Virat Kohli: ਵਿਰਾਟ ਕੋਹਲੀ ਨੂੰ ਪਿਛਲੇ ਦਹਾਕੇ 'ਚ ਕ੍ਰਿਕਟ ਜਗਤ ਦਾ ਸਭ ਤੋਂ ਮਹਾਨ ਖਿਡਾਰੀ ਕਹਿਣਾ ਗਲਤ ਨਹੀਂ ਹੋਵੇਗਾ। ਉਹ ਜਲਦ ਹੀ ਆਈਪੀਐਲ 2024 ਵਿੱਚ ਰਾਇਲ ਚੈਲੰਜਰਜ਼ ਬੈਂਗਲੁਰੂ ਲਈ ਖੇਡਦੇ ਹੋਏ ਨਜ਼ਰ ਆਉਣਗੇ, ਪਰ ਇਸ ਸਮੇਂ ਟੀ-20 ਵਿਸ਼ਵ ਕੱਪ ਟੀਮ ਵਿੱਚ ਉਸ ਦੇ ਸ਼ਾਮਲ ਹੋਣ ਦੀ ਉਮੀਦ ਘੱਟ ਨਜ਼ਰ ਆ ਰਹੀ ਹੈ। ਟੀ-20 ਵਿਸ਼ਵ ਕੱਪ 2024, ਜੋ ਕਿ ਆਈਪੀਐਲ ਖ਼ਤਮ ਹੋਣ ਤੋਂ ਇੱਕ ਹਫ਼ਤੇ ਬਾਅਦ ਹੀ ਸ਼ੁਰੂ ਹੋਵੇਗਾ। ਕੋਹਲੀ ਭਾਵੇਂ ਪਾਵਰ ਹਿਟਰ ਨਾ ਹੋਵੇ ਜਾਂ ਫਿਰ ਸੂਰਿਆਕੁਮਾਰ ਯਾਦਵ ਵਾਂਗ ਅਜੀਬ ਦਿਸ਼ਾਵਾਂ 'ਚ ਸ਼ਾਟ ਨਾ ਖੇਡ ਸਕਦੇ ਹੋਣ, ਪਰ ਉਨ੍ਹਾਂ ਦੀ ਪਾਰੀ ਰਚਣ ਦੀ ਯੋਗਤਾ ਅਤੇ ਉਨ੍ਹਾਂ ਦੀ ਬੱਲੇਬਾਜ਼ੀ ਦੀ ਸ਼੍ਰੇਣੀ ਉਨ੍ਹਾਂ ਨੂੰ ਹਰ ਕਿਸੇ ਤੋਂ ਵੱਖਰਾ ਬਣਾਉਂਦੀ ਹੈ।
ਵਿਰਾਟ ਕੋਹਲੀ ਕਿਉਂ ਹੈ ਜ਼ਰੂਰੀ?
ਵਿਰਾਟ ਕੋਹਲੀ ਨੇ ਹੁਣ ਤੱਕ 117 ਟੀ-20 ਮੈਚਾਂ ਦੀਆਂ 109 ਪਾਰੀਆਂ 'ਚ 4,037 ਦੌੜਾਂ ਬਣਾਈਆਂ ਹਨ। ਟੀ-20 ਕ੍ਰਿਕਟ ਵਿੱਚ 50 ਦੀ ਔਸਤ ਨਾਲ ਦੌੜਾਂ ਬਣਾਉਣਾ ਕੋਈ ਆਮ ਗੱਲ ਨਹੀਂ ਹੈ ਅਤੇ ਕੋਹਲੀ ਦੀ ਔਸਤ 51.76 ਦੀ ਉਨ੍ਹਾਂ ਨੂੰ ਅਸਾਧਾਰਨ ਬਣਾਉਂਦੀ ਹੈ। ਉਨ੍ਹਾਂ ਨੂੰ ਚੇਜ਼ ਮਾਸਟਰ ਐਵੇਂ ਹੀ ਨਹੀਂ ਕਿਹਾ ਜਾਂਦਾ, ਅੰਕੜੇ ਦੱਸਦੇ ਹਨ ਕਿ ਟੀ-20 ਮੈਚਾਂ ਵਿੱਚ ਚੇਜ਼ ਕਰਦੇ ਸਮੇਂ ਉਨ੍ਹਾਂ ਦੀ ਔਸਤ 71.85 ਹੈ ਅਤੇ ਜਦੋਂ-ਜਦੋਂ ਕੋਹਲੀ ਖੇਡਦੇ ਹਨ ਭਾਰਤੀ ਟੀਮ ਟੀਚੇ ਦਾ ਪਿੱਛਾ ਕਰਨ ਲਈ ਉਤਰੀ ਹੈ, ਤਾਂ 46 ਵਿੱਚੋਂ 40 ਵਾਰ ਭਾਰਤੀ ਟੀਮ ਨੇ ਜਿੱਤ ਹਾਸਲ ਕੀਤੀ ਹੈ।
ਅਜਿਹੀਆਂ ਖਬਰਾਂ ਵੀ ਸਾਹਮਣੇ ਆਈਆਂ ਹਨ ਕਿ ਆਈਪੀਐਲ ਦੇ ਪ੍ਰਦਰਸ਼ਨ ਦੇ ਆਧਾਰ 'ਤੇ ਕੋਹਲੀ ਦਾ ਟੀ-20 ਵਿਸ਼ਵ ਕੱਪ ਟੀਮ 'ਚ ਸਿਲੈਕਸ਼ਨ ਕੀਤਾ ਜਾਵੇਗਾ। ਕੋਹਲੀ ਅਜਿਹਾ ਖਿਡਾਰੀ ਹੈ ਜੋ ਵਿਚਕਾਰਲੇ ਓਵਰਾਂ 'ਚ ਚੌਕੇ ਨਾ ਲੱਗਣ 'ਤੇ ਵੀ ਸਿੰਗਲ ਅਤੇ ਡਬਲਜ਼ ਨਾਲ ਸਕੋਰ ਬੋਰਡ ਨੂੰ ਚਲਾਉਂਦੇ ਰਹਿੰਦੇ ਹਨ। ਇਹੀ ਗੱਲ ਉਨ੍ਹਾਂ ਨੂੰ ਵਿਰੋਧੀ ਕਪਤਾਨਾਂ ਲਈ ਵੱਡਾ ਖ਼ਤਰਾ ਬਣਾਉਂਦੀ ਹੈ। ਇਸ ਦੇ ਨਾਲ ਹੀ ਉਹ ਮੁਸ਼ਕਲ ਹਾਲਾਤਾਂ 'ਚ ਕਿਸੇ ਵੀ ਮਜ਼ਬੂਤ ਬੱਲੇਬਾਜ਼ ਦੀ ਤਰ੍ਹਾਂ ਤੂਫਾਨੀ ਪਾਰੀ ਖੇਡਣਾ ਚੰਗੀ ਤਰ੍ਹਾਂ ਜਾਣਦੇ ਹਨ। ਪਿਛਲੇ ਕੁਝ ਮੈਚਾਂ 'ਚ ਵੀ ਉਨ੍ਹਾਂ ਨੂੰ ਜ਼ਿਆਦਾ ਸਟ੍ਰਾਈਕ ਰੇਟ 'ਤੇ ਦੌੜਾਂ ਬਣਾਉਣ ਦੀ ਕੋਸ਼ਿਸ਼ ਕੀਤੀ ਹੈ ਕਿਉਂਕਿ ਪਿਛਲੇ 14 ਟੀ-20 ਮੈਚਾਂ 'ਚ ਉਸ ਦਾ ਕੁੱਲ ਸਟ੍ਰਾਈਕ ਰੇਟ 146.31 ਰਿਹਾ ਹੈ।
ਇਹ ਤੱਥ ਵੀ ਕਿਸੇ ਤੋਂ ਲੁਕਿਆ ਨਹੀਂ ਹੈ ਕਿ ਜ਼ਿਆਦਾ ਗੇਂਦਾਂ ਖੇਡਣ ਨਾਲ ਕੋਹਲੀ ਦਾ ਸਟ੍ਰਾਈਕ ਰੇਟ ਵੀ ਵਧਦਾ ਰਹਿੰਦਾ ਹੈ। ਉਹ ਨਾ ਸਿਰਫ ਤੇਜ਼, ਸਗੋਂ ਸਪਿਨ ਗੇਂਦਬਾਜ਼ਾਂ ਦੇ ਖਿਲਾਫ ਵੀ ਚੰਗੀ ਤਰ੍ਹਾਂ ਦੌੜਾਂ ਬਣਾਉਣੀਆਂ ਆਉਂਦੀਆਂ ਹਨ। IPL ਦੀ ਗੱਲ ਕਰੀਏ ਤਾਂ ਸਭ ਤੋਂ ਵੱਧ ਸੈਂਕੜੇ ਲਗਾਉਣ ਦਾ ਰਿਕਾਰਡ ਵਿਰਾਟ ਕੋਹਲੀ ਦੇ ਨਾਂ ਹੈ। ਟੀ-20 ਫਾਰਮੈਟ ਵਿੱਚ ਲਗਾਤਾਰ ਵੱਡੀਆਂ ਪਾਰੀਆਂ ਖੇਡਣਾ ਵਿਰਾਟ ਕੋਹਲੀ ਨੂੰ ਕ੍ਰਿਕਟ ਦੇ ਇਸ ਫਾਰਮੈਟ ਲਈ ਇੱਕ ਆਦਰਸ਼ ਬੱਲੇਬਾਜ਼ ਬਣਾਉਂਦਾ ਹੈ। ਇਹ ਸਾਰੇ ਪਹਿਲੂ ਦੱਸਦੇ ਹਨ ਕਿ ਕੋਹਲੀ ਹੁਣ ਭਾਰਤੀ ਟੀਮ ਦੀ ਜ਼ਰੂਰਤ ਬਣ ਗਿਆ ਹੈ।