Airtel Recharge Plan : ਜੇਕਰ ਤੁਸੀਂ ਵੀ Airtel ਦਾ ਸਿਮ ਵਰਤਦੇ ਹੋ ਅਤੇ ਹਰ ਮਹੀਨੇ 300 ਰੁਪਏ ਦੇ ਕਰੀਬ ਰੀਚਾਰਜ ਕਰਵਾਉਂਦੇ ਹੋ ਤਾਂ ਤੁਹਾਡੇ ਲਈ ਅਹਿਮ ਖ਼ਬਰ ਹੈ। ਕੰਪਨੀ ਨੇ ਆਪਣਾ ਪੁਰਾਣਾ 299 ਰੁਪਏ ਵਾਲਾ ਪ੍ਰੀਪੇਡ ਰੀਚਾਰਜ ਪਲਾਨ ਮੁੜ ਸ਼ੁਰੂ ਕਰ ਦਿੱਤਾ ਹੈ। ਕਰੀਬ ਤਿੰਨ ਮਹੀਨੇ ਪਹਿਲਾਂ ਕੰਪਨੀ ਨੇ ਇਸ ਪਲਾਨ ਨੂੰ ਬੰਦ ਕਰ ਦਿੱਤਾ ਸੀ। ਹੁਣ ਇਸ ਦੀ ਵਾਪਸੀ ਤਾਂ ਹੋ ਗਈ ਹੈ, ਪਰ ਗਾਹਕਾਂ ਨੂੰ ਪਹਿਲਾਂ ਦੇ ਮੁਕਾਬਲੇ ਘੱਟ ਡਾਟਾ ਮਿਲੇਗਾ।
Airtel ਦੇ 299 ਰੁਪਏ ਪਲਾਨ ਵਿੱਚ ਹੁਣ ਕੀ ਮਿਲੇਗਾ?
Airtel ਦੇ ਨਵੇਂ 299 ਰੁਪਏ ਵਾਲੇ ਪ੍ਰੀਪੇਡ ਪਲਾਨ ਵਿੱਚ ਗਾਹਕਾਂ ਨੂੰ 28 ਦਿਨਾਂ ਦੀ ਵੈਲੀਡਿਟੀ ਮਿਲੇਗੀ। ਇਸ ਦੇ ਨਾਲ ਹਰ ਰੋਜ਼ 1GB ਹਾਈ-ਸਪੀਡ ਡਾਟਾ, ਅਨਲਿਮਟਿਡ ਵੌਇਸ ਕਾਲਿੰਗ ਅਤੇ ਰੋਜ਼ਾਨਾ 100 SMS ਮਿਲਣਗੇ। ਇਸ ਤਰ੍ਹਾਂ 28 ਦਿਨਾਂ ਵਿੱਚ ਗਾਹਕਾਂ ਨੂੰ ਕੁੱਲ 28GB ਡਾਟਾ ਮਿਲੇਗਾ। ਜਦਕਿ ਪਹਿਲਾਂ ਇਸੇ ਕੀਮਤ ਵਾਲੇ ਪਲਾਨ ਵਿੱਚ ਹਰ ਰੋਜ਼ 1.5GB ਡਾਟਾ ਮਿਲਦਾ ਸੀ। ਯਾਨੀ ਹੁਣ ਗਾਹਕਾਂ ਨੂੰ ਹਰ ਦਿਨ 500MB ਡਾਟਾ ਘੱਟ ਮਿਲੇਗਾ।
ਇਸ ਦਾ ਅਸਰ ਉਨ੍ਹਾਂ ਗਾਹਕਾਂ 'ਤੇ ਪਵੇਗਾ ਜੋ ਰੋਜ਼ਾਨਾ ਵੀਡੀਓ ਦੇਖਦੇ ਹਨ, ਸੋਸ਼ਲ ਮੀਡੀਆ ਚਲਾਉਂਦੇ ਹਨ ਜਾਂ ਇੰਟਰਨੈੱਟ ਦੀ ਜ਼ਿਆਦਾ ਵਰਤੋਂ ਕਰਦੇ ਹਨ। ਜੇਕਰ ਤੁਹਾਡਾ ਰੋਜ਼ਾਨਾ ਡਾਟਾ ਖ਼ਰਚ 1GB ਤੋਂ ਵੱਧ ਹੈ ਤਾਂ ਤੁਹਾਨੂੰ ਵਾਧੂ ਡਾਟਾ ਪੈਕ ਲੈਣਾ ਪੈ ਸਕਦਾ ਹੈ।
ਤਿੰਨ ਮਹੀਨੇ ਪਹਿਲਾਂ ਕਿਉਂ ਬੰਦ ਕੀਤਾ ਸੀ ਪਲਾਨ?
Airtel ਨੇ ਅਗਸਤ 2026 ਵਿੱਚ ਆਪਣੇ ਪ੍ਰੀਪੇਡ ਰੀਚਾਰਜ ਪਲਾਨਾਂ ਵਿੱਚ ਬਦਲਾਅ ਕੀਤਾ ਸੀ। ਇਸ ਦੌਰਾਨ ਕੰਪਨੀ ਨੇ 299 ਰੁਪਏ ਤੋਂ ਇਲਾਵਾ 319 ਰੁਪਏ , 579 ਰੁਪਏ , 619 ਰੁਪਏ ਅਤੇ 649 ਰੁਪਏ ਵਾਲੇ ਕੁਝ ਪਲਾਨ ਵੀ ਬੰਦ ਕਰ ਦਿੱਤੇ ਸਨ। ਇਨ੍ਹਾਂ ਪਲਾਨਾਂ ਵਿੱਚ ਰੋਜ਼ਾਨਾ 1.5GB ਡਾਟਾ ਅਤੇ ਅਨਲਿਮਟਿਡ ਕਾਲਿੰਗ ਵਰਗੀਆਂ ਸਹੂਲਤਾਂ ਮਿਲਦੀਆਂ ਸਨ। 299 ਰੁਪਏ ਵਾਲਾ ਪਲਾਨ ਬੰਦ ਹੋਣ ਤੋਂ ਬਾਅਦ 28 ਦਿਨਾਂ ਦੀ ਵੈਲੀਡਿਟੀ ਅਤੇ ਰੋਜ਼ਾਨਾ ਡਾਟਾ ਚਾਹੁਣ ਵਾਲੇ ਗਾਹਕਾਂ ਲਈ 349 ਰੁਪਏ ਵਾਲਾ ਪਲਾਨ ਮੁੱਖ ਵਿਕਲਪ ਬਣ ਗਿਆ ਸੀ। ਇਸ ਵਿੱਚ ਰੋਜ਼ਾਨਾ 1.5GB ਡਾਟਾ ਅਤੇ ਅਨਲਿਮਟਿਡ 5G ਦੀ ਸਹੂਲਤ ਦਿੱਤੀ ਜਾ ਰਹੀ ਸੀ। ਇਸ ਦਾ ਮਤਲਬ ਸੀ ਕਿ ਜਿਹੜੇ ਗਾਹਕ ਪਹਿਲਾਂ 299 ਰੁਪਏ ਖਰਚ ਕਰਦੇ ਸਨ, ਉਨ੍ਹਾਂ ਨੂੰ ਹੁਣ ਇਸ ਤਰ੍ਹਾਂ ਦੀ ਡਾਟਾ ਸਹੂਲਤ ਲਈ 349 ਰੁਪਏ ਖਰਚ ਕਰਨੇ ਪੈ ਰਹੇ ਸਨ। ਯਾਨੀ ਰੀਚਾਰਜ ਦਾ ਖਰਚ ਲਗਭਗ 16.7 ਫੀਸਦੀ ਵੱਧ ਗਿਆ ਸੀ।
Airtel ਨੇ ਪਲਾਨ ਮੁੜ ਕਿਉਂ ਕੀਤਾ ਸ਼ੁਰੂ?
ਟੈਲੀਕਾਮ ਕੰਪਨੀਆਂ ਆਪਣੇ ਹਰ ਗਾਹਕ ਤੋਂ ਹੋਣ ਵਾਲੀ ਔਸਤ ਕਮਾਈ ਨੂੰ ARPU (Average Revenue Per User) ਕਹਿੰਦੀਆਂ ਹਨ। ਕੰਪਨੀ ਦੀ ਕੋਸ਼ਿਸ਼ ਹੁੰਦੀ ਹੈ ਕਿ ਹਰ ਗਾਹਕ ਤੋਂ ਹੋਣ ਵਾਲੀ ਕਮਾਈ ਵਧਾਈ ਜਾਵੇ ਪਰ Airtel ਦੇ ਸਤੰਬਰ ਤਿਮਾਹੀ ਦੇ ਅੰਕੜਿਆਂ ਮੁਤਾਬਕ ਨਵੇਂ ਮੋਬਾਈਲ ਗਾਹਕ ਜੋੜਨ ਦੀ ਰਫ਼ਤਾਰ ਵਿੱਚ ਕਾਫ਼ੀ ਕਮੀ ਆਈ ਹੈ।
ਜੁਲਾਈ ਤੋਂ ਸਤੰਬਰ 2026 ਦੌਰਾਨ ਕੰਪਨੀ ਨੇ ਕਰੀਬ 7.16 ਲੱਖ ਨਵੇਂ ਮੋਬਾਈਲ ਗਾਹਕ ਜੋੜੇ, ਜਦਕਿ ਇਸ ਤੋਂ ਪਿਛਲੀ ਤਿਮਾਹੀ ਵਿੱਚ ਇਹ ਗਿਣਤੀ ਲਗਭਗ 33 ਲੱਖ ਸੀ। ਇਸ ਲਈ 299 ਰੁਪਏ ਵਾਲੇ ਪਲਾਨ ਦੀ ਵਾਪਸੀ ਨੂੰ ਗਾਹਕਾਂ ਨੂੰ ਆਪਣੇ ਨਾਲ ਜੋੜ ਕੇ ਰੱਖਣ ਦੀ ਕੋਸ਼ਿਸ਼ ਵਜੋਂ ਦੇਖਿਆ ਜਾ ਰਿਹਾ ਹੈ। ਹਾਲਾਂਕਿ ਪਲਾਨ ਦੀ ਕੀਮਤ ਤਾਂ ਉਹੀ ਰੱਖੀ ਗਈ ਹੈ, ਪਰ ਰੋਜ਼ਾਨਾ ਡਾਟਾ ਘਟਾ ਦਿੱਤਾ ਗਿਆ ਹੈ।