ਪੰਜਾਬ ਦੇ ਮਸ਼ਹੂਰ ਕਾਮੇਡੀਅਨ ਕਪਿਲ ਸ਼ਰਮਾ ਦੇ ਕੈਨੇਡਾ ਸਥਿਤ ਕਪਿਲ ਕੈਫੇ Kap's Cafe ‘ਤੇ ਹੋਈ ਤਿੰਨ ਤਾਬੜਤੋੜ ਗੋਲਾਬਾਰੀ ਘਟਨਾਵਾਂ ਵਿੱਚ ਇੱਕ ਹੈਰਾਨ ਕਰਨ ਵਾਲਾ ਨਾਮ ਸਾਹਮਣੇ ਆਇਆ ਹੈ। ਇਹ ਨਾਮ ਲੁਧਿਆਣਾ ਦਿਹਾਤੀ ਪੁਲਿਸ ਲਈ ਵੀ ਚਿੰਤਾ ਦਾ ਵਿਸ਼ਾ ਬਣ ਗਿਆ ਹੈ। ਰਾਏਕੋਟ ਦੇ ਬ੍ਰਾਹਮਪੁਰ ਪਿੰਡ ਦੇ ਨਿਵਾਸੀ ਯੁਵਕ ਸੁਖਵਿੰਦਰ ਉਰਫ਼ ਸੀਪੂ ਹੁਣ ਕੈਨੇਡੀਅਨ ਪੁਲਿਸ ਅਤੇ ਭਾਰਤ ਦੀ ਕੇਂਦਰੀ ਏਜੰਸੀਜ਼ ਦੇ ਨਿਸ਼ਾਨੇ ‘ਤੇ ਹੈ। ਸੀਪੂ ਨਾਲ ਪੰਜਾਬ ਦੇ ਦੋ ਹੋਰ ਯੁਵਕ ਸ਼ੈਰੀ ਅਤੇ ਦਿਲਜੋਤ ਰਿਹਾਲ ਦੇ ਨਾਮ ਵੀ ਇਸ ਜਾਂਚ ਵਿੱਚ ਸਾਹਮਣੇ ਆਏ ਹਨ।
ਮਾਮਲੇ ਦਾ ਪੂਰਾ ਪੱਧਰ
ਕਪਿਲ ਸ਼ਰਮਾ ਦਾ ਇਹ ਨਵਾਂ ਕੈਫੇ ਪਿਛਲੇ ਕੁਝ ਮਹੀਨਿਆਂ ਤੋਂ ਗੈਂਗਸਟਰਾਂ ਦੇ ਨਿਸ਼ਾਨੇ ‘ਤੇ ਸੀ। ਪਹਿਲੀ ਫਾਇਰਿੰਗ 10 ਜੁਲਾਈ ਨੂੰ ਹੋਈ। ਦੂਜੀ ਫਾਇਰਿੰਗ 7 ਅਗਸਤ ਨੂੰ ਹੋਈ। ਤੀਜੀ ਫਾਇਰਿੰਗ 16 ਅਕਤੂਬਰ ਨੂੰ ਹੋਈ। ਤਿੰਨਾਂ ਵਾਰਾਂ ਲਾਰੈਂਸ ਬਿਸ਼ਨੋਈ ਗੈਂਗ ਨੇ ਇਹਨਾਂ ਹਮਲਿਆਂ ਦੀ ਜ਼ਿੰਮੇਵਾਰੀ ਲਈ ਸੀ।
ਜਾਂਚ ਏਜੰਸੀਆਂ ਦੇ ਅਨੁਸਾਰ, ਸੀਪੂ ਅਤੇ ਉਸ ਦਾ ਇੱਕ ਸਾਥੀ ਬੰਧੂ ਮਾਨ ਸਿੰਘ ਸੇਖੋਂ, ਜੋ ਗੋਲਡੀ ਢਿੱਲੋਂ ਗੈਂਗ ਨਾਲ ਜੁੜਿਆ ਹੈ, ਨੇ ਸਿੱਧੀਆਂ ਗੋਲੀਆਂ ਨਹੀਂ ਚਲਾਈਆਂ। ਸੀਪੂ ਉੱਤੇ ਆਰੋਪ ਹੈ ਕਿ ਉਸ ਨੇ ਹਮਲੇ ਦੀ ਪੂਰੀ ਯੋਜਨਾ (ਪਲੈਨਿੰਗ) ਤਿਆਰ ਕੀਤੀ ਅਤੇ ਉਸ ‘ਤੇ ਨਿਗਰਾਨੀ (ਮਾਨੀਟਰਨਿੰਗ) ਰੱਖੀ।
ਸੇਖੋਂ ਉੱਤੇ ਆਰੋਪ ਹੈ ਕਿ ਉਸ ਨੇ ਗੋਲੀਆਂ ਚਲਾਉਣ ਵਾਲਿਆਂ ਨੂੰ ਹਥਿਆਰ ਅਤੇ ਗੱਡੀ ਮੁਹੱਈਆ ਕਰਵਾਈ। ਪੁਲਿਸ ਦਾ ਮੰਨਣਾ ਹੈ ਕਿ ਸ਼ੈਰੀ ਅਤੇ ਦਿਲਜੋਤ ਰਿਹਾਲ ਨੇ ਹੀ ਸੀਪੂ ਦੇ ਕਹਿਣ ‘ਤੇ ਫਾਇਰਿੰਗ ਨੂੰ ਅੰਜਾਮ ਦਿੱਤਾ।
ਦਿੱਲੀ ਪੁਲਿਸ ਨੇ ਸੇਖੋਂ ਨੂੰ ਫੜਿਆ ਤਾਂ ਖੁੱਲਿਆ ਰਾਜ਼
ਇਸ ਮਾਮਲੇ ਦਾ ਵੱਡਾ ਖੁਲਾਸਾ ਤਦ ਹੋਇਆ ਜਦੋਂ ਦਿੱਲੀ ਪੁਲਿਸ ਦੀ ਕ੍ਰਾਈਮ ਬ੍ਰਾਂਚ ਨੇ 28 ਨਵੰਬਰ ਨੂੰ ਸੇਖੋਂ ਨੂੰ ਲੁਧਿਆਣਾ ਦੇ ਜਵੱਡੀ ਇਲਾਕੇ ਤੋਂ ਗ੍ਰਿਫ਼ਤਾਰ ਕੀਤਾ। ਪੁੱਛਤਾਛ ਦੌਰਾਨ ਸੇਖੋਂ ਨੇ ਸੀਪੂ, ਸ਼ੈਰੀ ਅਤੇ ਦਿਲਜੋਤ ਰਿਹਾਲ ਦੇ ਨਾਮ ਦੱਸੇ ਅਤੇ ਕਿਹਾ ਕਿ ਇਹ ਸਾਰੇ ਗੈਂਗ ਦੀਆਂ ਹਰਕਤਾਂ ਵਿੱਚ ਸ਼ਾਮਿਲ ਸਨ।
ਲੁਧਿਆਣਾ ਪੁਲਿਸ ਹੋਈ ਚੌਕਸ, ਛੇ ਮਹੀਨੇ ਪੁਰਾਣਾ ਕੇਸ ਵੀ ਜੁੜਿਆ
ਲੁਧਿਆਣਾ (ਦਿਹਾਤੀ) ਪੁਲਿਸ ਇਸ ਮਾਮਲੇ ‘ਤੇ ਖੁੱਲ੍ਹ ਕੇ ਕੁਝ ਨਹੀਂ ਕਹਿ ਰਹੀ, ਪਰ ਰਾਏਕੋਟ ਦੇ ਵੱਡੇ ਅਧਿਕਾਰੀ ਸੀਪੂ ਦੇ ਆਲੇ-ਦੁਆਲੇ ਦੇ ਲੋਕਾਂ ਅਤੇ ਸੰਭਾਵਿਤ ਸਾਥੀਆਂ ‘ਤੇ ਕੜੀ ਨਿਗਰਾਨੀ ਰੱਖ ਰਹੇ ਹਨ।
ਜਾਂਚ ਦੌਰਾਨ ਇਹ ਵੀ ਪਤਾ ਲੱਗਿਆ ਕਿ ਸੀਪੂ ਦਾ ਨਾਮ ਛੇ ਮਹੀਨੇ ਪਹਿਲਾਂ ਅਹਿਮਦਗੜ੍ਹ ਸਿਟੀ ਥਾਣਾ (ਮਲੇਰਕੋਟਲਾ) ਵਿੱਚ ਇਕ ਧਮਕੀ ਦੇਣ ਵਾਲੇ ਕੇਸ ਵਿੱਚ ਵੀ ਆਇਆ ਸੀ। ਮਲੇਰਕੋਟਲਾ ਪੁਲਿਸ ਇਸ ਪੁਰਾਣੇ ਕੇਸ ਦੀ ਦੁਬਾਰਾ ਜਾਂਚ ਕਰ ਰਹੀ ਸੀ ਕਿ ਕੈਨੇਡਾ ਵਾਲੇ ਫਾਇਰਿੰਗ ਮਾਮਲੇ ਵਿੱਚ ਸੀਪੂ ਦਾ ਨਾਮ ਸਾਹਮਣੇ ਆ ਗਿਆ, ਜਿਸ ਦੇ ਬਾਅਦ ਕੇਸ ਫਾਈਲ ਵਾਪਸ ਸੀਨੀਅਰ ਅਧਿਕਾਰੀਆਂ ਨੂੰ ਭੇਜ ਦਿੱਤੀ ਗਈ।