Prithvi Shaw: ਟੀਮ ਇੰਡੀਆ ਦੇ ਹੋਣਹਾਰ ਬੱਲੇਬਾਜ਼ ਅਤੇ ਮੁੰਬਈ ਦੇ ਖਿਡਾਰੀ ਪ੍ਰਿਥਵੀ ਸ਼ਾਅ ਇਨ੍ਹੀਂ ਦਿਨੀਂ ਲਗਾਤਾਰ ਸੁਰਖੀਆਂ ਬਟੋਰ ਰਹੇ ਹਨ। ਦੱਸ ਦੇਈਏ ਕਿ ਉਨ੍ਹਾਂ ਨੇ ਲੰਬੇ ਸਮੇਂ ਤੋਂ ਅੰਤਰਰਾਸ਼ਟਰੀ ਕ੍ਰਿਕਟ ਨਹੀਂ ਖੇਡਿਆ ਹੈ। ਇਸ ਖਿਡਾਰੀ ਨੂੰ ਚੋਣਕਾਰਾਂ ਨੇ ਭਾਰਤੀ ਟੀਮ ਤੋਂ ਬਾਹਰ ਕਰ ਦਿੱਤਾ ਸੀ। ਹਾਲਾਂਕਿ ਟੀਮ ਤੋਂ ਬਾਹਰ ਹੋਣ ਤੋਂ ਬਾਅਦ ਵੀ ਸ਼ਾਅ ਦੀ ਕ੍ਰਿਕਟ ਖੇਡਣ ਦੀ ਭੁੱਖ ਅਜੇ ਵੀ ਬਰਕਰਾਰ ਹੈ ਅਤੇ ਉਹ ਫਿਰ ਤੋਂ ਆਪਣੇ ਦੇਸ਼ ਲਈ ਖੇਡਣ ਲਈ ਬੇਤਾਬ ਹਨ।
ਇਹੀ ਕਾਰਨ ਹੈ ਕਿ ਇਹ 24 ਸਾਲਾ ਕ੍ਰਿਕਟਰ ਫਿਲਹਾਲ ਇੰਗਲੈਂਡ 'ਚ ਰਾਇਲ ਵਨ ਡੇ ਕੱਪ ਖੇਡ ਰਿਹਾ ਹੈ। ਸ਼ਾਅ ਨੌਰਥੈਂਪਟਨਸ਼ਾਇਰ ਟੀਮ ਦੀ ਨੁਮਾਇੰਦਗੀ ਕਰ ਰਹੇ ਹਨ। ਤੁਹਾਨੂੰ ਯਾਦ ਹੋਵੇਗਾ ਕਿ ਪਿਛਲੇ ਸਾਲ ਇਸ ਟੀਮ ਲਈ ਖੇਡਦੇ ਹੋਏ ਸੱਜੇ ਹੱਥ ਦੇ ਇਸ ਬੱਲੇਬਾਜ਼ ਨੇ 244 ਦੌੜਾਂ ਬਣਾਈਆਂ ਸਨ। ਉਸ ਦਿਨ ਰੋਹਿਤ ਸ਼ਰਮਾ ਦਾ 264 ਦੌੜਾਂ ਦਾ ਰਿਕਾਰਡ ਖ਼ਤਰੇ ਵਿੱਚ ਸੀ। ਇਸ ਪਾਰੀ ਦੀ ਇੱਕ ਵਾਰ ਫਿਰ ਤੋਂ ਚਰਚਾ ਛਿੜ ਗਈ ਹੈ।
ਜਦੋਂ ਪ੍ਰਿਥਵੀ ਸ਼ਾਅ ਇੰਗਲੈਂਡ ਵਿੱਚ ਖੇਡੇ ਸੀ
ਇਹ ਕਿੱਸਾ 9 ਅਗਸਤ 2023 ਦਾ ਹੈ। ਰਾਇਲ ਵਨ ਡੇ ਕੱਪ ਇੰਗਲੈਂਡ 'ਚ ਖੇਡਿਆ ਜਾ ਰਿਹਾ ਸੀ। ਇਸ ਤਹਿਤ ਨੌਰਥੈਂਪਟਨਸ਼ਾਇਰ ਅਤੇ ਸਮਰਸੈਟ ਵਿਚਾਲੇ ਮੈਚ ਖੇਡਿਆ ਜਾ ਰਿਹਾ ਸੀ। ਜੇਕਰ ਇਸ ਮੈਚ ਦੀ ਗੱਲ ਕਰੀਏ ਤਾਂ ਨੌਰਥੈਂਪਟਨਸ਼ਾਇਰ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਪਹਿਲਾਂ ਖੇਡਦਿਆਂ ਇਸ ਟੀਮ ਦੀ ਸ਼ੁਰੂਆਤ ਬੇਹੱਦ ਖ਼ਤਰਨਾਕ ਰਹੀ। ਸੱਜੇ ਹੱਥ ਦੇ ਸਲਾਮੀ ਬੱਲੇਬਾਜ਼ ਪ੍ਰਿਥਵੀ ਸ਼ਾਅ ਨੇ ਬੱਲੇ ਨਾਲ ਤਬਾਹੀ ਮਚਾਈ।
ਇਸ ਭਾਰਤੀ ਕ੍ਰਿਕਟਰ ਨੇ 153 ਗੇਂਦਾਂ ਦਾ ਸਾਹਮਣਾ ਕਰਦਿਆਂ 244 ਦੌੜਾਂ ਬਣਾਈਆਂ। ਉਸ ਦੀ ਪਾਰੀ ਵਿੱਚ 28 ਚੌਕੇ ਅਤੇ 11 ਛੱਕੇ ਸ਼ਾਮਲ ਸਨ। ਸ਼ਾਅ ਦਾ ਸਟ੍ਰਾਈਕ ਰੇਟ 159.47 ਰਿਹਾ। ਇਸ ਪਾਰੀ ਦੇ ਦਮ 'ਤੇ ਨੌਰਥੈਂਪਟਨਸ਼ਾਇਰ ਨੇ 50 ਓਵਰਾਂ 'ਚ 415 ਦੌੜਾਂ ਦਾ ਵੱਡਾ ਸਕੋਰ ਖੜ੍ਹਾ ਕੀਤਾ। ਜਵਾਬ 'ਚ ਸਮਰਸੈਟ 328 ਦੌੜਾਂ ਬਣਾ ਕੇ ਆਲ ਆਊਟ ਹੋ ਗਈ। ਨੌਰਥੈਂਪਟਨਸ਼ਾਇਰ ਨੇ ਇਹ ਮੈਚ 87 ਦੌੜਾਂ ਦੇ ਵੱਡੇ ਫਰਕ ਨਾਲ ਜਿੱਤ ਲਿਆ।
ਟੀਮ ਇੰਡੀਆ 'ਚ ਵਾਪਸੀ ਲਈ ਤਿਆਰ
ਪ੍ਰਿਥਵੀ ਸ਼ਾਅ ਨੇ ਆਪਣਾ ਆਖਰੀ ਅੰਤਰਰਾਸ਼ਟਰੀ ਮੈਚ ਸਾਲ 2021 ਵਿੱਚ ਖੇਡਿਆ ਸੀ। ਦੱਸ ਦੇਈਏ ਕਿ 2018 ਵਿੱਚ ਆਪਣੇ ਡੈਬਿਊ ਦੇ ਨਾਲ ਹੀ ਉਹ ਤਿੰਨੋਂ ਫਾਰਮੈਟਾਂ ਵਿੱਚ ਟੀਮ ਇੰਡੀਆ ਦੇ ਸਥਾਈ ਮੈਂਬਰ ਬਣ ਗਏ ਸਨ। ਹਾਲਾਂਕਿ ਉਸ ਨੂੰ ਸਿਰਫ਼ ਤਿੰਨ ਸਾਲ ਬਾਅਦ ਹੀ ਟੀਮ ਤੋਂ ਬਾਹਰ ਕਰ ਦਿੱਤਾ ਗਿਆ ਸੀ। ਫਿਲਹਾਲ ਇਹ ਖਿਡਾਰੀ ਭਾਰਤੀ ਟੀਮ 'ਚ ਵਾਪਸੀ ਲਈ ਬੇਤਾਬ ਹੈ।
ਸ਼ਾਅ ਫਿਲਹਾਲ ਇੰਗਲੈਂਡ 'ਚ ਚੱਲ ਰਹੇ ਰਾਇਲ ਵਨ ਡੇ ਕੱਪ 'ਚ ਨੌਰਥੈਂਪਟਨਸ਼ਾਇਰ ਦਾ ਹਿੱਸਾ ਹੈ। ਹੁਣ ਤੱਕ ਖੇਡੇ ਗਏ ਕੁੱਲ ਤਿੰਨ ਮੈਚਾਂ ਵਿੱਚ ਉਸ ਨੇ ਲਗਾਤਾਰ ਤਿੰਨ ਅਰਧ ਸੈਂਕੜੇ ਲਗਾਏ ਹਨ। ਉਸ ਦੇ ਪ੍ਰਦਰਸ਼ਨ ਨੂੰ ਦੇਖ ਕੇ ਪ੍ਰਸ਼ੰਸਕ ਅੰਦਾਜ਼ਾ ਲਗਾ ਰਹੇ ਹਨ ਕਿ ਜਲਦੀ ਹੀ ਪ੍ਰਿਥਵੀ ਸ਼ਾਅ ਭਾਰਤ ਲਈ ਅੰਤਰਰਾਸ਼ਟਰੀ ਕ੍ਰਿਕਟ ਖੇਡਦੇ ਨਜ਼ਰ ਆ ਸਕਦੇ ਹਨ।