ਬਿੰਨੂੰ ਢਿੱਲੋਂ ਤੇ ਜਸਵਿੰਦਰ ਭੱਲਾ ਦੀ ਜੋੜੀ ਇੱਕ ਵਾਰ ਫ਼ਿਰ ਤੋਂ ਹਾਸਿਆਂ ਦੇ ਪਟਾਕੇ ਪਾਉਣ ਜਾ ਰਹੀ ਹੈ। ਬਿੰਨੂੰ ਢਿੱਲੋਂ ਨੇ ਆਪਣੇ ਅਧਿਕਾਰਤ ਇੰਸਟਾਗ੍ਰਾਮ ਪੇਜ `ਤੇ ਕੈਨੇਡਾ `ਚ ਕਾਮੇਡੀ ਸ਼ੋਅ `ਕਦੇ ਕਦੇ ਹੱਸਣਾ ਜ਼ਰੂਰ ਚਾਹੀਦਾ` ਦਾ ਐਲਾਨ ਕੀਤਾ ਹੈ। ਜਿਸ ਵਿੱਚ ਬਿੰਨੂੰ ਢਿੱਲੋਂ ਤੇ ਜਸਵਿੰਦਰ ਭੱਲਾ ਤੋਂ ਇਲਾਵਾ ਜੱਗੀ ਧੂਰੀ ਤੇ ਰਵਿੰਦਰ ਮੰਡ ਦੇ ਨਾਲ ਹੋਰ ਵੀ ਕਈ ਕਾਮੇਡੀਅਨਜ਼ ਤੁਹਾਡਾ ਮਨੋਰੰਜਨ ਕਰਨਗੇ।
ਸ਼ੋਅ ਬਾਰੇ ਗੱਲ ਕੀਤੀ ਜਾਏ ਤਾਂ ਇਹ ਕਾਮੇਡੀ ਸ਼ੋਅ ਜੁਲਾਈ ਦੇ ਅਖ਼ੀਰਲੇ ਹਫ਼ਤੇ ਤੋਂ ਸ਼ੁਰੂ ਹੋ ਕੇ ਅਗਸਤ ਦੇ ਪਹਿਲੇ ਹਫ਼ਤੇ ਤੱਕ ਚੱਲੇਗਾ। ਬਿੰਨੂ ਢਿੱਲੋਂ ਨੇ ਆਪਣੇ ਇੰਸਟਾਗ੍ਰਾਮ ਪੇਜ `ਤੇ ਵੀਡੀਓ ਜਾਰੀ ਕਰ ਆਪਣੇ ਫ਼ੈਨਜ਼ ਨਾਲ ਇਹ ਜਾਣਕਾਰੀ ਸ਼ੇਅਰ ਕੀਤੀ।
ਦਸ ਦਈਏ ਕਿ ਬਿੰਨੂੰ ਢਿੱਲੋਂ ਲੰਮੇ ਸਮੇਂ ਬਾਅਦ ਕੈਨੇਡਾ `ਚ ਕਾਮੇਡੀ ਸ਼ੋਅ ਕਰਨ ਜਾ ਰਹੇ ਹਨ। ਇਸ ਤੋਂ ਪਹਿਲਾਂ ਢਿੱਲੋਂ ਤੇ ਜਸਵਿੰਦਰ ਭੱਲਾ 4 ਸਾਲ ਪਹਿਲਾਂ ਯਾਨਿ 2018 ਵਿੱਚ ਕੈਨੇਡਾ ਟੂਰ `ਤੇ ਇਕੱਠੇ ਨਜ਼ਰ ਆਏ ਸਨ। ਇਨ੍ਹਾਂ ਨੇ ਕੈਨੇਡਾ `ਚ ਐਨਆਰਆਈ: ਨਹੀਂ ਰਹਿਣਾ ਇੰਡੀਆ ਕਾਮੇਡੀ ਸ਼ੋਅ ਕੀਤਾ ਸੀ, ਜਿਸ ਨੂੰ ਦਰਸ਼ਕਾਂ ਦਾ ਭਰਪੂਰ ਪਿਆਰ ਮਿਲਿਆ ਸੀ।