Adipurush Controversy: ਸਾਊਥ ਦੇ ਸੁਪਰਸਟਾਰ ਪ੍ਰਭਾਸ ਦੀ ਫਿਲਮ 'ਆਦਿਪੁਰਸ਼' ਨੂੰ ਲੈ ਕੇ ਅਜੇ ਵੀ ਹੰਗਾਮਾ ਜਾਰੀ ਹੈ। ਫਿਲਮ ਦੀ ਕਹਾਣੀ ਅਤੇ ਇਸ ਵਿੱਚ ਦਿਖਾਏ ਗਏ ਡਾਇਲੌਗਜ਼ ਨੂੰ ਲੈ ਕੇ ਦੇਸ਼ ਭਰ ਵਿੱਚ ਵਿਰੋਧ ਪ੍ਰਦਰਸ਼ਨ ਹੋ ਰਹੇ ਹਨ। ਇਸ ਹੰਗਾਮੇ ਨੂੰ ਦੇਖਦੇ ਹੋਏ ਹੁਣ ਫਿਲਮ ਦੇ ਲੇਖਕ ਮਨੋਜ ਮੁੰਤਸ਼ੀਰ ਨੇ ਮੁੰਬਈ ਪੁਲਿਸ ਤੋਂ ਆਪਣੇ ਲਈ ਸੁਰੱਖਿਆ ਦੀ ਮੰਗ ਕੀਤੀ ਹੈ। ਮਨੋਜ ਨੇ ਇਸ ਸਮੇਂ ਆਪਣੇ ਲਈ ਖਤਰੇ ਦਾ ਖਦਸ਼ਾ ਪ੍ਰਗਟਾਇਆ ਹੈ। ਜਿਸ 'ਤੇ ਹੁਣ ਮੁੰਬਈ ਪੁਲਿਸ ਨੇ ਫੈਸਲਾ ਲੈਂਦਿਆਂ ਉਸ ਨੂੰ ਸੁਰੱਖਿਆ ਪ੍ਰਦਾਨ ਕੀਤੀ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਉਹ ਮਾਮਲੇ ਦੀ ਜਾਂਚ ਕਰ ਰਹੇ ਹਨ।
ਫਿਲਮ ਦੇ ਡਾਇਲੌਗਜ਼ ਨੂੰ ਲੈ ਕੇ ਦੇਸ਼ ਭਰ 'ਚ ਹੋਇਆ ਹੰਗਾਮਾ
ਪ੍ਰਭਾਸ, ਕ੍ਰਿਤੀ ਸੈਨਨ ਅਤੇ ਸੈਫ ਅਲੀ ਖਾਨ ਸਟਾਰਰ ਫਿਲਮ 'ਆਦਿਪੁਰਸ਼' ਪਿਛਲੇ ਸ਼ੁੱਕਰਵਾਰ ਯਾਨੀ 16 ਜੂਨ ਨੂੰ ਵੱਡੇ ਪਰਦੇ 'ਤੇ ਰਿਲੀਜ਼ ਹੋ ਗਈ ਹੈ। ਇਕ ਪਾਸੇ ਫਿਲਮ ਬਾਕਸ ਆਫਿਸ 'ਤੇ ਜ਼ਬਰਦਸਤ ਕਮਾਈ ਕਰ ਰਹੀ ਹੈ। ਦੂਜੇ ਪਾਸੇ ਦਰਸ਼ਕ ਵੀ ਇਸ ਦੀ ਤਿੱਖੀ ਆਲੋਚਨਾ ਕਰ ਰਹੇ ਹਨ। ਫਿਲਮ 'ਚ ਦਿਖਾਏ ਗਏ ਡਾਇਲਾਗਸ ਨੂੰ ਲੈ ਕੇ ਪੂਰੇ ਦੇਸ਼ 'ਚ ਹੰਗਾਮਾ ਹੋ ਗਿਆ ਹੈ। ਇਸ ਦੇ ਨਾਲ ਹੀ ਫਿਲਮ ਨਿਰਮਾਤਾਵਾਂ 'ਤੇ ਹਿੰਦੂ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਦਾ ਵੀ ਦੋਸ਼ ਲਗਾਇਆ ਜਾ ਰਿਹਾ ਹੈ। ਇਸ ਲਈ ਫਿਲਮ 'ਤੇ ਪਾਬੰਦੀ ਲਗਾਉਣ ਦੀ ਮੰਗ ਕੀਤੀ ਜਾ ਰਹੀ ਹੈ। ਦੱਸ ਦੇਈਏ ਕਿ ਇਸ ਫਿਲਮ ਨੂੰ ਨਿਰਦੇਸ਼ਕ ਓਮ ਰਾਉਤ ਨੇ ਬਣਾਇਆ ਹੈ।
ਜਾਣੋ ਕਿਹੜੇ ਡਾਇਲੌਗਜ਼ ਨੇ ਮਚਾਇਆ ਹੰਗਾਮਾ
1, ਫਿਲਮ ਵਿੱਚ, ਜਦੋਂ ਹਨੂੰਮਾਨ ਸੀਤਾ ਮਾਂ ਨੂੰ ਮਿਲਣ ਲਈ ਲੰਕਾ ਜਾਂਦਾ ਹੈ, ਤਾਂ ਇੱਕ ਭੂਤ ਉਸਨੂੰ ਦੇਖਦਾ ਹੈ ਅਤੇ ਕਹਿੰਦਾ ਹੈ, "ਯੇ ਲੰਕਾ ਕਿਆ ਤੇਰੀ ਬੁਆ ਕਾ ਬਗੀਚਾ ਹੈ, ਜੋ ਹਵਾ ਖਾਖਾਨੇ ਚਲਾ ਆਇਆ"।
2. ਇਸ ਤੋਂ ਇਲਾਵਾ ਜਦੋਂ ਹਨੂੰਮਾਨ ਜੀ ਇੱਕ ਸੀਨ ਵਿੱਚ ਲੰਕਾ ਆਉਂਦੇ ਹਨ ਤਾਂ ਆਪਣੀ ਪੂਛ ਨੂੰ ਅੱਗ ਲਗਾਉਣ ਤੋਂ ਬਾਅਦ ਮੇਘਨਾਥ ਉਨ੍ਹਾਂ ਨੂੰ ਪੁੱਛਦੇ ਹਨ, "ਜਲੀ"। ਜਿਸ ਦੇ ਜਵਾਬ ਵਿੱਚ ਹਨੂੰਮਾਨ ਕਹਿੰਦੇ ਹਨ, "ਤੇਲ ਤੇਰੇ ਬਾਪ ਕਾ......ਕਪੜਾ ਤੇਰੇ ਬਾਪ ਕਾ.......ਜਲੇਗੀ ਬੀ ਤੇਰੇ ਬਾਪ ਕੀ।"
3. ਇਸ ਤੋਂ ਬਾਅਦ ਜਦੋਂ ਹਨੂੰਮਾਨ ਉਥੋਂ ਵਾਪਿਸ ਆਉਂਦੇ ਹਨ ਤਾਂ ਰਾਮ ਉਸ ਤੋਂ ਜਗ੍ਹਾ ਦੀ ਹਾਲਤ ਦਾ ਜਾਇਜ਼ਾ ਮੰਗਦੇ ਹਨ। ਜਿਸ ਦੇ ਜਵਾਬ ਵਿੱਚ ਹਨੂੰਮਾਨ ਕਹਿੰਦੇ ਹਨ ਕਿ - ਉਨਹੇ ਬੋਲ ਦੀਆ ਹੈ ਕਿ ਜੋ ਹਮਾਰੀ ਬਹਿਨੋਂ ਕੋ ਹਾਥ ਲਗਾਏਂਗੇ, ਉਨਕੀ ਲੰਕਾ ਲਗਾ ਦੇਂਗੇ।