰ ਮਿਲਿਆ ਜਦੋਂ ਸਿੱਖ ਭਰਾਵਾਂ ਨੇ ਜਨਤਕ ਤੌਰ 'ਤੇ ਮੁਸਲਿਮ ਭਰਾਵਾਂ ਦੇ ਤਿਉਹਾਰ 'ਚ ਸ਼ਾਮਿਲ ਹੋ ਕੇ ਖੁਸ਼ੀ ਮਨਾਈ।
ਰਮਜ਼ਾਨ ਦੇ ਮਹੀਨੇ ਮੁਸਲਿਮ ਲੋਕ ਪੂਰਾ ਮਹੀਨਾ ਰੋਜ਼ੇ ਰੱਖਦੇ ਹਨ ਅਤੇ ਹਰ ਰਾਤ ਇਫਤਾਰੀ ਖਾ ਕੇ ਰੋਜ਼ਾ ਖੋਲਦੇ ਹਨ।