Bronx Subway Tracks Video: ਐਤਵਾਰ ਨੂੰ ਨਿਊਯਾਰਕ ਸ਼ਹਿਰ (New York City) ਦੇ ਬ੍ਰੌਂਕਸ 'ਚ ਇਕ ਵਿਅਕਤੀ ਨੇ 52 ਸਾਲਾ ਔਰਤ ਨੂੰ ਸਬ-ਵੇਅ (Subway Tracks) ਦੀਆਂ ਪਟੜੀਆਂ 'ਤੇ ਸੁੱਟ ਦਿੱਤਾ। ਹੁਣ ਇਸੇ ਘਟਨਾ ਦੀ ਇੱਕ ਵੀਡੀਓ ਨਿਊਯਾਰਕ ਸਿਟੀ ਪੁਲਿਸ ਡਿਪਾਰਟਮੈਂਟ (NYPD) ਨੇ ਜਾਰੀ ਕੀਤੀ ਹੈ। ਇਸ ਵੀਡੀਓ 'ਚ ਤੁਸੀਂ ਦੇਖ ਸਕਦੇ ਹੋ ਕਿ ਇਕ ਸ਼ਖ਼ਸ ਔਰਤ ਨੂੰ ਜ਼ਬਰਦਸਤੀ ਫੜ ਕੇ ਪਟੜੀ 'ਤੇ ਸੁੱਟ ਦਿੰਦਾ ਹੈ।
ਪੁਲਿਸ ਨੇ ਦੱਸਿਆ ਕਿ ਇਹ ਘਟਨਾ ਐਤਵਾਰ ਸ਼ਾਮ ਕਰੀਬ 4:40 ਵਜੇ ਸਾਊਥ ਬ੍ਰੌਂਕਸ ਦੇ ਵੈਸਟਚੈਸਟਰ ਐਵੇਨਿਊ-ਜੈਕਸਨ ਐਵੇਨਿਊ ਸਟਾਪ 'ਤੇ ਵਾਪਰੀ। ਪੁਲਿਸ ਨੇ ਸ਼ੱਕੀ ਦੀ ਪਛਾਣ ਕਰਨ ਲਈ ਲੋਕਾਂ ਦੀ ਮਦਦ ਮੰਗੀ ਹੈ।
'ਔਰਤ ਦੀ ਹਾਲਤ 'ਚ ਹੋ ਰਿਹਾ ਹੈ ਸੁਧਾਰ'
ਨਿਊਯਾਰਕ ਡੇਲੀ ਨਿਊਜ਼ ਦੇ ਅਨੁਸਾਰ 52 ਸਾਲਾ ਪੀੜਤ, ਜੋ ਰੇਲ ਗੱਡੀ ਦੀ ਲਪੇਟ 'ਚ ਆਉਣ ਤੋਂ ਬੱਚ ਗਈ, ਨੂੰ ਸਥਿਰ ਹਾਲਤ 'ਚ ਲਿੰਕਨ ਹਸਪਤਾਲ ਲਿਜਾਇਆ ਗਿਆ। ਨਿਊਯਾਰਕ ਸਿਟੀ ਪੁਲਿਸ ਵਿਭਾਗ ਦੇ ਕਮਿਸ਼ਨਰ ਕੀਚੈਂਟ ਸੇਵੇਲ ਨੇ ਮੰਗਲਵਾਰ ਨੂੰ ਕਿਹਾ ਕਿ ਔਰਤ ਦੀ ਹਾਲਤ 'ਚ ਸੁਧਾਰ ਹੋ ਰਿਹਾ ਹੈ।
ਮਹੱਤਵਪੂਰਨ ਗੱਲ ਇਹ ਹੈ ਕਿ ਵੀਡੀਓ 'ਚ ਦਿਖਾਇਆ ਗਿਆ ਹੈ ਕਿ ਬੇਸਬਾਲ ਕੈਪ ਅਤੇ ਚਿੱਟੇ ਰੰਗ ਦੀ ਟੈਂਕ ਟੌਪ ਪਹਿਨੇ ਵਿਅਕਤੀ ਪਿੱਛੇ ਤੋਂ ਔਰਤ ਦੇ ਕੋਲ ਆਉਂਦਾ ਹੈ। ਉਸ ਨੂੰ ਦੋਵੇਂ ਹੱਥਾਂ ਨਾਲ ਫੜਦਾ ਹੈ ਅਤੇ ਉਸ ਨੂੰ ਪਟੜੀ ਵੱਲ ਸੁੱਟ ਦਿੰਦਾ ਹੈ। ਔਰਤ ਪਟੜੀ 'ਤੇ ਡਿੱਗਣ ਤੋਂ ਪਹਿਲਾਂ ਪਲੇਟਫ਼ਾਰਮ ਦੇ ਫੁੱਟਪਾਥ ਨਾਲ ਟਕਰਾ ਗਈ।
ਰੇਲਗੱਡੀ ਦੇ ਨਾ ਆਉਣ ਕਾਰਨ ਵੱਡਾ ਹਾਦਸਾ ਹੋਣੋਂ ਟਲਿਆ
ਐਮਟੀਏ ਦੇ ਬੁਲਾਰੇ ਨੇ ਦੱਸਿਆ ਕਿ ਰਾਹਗੀਰਾਂ ਨੇ ਔਰਤ ਨੂੰ ਪਟੜੀ ਤੋਂ ਚੁੱਕਣ 'ਚ ਮਦਦ ਕੀਤੀ। ਜਦੋਂ ਉਸ ਨੂੰ ਪਟੜੀ 'ਤੇ ਸੁੱਟਿਆ ਗਿਆ ਤਾਂ ਕੋਈ ਟਰੇਨ ਨਹੀਂ ਆ ਰਹੀ ਸੀ, ਇਸ ਲਈ ਔਰਤ ਸੁਰੱਖਿਅਤ ਹੈ। ਦੱਸ ਦਈਏ ਕਿ ਪੁਲਿਸ ਅਜੇ ਵੀ ਮੁਲਜ਼ਮ ਦੀ ਭਾਲ ਕਰ ਰਹੀ ਹੈ। ਪੁਲਿਸ ਨੇ ਮੁਲਜ਼ਮ ਨੂੰ ਫੜਨ ਲਈ ਲੋਕਾਂ ਤੋਂ ਮਦਦ ਦੀ ਮੰਗ ਕੀਤੀ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਉਹ ਜਲਦ ਹੀ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਵੇਗੀ।