ਗੁਰੂ ਹੁਣ ਤਾਂ ਠੋਕੋ ਤਾੜੀ .......

ਕਪਿਲ ਸ਼ਰਮਾ ਦੀ ਕਮੇਡੀ ‘ਤੇ ਤਾੜੀਆਂ ਵਜਾਉਣ ਵਾਲੇ ਸਿੱਧੂ ਨੇ ਕੱਚੀਆਂ ਗੋਲੀਆਂ ਨਹੀਂ ਖੇਡੀਆਂ ਹਨ। ਆਮ ਆਦਮੀ ਪਾਰਟੀ ਤੇ ਬੈਂਸ ਭਰਾਵਾਂ ਤੋਂ ਬਾਅਦ ਹੁਣ ਕਾਂਗਰਸ ਨੂੰ ਵੀ ਇਹ ਸਮਝ ਆ ਗਿਆ ਹੋਵੇਗਾ। ਲਗਾਤਾਰ ਦਿਨ ਬੀਤ ਰਹੇ ਹਨ, ਪਰ ਸਿੱਧੂ ਸਾਹਿਬ ਦਾ ਕੁੱਝ ਪਤਾ ਨਹੀਂ। ਨਵਜੋਤ ਸਿੱਧੂ ਰਾਹੁਲ ਗਾਂਧੀ ਤੱਕ ਨਾਲ ਮੀਟਿੰਗ ਕਰ ਚੁੱਕੇ ਹਨ। ਸਿੱਧੂ ਦੇ ਕਾਂਗਰਸ ‘ਚ ਸ਼ਾਮਲ ਹੋਣ ਨੂੰ ਲੈ ਕੇ ਹਰ ਦਿਨ ਨਵੀਂ ਚਰਚਾ ਅਤੇ ਨਵੀਂ ਤਾਰੀਕ ਮਿਲ ਰਹੀ ਹੈ। ਪੰਜਾਬ ਵਿਧਾਨ ਸਭਾ ਚੋਣਾਂ ਦੀਆਂ ਨਾਮਜਦਗੀਆਂ ਦੀ ਆਖਰੀ ਤਾਰੀਕ ਵੀ 18 ਜਨਵਰੀ ਹੈ।

ਇਸ ਤੋਂ ਪਹਿਲਾਂ ਚਰਚਾ ਹੋ ਰਹੀ ਹੈ ਕਿ ਸਰਕਾਰ ਬਣਨ ‘ਤੇ ਕਾਂਗਰਸ ਨਵਜੋਤ ਸਿੱਧੂ ਨੂੰ ਉਪ ਮੁੱਖ ਮੰਤਰੀ ਬਣਾ ਸਕਦੀ ਹੈ। ਸਿੱਧੂ ਵੀ ਪੰਜਾਬ ਦੀਆਂ ਸਾਰੀਆਂ 117 ਵਿਧਾਨ ਸਭਾ ਸੀਟਾਂ ‘ਤੇ ਕਾਂਗਰਸ ਦਾ ਪ੍ਰਚਾਰ ਕਰਨਗੇ। ਉਹ ਕਰੀਬ 70 ਰੈਲੀਆਂ ਵੀ ਕਰਨਗੇ।

ਪੰਜਾਬ ਵਿਧਾਨ ਸਭਾ ਚੋਣਾਂ ‘ਚ ਸਿਰਫ 18 ਦਿਨ ਬਾਕੀ ਹਨ, ਪਰ ਨਵਜੋਤ ਸਿੱਧੂ ਕਾਂਗਰਸ ‘ਚ ਕਦੋਂ ਸ਼ਾਮਲ ਹੋਣਗੇ ? ਇਹ ਕੋਈ ਨਹੀਂ ਜਾਣਦਾ। ਇਸ ਸਸਪੈਂਸ ਤੋਂ ਲਗਦਾ ਹੈ ਕਿ ਸਿੱਧੂ ਤੇ ਕਾਂਗਰਸ ‘ਚ ਚੱਲ ਰਹੀ ਗੱਲਬਾਤ ‘ਚ ਕੋਈ ਪੇਚ ਜਰੂਰ ਫਸਿਆ ਹੈ। ਹਰ ਚੀਜ ਉਸ ਤਰਾਂ ਨਹੀਂ ਹੋ ਰਹੀ ਜਿਵੇਂ ਸਿੱਧੂ ਚਾਹੁੰਦੇ ਹਨ। ਇਹ ਤੈਅ ਹੈ ਕਿ ਅੰਮ੍ਰਿਤਸਰ ਦੀ ਇੱਕ ਸੀਟ ਲਈ ਤਾਂ ਸਿੱਧੂ ਕਾਂਗਰਸ ਦਾ ਸਾਥ ਨਹੀਂ ਦੇਣਗੇ।

ਪਾਰਟੀ ਪ੍ਰਚਾਰ ਲਈ ਹੈਲੀਕਪਟਰ ਵੀ ਦੇਵੇਗੀ ਤੇ ਅੰਮ੍ਰਿਤਸਰ ਈਸਟ ਸੀਟ ਵੀ ਸਿੱਧੂ ਪਰਿਵਾਰ ਲਈ ਰਹੇਗੀ। ਪਰ ਇਹ ਸਭ ਆਖਰ ਸਿਰੇ ਕਿਵੇਂ ਤੇ ਕਦ ਲੱਗੇਗਾ, ਇਹ ਵੱਡਾ ਸਵਾਲ ਅਜੇ ਵੀ ਬਣਿਆ ਹੋਇਆ ਹੈ। ਅਜਿਹੇ ‘ਚ ਹਰ ਕੋਈ ਇਹੀ ਕਹਿ ਰਿਹਾ ਹੈ ਕਿ ਸਿੱਧੂ ਮਹਾਰਾਜ ਹੁਣ ਤਾਂ ਠੋਕੋ ਤਾੜੀ…।