WhatsApp New Feature: ਮੈਸੇਜਿੰਗ ਪਲੇਟਫਾਰਮ WhatsApp ਲਗਾਤਾਰ ਨਵੇਂ ਫੀਚਰ ਲਿਆਉਂਦਾ ਰਹਿੰਦਾ ਹੈ। ਹੁਣ ਕੰਪਨੀ ਇੱਕ ਹੋਰ ਨਵਾਂ ਫੀਚਰ ਲਿਆਉਣ ਦੀ ਤਿਆਰੀ ਕਰ ਰਹੀ ਹੈ, ਜੋ ਯੂਜ਼ਰਾਂ ਦੀ ਪ੍ਰਾਈਵੇਸੀ ਨੂੰ ਹੋਰ ਮਜ਼ਬੂਤ ਬਣਾਏਗਾ। ਇਸ ਫੀਚਰ ਦੇ ਆਉਣ ਤੋਂ ਬਾਅਦ ਮੈਸੇਜ ਵੇਖਦੇ ਹੀ ਆਪਣੇ ਆਪ ਗਾਇਬ ਹੋ ਜਾਵੇਗਾ। WhatsApp ਇਸ ਰਾਹੀਂ ਯੂਜ਼ਰਾਂ ਨੂੰ ਆਪਣੇ ਮੈਸੇਜਾਂ 'ਤੇ ਹੋਰ ਵੱਧ ਕੰਟਰੋਲ ਦੇਣਾ ਚਾਹੁੰਦੀ ਹੈ। ਫਿਲਹਾਲ ਇਸ ਫੀਚਰ 'ਤੇ ਕੰਮ ਚੱਲ ਰਿਹਾ ਹੈ ਅਤੇ ਅਨੁਮਾਨ ਹੈ ਕਿ ਅਗਲੇ 1-2 ਮਹੀਨਿਆਂ ਵਿੱਚ ਇਸਨੂੰ ਰੋਲ ਆਉਟ ਕੀਤਾ ਜਾ ਸਕਦਾ ਹੈ।
ਨਵੇਂ ਫੀਚਰ ਨਾਲ ਕੀ ਬਦਲੇਗਾ?
ਮੌਜੂਦਾ ਸਮੇਂ WhatsApp 'ਤੇ ਫੋਟੋਆਂ ਅਤੇ ਵੀਡੀਓਜ਼ ਨੂੰ View Once ਫਾਰਮੈਟ ਵਿੱਚ ਭੇਜਣ ਦੀ ਸੁਵਿਧਾ ਮਿਲਦੀ ਹੈ। ਯੂਜ਼ਰ ਕਿਸੇ ਵੀ ਫੋਟੋ ਜਾਂ ਵੀਡੀਓ ਨੂੰ ਭੇਜਣ ਤੋਂ ਪਹਿਲਾਂ View Once ਆਈਕਨ 'ਤੇ ਕਲਿੱਕ ਕਰਕੇ ਇਸ ਫਾਰਮੈਟ ਵਿੱਚ ਬਦਲ ਸਕਦੇ ਹਨ। ਰਿਸੀਵਰ ਵੱਲੋਂ ਇੱਕ ਵਾਰ ਵੇਖਣ ਤੋਂ ਬਾਅਦ ਇਹ ਫੋਟੋ ਜਾਂ ਵੀਡੀਓ ਆਪਣੇ ਆਪ ਗਾਇਬ ਹੋ ਜਾਂਦੀ ਹੈ ਅਤੇ ਇਸਨੂੰ ਦੁਬਾਰਾ ਨਹੀਂ ਦੇਖਿਆ ਜਾ ਸਕਦਾ।
ਹੁਣ ਕੰਪਨੀ ਇਹੀ ਸੁਵਿਧਾ ਟੈਕਸਟ ਮੈਸੇਜਾਂ ਲਈ ਵੀ ਲਿਆਉਣ ਦੀ ਤਿਆਰੀ ਕਰ ਰਹੀ ਹੈ। ਇਸ ਨਾਲ ਯੂਜ਼ਰ ਮੀਡੀਆ ਦੇ ਨਾਲ-ਨਾਲ ਟੈਕਸਟ ਮੈਸੇਜਾਂ ਨੂੰ ਵੀ ਇੱਕ ਵਾਰ ਵੇਖਣ ਲਈ ਸੈੱਟ ਕਰ ਸਕਣਗੇ।
ਨਵਾਂ ਫੀਚਰ ਕਿਵੇਂ ਕੰਮ ਕਰੇਗਾ?
ਰਿਪੋਰਟਾਂ ਮੁਤਾਬਕ ਟੈਕਸਟ ਮੈਸੇਜ ਨੂੰ View Once ਫਾਰਮੈਟ ਵਿੱਚ ਭੇਜਣ ਲਈ ਯੂਜ਼ਰ ਨੂੰ Send ਬਟਨ ਨੂੰ ਲੰਮਾ ਦਬਾਉਣਾ (Long Press) ਪਵੇਗਾ। ਜਦੋਂ ਇਹ ਮੈਸੇਜ ਰਿਸੀਵਰ ਕੋਲ ਪਹੁੰਚੇਗਾ ਤਾਂ ਉਹ ਇਸਨੂੰ ਸਿਰਫ ਇੱਕ ਵਾਰ ਹੀ ਪੜ੍ਹ ਸਕੇਗਾ। ਇੱਕ ਵਾਰ ਵੇਖਣ ਤੋਂ ਬਾਅਦ ਮੈਸੇਜ ਸਥਾਈ ਤੌਰ 'ਤੇ ਗਾਇਬ ਹੋ ਜਾਵੇਗਾ।
ਇਸ ਮੈਸੇਜ ਨੂੰ ਕਾਪੀ, ਸ਼ੇਅਰ ਜਾਂ ਫਾਰਵਰਡ ਵੀ ਨਹੀਂ ਕੀਤਾ ਜਾ ਸਕੇਗਾ। ਇਹ ਫੀਚਰ ਨਿੱਜੀ (Individual) ਚੈਟਾਂ ਦੇ ਨਾਲ-ਨਾਲ ਗਰੁੱਪ ਚੈਟਾਂ ਵਿੱਚ ਵੀ ਕੰਮ ਕਰੇਗਾ, ਪਰ WhatsApp Channels ਵਿੱਚ ਇਸਦਾ ਸਹਿਯੋਗ ਨਹੀਂ ਮਿਲੇਗਾ।
ਕਦੋਂ ਹੋਵੇਗਾ ਰੋਲ ਆਉਟ?
ਫਿਲਹਾਲ ਇਸ ਫੀਚਰ 'ਤੇ ਕੰਮ ਜਾਰੀ ਹੈ ਅਤੇ ਇਸਨੂੰ ਅਜੇ ਬੀਟਾ ਵਰਜ਼ਨ ਲਈ ਵੀ ਜਾਰੀ ਨਹੀਂ ਕੀਤਾ ਗਿਆ। ਸਭ ਤੋਂ ਪਹਿਲਾਂ ਇਸਨੂੰ ਬੀਟਾ ਯੂਜ਼ਰਾਂ ਲਈ ਰੋਲ ਆਉਟ ਕੀਤਾ ਜਾਵੇਗਾ ਅਤੇ ਫੀਡਬੈਕ ਦੇ ਆਧਾਰ 'ਤੇ ਲੋੜੀਂਦੇ ਬਦਲਾਅ ਕਰਨ ਤੋਂ ਬਾਅਦ ਇਸਨੂੰ ਸਾਰੇ ਯੂਜ਼ਰਾਂ ਲਈ ਜਾਰੀ ਕੀਤਾ ਜਾਵੇਗਾ। ਇਸ ਲਈ ਫੀਚਰ ਨੂੰ ਆਮ ਯੂਜ਼ਰਾਂ ਤੱਕ ਪਹੁੰਚਣ ਵਿੱਚ ਕੁਝ ਮਹੀਨਿਆਂ ਦਾ ਸਮਾਂ ਲੱਗ ਸਕਦਾ ਹੈ।
ਸਕੈਮ ਤੋਂ ਬਚਾਉਣ ਵਾਲਾ ਫੀਚਰ ਵੀ ਆ ਰਿਹਾ
View Once ਟੈਕਸਟ ਫੀਚਰ ਦੇ ਨਾਲ-ਨਾਲ WhatsApp ਇੱਕ Scam Alert Feature 'ਤੇ ਵੀ ਕੰਮ ਕਰ ਰਹੀ ਹੈ। ਇਹ ਫੀਚਰ ਅਣਜਾਣ ਨੰਬਰਾਂ ਤੋਂ ਆਉਣ ਵਾਲੇ ਸ਼ੱਕੀ ਜਾਂ ਧੋਖਾਧੜੀ ਵਾਲੇ ਮੈਸੇਜਾਂ ਦੀ ਪਛਾਣ ਕਰਕੇ ਯੂਜ਼ਰ ਨੂੰ ਚੇਤਾਵਨੀ (Warning Alert) ਦੇਵੇਗਾ। ਜੇ ਯੂਜ਼ਰ ਨੂੰ ਮੈਸੇਜ ਸੁਰੱਖਿਅਤ ਲੱਗਦਾ ਹੈ ਤਾਂ ਉਹ ਚੈਟ ਜਾਰੀ ਰੱਖ ਸਕਦਾ ਹੈ। ਪਰ ਜੇਕਰ ਮੈਸੇਜ ਸ਼ੱਕੀ ਲੱਗੇ ਤਾਂ ਉੱਥੇ ਹੀ ਭੇਜਣ ਵਾਲੇ ਨੂੰ Block ਅਤੇ Report ਕਰਨ ਦਾ ਵਿਕਲਪ ਵੀ ਮਿਲੇਗਾ।