ਮੈਡਮ ਤੁਸਾਦ 'ਚ ਮਿਊਜ਼ਿਮ 'ਚ ਓਬਾਮਾ ਦੀ ਥਾਂ ਟਰੰਪ
ਅਮਰੀਕਾ ਦੇ ਨਵੇਂ ਚੁਣੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਤੁਸਾਦ ਵਿੱਚ ਵੀ ਓਬਾਮਾ ਦੀ ਥਾਂ ਲੈ ਲਈ ਹੈ। ਲੰਦਨ ਦੇ ਮੈਡਮ ਤੁਸਾਦ ਮਿਊਜ਼ੀਅਮ 'ਚ ਟਰੰਪ ਦੇ ਮੋਮ ਦੇ ਪੁਤਲੇ ਦਾ ਉਦਘਾਟਨ ਕੀਤਾ ਗਿਆ।
ਟਰੰਪ ਦੇ ਪੁਤਲੇ ਨੂੰ ਲੋਕ ਰਾਸ਼ਟਰਪਤੀ ਬਣਨ ਤੋਂ ਲੈ ਕੇ ਉਨ੍ਹਾਂ ਦੇ ਕਾਰਜਕਾਲ ਤੱਕ ਦੇਖ ਸਕਣਗੇ।
ਟਰੰਪ ਦੇ ਪੁਤਲੇ ਨੂੰ ਗਹਿਰੇ ਨੀਲੇ ਰੰਗ ਦਾ ਸੂਟ, ਸਫ਼ੇਦ ਕਮੀਜ਼ ਅਤੇ ਲਾਲ ਟਾਈ ਪਹਿਨਾਈ ਗਈ ਹੈ। ਵਾਈਟ ਹਾਊਸ ਦੇ ਓਵਲ ਦਫ਼ਤਰ ਦੀ ਤਰ੍ਹਾਂ ਬਣਾਏ ਗਏ ਇੱਕ ਸੈੱਟਅਪ 'ਚ ਲਾਏ ਗਏ ਟਰੰਪ ਦੇ ਪੁਤਲੇ ਦੇ ਸੂਟ 'ਚ ਇੱਕ ਅਮਰੀਕੀ ਝੰਡੇ ਦਾ ਲੈਪਲ ਵੀ ਲਗਾਇਆ ਗਿਆ ਹੈ।
ਮਿਊਜ਼ੀਅਮ ਦੇ ਪ੍ਰਬੰਧਕ ਐਡਵਰਡ ਫੁੱਲਰ ਨੇ ਕਿਹਾ ਕਿ ਟਰੰਪ ਨੂੰ ਅਮਰੀਕੀ ਚੋਣਾਂ 'ਚ ਜੇਤੂ ਐਲਾਨੇ ਜਾਣ ਤੋਂ ਬਾਅਦ ਹੀ ਸਾਡੀ ਟੀਮ ਨੇ ਖ਼ਾਸ ਤਰ੍ਹਾਂ ਦੀ ਚਮੜੀ ਅਤੇ ਉਨ੍ਹਾਂ ਦੀ ਪਛਾਣ ਬਣ ਚੁੱਕੇ ਉਨ੍ਹਾਂ ਦੇ ਵਾਲਾਂ ਨੂੰ ਬਣਾਉਣ ਦਾ ਕੰਮ ਕਰਨਾ ਸ਼ੁਰੂ ਕਰ ਦਿੱਤਾ ਸੀ।
ਮੈਡਮ ਤੁਸਾਦ ਮਿਊਜ਼ੀਅਮ 'ਚ ਓਵਲ ਦਫ਼ਤਰ ਦੇ ਸੈੱਟਅਪ 'ਚ ਟਰੰਪ ਦਾ ਪੁਤਲਾ ਲਗਾਏ ਜਾਣ ਦੇ ਨਾਲ ਹੀ ਮੌਜੂਦਾ ਰਾਸ਼ਟਰਪਤੀ ਓਬਾਮਾ ਦੇ ਪੁਤਲੇ ਨੂੰ ਉੱਥੋਂ ਹਟਾ ਦਿੱਤਾ ਗਿਆ ਹੈ।
ਇਸ ਮੋਮ ਦੇ ਪੁਤਲੇ 'ਚ ਧੁੱਪ ਨਾਲ ਟੈਨ ਹੋਈ ਟਰੰਪ ਦੀ ਚਮੜੀ ਅਤੇ ਖਾਸ ਤਰੀਕੇ ਨਾਲ ਸਵਾਰੇ ਗਏ ਵਾਲਾਂ ਨੂੰ ਦਰਸਾਇਆ ਗਿਆ ਹੈ।