Male Birth Control Pill: ਗਰਭ ਅਵਸਥਾ ਨੂੰ ਰੋਕਣ ਲਈ ਹੁਣ ਤੱਕ ਜ਼ਿਆਦਾਤਰ ਗਰਭ ਨਿਰੋਧਕ ਤਰੀਕਿਆਂ ਦੀ ਜ਼ਿੰਮੇਵਾਰੀ ਔਰਤਾਂ 'ਤੇ ਰਹੀ ਹੈ ਪਰ ਹੁਣ ਵਿਗਿਆਨੀ ਮਰਦਾਂ ਲਈ ਵੀ ਇੱਕ ਅਜਿਹੀ ਗਰਭ ਨਿਰੋਧਕ ਗੋਲੀ ਤਿਆਰ ਕਰਨ 'ਤੇ ਕੰਮ ਕਰ ਰਹੇ ਹਨ, ਜਿਸ ਨੂੰ ਸਰੀਰਕ ਸਬੰਧ ਬਣਾਉਣ ਤੋਂ ਕਰੀਬ 30 ਮਿੰਟ ਪਹਿਲਾਂ ਲਿਆ ਜਾ ਸਕੇਗਾ। ਹਾਲਾਂਕਿ ਇਹ ਗੋਲੀ ਅਜੇ ਖੋਜ ਦੇ ਪੜਾਅ ਵਿੱਚ ਹੈ ਅਤੇ ਆਮ ਲੋਕਾਂ ਲਈ ਉਪਲਬਧ ਨਹੀਂ ਹੈ।
ਕਿਵੇਂ ਕੰਮ ਕਰੇਗੀ ਇਹ ਗੋਲੀ?
ਅਮਰੀਕਾ ਦੇ ਵੇਇਲ ਕਾਰਨੇਲ ਮੈਡੀਸਨ (Weill Cornell Medicine) ਦੇ ਵਿਗਿਆਨੀ ਇਸ ਗੋਲੀ 'ਤੇ ਖੋਜ ਕਰ ਰਹੇ ਹਨ। ਇਹ ਗੋਲੀ ਮਰਦਾਂ ਦੇ ਹਾਰਮੋਨਜ਼ ਵਿੱਚ ਬਦਲਾਅ ਕਰਨ ਦੀ ਬਜਾਏ ਸ਼ੁਕਰਾਣੂਆਂ (Sperm) ਦੀ ਹਿਲਜੁਲ ਨੂੰ ਕੁਝ ਸਮੇਂ ਲਈ ਰੋਕਣ ਦਾ ਕੰਮ ਕਰ ਸਕਦੀ ਹੈ। ਇਹ ਦਵਾਈ ਸਰੀਰ ਵਿੱਚ ਮੌਜੂਦ sAC ਨਾਮ ਦੇ ਇੱਕ ਖਾਸ ਐਂਜ਼ਾਈਮ ਨੂੰ ਅਸਥਾਈ ਤੌਰ 'ਤੇ ਰੋਕਦੀ ਹੈ। ਇਸ ਨਾਲ ਸ਼ੁਕਰਾਣੂ ਅੰਡੇ ਤੱਕ ਆਸਾਨੀ ਨਾਲ ਨਹੀਂ ਪਹੁੰਚ ਸਕਦੇ ਅਤੇ ਗਰਭ ਠਹਿਰਨ ਦੀ ਸੰਭਾਵਨਾ ਘੱਟ ਹੋ ਸਕਦੀ ਹੈ।
6 ਤੋਂ 8 ਘੰਟੇ ਤੱਕ ਰਹਿ ਸਕਦਾ ਹੈ ਅਸਰ
ਸ਼ੁਰੂਆਤੀ ਖੋਜ ਮੁਤਾਬਕ ਇਸ ਗੋਲੀ ਦਾ ਅਸਰ ਕਰੀਬ 6 ਤੋਂ 8 ਘੰਟੇ ਤੱਕ ਰਹਿ ਸਕਦਾ ਹੈ। ਖਾਸ ਗੱਲ ਇਹ ਹੈ ਕਿ ਇਸ ਨੂੰ ਹਰ ਰੋਜ਼ ਲੈਣ ਦੀ ਲੋੜ ਨਹੀਂ ਪੈ ਸਕਦੀ। ਲੋੜ ਪੈਣ 'ਤੇ ਹੀ ਇਸ ਦੀ ਵਰਤੋਂ ਕੀਤੀ ਜਾ ਸਕੇਗੀ। ਹਾਲਾਂਕਿ ਮਨੁੱਖਾਂ ਵਿੱਚ ਇਸ ਦਾ ਅਸਰ ਕਿੰਨਾ ਸਮਾਂ ਰਹੇਗਾ, ਇਹ ਕਲੀਨਿਕਲ ਟਰਾਇਲ ਤੋਂ ਬਾਅਦ ਹੀ ਸਪੱਸ਼ਟ ਹੋਵੇਗਾ।
ਕੀ ਮਰਦਾਂ ਦੀ ਬੱਚੇ ਪੈਦਾ ਕਰਨ ਦੀ ਸਮਰੱਥਾ 'ਤੇ ਪਵੇਗਾ ਅਸਰ?
ਵਿਗਿਆਨੀਆਂ ਮੁਤਾਬਕ ਇਸ ਗੋਲੀ ਦਾ ਮਕਸਦ ਸ਼ੁਕਰਾਣੂ ਬਣਨ ਦੀ ਪ੍ਰਕਿਰਿਆ ਨੂੰ ਬੰਦ ਕਰਨਾ ਨਹੀਂ, ਸਗੋਂ ਉਨ੍ਹਾਂ ਦੀ ਹਿਲਜੁਲ ਨੂੰ ਅਸਥਾਈ ਤੌਰ 'ਤੇ ਰੋਕਣਾ ਹੈ। ਦਵਾਈ ਦਾ ਅਸਰ ਖ਼ਤਮ ਹੋਣ ਤੋਂ ਬਾਅਦ ਸ਼ੁਕਰਾਣੂਆਂ ਦੀ ਆਮ ਗਤੀ ਵਾਪਸ ਆਉਣ ਦੀ ਉਮੀਦ ਹੈ। ਪਰ ਲੰਬੇ ਸਮੇਂ ਤੱਕ ਇਸ ਦੀ ਵਰਤੋਂ ਨਾਲ ਕੋਈ ਨੁਕਸਾਨ ਹੋਵੇਗਾ ਜਾਂ ਨਹੀਂ, ਇਸ ਦੀ ਜਾਂਚ ਅਜੇ ਬਾਕੀ ਹੈ।
ਬਾਜ਼ਾਰ ਵਿੱਚ ਕਦੋਂ ਆਵੇਗੀ ਗੋਲੀ?
ਫਿਲਹਾਲ ਇਸ ਦਵਾਈ ਦੇ ਸ਼ੁਰੂਆਤੀ ਪ੍ਰਯੋਗ ਚੂਹਿਆਂ 'ਤੇ ਕੀਤੇ ਗਏ ਹਨ। ਮਨੁੱਖਾਂ ਲਈ ਇਸ ਨੂੰ ਮਨਜ਼ੂਰੀ ਮਿਲਣ ਤੋਂ ਪਹਿਲਾਂ ਸੁਰੱਖਿਆ, ਸਹੀ ਖੁਰਾਕ ਅਤੇ ਅਸਰ ਦੀ ਜਾਂਚ ਕਰਨੀ ਜ਼ਰੂਰੀ ਹੈ। ਅਕਤੂਬਰ 2026 ਵਿੱਚ ਖੋਜ ਟੀਮ ਨੂੰ ਅਗਲੇ ਸੁਰੱਖਿਆ ਟੈਸਟਾਂ ਲਈ ਵਾਧੂ ਫੰਡਿੰਗ ਮਿਲਣ ਦੀ ਜਾਣਕਾਰੀ ਦਿੱਤੀ ਗਈ ਹੈ।
ਜ਼ਰੂਰੀ ਗੱਲ: ਇਹ ਗੋਲੀ ਜੇਕਰ ਭਵਿੱਖ ਵਿੱਚ ਸਫਲ ਹੁੰਦੀ ਹੈ ਤਾਂ ਗਰਭ ਠਹਿਰਨ ਤੋਂ ਬਚਾਅ ਦਾ ਇੱਕ ਨਵਾਂ ਵਿਕਲਪ ਬਣ ਸਕਦੀ ਹੈ ਪਰ ਇਹ HIV ਸਮੇਤ ਜਿਨਸੀ ਇਨਫੈਕਸ਼ਨਾਂ ਤੋਂ ਸੁਰੱਖਿਆ ਨਹੀਂ ਦੇਵੇਗੀ। ਇਸ ਲਈ ਕੰਡੋਮ ਦੀ ਮਹੱਤਤਾ ਬਣੀ ਰਹੇਗੀ।