Kapil Sharma's Birthday: ਕਾਮੇਡੀ ਕਿੰਗ ਕਹੇ ਜਾਣ ਵਾਲੇ ਕਪਿਲ ਸ਼ਰਮਾ ਕਿਸੇ ਪਹਿਚਾਣ ਦੇ ਮੁਹਤਾਜ ਨਹੀਂ ਹਨ। ਉਨ੍ਹਾਂ ਨੇ ਆਪਣੇ ਦਮ 'ਤੇ ਇੰਡਸਟਰੀ 'ਚ ਉੱਚ ਮੁਕਾਮ ਹਾਸਲ ਕੀਤਾ ਹੈ। ਕਪਿਲ ਹਰ ਕਿਸੇ ਦੇ ਚਹੇਤੇ ਹਨ ਜੋ ਆਪਣੀ ਕਾਮੇਡੀ ਨਾਲ ਰੋਣ ਵਾਲੇ ਨੂੰ ਵੀ ਹਸਾ ਦਿੰਦੇ ਹਨ। ਪਰ ਹੱਸਣ ਤੋਂ ਇਲਾਵਾ ਕਪਿਲ ਕਈ ਵਾਰ ਵਿਵਾਦਾਂ 'ਚ ਵੀ ਘਿਰ ਚੁੱਕੇ ਹਨ। ਕਾਮੇਡੀਅਨ ਅਤੇ ਐਕਟਰ ਕਪਿਲ ਸ਼ਰਮਾ ਅੱਜ ਆਪਣਾ 42ਵਾਂ ਜਨਮਦਿਨ ਮਨਾ ਰਹੇ ਹਨ। ਉਨ੍ਹਾਂ ਦੇ ਜਨਮਦਿਨ ਦੇ ਮੌਕੇ 'ਤੇ ਇੱਕ ਅਜਿਹੀ ਘਟਨਾ ਨੂੰ ਤੁਹਾਡੇ ਨਾਲ ਸ਼ੇਅਰ ਕਰ ਰਹੇ ਹਾਂ।
ਵਿਵਾਦਾਂ ਨਾਲ ਡੂੰਘਾ ਸਬੰਧ
ਕਪਿਲ ਸ਼ਰਮਾ ਦਾ ਵਿਵਾਦਾਂ ਨਾਲ ਡੂੰਘਾ ਸਬੰਧ ਰਿਹਾ ਹੈ। ਆਪਣੇ ਹੱਸਮੁੱਖ ਵਿਵਹਾਰ ਤੋਂ ਇਲਾਵਾ, ਉਹ ਆਪਣੇ ਗੁੱਸੇ ਭਰੇ ਵਿਵਹਾਰ ਲਈ ਵੀ ਮਸ਼ਹੂਰ ਨੇ। ਇੱਕ ਇੰਟਰਵਿਊ ਵਿੱਚ ਕਪਿਲ ਨੇ ਖੁਲਾਸਾ ਕੀਤਾ ਸੀ ਕਿ ਉਸਨੇ ਇੱਕ ਵਾਰ ਪੀਐਮ ਮੋਦੀ ਨੂੰ ਸ਼ਰਾਬ ਦੇ ਨਸ਼ੇ ਵਿੱਚ ਟਵੀਟ ਕਰ ਦਿੱਤਾ ਸੀ। ਜਿਸ ਤੋਂ ਬਾਅਦ ਮੋਦੀ ਜੀ ਦੇ ਸਮਰਥਕਾਂ ਵੱਲੋਂ ਖੂਬ ਟ੍ਰੋਲ ਕੀਤਾ ਗਿਆ ਸੀ।
ਇਸ ਕਿੱਸੇ ਨੂੰ ਸਾਂਝਾ ਕਰਦੇ ਹੋਏ ਕਪਿਲ ਨੇ ਦੱਸਿਆ ਕਿ ਉਹ ਆਪਣੇ ਘਰ ਬੈਠੇ ਸ਼ਰਾਬ ਪੀ ਰਹੇ ਸਨ। ਜਿਵੇਂ-ਜਿਵੇਂ ਸ਼ਰਾਬ ਵੱਧਦੀ ਗਈ, ਮੈਂ ਵੱਖ-ਵੱਖ ਮੁੱਦਿਆਂ 'ਤੇ ਟਵੀਟ ਕਰਦਾ ਰਿਹਾ। ਇਸ ਤੋਂ ਬਾਅਦ ਇੱਕ ਸ਼ਰਾਬੀ ਕਪਿਲ ਸ਼ਰਮਾ ਨੇ ਪੀਐਮ ਮੋਦੀ ਨੂੰ ਟੈਗ ਕਰਦੇ ਹੋਏ ਇੱਕ ਟਵੀਟ ਕੀਤਾ ਅਤੇ ਸੌਂ ਗਏ। ਦੇਰ ਰਾਤ ਤੱਕ ਜਾਗਣ ਤੋਂ ਬਾਅਦ ਕਪਿਲ ਨੇ ਇੱਕ ਹੋਰ ਟਵੀਟ ਕੀਤਾ, ਜਿਸ ਤੋਂ ਬਾਅਦ ਕਾਫੀ ਵਿਵਾਦ ਹੋਇਆ। ਦਰਅਸਲ ਕਪਿਲ ਨੇ ਦੱਸਿਆ ਕਿ ਪਹਿਲਾ ਪੈਗ ਪੀਣ ਤੋਂ ਬਾਅਦ ਘਰ ਦੇ ਹਾਲਾਤ 'ਤੇ ਗੁੱਸਾ ਆ ਗਿਆ। ਦੂਜੇ ਪੈਗ ਤੋਂ ਬਾਅਦ ਉਸ ਨੂੰ ਸਮਾਜ ਵਿੱਚ ਕਮੀਆਂ ਨਜ਼ਰ ਆਉਣ ਲੱਗ ਪਈਆਂ। ਤੀਜੇ ਪੈਗ ਤੋਂ ਬਾਅਦ ਉਹ ਰਾਸ਼ਟਰੀ ਪੱਧਰ 'ਤੇ ਪਹੁੰਚ ਗਿਆ। ਕਿਹਾ- ਮੇਰਾ ਰਸੋਈਆ ਵੀ ਮੇਰੇ ਨਾਲ ਸੀ। ਮੈਂ ਸੋਚਿਆ ਜੇ ਉਹ ਤਿੰਨ ਪੈਗ ਤੋਂ ਬਾਅਦ ਆਪਣੇ ਬੌਸ ਨਾਲ ਫਰੈਂਕ ਹੋ ਰਿਹਾ ਹੈ, ਤਾਂ ਮੈਂ ਵੀ ਆਪਣੇ ਬੌਸ ਨਾਲ ਫਰੈਂਕ ਹੋਵਾਂਗਾ। ਮੈਂ ਟਵੀਟ ਕੀਤਾ।
ਆਪਣੇ ਟਵੀਟ ਵਿੱਚ ਪੀਐਮ ਮੋਦੀ ਨੂੰ ਟੈਗ ਕਰਦੇ ਹੋਏ ਕਪਿਲ ਨੇ ਲਿਖਿਆ- "ਮੈਂ ਪਿਛਲੇ 5 ਸਾਲਾਂ ਤੋਂ 15 ਕਰੋੜ ਦਾ ਇਨਕਮ ਟੈਕਸ ਅਦਾ ਕਰ ਰਿਹਾ ਹਾਂ ਅਤੇ ਮੈਨੂੰ ਆਪਣਾ ਦਫ਼ਤਰ ਬਣਾਉਣ ਲਈ BMC ਨੂੰ 5 ਲੱਖ ਰੁਪਏ ਦੀ ਰਿਸ਼ਵਤ ਦੇਣੀ ਪਈ ਹੈ। ਕੀ ਇਹ ਤੁਹਾਡੇ ਚੰਗੇ ਦਿਨ ਹਨ?" ਇਸ ਤੋਂ ਬਾਅਦ ਮੋਦੀ ਜੀ ਦੇ ਸਮਰਥਕਾਂ ਵੱਲੋਂ ਕਪਿਲ ਨੂੰ ਕਾਫੀ ਗਾਲ੍ਹਾਂ ਕੱਢੀਆਂ ਗਈਆਂ।