ਗਰਮੀ ਦੇ ਮੌਸਮ ਵਿੱਚ ਕੁਝ ਠੰਢਾ ਪੀਣ ਨੂੰ ਜੀਅ ਕਰਦਾ ਹੈ। ਇਸ ਲਈ ਜ਼ਿਆਦਾਤਰ ਲੋਕ ਫਰਿੱਜ ਦਾ ਪਾਣੀ ਪੀਂਦੇ ਹਨ। ਬੇਸ਼ੱਕ ਇਹ ਕੁਝ ਸਮੇਂ ਲਈ ਰਾਹਤ ਦਿੰਦਾ ਹੈ ਪਰ ਨਾਲ ਹੀ ਬਿਮਾਰੀਆਂ ਨੂੰ ਵੀ ਸੱਦਾ ਦਿੰਦਾ ਹੈ।

ਦੂਜੇ ਪਾਸੇ ਮਿੱਟੀ ਦੇ ਘੜੇ ਦਾ ਪਾਣੀ ਜਿੱਥੇ ਠੰਢਕ ਪਹੁੰਚਾਉਂਦਾ ਹੈ, ਉੱਥੇ ਹੀ ਸਿਹਤਮੰਦ ਵੀ ਰੱਖਦਾ ਹੈ।

ਜਿਸ ਕਰਕੇ ਪਿੰਡਾਂ ਦੇ ਨਾਲ ਹੀ ਸ਼ਹਿਰੀ ਲੋਕਾਂ ਵਿੱਚ ਵੀ ਮਿੱਟੀ ਦੇ ਬਰਤਨ ਖਰੀਦਣ ਦਾ ਰੁਝਾਨ ਵੱਧਣ ਲੱਗਾ ਹੈ।

ਸਿਹਤ ਮਾਹਿਰਾਂ ਦਾ ਕਹਿਣਾ ਹੈ ਕਿ ਘੜੇ ਦਾ ਪਾਣੀ ਨਾ ਸਿਰਫ ਠੰਢਾ ਹੁੰਦਾ ਹੈ, ਸਗੋਂ ਇਹ ਸਿਹਤ ਲਈ ਵੀ ਫਾਇਦੇਮੰਦ ਹੁੰਦਾ ਹੈ।

ਆਪਣੇ ਘੜੇ ਦੇ ਪਾਣੀ ਨੂੰ ਠੰਢਾ ਰੱਖਣ ਲਈ, ਤੁਸੀਂ ਇਸ ਦੇ ਹੇਠਾਂ ਰੇਤੇ ਨਾਲ ਭਰਿਆ ਬਰਤਨ ਰੱਖ ਸਕਦੇ ਹੋ। ਇਸ ਰੇਤੇ ਨੂੰ ਗਿੱਲਾ ਰੱਖਣ ਨਾਲ ਪਾਣੀ ਦਾ ਤਾਪਮਾਨ ਵੀ ਘੱਟ ਰਹਿੰਦਾ ਹੈ। ਅਜਿਹਾ ਕਰਨ ਨਾਲ ਘੜੇ ਦਾ ਪਾਣੀ ਬਿਲਕੁਲ ਠੰਢਾ ਹੋ ਜਾਵੇਗਾ।

ਮਿੱਟੀ ਦੇ ਘੜੇ ਵਿੱਚ ਪਾਣੀ ਨੂੰ ਠੰਢਾ ਰੱਖਣ ਲਈ, ਤੁਸੀਂ ਇਸ 'ਤੇ ਸੂਤੀ ਕੱਪੜਾ ਲਪੇਟ ਸਕਦੇ ਹੋ। ਗਰਮੀ ਵਧਣ ਨਾਲ ਇਹ ਕੱਪੜਾ ਜਲਦੀ ਸੁੱਕ ਜਾਵੇਗਾ। ਅਜਿਹੇ 'ਚ ਇਸ ਕੱਪੜੇ ਨੂੰ ਵਾਰ-ਵਾਰ ਗਿੱਲਾ ਕਰਦੇ ਰਹੋ।

ਇਸ ਦੇ ਨਾਲ ਹੀ, ਜੇਕਰ ਸੰਭਵ ਹੋਵੇ, ਤਾਂ ਘੜੇ ਨੂੰ ਅਜਿਹੀ ਜਗ੍ਹਾ 'ਤੇ ਰੱਖੋ ਜਿੱਥੇ ਬਾਹਰ ਦੀ ਹਵਾ ਘੜੇ ਵਿੱਚ ਜਾ ਸਕੇ। ਅਜਿਹਾ ਕਰਨ ਨਾਲ ਘੜੇ ਦਾ ਪਾਣੀ ਠੰਢਾ ਤੇ ਤਾਜ਼ਾ ਰਹੇਗਾ।

ਮਟਕੇ ਨੂੰ ਖਰੀਦਦੇ ਸਮੇਂ ਇਸ ਗੱਲ ਦਾ ਹਮੇਸ਼ਾ ਧਿਆਨ ਰੱਖਣਾ ਚਾਹੀਦਾ ਹੈ ਕਿ ਮਟਕਾ ਚੰਗੀ ਮਿੱਟੀ ਦਾ ਬਣਿਆ ਹੋਵੇ। ਕੱਚੀ ਮਿੱਟੀ ਦੇ ਬਣੇ ਘੜੇ ਵਿੱਚ ਪਾਣੀ ਠੰਢਾ ਨਹੀਂ ਰਹਿੰਦਾ।

ਇਸ ਲਈ, ਜਦੋਂ ਵੀ ਤੁਸੀਂ ਮਟਕਾ ਖਰੀਦਣ ਲਈ ਬਾਜ਼ਾਰ ਜਾਂਦੇ ਹੋ, ਤਾਂ ਪਤਾ ਕਰੋ ਕਿ ਘੜਾ ਕਿਸ ਤਰ੍ਹਾਂ ਦੀ ਮਿੱਟੀ ਦਾ ਬਣਿਆ ਹੋਇਆ ਹੈ।

ਜਦੋਂ ਤੁਸੀਂ ਪਹਿਲੀ ਵਾਰ ਬਾਜ਼ਾਰ ਤੋਂ ਘੜਾ ਲੈ ਕੇ ਆਉਂਦੇ ਹੋ ਤਾਂ ਇਸ ਨੂੰ ਇੱਕ ਵਾਰ ਠੰਢੇ ਪਾਣੀ 'ਚ ਭਿਓ ਦਿਓ, ਪਰ ਧਿਆਨ ਰੱਖੋ ਬਰਤਨ 'ਚ ਹੱਥ ਫੇਰ ਕੇ ਇਸ ਨੂੰ ਬਿਲਕੁਲ ਵੀ ਨਾ ਧੋਵੋ।