ਪ੍ਰਦੇਸ਼ 'ਚ ਸਿੰਘਾਂ ਦੀ ਬੱਲੇ ਬੱਲੇ
ਵਿਦੇਸ਼ਾਂ 'ਚ ਸਿੰਘਾਂ ਦੀ ਬੱਲੇ ਬੱਲੇ
ਗਗਨਦੀਪ ਪੰਜਾਬ 'ਚ ਅੰਮ੍ਰਿਤਸਰ ਜ਼ਿਲ੍ਹੇ ਦੇ ਪਿੰਡ ਵੇਰਕਾ ਦੇ ਰਹਿਣ ਵਾਲੇ ਹਨ ਅਤੇ ਵਿਦੇਸ਼ ਵਿੱਚ ਰਹਿੰਦਿਆਂ ਸਿੱਖੀ ਸਰੂਪ ਨੂੰ ਸੰਭਾਲਦਿਆਂ ਇੰਨੀ ਵੱਡੀ ਪ੍ਰਾਪਤੀ ਦਾ ਸਿਹਰਾ ਉਹ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਅਗਵਾਈ ਅਤੇ ਮਾਤਾ ਪਿਤਾ ਦੀ ਪ੍ਰੇਰਨਾ ਨੂੰ ਦਿੰਦੇ ਹਨ।
ਪੁਰਸਕਾਰ ਪ੍ਰਾਪਤ ਕਰਨ ਵੇਲੇ ਭਾਵੁਕ ਹੁੰਦਿਆਂ ਗਗਨਦੀਪ ਨੇ ਕਿਹਾ ਕਿ, ''ਦੁਨੀਆ 'ਚ ਸਿਰਫ਼ ਤੁਸੀਂ ਲੋਕ ਹੋ ਜੋ ਆਪਣੀ ਮਾਂ ਬੋਲੀ ਬੋਲਣ ਵਾਲਿਆਂ ਨੂੰ ਗਲ ਨਾਲ ਲਾ ਕੇ ਪਿਆਰ ਤੇ ਸਤਿਕਾਰ ਦਿੰਦੇ ਹੋ, ਮੈਂ ਕੋਈ ਲੇਖਕ ਨਹੀਂ ਹਾਂ ਪਰ ਤੁਹਾਡੇ ਪਿਆਰ ਨੇ ਹੀ ਮੇਰੇ ਤੋਂ ਇਹ ਕਿਤਾਬ ਲਿਖਵਾਈ ਹੈ, ਇਹ ਪੁਰਸਕਾਰ ਮੈਂ ਤੁਹਾਡੀ ਝੋਲੀ ਪਾਉਂਦਾ ਹਾਂ।''
ਗਗਨਦੀਪ ਸਿੰਘ ਨੂੰ ਇਹ ਪੁਰਸਕਾਰ ਕਤਲਾਨ ਦੇ ਰਾਸ਼ਟਰਪਤੀ ਕਾਰਲਾਸ ਪੁਜਦਾਮੋਨ ਨੇ ਦਿੱਤਾ। ਦੂਜੇ ਦੋ ਪੁਰਸਕਾਰ ਰੀਡ ਹੇਸਟਿੰਗਜ ਅਤੇ ਬੈਰੀ ਜੈਕਿੰਨਸ ਨੂੰ ਦਿੱਤੇ ਗਏ।
ਕਤਲੂਨੀਆ ਦੀ ਸਰਕਾਰ ਵੱਲੋਂ ਕਤਲਾਨ ਦਾ ਰਾਸ਼ਟਰੀ ਅਵਾਰਡ ਹਾਸਲ ਕਰ ਕੇ 30 ਸਾਲਾ ਅੰਮ੍ਰਿਤਧਾਰੀ ਸਿੱਖ ਨੌਜਵਾਨ ਗਗਨਦੀਪ ਸਿੰਘ ਨੇ ਸਿੱਖ ਕੌਮ ਦਾ ਮਾਣ ਪੂਰੀ ਦੁਨੀਆ ਵਿੱਚ ਵਧਾ ਦਿੱਤਾ ਹੈ। ਕਤਲੂਨੀਆ ਸਰਕਾਰ ਦੇ ਭਾਸ਼ਾ ਸੰਸਥਾਵਾਂ ਮੰਚ ਵੱਲੋਂ ਹਰ ਸਾਲ ਕਤਲਾਨ ਭਾਸ਼ਾ ਨੂੰ ਪ੍ਰਫੁਲਿਤ ਕਰਨ ਵਾਲੇ ਕਤਲਾਨ ਨਾਗਰਿਕਾਂ ਨੂੰ 3 ਵੱਕਾਰੀ ਪੁਰਸਕਾਰ ਹਰ ਸਾਲ ਦਿੱਤੇ ਜਾਂਦੇ ਹਨ।
ਇਨ੍ਹਾਂ 3 ਉਮੀਦਵਾਰਾਂ ਦੀ ਫਿਰ ਇੰਟਰਨੈੱਟ ਦੇ ਜ਼ਰੀਏ ਵੋਟਿੰਗ ਕਰਵਾਈ ਗਈ, ਅਤੇ ਕਤਲਾਨ ਵਾਸੀਆਂ ਨੇ ਸਭ ਤੋਂ ਵੱਧ ਵੋਟਿੰਗ ਕਰ ਕੇ ਗਗਨਦੀਪ ਸਿੰਘ ਨੂੰ 'ਕਤਲਾਨ ਰਾਸ਼ਟਰੀ ਪੁਰਸਕਾਰ' ਹਾਸਲ ਕਰਨ ਦਾ ਮਾਣ ਬਖ਼ਸ਼ਿਆ।
ਇਸ ਵਾਰ ਇਨ੍ਹਾਂ 3 ਪੁਰਸਕਾਰਾਂ ਵਿੱਚੋਂ ਸਭ ਤੋਂ ਅਹਿਮ 'ਕਤਲਾਨ ਰਾਸ਼ਟਰੀ ਪੁਰਸਕਾਰ' ਨੌਜਵਾਨ ਗਗਨਦੀਪ ਸਿੰਘ ਨੇ ਆਪਣੇ ਨਾਂ ਕਰ ਕੇ ਵੱਡੀ ਪ੍ਰਾਪਤੀ ਹਾਸਲ ਕੀਤੀ ਹੈ। ਗਗਨਦੀਪ ਸਿੰਘ ਖ਼ਾਲਸਾ ਪਿਛਲੇ ਕਈ ਸਾਲਾਂ ਤੋਂ ਕਤਲਾਨ ਰਹਿ ਰਹੇ ਹਨ ਅਤੇ ਉੱਥੇ ਰਹਿੰਦਿਆਂ ਉਨ੍ਹਾਂ ਕਤਲਾਨ ਦੀ ਮਾਂ ਬੋਲੀ ਕਤਲਾਨ 'ਚ ਮੁਹਾਰਤ ਹਾਸਲ ਕਰ ਕੇ ਕਤਲਾਨ ਭਾਸ਼ਾ ਵਿੱਚ ਕਈ ਅਹਿਮ ਕਾਰਜ ਕੀਤੇ ਹਨ।
ਕਤਲਾਨ ਭਾਸ਼ਾ ਪ੍ਰਤੀ ਇਸ ਸਨੇਹ ਤੇ ਉੱਦਮ ਸਦਕਾ ਪੁਰਸਕਾਰ ਲਈ ਆਵੇਦਨ ਕਰਨ ਵਾਲੇ 1000 ਲੋਕਾਂ ਵਿੱਚੋਂ ਗਗਨਦੀਪ ਸਿੰਘ ਨੂੰ ਚੁਣਿਆ ਗਿਆ। ਅਰਜ਼ੀਆਂ ਭੇਜਣ ਵਾਲੇ 1000 ਲੋਕਾਂ ਵਿੱਚੋਂ ਪਹਿਲਾਂ 370 ਉਮੀਦਵਾਰਾਂ ਨੂੰ ਚੁਣਿਆ ਗਿਆ ਜਿਨ੍ਹਾਂ ਵਿੱਚੋਂ ਪੁਰਸਕਾਰ ਦੇਣ ਲਈ ਜੱਜਾਂ ਵੱਲੋਂ 3 ਯੋਗ ਉਮੀਦਵਾਰ ਚੁਣੇ ਗਏ।
ਸਪੇਨਿਸ਼ ਵਾਸੀਆਂ ਨੂੰ ਸਿੱਖ ਧਰਮ ਤੋਂ ਜਾਣੂ ਕਰਵਾਉਣ ਲਈ ਗਗਨਦੀਪ ਸਿੰਘ ਕਤਲਾਨ ਭਾਸ਼ਾ ਵਿੱਚ ਉੱਥੋਂ ਦੇ ਸਕੂਲਾਂ, ਕਾਲਜਾਂ ਤੇ ਯੂਨੀਵਰਸਿਟੀਆਂ ਤੇ ਪੁਲਿਸ ਸਟੇਸ਼ਨਾਂ ਵਿੱਚ ਜਾ ਕੇ ਪ੍ਰੈਜੈਂਟਸ਼ਨਾਂ ਰਾਹੀਂ ਚਾਨਣਾ ਪਾਉਂਦੇ ਹਨ। ਇਸ ਦਰਮਿਆਨ ਗਗਨਦੀਪ ਸਿੰਘ ਨੇ ਕਤਲਾਨ ਭਾਸ਼ਾ ਸਿੱਖਣ ਵਾਸਤੇ ਖ਼ਾਸ ਤੌਰ 'ਤੇ ਪੰਜਾਬੀ ਭਾਈਚਾਰੇ ਲਈ ਇੱਕ ਕਿਤਾਬ 'ਪੰਜ ਦਰਿਆਵਾਂ ਵਾਲੇ ਕਤਲੂਨੀਆ ਵਿੱਚ' ਲਿਖੀ ਹੈ।