ਨਵੀਂ ਦਿੱਲੀ: ਜੇ ਤੁਸੀਂ ਵੀ ਜ਼ਿਆਦਾਤਰ ਭੁਗਤਾਨ ਔਨਲਾਈਨ ਕਰਦੇ ਹੋ, ਤਾਂ ਤੁਹਾਡੇ ਲਈ ਕੰਮ ਦੀ ਖ਼ਬਰ ਹੈ। ਦਰਅਸਲ, ਜਲਦੀ ਹੀ ਕ੍ਰੈਡਿਟ ਤੇ ਡੈਬਿਟ ਕਾਰਡਾਂ ਨਾਲ ਭੁਗਤਾਨ ਕਰਨ ਲਈ, ਤੁਹਾਨੂੰ ਸੀਵੀਵੀ ਨੰਬਰ ਦੇ ਨਾਲ 16 ਅੰਕਾਂ ਦਾ ਕਾਰਡ ਨੰਬਰ ਵੀ ਦਾਖਲ ਕਰਨਾ ਪਿਆ ਕਰੇਗਾ।

ਆਰਬੀਆਈ ਹੁਣ ਗਾਹਕਾਂ ਨਾਲ ਹੋ ਰਹੀਆਂ ਔਨਲਾਈਨ ਧੋਖਾਧੜੀਆਂ ਰੋਕਣ ਲਈ ਇਹ ਕਦਮ ਚੁੱਕਣ ਜਾ ਰਿਹਾ ਹੈ। ਇਸ ਦੇ ਨਾਲ, ਇਹ ਉਨ੍ਹਾਂ ਵੱਡੀਆਂ ਤਕਨੀਕੀ ਕੰਪਨੀਆਂ 'ਤੇ ਵੀ ਨਜ਼ਰ ਰੱਖੀ ਜਾਵੇਗੀ, ਜੋ ਗਾਹਕਾਂ ਦੇ ਡੈਬਿਟ-ਕ੍ਰੈਡਿਟ ਕਾਰਡ ਦਾ ਡਾਟਾ ਸਟੋਰ ਕਰਦੀਆਂ ਹਨ।

ਕਾਰਡ ਦੇ 16 ਅੰਕ ਐਂਟਰ ਕਰਨੇ ਪੈਣਗੇ
ਆਰਬੀਆਈ ਦੇ ਨਵੇਂ ਨਿਯਮਾਂ ਤੋਂ ਬਾਅਦ, ਅਜਿਹੀਆਂ ਕੰਪਨੀਆਂ ਆਪਣੇ ਸਰਵਰਾਂ ਵਿੱਚ ਗਾਹਕਾਂ ਦੇ ਕ੍ਰੈਡਿਟ-ਡੈਬਿਟ ਕਾਰਡਾਂ ਦਾ ਡਾਟਾ ਸਟੋਰ ਨਹੀਂ ਕਰ ਸਕਣਗੀਆਂ। ਹੁਣ ਗਾਹਕ ਨੂੰ ਕੋਈ ਵੀ ਔਨਲਾਈਨ ਭੁਗਤਾਨ ਕਰਦੇ ਸਮੇਂ ਆਪਣੇ ਡੈਬਿਟ ਜਾਂ ਕ੍ਰੈਡਿਟ ਕਾਰਡ ਦੇ ਪੂਰੇ ਵੇਰਵੇ ਦਰਜ ਕਰਨੇ ਪੈਣਗੇ। ਮਤਲਬ ਹੁਣ ਸਿਰਫ ਸੀਵੀਵੀ ਨੰਬਰ ਹੀ ਕੰਮ ਨਹੀਂ ਕਰੇਗਾ। ਇਸ ਤੋਂ ਬਿਨਾਂ ਕੋਈ ਲੈਣ-ਦੇਣ ਸੰਭਵ ਨਹੀਂ ਹੋਵੇਗਾ। ਕੰਪਨੀਆਂ ਵੀ ਗਾਹਕਾਂ ਦਾ ਡਾਟਾ ਸਟੋਰ ਨਹੀਂ ਕਰ ਸਕਣਗੀਆਂ ਅਤੇ ਇਸ ਨਾਲ ਸੁਰੱਖਿਆ ਵਧੇਗੀ।

ਨਿਯਮ ਅਗਲੇ ਸਾਲ ਤੋਂ ਲਾਗੂ ਹੋਣਗੇ
ਮੀਡੀਆ ਰਿਪੋਰਟਾਂ ਅਨੁਸਾਰ ਇਹ ਨਵੇਂ ਨਿਯਮ ਅਗਲੇ ਸਾਲ ਜਨਵਰੀ ਤੋਂ ਲਾਗੂ ਕੀਤੇ ਜਾ ਸਕਦੇ ਹਨ। ਆਰਬੀਆਈ ਇਸ ਨਿਯਮ ਨੂੰ ਇਸ ਸਾਲ ਜੁਲਾਈ ਤੋਂ ਹੀ ਲਾਗੂ ਕਰਨਾ ਚਾਹੁੰਦਾ ਸੀ ਪਰ ਇਸ ਦੇ ਅਮਲ ਵਿੱਚ ਆਉਣ ਵਾਲੀਆਂ ਮੁਸ਼ਕਲਾਂ ਕਾਰਨ ਅਜਿਹਾ ਨਹੀਂ ਹੋ ਸਕਿਆ। ਦੂਜੇ ਪਾਸੇ, ਬੈਂਕ ਵੀ ਹਾਲੇ ਇਸ ਲਈ ਪੂਰੀ ਤਰ੍ਹਾਂ ਤਿਆਰ ਨਹੀਂ ਸਨ। ਇਨ੍ਹਾਂ ਦੇ ਮੱਦੇਨਜ਼ਰ ਹੁਣ ਇਹ ਨਿਯਮ ਜਨਵਰੀ 2022 ਤੋਂ ਲਾਗੂ ਹੋਣਗੇ।

ਸੁਰੱਖਿਆ ਵਧੇਗੀ
ਆਰਬੀਆਈ ਦੇ ਇਨ੍ਹਾਂ ਨਵੇਂ ਨਿਯਮਾਂ ਦੇ ਸਬੰਧ ਵਿੱਚ, ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸ ਨਾਲ ਔਨਲਾਈਨ ਭੁਗਤਾਨ ਲਈ ਸਮਾਂ ਜ਼ਰੂਰ ਵਧੇਗਾ ਪਰ ਇਹ ਪਹਿਲਾਂ ਨਾਲੋਂ ਵਧੇਰੇ ਸੁਰੱਖਿਅਤ ਹੋਵੇਗਾ। ਇਨ੍ਹਾਂ ਨਿਯਮਾਂ ਦੀ ਪਾਲਣਾ ਕਰਦਿਆਂ, ਔਨਲਾਈਨ ਖਰੀਦਦਾਰੀ ਕਰਦੇ ਸਮੇਂ, ਗਾਹਕਾਂ ਨੂੰ ਆਪਣੇ ਕ੍ਰੈਡਿਟ ਜਾਂ ਡੈਬਿਟ ਕਾਰਡ ਦੇ ਪੂਰੇ 16 ਅੰਕ ਦਰਜ ਕਰਨੇ ਪੈਣਗੇ। ਸੀਵੀਵੀ, ਮਿਆਦ ਪੁੱਗਣ ਦੀ ਤਾਰੀਖ ਭਾਵ ਐਕਸਪਾਇਰੀ ਡੇਟ ਵਰਗੇ ਵੇਰਵੇ ਵੀ ਆਪਣੇ ਆਪ ਹੀ ਦਰਜ ਕਰਨੇ ਪਿਆ ਕਰਨਗੇ।