Sudhanshu Pandey: ਮਸ਼ਹੂਰ ਟੀਵੀ ਸੀਰੀਅਲ 'ਅਨੁਪਮਾ' ਨੂੰ ਲੈ ਪ੍ਰਸ਼ੰਸਕਾਂ ਲਈ ਬੁਰੀ ਖਬਰ ਸਾਹਮਣੇ ਆ ਰਹੀ ਹੈ। ਦੱਸ ਦੇਈਏ ਕਿ ਸੋਸ਼ਲ ਮੀਡੀਆ ਉੱਪਰ ਇੱਕ ਅਜਿਹਾ ਵੀਡੀਓ ਵਾਇਰਲ ਹੋ ਰਿਹਾ ਹੈ, ਜਿਸ ਨੇ ਸੋਸ਼ਲ ਮੀਡੀਆ ਉੱਪਰ ਤਰਥੱਲੀ ਮਚਾ ਦਿੱਤੀ ਹੈ। ਜਾਣਕਾਰੀ ਮੁਤਾਬਕ ਸ਼ੋਅ 'ਚ ਆਉਣ ਵਾਲੀ ਲੀਪ ਤੋਂ ਬਾਅਦ ਰੂਪਾਲੀ ਗਾਂਗੁਲੀ ਅਤੇ ਗੌਰਵ ਖੰਨਾ ਸ਼ੋਅ ਨੂੰ ਅਲਵਿਦਾ ਕਹਿ ਸਕਦੇ ਹਨ।
ਹਾਲਾਂਕਿ, ਇਸ ਕਾਰਨ ਵਨਰਾਜ ਦੀ ਭੂਮਿਕਾ ਨਿਭਾਉਣ ਵਾਲੇ ਅਭਿਨੇਤਾ ਸੁਧਾਂਸ਼ੂ ਪਾਂਡੇ ਨੂੰ ਲੈ ਹੈਰਾਨ ਕਰਨ ਵਾਲੀ ਖਬਰ ਸਾਹਮਣੇ ਆ ਰਹੀ ਹੈ। ਦਰਅਸਲ, ਸੁਧਾਂਸ਼ੂ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ 'ਤੇ ਐਲਾਨ ਕੀਤਾ ਹੈ ਕਿ ਉਨ੍ਹਾਂ ਨੇ ਸੀਰੀਅਲ 'ਅਨੁਪਮਾ' ਛੱਡ ਦਿੱਤਾ ਹੈ। ਮਿਲੀ ਜਾਣਕਾਰੀ ਮੁਤਾਬਕ ਸੁਧਾਂਸ਼ੂ ਪਾਂਡੇ ਨੇ ਸ਼ੋਅ ਨਹੀਂ ਛੱਡਿਆ ਹੈ, ਸਗੋਂ ਉਨ੍ਹਾਂ ਨੂੰ ਸ਼ੋਅ ਤੋਂ ਬਾਹਰ ਕਰ ਦਿੱਤਾ ਗਿਆ ਹੈ। ਅਦਾਕਾਰ ਨੇ ਵੀਡੀਓ ਸ਼ੇਅਰ ਕਰ ਸ਼ੋਅ ਛੱਡਣ ਦੀ ਪੁਸ਼ਟੀ ਕੀਤੀ ਹੈ।
ਅਦਾਕਾਰ ਦੀ ਪ੍ਰੋਡਿਊਸਰ ਨਾਲ ਹੋਈ ਬਹਿਸ
ਜਾਣਕਾਰੀ ਮੁਤਾਬਕ 'ਸਕ੍ਰਿਪਟ 'ਚ ਦਖਲਅੰਦਾਜ਼ੀ' ਯਾਨੀ ਸ਼ੋਅ ਦੀ ਸਕ੍ਰਿਪਟ 'ਚ ਦਖਲਅੰਦਾਜ਼ੀ ਕਾਰਨ ਸੁਧਾਂਸ਼ੂ ਨੂੰ ਸ਼ੋਅ ਤੋਂ ਬਾਹਰ ਦਾ ਰਸਤਾ ਦਿਖਾ ਦਿੱਤਾ ਗਿਆ ਹੈ। ਸਕ੍ਰਿਪਟ ਨੂੰ ਲੈ ਕੇ ਸ਼ੋਅ ਦੇ ਪ੍ਰੋਡਿਊਸਰ ਰਾਜਨ ਸ਼ਾਹੀ ਨਾਲ ਉਨ੍ਹਾਂ ਦੀ ਬਹਿਸ ਕਾਰਨ ਉਨ੍ਹਾਂ ਨੂੰ ਸ਼ੋਅ ਛੱਡਣ ਲਈ ਕਿਹਾ ਗਿਆ।
ਦਰਅਸਲ, ਪਿਛਲੇ ਦੋ ਦਹਾਕਿਆਂ ਤੋਂ ਆਪਣੇ ਸੀਰੀਅਲਾਂ ਰਾਹੀਂ ਕਰੋੜਾਂ ਦਰਸ਼ਕਾਂ ਦਾ ਮਨੋਰੰਜਨ ਕਰਨ ਵਾਲੇ ਰਾਜਨ ਸ਼ਾਹੀ ਦੇ ਨਾਲ ਉਨ੍ਹਾਂ ਦੀ ਟੀਮ ਸੀਰੀਅਲਾਂ ਵਿੱਚ ਦਿਖਾਏ ਗਏ ਕੰਟੈਂਟ 'ਤੇ ਕੰਮ ਕਰਦੇ ਹਨ। ਇਸ ਲਈ, ਜਦੋਂ ਕੋਈ ਅਭਿਨੇਤਾ ਆਪਣੇ ਕਿਰਦਾਰ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਸਕ੍ਰਿਪਟ ਵਿੱਚ ਬਦਲਾਅ ਦੀ ਮੰਗ ਕਰਦਾ ਹੈ, ਤਾਂ ਰਾਜਨ ਸ਼ਾਹੀ ਉਨ੍ਹਾਂ ਨੂੰ ਠੁਕਰਾ ਦਿੰਦੇ ਹਨ। ਸੁਣਨ 'ਚ ਆਇਆ ਹੈ ਕਿ ਸੁਧਾਂਸ਼ੂ ਨਾਲ ਵੀ ਕੁਝ ਅਜਿਹਾ ਹੀ ਹੋਇਆ ਸੀ ਅਤੇ ਇਸ ਲਈ ਉਨ੍ਹਾਂ ਨੂੰ ਸ਼ੋਅ ਛੱਡਣਾ ਪਿਆ ਸੀ।
ਸੁਧਾਂਸ਼ੂ ਨੇ ਸਪਸ਼ਟ ਕੀਤੀਆਂ ਗੱਲਾਂ
ਹਾਲਾਂਕਿ ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਕੁਝ ਹੋਰ ਹੀ ਬਿਆਨ ਕਰ ਰਹੀ ਹੈ ਪਰ ਸੁਧਾਂਸ਼ੂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਖੁਦ 'ਅਨੁਪਮਾ' ਨੂੰ ਅਲਵਿਦਾ ਕਹਿ ਦਿੱਤਾ ਹੈ। ਸੋਸ਼ਲ ਮੀਡੀਆ 'ਤੇ ਲਾਈਵ ਚੈਟ ਦੌਰਾਨ ਕੀਤੇ ਗਏ ਇਸ ਐਲਾਨ 'ਚ ਸੁਧਾਂਸ਼ੂ ਨੂੰ ਇਹ ਕਹਿੰਦੇ ਹੋਏ ਦੇਖਿਆ ਗਿਆ ਕਿ ਪਿਛਲੇ 4 ਸਾਲਾਂ ਤੋਂ ਮੈਂ ਹਰ ਰੋਜ਼ ਇਕ ਸੀਰੀਅਲ ਰਾਹੀਂ ਤੁਹਾਨੂੰ ਮਿਲਣ ਤੁਹਾਡੇ ਘਰ ਆਉਂਦਾ ਹਾਂ। ਇਸ ਸੀਰੀਅਲ ਵਿੱਚ ਮੈਂ ਜੋ ਕਿਰਦਾਰ ਨਿਭਾਇਆ ਹੈ, ਉਸ ਕਿਰਦਾਰ ਲਈ ਮੈਨੂੰ ਜੋ ਨਰਾਜ਼ਗੀ ਅਤੇ ਗੁੱਸਾ ਮਿਲਿਆ ਹੈ, ਉਹ ਮੇਰੇ ਲਈ ਪਿਆਰ ਤੋਂ ਘੱਟ ਨਹੀਂ ਸੀ। ਜੇਕਰ ਮੇਰੇ ਕਿਰਦਾਰ ਨੂੰ ਤੁਹਾਡੇ ਵੱਲੋਂ ਇੰਨੀ ਨਫ਼ਰਤ ਨਾ ਮਿਲੀ ਹੁੰਦੀ ਤਾਂ ਮੈਂ ਇਸ ਨੂੰ ਸਹੀ ਢੰਗ ਨਾਲ ਨਿਭਾਉਣ ਦੇ ਯੋਗ ਨਹੀਂ ਸੀ, ਪਰ ਹੁਣ ਮੈਂ ਤੁਹਾਨੂੰ ਬਹੁਤ ਦੁੱਖ ਨਾਲ ਇੱਕ ਗੱਲ ਦੱਸਣਾ ਚਾਹੁੰਦਾ ਹਾਂ।
ਸੁਧਾਂਸ਼ੂ ਨੇ ਅੱਗੇ ਕਿਹਾ, 'ਮੈਂ ਤੁਹਾਡੇ ਨਾਲ ਸਾਂਝਾ ਕਰਨਾ ਚਾਹੁੰਦਾ ਹਾਂ ਕਿ ਮੈਂ ਹੁਣ 'ਅਨੁਪਮਾ' ਦਾ ਹਿੱਸਾ ਨਹੀਂ ਹਾਂ। ਰਕਸ਼ਾ ਬੰਧਨ ਸਪੈਸ਼ਲ ਐਪੀਸੋਡ ਇਸ ਸੀਰੀਅਲ ਦਾ ਮੇਰਾ ਆਖਰੀ ਐਪੀਸੋਡ ਸੀ। ਮੈਂ ਜਾਣਦਾ ਹਾਂ ਕਿ ਤੁਹਾਡੀਆਂ ਅੱਖਾਂ ਮੈਨੂੰ ਲੱਭ ਰਹੀਆਂ ਹਨ ਅਤੇ ਮੈਂ ਮੰਨਦਾ ਹਾਂ ਕਿ ਇਸ ਨੂੰ ਆਪਣੇ ਪ੍ਰਸ਼ੰਸਕਾਂ ਨਾਲ ਸਾਂਝਾ ਕਰਨਾ ਮੇਰੀ ਜ਼ਿੰਮੇਵਾਰੀ ਹੈ। ਮੈਂ ਨਹੀਂ ਚਾਹੁੰਦਾ ਕਿ ਬਿਨਾਂ ਦੱਸੇ ਸ਼ੋਅ ਛੱਡਣ 'ਤੇ ਮੇਰੇ ਦਰਸ਼ਕ ਮੇਰੇ ਨਾਲ ਨਾਰਾਜ਼ ਹੋਣ। ਇਸ ਦੌਰਾਨ ਸੁਧਾਂਸ਼ੂ ਨੇ ਸਾਰਿਆਂ ਤੋਂ ਮੁਆਫੀ ਵੀ ਮੰਗੀ ਹੈ। ਸੁਧਾਂਸ਼ੂ ਨੇ ਕਿਹਾ, 'ਮੈਂ ਹੁਣ ਵਨਰਾਜ ਦੀ ਭੂਮਿਕਾ 'ਚ ਨਹੀਂ ਨਜ਼ਰ ਆਵਾਂਗਾ। ਮੈਂ 'ਅਨੁਪਮਾ' ਛੱਡ ਦਿੱਤਾ ਹੈ। ਪਰ ਇਸ ਕਿਰਦਾਰ ਲਈ ਮੈਨੂੰ ਦਿੱਤੇ ਪਿਆਰ, ਸਮਰਥਨ ਅਤੇ ਸਨਮਾਨ ਲਈ ਧੰਨਵਾਦ। ਇਹ ਖਬਰ ਅਚਾਨਕ ਤੁਹਾਡੇ ਨਾਲ ਸਾਂਝੀ ਕਰਦੇ ਹੋਏ ਅਫਸੋਸ ਹੈ। ਪਰ ਸਾਨੂੰ ਸਾਰਿਆਂ ਨੂੰ ਆਪਣੀ ਜ਼ਿੰਦਗੀ ਵਿਚ ਅੱਗੇ ਵਧਣਾ ਪਵੇਗਾ। ਉਮੀਦ ਹੈ ਤੁਹਾਡਾ ਪਿਆਰ ਹਮੇਸ਼ਾ ਮੇਰੇ ਨਾਲ ਰਹੇਗਾ। ਮੈਂ ਤੁਹਾਨੂੰ ਜਲਦੀ ਹੀ ਇੱਕ ਨਵੇਂ ਕਿਰਦਾਰ ਨਾਲ ਮਿਲਾਂਗਾ ਅਤੇ ਤੁਹਾਨੂੰ ਬਿਲਕੁਲ ਵੀ ਬੋਰ ਨਹੀਂ ਕਰਾਂਗਾ।