Daily Habits That Increase Cancer Risk: ਕੈਂਸਰ ਨੂੰ ਲੰਬੇ ਸਮੇਂ ਤੋਂ ਇੱਕ ਬਿਮਾਰੀ ਮੰਨਿਆ ਜਾਂਦਾ ਰਿਹਾ ਹੈ ਜੋ ਸਿਰਫ਼ ਵਧਦੀ ਉਮਰ, ਖਰਾਬ ਕਿਸਮਤ ਜਾਂ ਜੈਨੇਟਿਕ ਕਾਰਕਾਂ ਕਰਕੇ ਹੁੰਦੀ ਹੈ। ਪਰ ਨਵੀਂ ਖੋਜ ਇਸ ਧਾਰਨਾ ਨੂੰ ਬਦਲ ਰਹੀ ਹੈ। ਨੇਚਰ ਮੈਡੀਸਨ ਜਰਨਲ ਵਿੱਚ ਪ੍ਰਕਾਸ਼ਿਤ ਇੱਕ ਅਧਿਐਨ ਦੇ ਅਨੁਸਾਰ, ਲਗਭਗ 40 ਪ੍ਰਤੀਸ਼ਤ ਕੈਂਸਰ ਦੇ ਕੇਸ ਅਤੇ ਲਗਭਗ ਅੱਧੀਆਂ ਕੈਂਸਰ ਦੀਆਂ ਮੌਤਾਂ ਉਹਨਾਂ ਜੋਖਮਾਂ ਨਾਲ ਜੁੜੀਆਂ ਹੋਈਆਂ ਹਨ, ਜਿਨ੍ਹਾਂ ਨੂੰ ਸਿਹਤਮੰਦ ਜੀਵਨ ਸ਼ੈਲੀ ਅਪਣਾ ਕੇ ਵੱਡੇ ਪੱਧਰ 'ਤੇ ਰੋਕਿਆ ਜਾ ਸਕਦਾ ਹੈ।
ਕਿਹੜੀਆਂ ਆਦਤਾਂ ਕਰਕੇ ਅਸੀਂ ਹੋ ਰਹੇ ਬਿਮਾਰ
ਮਾਹਿਰਾਂ ਦੇ ਅਨੁਸਾਰ, ਸਮੱਸਿਆ ਇਹ ਹੈ ਕਿ ਕੈਂਸਰ ਦੇ ਜੋਖਮ ਨੂੰ ਵਧਾਉਣ ਵਾਲੀਆਂ ਬਹੁਤ ਸਾਰੀਆਂ ਆਦਤਾਂ ਸਾਡੀ ਰੋਜ਼ਾਨਾ ਜ਼ਿੰਦਗੀ ਦਾ ਹਿੱਸਾ ਬਣ ਗਈਆਂ ਹਨ। ਦੇਰ ਤੱਕ ਜਾਗਣਾ, ਘੰਟਿਆਂ ਤੱਕ ਇੱਕ ਜਗ੍ਹਾ ਬੈਠੇ ਰਹਿਣਾ, ਪ੍ਰੋਸੈਸਡ ਫੂਡ ਖਾਣਾ, ਤਣਾਅ ਨੂੰ ਨਜ਼ਰਅੰਦਾਜ਼ ਕਰਨਾ ਅਤੇ ਸਰੀਰਕ ਗਤੀਵਿਧੀ ਦੀ ਘਾਟ ਹੌਲੀ-ਹੌਲੀ ਸਰੀਰ ਨੂੰ ਪ੍ਰਭਾਵਿਤ ਕਰਦੀ ਹੈ।
ਇਸ ਦਾ ਅਸਰ ਸ਼ੁਰੂਆਤ ਵਿੱਚ ਨਜ਼ਰ ਨਹੀਂ ਆਉਂਦਾ, ਪਰ ਸਾਲਾਂ ਤੋਂ ਬਾਅਦ ਇਸ ਦਾ ਅਸਰ ਹੌਲੀ-ਹੌਲੀ ਨਜ਼ਰ ਆਉਣਾ ਸ਼ੁਰੂ ਹੋ ਜਾਂਦਾ ਹੈ। ਵਿਸ਼ਵ ਸਿਹਤ ਸੰਗਠਨ ਦੀ ਇੱਕ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਤੰਬਾਕੂ, ਮੋਟਾਪਾ, ਸ਼ਰਾਬ ਦਾ ਸੇਵਨ, ਅਨਹੈਲਥੀ ਫੂਡਸ ਖਾਣ ਦੀਆਂ ਆਦਤਾਂ, ਸਰੀਰਕ ਗਤੀਵਿਧੀ ਦੀ ਘਾਟ ਅਤੇ ਹਵਾ ਪ੍ਰਦੂਸ਼ਣ ਕੈਂਸਰ ਦੇ ਸਭ ਤੋਂ ਵੱਧ ਰੋਕਥਾਮਯੋਗ ਕਾਰਨਾਂ ਵਿੱਚੋਂ ਇੱਕ ਹਨ। ਭਾਰਤ ਵਿੱਚ ਜੀਵਨ ਸ਼ੈਲੀ ਨਾਲ ਸਬੰਧਤ ਕੈਂਸਰ ਦੇ ਮਾਮਲਿਆਂ ਵਿੱਚ ਵੀ ਲਗਾਤਾਰ ਵਾਧਾ ਹੋ ਰਿਹਾ ਹੈ।
ਘੱਟ ਉਮਰ ਦੇ ਲੋਕ ਕਿਉਂ ਆ ਰਹੇ ਇਸ ਦੀ ਚਪੇਟ 'ਚ?
ਡਾ. ਅਨਿੰਦਿਆ ਮੁਖਰਜੀ ਨੇ TOI ਨੂੰ ਦੱਸਿਆ ਕਿ ਕੈਂਸਰ ਹੁਣ ਸਿਰਫ਼ ਬਜ਼ੁਰਗਾਂ ਦੀ ਬਿਮਾਰੀ ਨਹੀਂ ਰਹੀ। 50 ਸਾਲ ਦੀ ਉਮਰ ਤੋਂ ਬਾਅਦ ਪਹਿਲਾਂ ਆਮ ਹੋਣ ਵਾਲੇ ਕੈਂਸਰ ਹੁਣ ਨੌਜਵਾਨਾਂ ਵਿੱਚ ਵੱਧ ਰਹੇ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਸਿਗਰਟ, ਸ਼ਰਾਬ, ਮੋਟਾਪਾ, ਮਾੜੀ ਖੁਰਾਕ, ਕਸਰਤ ਦੀ ਘਾਟ, ਪ੍ਰਦੂਸ਼ਣ ਅਤੇ ਲਗਾਤਾਰ ਤਣਾਅ ਵਰਗੇ ਕਾਰਕਾਂ ਨੇ ਹਰ ਉਮਰ ਦੇ ਲੋਕਾਂ ਲਈ ਕੈਂਸਰ ਦਾ ਖ਼ਤਰਾ ਵਧਾ ਦਿੱਤਾ ਹੈ।
ਲੋੜ ਤੋਂ ਵੱਧ ਫੈਟ ਖਾਣ ਨਾਲ ਕਿਹੜੇ ਕੈਂਸਰ ਦਾ ਖਤਰਾ ਰਹਿੰਦਾ?
ਯੂਐਸ ਨੈਸ਼ਨਲ ਕੈਂਸਰ ਇੰਸਟੀਚਿਊਟ ਦੀ ਖੋਜ ਦੇ ਅਨੁਸਾਰ, ਸਰੀਰ ਦੀ ਵਾਧੂ ਚਰਬੀ ਕਈ ਕਿਸਮਾਂ ਦੇ ਕੈਂਸਰ ਨਾਲ ਜੁੜੀ ਹੋਈ ਹੈ, ਜਿਸ ਵਿੱਚ ਛਾਤੀ, ਕੋਲੋਰੈਕਟਲ, ਬੱਚੇਦਾਨੀ, ਗੁਰਦੇ, ਜਿਗਰ ਅਤੇ ਪੈਨਕ੍ਰੀਅਸ ਕੈਂਸਰ ਸ਼ਾਮਲ ਹਨ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਜਦੋਂ ਸਰੀਰ ਲੰਬੇ ਸਮੇਂ ਤੱਕ ਮਾੜੀ ਜੀਵਨ ਸ਼ੈਲੀ ਦਾ ਅਨੁਭਵ ਕਰਦਾ ਹੈ, ਤਾਂ ਅੰਦਰੂਨੀ ਸੋਜਸ਼ ਵਧ ਜਾਂਦੀ ਹੈ। ਇਹ ਸੋਜਸ਼ ਸਿਹਤਮੰਦ ਸੈੱਲਾਂ ਨੂੰ ਨੁਕਸਾਨ ਪਹੁੰਚਾਉਂਦੀ ਹੈ ਅਤੇ ਕੈਂਸਰ ਲਈ ਅਨੁਕੂਲ ਵਾਤਾਵਰਣ ਪੈਦਾ ਕਰ ਸਕਦੀ ਹੈ।
ਡਾ. ਮੁਖਰਜੀ ਦੇ ਅਨੁਸਾਰ, ਤੰਬਾਕੂ ਕੈਂਸਰ ਦਾ ਮੁੱਖ ਰੋਕਥਾਮਯੋਗ ਕਾਰਨ ਬਣਿਆ ਹੋਇਆ ਹੈ। ਇਹ ਨਾ ਸਿਰਫ਼ ਫੇਫੜਿਆਂ ਨੂੰ ਪ੍ਰਭਾਵਿਤ ਕਰਦਾ ਹੈ, ਸਗੋਂ ਮੂੰਹ, ਗਲਾ, ਪੇਟ, ਗੁਰਦੇ, ਬਲੈਡਰ ਅਤੇ ਹੋਰ ਬਹੁਤ ਸਾਰੇ ਅੰਗਾਂ ਨੂੰ ਵੀ ਪ੍ਰਭਾਵਿਤ ਕਰਦਾ ਹੈ, ਜਦੋਂ ਕਿ ਪੈਸਿਵ ਸਮੋਕਿੰਗ ਵੀ ਓਨੀ ਹੀ ਖ਼ਤਰਨਾਕ ਹੈ। ਇਸ ਤੋਂ ਇਲਾਵਾ, ਹਵਾ ਪ੍ਰਦੂਸ਼ਣ ਖਾਸ ਕਰਕੇ ਸ਼ਹਿਰ ਵਾਲਿਆਂ ਲਈ ਤੇਜ਼ੀ ਨਾਲ ਉੱਭਰਦਾ ਖ਼ਤਰਾ ਬਣਦਾ ਜਾ ਰਿਹਾ ਹੈ।
ਇਦਾਂ ਕਰੋ ਬਚਾਅ
ਡਾ. ਮੁਖਰਜੀ ਦੇ ਅਨੁਸਾਰ, ਕੈਂਸਰ ਨੂੰ ਰੋਕਣ ਲਈ, ਸਿਹਤਮੰਦ ਵਜ਼ਨ ਬਣਾਈ ਰੱਖਣਾ, ਨਿਯਮਿਤ ਤੌਰ 'ਤੇ ਕਸਰਤ ਕਰਨਾ, ਤਾਜ਼ੇ ਫਲ ਅਤੇ ਸਬਜ਼ੀਆਂ ਖਾਣਾ, ਤੰਬਾਕੂ ਤੋਂ ਦੂਰ ਰਹਿਣਾ, ਸ਼ਰਾਬ ਦੀ ਖਪਤ ਨੂੰ ਸੀਮਤ ਕਰਨਾ, ਤਣਾਅ ਨੂੰ ਕੰਟਰੋਲ ਕਰਨਾ ਅਤੇ ਲੋੜੀਂਦੀ ਨੀਂਦ ਲੈਣਾ ਬਹੁਤ ਜ਼ਰੂਰੀ ਹੈ।