David Willey to retire from International cricket: ਵਿਸ਼ਵ ਕੱਪ ਤੋਂ ਬਾਅਦ ਇੰਗਲੈਂਡ ਦੇ ਗੇਂਦਬਾਜ਼ ਡੇਵਿਡ ਵਿਲੀ ਨੇ ਅੰਤਰਰਾਸ਼ਟਰੀ ਕ੍ਰਿਕਟ ਨੂੰ ਅਲਵਿਦਾ ਕਹਿਣ ਦਾ ਫੈਸਲਾ ਕੀਤਾ ਹੈ।

ਉਸ ਨੇ ਸੋਸ਼ਲ ਮੀਡੀਆ 'ਤੇ ਪੋਸਟ ਕੀਤੀ ਹੈ, ਇਸ ਪੋਸਟ ਰਾਹੀਂ ਉਸ ਨੇ ਦੱਸਿਆ ਕਿ ਉਹ ਵਿਸ਼ਵ ਕੱਪ ਤੋਂ ਬਾਅਦ ਅੰਤਰਰਾਸ਼ਟਰੀ ਕ੍ਰਿਕਟ ਨੂੰ ਅਲਵਿਦਾ ਕਹਿ ਦੇਣਗੇ।

ਆਪਣੀ ਪੋਸਟ 'ਚ ਡੇਵਿਡ ਵਿਲੀ ਨੇ ਲਿਖਿਆ ਕਿ ਮੈਂ ਕਦੇ ਨਹੀਂ ਚਾਹੁੰਦਾ ਸੀ ਕਿ ਇਹ ਦਿਨ ਆਵੇ... ਛੋਟੀ ਉਮਰ ਤੋਂ ਹੀ ਇੰਗਲੈਂਡ ਲਈ ਖੇਡਣਾ ਮੇਰਾ ਸੁਪਨਾ ਸੀ।

ਪਰ ਇਹ ਐਲਾਨ ਕਰਦੇ ਹੋਏ ਮੈਨੂੰ ਚੰਗਾ ਨਹੀਂ ਲੱਗ ਰਿਹਾ ਕਿ ਇਸ ਵਿਸ਼ਵ ਕੱਪ ਤੋਂ ਬਾਅਦ ਮੈਂ ਅੰਤਰਰਾਸ਼ਟਰੀ ਕ੍ਰਿਕਟ ਦੇ ਸਾਰੇ ਰੂਪਾਂ ਨੂੰ ਅਲਵਿਦਾ ਕਹਿ ਦੇਵਾਂਗਾ।

ਡੇਵਿਡ ਵਿਲੀ ਨੇ ਲਿਖਿਆ ਕਿ ਮੈਂ ਹਮੇਸ਼ਾ ਇੰਗਲੈਂਡ ਦੀ ਜਰਸੀ ਪਹਿਨ ਕੇ ਮਾਣ ਮਹਿਸੂਸ ਕੀਤਾ। ਮੈਂ ਇਸ ਮਹਾਨ ਟੀਮ ਦਾ ਹਿੱਸਾ ਬਣ ਕੇ ਬਹੁਤ ਖੁਸ਼ਕਿਸਮਤ ਸੀ ਅਤੇ ਮੈਨੂੰ ਕਈ ਵੱਡੇ ਖਿਡਾਰੀਆਂ ਨਾਲ ਖੇਡਣ ਦਾ ਮੌਕਾ ਮਿਲਿਆ।

ਇਸ ਖੇਡ ਨਾਲ ਮੇਰੀਆਂ ਕਈ ਖਾਸ ਯਾਦਾਂ ਜੁੜੀਆਂ ਹੋਈਆਂ ਹਨ। ਇਸ ਸਮੇਂ ਦੌਰਾਨ ਮੈਂ ਕਈ ਚੰਗੇ ਦੋਸਤ ਬਣਾਏ। ਹਾਲਾਂਕਿ, ਮੇਰੇ ਕਰੀਅਰ ਵਿੱਚ ਉਤਰਾਅ-ਚੜ੍ਹਾਅ ਆਏ।

ਕਈ ਵਾਰ ਔਖੇ ਦੌਰ ਵਿੱਚੋਂ ਲੰਘਿਆ। ਨਾਲ ਹੀ ਡੇਵਿਡ ਵਿਲੀ ਨੇ ਆਪਣੀ ਪੋਸਟ 'ਚ ਸਪੱਸ਼ਟ ਕੀਤਾ ਕਿ ਇਸ ਵਿਸ਼ਵ ਕੱਪ 'ਚ ਇੰਗਲੈਂਡ ਦਾ ਖਰਾਬ ਪ੍ਰਦਰਸ਼ਨ ਜਾਰੀ ਹੈ ਪਰ ਮੇਰੇ ਸੰਨਿਆਸ ਦਾ ਇਸ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਹੈ।

ਡੇਵਿਡ ਵਿਲੀ ਨੇ ਕਿਹਾ ਕਿ ਮੈਨੂੰ ਲੱਗਦਾ ਹੈ ਕਿ ਮੇਰੇ ਕੋਲ ਅਜੇ ਵੀ ਮੈਦਾਨ 'ਤੇ ਅਤੇ ਮੈਦਾਨ ਤੋਂ ਬਾਹਰ ਬਹੁਤ ਕੁਝ ਹੈ। ਮੈਂ ਅਜੇ ਵੀ ਆਪਣਾ ਸਰਵੋਤਮ ਕ੍ਰਿਕਟ ਖੇਡ ਰਿਹਾ ਹਾਂ।

ਪਰ ਮੇਰੇ ਫੈਸਲੇ ਦਾ ਟੀਮ ਦੇ ਖਰਾਬ ਪ੍ਰਦਰਸ਼ਨ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਹੈ। ਇਹ ਮੇਰਾ ਨਿੱਜੀ ਫੈਸਲਾ ਹੈ।

ਮੈਂ ਇਸ ਵਿਸ਼ਵ ਕੱਪ ਤੋਂ ਬਾਅਦ ਅੰਤਰਰਾਸ਼ਟਰੀ ਕ੍ਰਿਕਟ ਨਹੀਂ ਖੇਡਾਂਗਾ। ਅੰਕੜੇ ਦੱਸਦੇ ਹਨ ਕਿ 70 ਵਨਡੇ ਮੈਚਾਂ ਤੋਂ ਇਲਾਵਾ ਡੇਵਿਡ ਵਿਲੀ ਨੇ 43 ਟੀ-20 ਮੈਚਾਂ 'ਚ ਇੰਗਲੈਂਡ ਦੀ ਨੁਮਾਇੰਦਗੀ ਕੀਤੀ ਹੈ।