T20 World Cup 2024 Squad: ਇੰਗਲੈਂਡ ਕ੍ਰਿਕਟ ਬੋਰਡ ਨੇ ਟੀ-20 ਵਿਸ਼ਵ ਕੱਪ 2024 ਲਈ ਮੁੱਢਲੀ ਟੀਮ ਦਾ ਐਲਾਨ ਕਰ ਦਿੱਤਾ ਹੈ। ਇਸ ਦੇ ਨਾਲ ਹੀ ਬੋਰਡ ਨੇ ਪਾਕਿਸਤਾਨ ਦੇ ਖਿਲਾਫ ਟੀ-20 ਸੀਰੀਜ਼ ਲਈ ਵੀ ਇਨ੍ਹਾਂ ਖਿਡਾਰੀਆਂ ਦੀ ਚੋਣ ਕੀਤੀ ਹੈ। ਟੀ-20 ਵਿਸ਼ਵ ਕੱਪ 1 ਜੂਨ ਤੋਂ ਕਰਵਾਇਆ ਜਾਵੇਗਾ। ਇੰਗਲੈਂਡ ਦੀ ਕਪਤਾਨੀ ਜੋਸ ਬਟਲਰ ਨੂੰ ਮਿਲੀ ਹੈ। ਬਟਲਰ ਫਿਲਹਾਲ IPL 2024 'ਚ ਰਾਜਸਥਾਨ ਰਾਇਲਸ ਲਈ ਖੇਡ ਰਿਹਾ ਹੈ। ਉਹ ਫਾਰਮ 'ਚ ਹੈ ਅਤੇ ਧਮਾਕੇਦਾਰ ਬੱਲੇਬਾਜ਼ੀ ਵੀ ਕਰ ਰਿਹਾ ਹੈ।
ਇੰਗਲੈਂਡ ਨੇ ਟੀਮ ਦੀ ਕਪਤਾਨੀ ਬਟਲਰ ਨੂੰ ਸੌਂਪ ਦਿੱਤੀ ਹੈ। ਉਹ ਖਤਰਨਾਕ ਫਾਰਮ 'ਚ ਹੈ। ਬਟਲਰ ਨੇ IPL 2024 ਦੇ 8 ਮੈਚਾਂ 'ਚ 319 ਦੌੜਾਂ ਬਣਾਈਆਂ ਹਨ। ਇਸ ਦੌਰਾਨ 2 ਸੈਂਕੜੇ ਲਗਾਏ ਹਨ। ਬਟਲਰ ਦੇ ਨਾਲ ਮੋਈਨ ਅਲੀ ਅਤੇ ਜੋਫਰਾ ਆਰਚਰ ਨੂੰ ਵੀ ਜਗ੍ਹਾ ਮਿਲੀ ਹੈ। ਆਰਚਰ ਲੰਬੇ ਸਮੇਂ ਤੋਂ ਇੰਗਲੈਂਡ ਟੀਮ ਤੋਂ ਬਾਹਰ ਸਨ। ਉਹ ਸੱਟ ਕਾਰਨ ਮੈਦਾਨ ਤੋਂ ਦੂਰ ਸੀ। ਪਰ ਹੁਣ ਉਨ੍ਹਾਂ ਨੇ ਵਾਪਸੀ ਕੀਤੀ ਹੈ।
ਇੰਗਲੈਂਡ ਨੇ ਵਿਸਫੋਟਕ ਬੱਲੇਬਾਜ਼ ਫਿਲਿਪ ਸਾਲਟ ਨੂੰ ਵੀ ਟੀਮ ਵਿੱਚ ਸ਼ਾਮਲ ਕੀਤਾ ਹੈ। ਵਿਲ ਜੈਕਸ ਅਤੇ ਜੌਨੀ ਬੇਅਰਸਟੋ ਵੀ ਟੀ-20 ਵਿਸ਼ਵ ਕੱਪ 2024 ਵਿੱਚ ਖੇਡਦੇ ਨਜ਼ਰ ਆਉਣਗੇ। ਬੋਰਡ ਨੇ ਹੈਰੀ ਬਰੂਕ ਅਤੇ ਲਿਆਮ ਲਿਵਿੰਗਸਟੋਨ 'ਤੇ ਵੀ ਭਰੋਸਾ ਜਤਾਇਆ ਹੈ। ਇੰਗਲੈਂਡ ਦਾ ਗੇਂਦਬਾਜ਼ੀ ਹਮਲਾ ਵੀ ਕਾਫੀ ਮਜ਼ਬੂਤ ਨਜ਼ਰ ਆ ਰਿਹਾ ਹੈ। ਮਾਰਕ ਵੁੱਡ, ਰੀਸ ਟੋਪਲੇ ਅਤੇ ਆਦਿਲ ਰਾਸ਼ਿਦ ਟੀਮ ਦਾ ਹਿੱਸਾ ਹਨ।
ਸਾਲਟ ਦੀ ਗੱਲ ਕਰੀਏ ਤਾਂ ਉਹ ਆਈਪੀਐਲ ਵਿੱਚ ਕੋਲਕਾਤਾ ਨਾਈਟ ਰਾਈਡਰਜ਼ ਦਾ ਹਿੱਸਾ ਹੈ। ਉਸ ਨੇ ਇਸ ਸਾਲ 2024 ਦੇ 9 ਮੈਚਾਂ ਵਿੱਚ 392 ਦੌੜਾਂ ਬਣਾਈਆਂ ਹਨ। ਇਸ ਦੌਰਾਨ ਉਨ੍ਹਾਂ ਨੇ 4 ਅਰਧ ਸੈਂਕੜੇ ਲਗਾਏ ਹਨ। ਸਾਲਟ ਦਾ ਇਸ ਸੀਜ਼ਨ ਦਾ ਸਰਵੋਤਮ ਸਕੋਰ ਨਾਬਾਦ 89 ਰਿਹਾ ਹੈ। ਵਿਲ ਜੈਕਸ ਨੇ ਵੀ ਚੰਗਾ ਪ੍ਰਦਰਸ਼ਨ ਕੀਤਾ ਹੈ।
ਟੀ-20 ਵਿਸ਼ਵ ਕੱਪ 2024 ਲਈ ਇੰਗਲੈਂਡ ਦੀ ਟੀਮ - ਜੋਸ ਬਟਲਰ (ਕਪਤਾਨ), ਮੋਈਨ ਅਲੀ (ਉਪ-ਕਪਤਾਨ), ਫਿਲ ਸਾਲਟ, ਵਿਲ ਜੈਕ, ਜੌਨੀ ਬੇਅਰਸਟੋ, ਹੈਰੀ ਬਰੂਕ, ਲਿਆਮ ਲਿਵਿੰਗਸਟੋਨ, ਸੈਮ ਕੁਰਾਨ, ਜੋਫਰਾ ਆਰਚਰ, ਕ੍ਰਿਸ ਜੌਰਡਨ, ਮਾਰਕ ਵੁੱਡ, ਰੀਸ ਟੋਪਲੇ, ਆਦਿਲ ਰਸ਼ੀਦ, ਟੌਮ ਹਾਰਟਲੇ, ਬੇਨ ਡਕੇਟ।
ਇਹ ਵੀ ਪੜ੍ਹੋ-T20 World Cup 2024: ਟੀਮ ਇੰਡੀਆ ਦਾ ਹੋਇਆ ਐਲਾਨ, ਅਸ਼ਰਦੀਪ, ਬੁਮਰਾਹ ਸਮੇਤ ਇਨ੍ਹਾਂ ਗੇਂਦਬਾਜ਼ਾਂ ਨੂੰ ਮਿਲੀ ਜਗ੍ਹਾ