ਮੈਡਲ ਤੋਂ ਇੱਕ ਜਿੱਤ ਦੂਰ ਵਿਕਾਸ ਕ੍ਰਿਸ਼ਨ

ਵਿਕਾਸ ਨੇ ਲਗਾਤਾਰ 2 ਮੈਚ ਜਿੱਤੇ

ਭਾਰਤ ਦੀ ਮੁੱਕੇਬਾਜ਼ੀ 'ਚ ਤਗਮੇ ਦੀ ਭਾਲ ਖਤਮ ਕਰਨ ਦੇ ਮਿਸ਼ਨ 'ਤੇ ਹੈ ਵਿਕਾਸ ਕ੍ਰਿਸ਼ਨ। 75kg ਭਾਰਵਰਗ 'ਚ ਵਿਕਾਸ ਨੇ ਓਲੰਪਿਕਸ ਦੇ ਕੁਆਟਰਫਾਈਨਲ 'ਚ ਐਂਟਰੀ ਕਰ ਲਈ ਹੈ। ਵਿਕਾਸ ਕ੍ਰਿਸ਼ਨ ਨੇ ਸ਼ੁੱਕਰਵਾਰ ਨੂੰ ਖੇਡੇ ਪ੍ਰੀਕੁਆਟਰਫਾਈਨਲ ਬਾਊਟ 'ਚ ਜਿੱਤ ਦਰਜ ਕੀਤੀ। ਇਸਦੇ ਨਾਲ ਹੀ ਹੁਣ ਵਿਕਾਸ ਮੈਡਲ ਤੋਂ ਸਿਰਫ 1 ਜਿੱਤ ਦੂਰ ਹਨ।

ਰੀਓ ਓਲੰਪਿਕਸ 'ਚ ਭਾਰਤੀ ਮੁੱਕੇਬਾਜ਼ ਵਿਕਾਸ ਕ੍ਰਿਸ਼ਨ ਨੂੰ ਦਮਦਾਰ ਸ਼ੁਰੂਆਤ ਮਿਲੀ। ਵਿਕਾਸ ਕ੍ਰਿਸ਼ਨ ਨੇ 75kg ਭਾਰਵਰਗ 'ਚ ਜੇਤੂ ਆਗਾਜ਼ ਕੀਤਾ ਅਤੇ ਅਮਰੀਕਾ ਦੇ ਚਾਰਲਸ ਕਾਨਵੈਲ ਨੂੰ ਇੱਕ ਤਰਫਾ ਅੰਦਾਜ਼ 'ਚ 3-0 ਨਾਲ ਮਾਤ ਦਿੱਤੀ।

ਵਿਕਾਸ ਕ੍ਰਿਸ਼ਨ ਨੇ ਜਿੱਤ ਦਰਜ ਕਰ ਪ੍ਰੀਕੁਆਟਰਫਾਈਨਲ 'ਚ ਕੀਤੀ ਐਂਟਰੀ। ਫਿਰ ਸ਼ੁੱਕਰਵਾਰ ਨੂੰ ਖੇਡੇ ਰਾਊਂਡ ਆਫ 16 ਦੇ ਮੈਚ 'ਚ ਵਿਕਾਸ ਕ੍ਰਿਸ਼ਨ ਨੇ ਧਮਾਕੇਦਾਰ ਖੇਡ ਵਿਖਾਉਂਦਿਆਂ ਕੁਆਟਰਫਾਈਨਲ 'ਚ ਐਂਟਰੀ ਕੀਤੀ। ਟਰਕੀ ਦੇ ਮੁੱਕੇਬਾਜ਼ ਔਂਡਰ ਸਿਪਲ ਖਿਲਾਫ 3-0 ਨਾਲ ਬਾਜ਼ੀ ਮਾਰੀ।

ਹੁਣ ਵਿਕਾਸ ਕ੍ਰਿਸ਼ਨ ਦੀ ਕੁਆਟਰਫਾਈਨਲ 'ਚ ਉਜ਼ਬੇਕਿਸਤਾਨ ਦੇ ਬਾਕਸਰ ਨਾਲ ਟੱਕਰ ਹੋਵੇਗੀ ਅਤੇ ਜੇਕਰ ਵਿਕਾਸ ਕ੍ਰਿਸ਼ਨ ਆਪਣੇ ਅਗਲਾ ਮੈਚ ਜਿੱਤ ਲੈਂਦਾ ਹੈ ਤਾਂ ਭਾਰਤ ਦਾ ਘੱਟੋ-ਘੱਟ ਕਾਂਸੀ ਦਾ ਤਗਮਾ ਪੱਕਾ ਹੋ ਜਾਵੇਗਾ। ਹੁਣ ਭਾਰਤ ਇਹੀ ਉਮੀਦ ਕਰ ਰਿਹਾ ਹੈ ਕਿ ਓਲੰਪਿਕਸ 'ਚ ਚਲ ਰਹੇ ਮੈਡਲ ਦੇ ਸੋਕੇ ਨੂੰ ਵਿਕਾਸ ਕ੍ਰਿਸ਼ਨ ਖਤਮ ਕਰੇ।

ਮੁੱਕੇਬਾਜ਼ੀ 'ਚ ਭਾਰਤ ਨੂੰ ਲਗਾਤਾਰ ਪਿਛਲੇ 2 ਓਲੰਪਿਕਸ ਤੋਂ ਕਾਮਯਾਬੀ ਮਿਲ ਰਹੀ ਹੈ। ਪਹਿਲਾਂ ਬੀਜਿੰਗ ਓਲੰਪਿਕਸ 'ਚ ਵਿਜੇਂਦਰ ਸਿੰਘ ਨੇ ਕਾਂਸੀ ਦਾ ਤਗਮਾ ਜਿੱਤ ਕੇ ਇਤਿਹਾਸ ਰਚਿਆ ਸੀ। ਇਸਤੋਂ ਬਾਅਦ ਲੰਡਨ ਓਲੰਪਿਕਸ 'ਚ ਭਾਰਤ ਲਈ ਐਮ.ਸੀ. ਮੈਰੀ ਕਾਮ ਨੇ ਕਾਂਸੀ ਦਾ ਤਗਮਾ ਜਿੱਤਿਆ। ਹੁਣ ਲਗਾਤਾਰ ਤੀਜੇ ਓਲੰਪਿਕਸ 'ਚ ਭਾਰਤ ਨੂੰ ਤਗਮੇ ਦੀ ਭਾਲ ਹੈ।