ਕੋਰੋਨਾਵਾਇਰਸ ਦੇ ਵੱਧ ਰਹੇ ਕੇਸਾਂ ਦਾ ਅਸਰ ਫਿਰ ਤੋਂ ਫਿਲਮ ਇੰਡਸਟਰੀ 'ਤੇ ਪੈ ਰਿਹਾ ਹੈ। ਫ਼ਿਲਮ ਮੇਕਰਸ ਆਪਣੀ ਫ਼ਿਲਮਾਂ ਦੀ ਰਿਲੀਜ਼ ਡੇਟ ਨੂੰ ਮੁਲਤਵੀ ਕਰ ਰਹੇ ਹਨ। YRF ਨੇ ਆਪਣੇ ਬੈੱਨਰ ਹੇਠਾਂ ਬਣੀ ਫ਼ਿਲਮ 'ਬੰਟੀ ਔਰ ਬਬਲੀ 2' ਨੂੰ ਮੁਲਤਵੀ ਕਰ ਦਿੱਤਾ ਹੈ। ਇਹ ਫ਼ਿਲਮ 23 ਅਪ੍ਰੈਲ ਨੂੰ ਰਿਲੀਜ਼ ਹੋਣ ਲਈ ਪੂਰੀ ਤਰ੍ਹਾਂ ਤਿਆਰ ਸੀ, ਪਰ ਪਿੱਛਲੇ ਸਾਲ ਵਾਂਗ ਇਸ ਸਾਲ ਵੀ ਕੋਰੋਨਾਵਾਇਰਸ ਨੇ ਫ਼ਿਲਮ ਇੰਡਸਟਰੀ ਨੂੰ ਆਪਣੀ ਚਪੇਟ 'ਚ ਲੈ ਲਿਆ ਹੈ।
ਕਈ ਬਾਲੀਵੁੱਡ ਕਲਾਕਾਰ ਕੋਰੋਨਾਵਾਇਰਸ ਦੇ ਵੀ ਸ਼ਿਕਾਰ ਹੋ ਚੁੱਕੇ ਹਨ। ਦੇਸ਼ 'ਚ ਵੀ ਦਿਨ-ਬ-ਦਿਨ ਕੋਵਿਡ ਦੇ ਮਾਮਲੇ ਵਧਦੇ ਜਾ ਰਹੇ ਹਨ। ਜਿਸ ਤੋਂ ਬਾਅਦ ਫ਼ਿਲਮਾਂ ਨੂੰ ਮੁਲਤਵੀ ਕੀਤਾ ਜਾ ਰਿਹਾ ਹੈ। YRF ਬੈੱਨਰ ਆਉਣ ਵਾਲੇ ਸਮੇਂ 'ਚ 'ਬੰਟੀ ਔਰ ਬਬਲੀ 2' ਦੀ ਨਵੀਂ ਰਿਲੀਜ਼ ਡੇਟ ਦਾ ਐਲਾਨ ਕਰ ਦੇਗਾ। ਪਰ ਫਿਲਹਾਲ ਇਹ ਫ਼ਿਲਮ ਤੈਅ ਕੀਤੀ ਗਈ ਤਰੀਕ 'ਤੇ ਰਿਲੀਜ਼ ਨਹੀਂ ਹੋਵੇਗੀ।
ਰਾਣੀ ਮੁਖਰਜੀ, ਸੈਫ ਅਲੀ ਖ਼ਾਨ, ਸਿਧਾਂਤ ਚਤੁਰਵੇਦੀ ਤੇ ਸਰਵਰੀ ਸਟਾਰਰ ਫ਼ਿਲਮ 'ਬੰਟੀ ਔਰ ਬਬਲੀ 2' ਦਾ ਇੰਤਜ਼ਾਰ ਹੁਣ ਲੰਮਾ ਹੋ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾ ਫ਼ਿਲਮ 'ਹਾਥੀ ਮੇਰੇ ਸਾਥੀ' ਦੇ ਮੇਕਰਸ ਨੇ ਵੀ ਫ਼ਿਲਮ ਨੂੰ ਮੁਲਤਵੀ ਕਰ ਦਿੱਤਾ ਸੀ। ਜੋ ਕਿ 26 ਮਾਰਚ ਨੂੰ ਰਿਲੀਜ਼ ਹੋਣੀ ਸੀ। ਦੂਜੇ ਪਾਸੇ ਪੰਜਾਬੀ ਫ਼ਿਲਮ 'ਪੁਆੜਾ' ਨੂੰ ਵੀ ਕੋਵਿਡ ਕਾਰਨ 2 ਅਪ੍ਰੈਲ ਨੂੰ ਰਿਲੀਜ਼ ਨਹੀਂ ਕੀਤਾ ਜਾਵੇਗਾ। ਮੇਕਰਸ ਸਥਿਤੀ ਸਥਿਰ ਹੋਣ ਦਾ ਇੰਤਜ਼ਾਰ ਕਰ ਰਹੇ ਹਨ।