UP News: ਰੇਵੜੀ ਤੇ ਗਜਕ ਲਈ ਮਸ਼ਹੂਰ ਮੇਰਠ ਹੁਣ ਆਪਣੇ 'ਬਾਹੂਬਲੀ' ਸਮੋਸੇ ਲਈ ਲੋਕਾਂ ਦਾ ਧਿਆਨ ਆਪਣੇ ਵੱਲ ਖਿੱਚ ਰਿਹਾ ਹੈ। ਆਲੂ, ਮਟਰ, ਮਸਾਲੇ, ਪਨੀਰ ਅਤੇ ਸੁੱਕੇ ਮੇਵੇ ਤੋਂ ਤਿਆਰ ਨਮਕੀਨ ਸਟਫਿੰਗ ਨਾਲ ਬਣਿਆ 12 ਕਿਲੋ ਵਜ਼ਨ ਦਾ ਇਹ ਸਮੋਸਾ ਇਨ੍ਹੀਂ ਦਿਨੀਂ ਸੋਸ਼ਲ ਮੀਡੀਆ 'ਤੇ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਇਸ ਨੂੰ 30 ਮਿੰਟਾਂ 'ਚ ਖਾਣ ਵਾਲੇ ਨੂੰ 71,000 ਰੁਪਏ ਦਾ ਇਨਾਮ ਦੇਣ ਦਾ ਐਲਾਨ ਕੀਤਾ ਗਿਆ ਹੈ। ਲਾਲਕੁਰਤੀ ਸਥਿਤ ਕੌਸ਼ਲ ਸਵੀਟਸ ਦੇ ਤੀਜੀ ਪੀੜ੍ਹੀ ਦੇ ਮਾਲਕ ਸ਼ੁਭਮ ਕੌਸ਼ਲ ਨੇ ਕਿਹਾ ਕਿ ਉਹ ਸਮੋਸੇ ਨੂੰ ਖਿੱਚ ਦਾ ਕੇਂਦਰ ਬਣਾਉਣ ਲਈ "ਕੁਝ ਵੱਖਰਾ" ਕਰਨਾ ਚਾਹੁੰਦਾ ਸੀ ਅਤੇ ਇਸ ਲਈ 12 ਕਿਲੋ ਦੇ ਬਾਹੂਬਲੀ 'ਸਮੋਸੇ' ਨੂੰ ਤਿਆਰ ਕਰਨ ਦਾ ਵਿਚਾਰ ਆਇਆ।
ਕੌਸ਼ਲ ਨੇ ਕਿਹਾ ਕਿ ਲੋਕ ਆਪਣੇ ਜਨਮਦਿਨ 'ਤੇ ਰਵਾਇਤੀ ਕੇਕ ਦੀ ਬਜਾਏ 'ਬਾਹੂਬਲੀ' ਸਮੋਸੇ ਕੱਟਦੇ ਹਨ। ਉਨ੍ਹਾਂ ਦੱਸਿਆ ਕਿ ਇਸ ਨੂੰ 30 ਮਿੰਟ 'ਚ ਪੂਰੀ ਤਰ੍ਹਾਂ ਖਾਣ 'ਤੇ 71 ਹਜ਼ਾਰ ਰੁਪਏ ਦਾ ਇਨਾਮ ਵੀ ਐਲਾਨਿਆ ਗਿਆ ਹੈ। ਇਸ ਸਮੋਸੇ ਨੂੰ ਤਿਆਰ ਕਰਨ ਲਈ ਹੁਨਰਮੰਦ ਰਸੋਈਏ ਨੂੰ ਲਗਭਗ ਛੇ ਘੰਟੇ ਲੱਗਦੇ ਹਨ। ਕੌਸ਼ਲ ਨੇ ਦੱਸਿਆ ਕਿ ਕੜਾਹੀ ਵਿੱਚ ਸਮੋਸੇ ਨੂੰ ਤਲਣ ਵਿੱਚ ਡੇਢ ਘੰਟਾ ਲੱਗਦਾ ਹੈ ਅਤੇ ਇਸ ਕੰਮ ਲਈ ਤਿੰਨ ਵਿਅਕਤੀਆਂ ਦੀ ਸਖ਼ਤ ਮਿਹਨਤ ਦੀ ਲੋੜ ਹੁੰਦੀ ਹੈ। ਉਹਨਾਂ ਅੱਗੇ ਕਿਹਾ, “ਸਾਡੇ ਬਾਹੂਬਲੀ ਸਮੋਸੇ ਨੇ ਸੋਸ਼ਲ ਮੀਡੀਆ ਪ੍ਰਭਾਵਕ ਅਤੇ ਫੂਡ ਬਲੌਗਰਸ ਦਾ ਵੀ ਧਿਆਨ ਖਿੱਚਿਆ ਹੈ। ਸਥਾਨਕ ਲੋਕਾਂ ਤੋਂ ਇਲਾਵਾ ਦੇਸ਼ ਦੇ ਹੋਰ ਹਿੱਸਿਆਂ ਦੇ ਲੋਕ ਵੀ ਸਾਨੂੰ ਇਸ ਸਮੋਸੇ ਬਾਰੇ ਪੁੱਛਦੇ ਹਨ।
ਕੌਸ਼ਲ ਨੇ ਕਿਹਾ, ''ਮੈਂ ਖਬਰਾਂ 'ਚ ਸਮੋਸੇ ਲਿਆਉਣ ਲਈ ਕੁਝ ਵੱਖਰਾ ਕਰਨਾ ਚਾਹੁੰਦਾ ਸੀ। ਅਸੀਂ 'ਬਾਹੂਬਲੀ' ਸਮੋਸਾ ਬਣਾਉਣ ਦਾ ਫੈਸਲਾ ਕੀਤਾ ਹੈ। ਅਸੀਂ ਚਾਰ ਕਿਲੋ ਦਾ ਸਮੋਸਾ ਅਤੇ ਫਿਰ ਅੱਠ ਕਿਲੋ ਦਾ ਸਮੋਸਾ ਬਣਾ ਕੇ ਸ਼ੁਰੂ ਕੀਤਾ। ਇਸ ਤੋਂ ਬਾਅਦ ਅਸੀਂ ਪਿਛਲੇ ਸਾਲ 12 ਕਿਲੋ ਦਾ ਸਮੋਸੇ ਤਿਆਰ ਕੀਤਾ। ਉਨ੍ਹਾਂ ਦੱਸਿਆ ਕਿ 12 ਕਿਲੋ ਦੇ ਸਮੋਸੇ ਦੀ ਕੀਮਤ ਕਰੀਬ 1500 ਰੁਪਏ ਹੈ। ਸ਼ੁਭਮ ਨੇ ਦਾਅਵਾ ਕੀਤਾ ਕਿ ਉਸ ਨੂੰ ਹੁਣ ਤੱਕ ਆਪਣੇ ਬਾਹੂਬਲੀ ਸਮੋਸੇ ਦੇ ਕਰੀਬ 40-50 ਆਰਡਰ ਮਿਲ ਚੁੱਕੇ ਹਨ। ਉਨ੍ਹਾਂ ਦਾਅਵਾ ਕੀਤਾ ਕਿ ਇਹ ਦੇਸ਼ ਦਾ ਸਭ ਤੋਂ ਵੱਡਾ ਸਮੋਸਾ ਹੈ।