Whatsapp on PC: ਜੇਕਰ ਤੁਸੀਂ Windows 11 'ਤੇ Native ਐਪ ਰਾਹੀਂ WhatsApp ਵਰਤ ਰਹੇ ਹੋ ਤਾਂ ਇਹ ਖ਼ਬਰ ਤੁਹਾਡੇ ਲਈ ਬੇਹੱਦ ਅਹਿਮ ਹੈ। Meta ਨੇ ਆਪਣੇ ਨਵੀਨਤਮ ਬੀਟਾ ਅਪਡੇਟ ਵਿੱਚ ਲਗਪਗ ਪੁਸ਼ਟੀ ਕਰ ਦਿੱਤੀ ਹੈ ਕਿ Windows 11 'ਤੇ WhatsApp ਦਾ Native ਐਪ ਹੁਣ ਸਪੋਰਟ ਨਹੀਂ ਰਹੇਗਾ। ਇਸ ਦੀ ਬਜਾਏ ਕੰਪਨੀ WhatsApp ਵੈੱਬ ਵਰਜਨ ਨੂੰ ਸਥਾਈ ਤੌਰ 'ਤੇ ਅਪਣਾਉਣ ਜਾ ਰਹੀ ਹੈ, ਜੋ ਪਹਿਲਾਂ ਹੀ ਕਰੋੜਾਂ ਉਪਭੋਗਤਾਵਾਂ ਦੁਆਰਾ ਵਰਤਿਆ ਜਾ ਰਿਹਾ ਹੈ।
ਨਵਾਂ ਇੰਟਰਫੇਸ, ਨਵਾਂ ਅਨੁਭਵ
WhatsApp ਦੇ ਨਵੇਂ ਬੀਟਾ ਵਰਜਨ ਵਿੱਚ ਇੱਕ ਸੂਚਨਾ ਦਿਖਾਈ ਦਿੰਦੀ ਹੈ: "updated how WhatsApp beta looks and works." ਯਾਨੀ, WhatsApp ਹੁਣ ਨਾ ਸਿਰਫ਼ ਆਪਣੀ ਦਿੱਖ ਨੂੰ ਬਦਲ ਰਿਹਾ ਹੈ, ਸਗੋਂ ਆਪਣੇ ਕੰਮ ਕਰਨ ਦੇ ਤਰੀਕੇ ਨੂੰ ਵੀ ਬਦਲ ਰਿਹਾ ਹੈ। ਨਵਾਂ ਇੰਟਰਫੇਸ WhatsApp ਵੈੱਬ ਵਰਗਾ ਦਿਖਾਈ ਦੇਵੇਗਾ ਤੇ ਕੰਪਨੀ ਆਪਣੇ ਬੈਕਐਂਡ ਵਿੱਚ ਬਹੁਤ ਸਾਰੇ ਸੁਧਾਰ ਕਰ ਰਹੀ ਹੈ ਤਾਂ ਜੋ ਐਪ ਪਹਿਲਾਂ ਨਾਲੋਂ ਤੇਜ਼ੀ ਨਾਲ ਚੱਲੇ ਤੇ ਘੱਟ ਬੱਗ ਹੋਣ।
ਇਹ ਫੈਸਲਾ ਕਿਉਂ ਲਿਆ?
Meta ਦਾ ਇਹ ਕਦਮ ਮੁੱਖ ਤੌਰ 'ਤੇ ਤਕਨੀਕੀ ਸਰੋਤਾਂ ਨੂੰ ਬਚਾਉਣ ਲਈ ਚੁੱਕਿਆ ਗਿਆ ਹੈ। ਕੰਪਨੀ ਹੁਣ Native Windows ਐਪ ਨੂੰ ਬਣਾਈ ਰੱਖਣ ਵਿੱਚ ਜ਼ਿਆਦਾ ਨਿਵੇਸ਼ ਨਹੀਂ ਕਰਨਾ ਚਾਹੁੰਦੀ। ਵੈੱਬ ਵਰਜ਼ਨ ਨੂੰ ਸੰਭਾਲਣਾ ਆਸਾਨ ਹੈ ਤੇ ਇਸ ਰਾਹੀਂ ਨਵੇਂ ਫੀਚਰ ਵੀ ਉਪਭੋਗਤਾਵਾਂ ਤੱਕ ਜਲਦੀ ਪਹੁੰਚਾਏ ਜਾ ਸਕਦੇ ਹਨ। ਹਾਲਾਂਕਿ, ਨੇਟਿਵ ਐਪ ਲਿਆਉਣ ਦਾ ਉਦੇਸ਼ ਇਹ ਸੀ ਕਿ ਇਹ ਘੱਟ ਰੈਮ ਦੀ ਵਰਤੋਂ ਕਰੇ ਤੇ ਸਿਸਟਮ 'ਤੇ ਤੇਜ਼ੀ ਨਾਲ ਚੱਲੇ, ਜੋ ਹੁਣ ਬਦਲ ਰਿਹਾ ਹੈ।
ਕੌਣ ਹੋਵੇਗਾ ਪ੍ਰਭਾਵਿਤ ?
ਇਹ ਬਦਲਾਅ ਉਨ੍ਹਾਂ ਉਪਭੋਗਤਾਵਾਂ ਨੂੰ ਹੈਰਾਨ ਕਰ ਸਕਦਾ ਹੈ ਜੋ ਹੁਣ ਤੱਕ ਵਿੰਡੋਜ਼ 'ਤੇ ਵਟਸਐਪ ਨੇਟਿਵ ਐਪ ਦੀ ਵਰਤੋਂ ਕਰ ਰਹੇ ਸਨ। ਵੈੱਬ ਵਰਜ਼ਨ ਨੂੰ ਚਲਾਉਣ ਲਈ ਉਨ੍ਹਾਂ ਨੂੰ ਹੁਣ ਕ੍ਰੋਮ, ਐਜ ਜਾਂ ਕਿਸੇ ਹੋਰ ਬ੍ਰਾਊਜ਼ਰ ਦੀ ਜ਼ਰੂਰਤ ਹੋਏਗੀ, ਜਿਸ ਨਾਲ ਰੈਮ ਦੀ ਖਪਤ ਵੀ ਵਧੇਗੀ। ਹਾਲਾਂਕਿ, ਜੋ ਪਹਿਲਾਂ ਹੀ ਵਟਸਐਪ ਵੈੱਬ ਦੀ ਵਰਤੋਂ ਕਰ ਰਹੇ ਹਨ, ਉਨ੍ਹਾਂ ਲਈ ਇਹ ਅਨੁਭਵ ਕੁਝ ਨਵਾਂ ਨਹੀਂ ਹੋਵੇਗਾ।
ਵਟਸਐਪ 'ਤੇ ਜਲਦੀ ਹੀ ਇਸ਼ਤਿਹਾਰ ਆਉਣਗੇ
ਸਿਰਫ ਇੰਟਰਫੇਸ ਹੀ ਨਹੀਂ, ਵਟਸਐਪ 'ਤੇ ਇਸ਼ਤਿਹਾਰਾਂ ਵਿੱਚ ਇੱਕ ਵੱਡਾ ਬਦਲਾਅ ਹੋਣ ਵਾਲਾ ਹੈ। ਹਾਲ ਹੀ ਵਿੱਚ ਵਟਸਐਪ ਦੇ ਐਂਡਰਾਇਡ ਬੀਟਾ ਵਰਜ਼ਨ 2.25.21.11 ਵਿੱਚ ਸਟੇਟਸ ਅਪਡੇਟਸ ਦੇ ਵਿਚਕਾਰ ਇਸ਼ਤਿਹਾਰ ਦਿਖਾਈ ਦੇਣ ਲੱਗੇ ਹਨ। ਇਹ ਇਸ਼ਤਿਹਾਰ ਫੇਸਬੁੱਕ ਜਾਂ ਇੰਸਟਾਗ੍ਰਾਮ ਵਾਂਗ "ਸਪਾਂਸਰਡ" ਲੇਬਲ ਦੇ ਨਾਲ ਸਟੇਟਸ ਸੈਕਸ਼ਨ ਵਿੱਚ ਦਿਖਾਈ ਦੇਣਗੇ। ਸ਼ੁਰੂ ਵਿੱਚ ਇਹ ਸਿਰਫ ਕੁਝ ਚੁਣੇ ਹੋਏ ਬੀਟਾ ਉਪਭੋਗਤਾਵਾਂ ਲਈ ਹੈ, ਪਰ ਜਲਦੀ ਹੀ ਇਸ ਨੂੰ ਸਾਰੇ ਉਪਭੋਗਤਾਵਾਂ ਦੁਆਰਾ ਦੇਖਿਆ ਜਾ ਸਕਦਾ ਹੈ।