ਭਾਰਤ ਹੁਣ ਦੁਨੀਆ ਵਿੱਚ ਸਾਈਬਰ ਹਮਲਿਆਂ ਦਾ ਸਭ ਤੋਂ ਵੱਡਾ ਨਿਸ਼ਾਨਾ ਬਣ ਗਿਆ ਹੈ।

ਸਵਿਸ ਕੰਪਨੀ ਐਕਰੋਨਿਸ ਦੀ ਰਿਪੋਰਟ ਅਨੁਸਾਰ ਮਈ 2025 ਵਿੱਚ 12.4% ਵਿੰਡੋਜ਼ ਡਿਵਾਈਸ ਮਾਲਵੇਅਰ ਨਾਲ ਪ੍ਰਭਾਵਿਤ ਸਨ, ਜਦਕਿ ਜੂਨ ਵਿੱਚ ਇਹ ਅੰਕੜਾ ਵੱਧ ਕੇ 13.2% ਹੋ ਗਿਆ। ਇਹ ਦਰ ਵਿਸ਼ਵ ਪੱਧਰ 'ਤੇ ਸਭ ਤੋਂ ਉੱਚੀ ਹੈ।

ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਭਾਰਤ ਦਾ ਡਿਜੀਟਲ ਈਕੋਸਿਸਟਮ ਇੱਕ ਪਰਫੈਕਟ ਸਟੋਰਮ ਸਥਿਤੀ ਦਾ ਸਾਹਮਣਾ ਕਰ ਰਿਹਾ ਹੈ, ਜਿਸ ਵਿੱਚ ਬਹੁਤ ਸਾਰੇ ਖਤਰਨਾਕ ਕਾਰਕ ਇਕੱਠੇ ਕੰਮ ਕਰ ਰਹੇ ਹਨ।

ਇਸ ਵਿੱਚ ਸਭ ਤੋਂ ਵੱਡਾ ਖ਼ਤਰਾ ਮਾਲਵੇਅਰ ਹੈ, ਜੋ ਇੱਕ ਸਾਫਟਵੇਅਰ ਹੈ ਜੋ ਇੱਕ ਕੰਪਿਊਟਰ ਜਾਂ ਨੈੱਟਵਰਕ ਵਿੱਚ ਘੁਸਪੈਠ ਕਰਦਾ ਹੈ ਤੇ ਕਾਰਜਾਂ ਵਿੱਚ ਵਿਘਨ ਪਾਉਂਦਾ ਹੈ। ਇਹ ਖਤਰਾ ਲਗਾਤਾਰ ਵਧਦਾ ਜਾ ਰਿਹਾ ਹੈ।

ਸਾਈਬਰ ਹਮਲਿਆਂ ਵਿੱਚ ਸਭ ਤੋਂ ਵੱਧ ਨਿਸ਼ਾਨਾ ਹੁਣ ਕਾਰੋਬਾਰੀ ਈਮੇਲ ਬਣ ਰਹੇ ਹਨ। ਰਿਪੋਰਟ ਮੁਤਾਬਕ, 2024 ਵਿੱਚ 20% ਈਮੇਲ ਹਮਲੇ ਹੁੰਦੇ ਸਨ, ਜੋ 2025 ਵਿੱਚ ਵੱਧ ਕੇ 25.6% ਹੋ ਗਏ।

ਹੁਣ ਸਾਈਬਰ ਅਪਰਾਧੀ ਏਆਈ ਟੂਲ ਨਾਲ ਨਕਲੀ ਈਮੇਲ, ਇਨਵੌਇਸ ਅਤੇ ਡੀਪਫੇਕ ਤਿਆਰ ਕਰਦੇ ਹਨ, ਜਿਨ੍ਹਾਂ ਨੂੰ ਪਹਿਚਾਨਣਾ ਔਖਾ ਹੈ।

ਕੋਵਿਡ-19 ਤੋਂ ਬਾਅਦ ਹਾਈਬ੍ਰਿਡ ਕੰਮ ਕਾਰਨ ਅਸੁਰੱਖਿਅਤ ਨੈੱਟਵਰਕ ਤੇ ਰਿਮੋਟ ਸਿਸਟਮ ਸਭ ਤੋਂ ਵੱਡਾ ਨਿਸ਼ਾਨਾ ਬਣ ਰਹੇ ਹਨ।

ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਭਾਰਤ ਵਿੱਚ ਨਿਰਮਾਣ, ਆਈਟੀ ਸੇਵਾਵਾਂ ਤੇ ਟੈਲੀਕਾਮ ਸੈਕਟਰ ਸਭ ਤੋਂ ਵੱਧ ਜੋਖਮ ਵਿੱਚ ਹਨ।

ਸਾਈਬਰ ਅਪਰਾਧੀ Cl0p, Akira ਤੇ Qilin ਵਰਗੇ ਰੈਨਸਮਵੇਅਰ ਕਾਰਟੈਲਾਂ ਰਾਹੀਂ ਹਮਲੇ ਵਧਾ ਰਹੇ ਹਨ।

ਇਸ ਦੇ ਨਾਲ ਹੀ ਰਿਮੋਟ ਪ੍ਰਬੰਧਨ ਟੂਲ ਵਰਗੇ ਭਰੋਸੇਯੋਗ ਸੌਫਟਵੇਅਰ ਨੂੰ ਮਾਲਵੇਅਰ ਫੈਲਾਉਣ ਲਈ ਹਥਿਆਰਾਂ ਵਜੋਂ ਵਰਤਿਆ ਜਾ ਰਿਹਾ ਹੈ।

ਰੈਨਸਮਵੇਅਰ ਹਮਲਿਆਂ ਵਿੱਚ ਅਪਰਾਧੀ ਸਿਸਟਮ ਅਤੇ ਫਾਈਲਾਂ ਨੂੰ ਲਾਕ ਕਰ ਦਿੰਦੇ ਹਨ ਤੇ ਉਨ੍ਹਾਂ ਨੂੰ ਵਾਪਸ ਪ੍ਰਾਪਤ ਕਰਨ ਲਈ ਫਿਰੌਤੀ ਦੀ ਮੰਗ ਕਰਦੇ ਹਨ।

ਰਿਪੋਰਟ ਕਹਿੰਦੀ ਹੈ ਕਿ ਭਾਰਤ ਸਭ ਤੋਂ ਵੱਡਾ ਸਾਈਬਰ ਖ਼ਤਰਾ ਹੌਟਸਪੌਟ ਹੈ, ਇਸ ਲਈ ਕੰਪਨੀਆਂ ਨੂੰ ਰੋਕਥਾਮ ਨਾਲ ਨਾਲ ਤੇਜ਼ ਰਿਕਵਰੀ 'ਤੇ ਵੀ ਧਿਆਨ ਦੇਣਾ ਚਾਹੀਦਾ ਹੈ।