ਅਜਨਾਲਾ: ਸ਼੍ਰੋਮਣੀ ਅਕਾਲੀ ਦਲ ਨੇ ਅੱਜ 'ਮਜ਼ਾਕ-ਮਜ਼ਾਕ' ਵਿੱਚ ਇੱਕ ਹੋਰ ਉਮੀਦਵਾਰ ਦਾ ਐਲਾਨ ਕਰ ਦਿੱਤਾ ਹੈ। ਅਜਨਾਲਾ ਵਿੱਚ ਅਕਾਲੀ ਦਲ ਦੀ 'ਪੰਜਾਬ ਮੰਗਦਾ ਜਵਾਬ' ਰੈਲੀ (Punjab Mangda Jawab Rally) 'ਚ ਪਹਿਲਾਂ ਤਾਂ ਬਿਕਰਮ ਮਜੀਠੀਆ ਨੇ ਮਜ਼ਾਕ-ਮਜ਼ਾਕ ਵਿੱਚ ਅਮਰਪਾਲ ਸਿੰਘ ਬੋਨੀ ਨੂੰ ਅਜਨਾਲਾ ਹਲਕੇ ਤੋਂ ਉਮੀਦਵਾਰ ਬਣਾਉਣ ਦੀ ਗੱਲ ਤੋਰੀ।
ਇਸ ਮਗਰੋਂ ਸਟੇਜ ਤੋਂ ਹੇਠੋਂ ਰੈਲੀ ਸਮਾਪਤੀ ਉਪਰੰਤ ਅਕਾਲੀ ਵਰਕਰਾਂ ਦੀ ਮੰਗ 'ਤੇ ਸੁਖਬੀਰ ਬਾਦਲ ਨੇ ਕਿਹਾ ਕਿ ਬੋਨੀ ਦੀ ਟਿਕਟ ਦਾ ਐਲਾਨ ਕਰਨ ਦੀ ਲੋੜ ਨਹੀਂ, ਬੋਨੀ ਮੇਰਾ ਭਰਾ ਹੈ, ਮੈਂ ਕਦੇ ਬੋਨੀ ਨੂੰ ਨਾਂਹ ਨਹੀਂ ਕਰ ਸਕਦਾ। ਉਨ੍ਹਾਂ ਕਿਹਾ ਕਿ ਤੁਸੀਂ ਤਗੜੇ ਹੋ ਕੇ ਬੋਨੀ ਅਜਨਾਲਾ ਨੂੰ ਵਿਧਾਇਕ ਬਣਾਓ।
ਦਰਅਸਲ ਮਜੀਠੀਆ ਨੇ ਸਟੇਜ ਤੋਂ ਬੋਨੀ ਨਾਲ ਮਜ਼ਾਕ ਕਰਦਿਆਂ ਕਿਹਾ ਕਿ ਬੋਨੀ ਤਾਂ 5911 ਵਰਗਾ ਹੈ। ਇਸ ਦੀ ਟਿਕਟ ਕੌਣ ਰੋਕ ਸਕਦਾ ਹੈ। ਇਸ ਨੂੰ ਨਾ ਟਿਕਟ ਨਾ ਦਿੱਤੀ ਤਾਂ ਬੋਨੀ ਨੇ ਖੋਹ ਕੇ ਲੈ ਜਾਣੀ ਹੈ। ਮਜੀਠੀਆ ਨੇ ਮਜ਼ਾਕੀਆ ਲਹਿਜ਼ੇ 'ਚ ਕਿਹਾ ਕਿ ਵਿਧਾਇਕ ਤਾਂ ਬੋਨੀ ਨੇ ਬਣ ਹੀ ਜਾਣਾ ਪਰ ਕੁਝ ਆਗੂਆਂ ਵੱਲੋਂ ਬੋਨੀ ਨੂੰ ਵਜੀਰੀ ਦੇਣ ਬਾਰੇ ਕਿਹਾ ਜਾ ਰਿਹਾ ਹੈ। ਬੋਨੀ ਨੂੰ ਫਿਰ ਕੋਈ ਅਜਿਹਾ ਵਿਭਾਗ ਦੇਣਾ ਪੈਣੇ ਜਿਸ 'ਚ ਬੋਨੀ ਰੁੱਝਿਆ ਰਹੇ, ਨਹੀਂ ਤਾਂ ਬੋਨੀ ਨੇ ਕਾਂਗਰਸੀਆਂ ਭਜਾਈ ਫਿਰਨਾ ਹੈ।
ਦੱਸ ਦਈਏ ਕਿ ਕੋਰੋਨਾ (Coronavirus) ਤੋਂ ਸਿਹਤਯਾਬ ਹੋਣ ਮਗਰੋਂ ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ (Sukhbir Singh Badal) ਬਾਦਲ ਨੇ ਅੱਜ ਪਹਿਲੀ ਰੈਲੀ ਕੀਤੀ ਹੈ। ਉਹ ਪਹਿਲਾਂ ਦਰਬਾਰ ਸਾਹਿਬ (Darbar Sahib) ਨਤਮਸਤਕ ਹੋਣ ਪੁੱਜੇ।
ਇਸ ਤੋਂ ਪਹਿਲਾਂ ਦਿੱਲੀ ਗੁਰਦੁਆਰਾ ਕਮੇਟੀ ਬਾਬਤ ਬੋਲਦਿਆਂ ਸੁਖਬੀਰ ਬਾਦਲ ਨੇ ਕਿਹਾ ਕਿ ਕੇਂਦਰ ਸਰਕਾਰ ਤੇ ਦਿੱਲੀ ਸਰਕਾਰ ਨੇ 100 ਸਾਲ ਤੋਂ ਲੋਕਾਂ ਦੀ ਸੇਵਾ ਕਰ ਰਹੇ ਸ਼੍ਰੋਮਣੀ ਅਕਾਲੀ ਦਲ ਨੂੰ ਸਾਜਿਸ਼ ਕਰਕੇ ਹਟਾਉਣ ਤੇ ਦਿੱਲੀ ਕਮੇਟੀ 'ਤੇ ਕਬਜਾ ਕਰਨ ਦੀ ਵੱਡੀ ਸਾਜਿਸ਼ ਰਚੀ ਪਰ ਹਾਈਕੋਰਟ ਨੇ ਸਟੇਅ ਦੇ ਦਿੱਤਾ। ਸੁਖਬੀਰ ਨੇ ਕਿਹਾ ਕੇਂਦਰ ਸਰਕਾਰ, ਕੇਜਰੀਵਾਲ ਸਰਕਾਰ, ਸਰਨਾ ਤੇ ਜੀਕੇ ਸਭ ਇਸ ਸਾਜਿਸ਼ 'ਚ ਸ਼ਾਮਲ ਹਨ ਤੇ ਜੇਕਰ ਉਹ ਆਪਣੇ ਆਪ ਨੂੰ ਕਾਬਲ ਸਮਝਦੇ ਹਨ ਤਾਂ ਚੋਣਾਂ ਲੜਨ ਤੇ ਗਲਤ ਹੱਥਕੰਡੇ ਨਾ ਅਪਨਾਉਣ।
ਸ਼੍ਰੋਮਣੀ ਕਮੇਟੀ ਵੱਲੋਂ ਆਰਆਰਐਸ ਬਾਰੇ ਦਿੱਤੇ ਬਿਆਨ 'ਤੇ ਸੁਖਬੀਰ ਬਾਦਲ ਨੇ ਕਿਹਾ ਐਸਜੀਪੀਸੀ ਆਜਾਦ ਅਦਾਰਾ ਹੈ, ਉਹ ਕੁਝ ਨਹੀਂ ਬੋਲਣਗੇ। ਉਨ੍ਹਾਂ ਕਿਹਾ ਕੈਪਟਨ ਪੰਜਾਬ ਦਾ ਫੇਲ੍ਹ ਮੁੱਖ ਮੰਤਰੀ ਹੈ, ਕਿਉਂਕਿ ਉਨ੍ਹਾਂ ਨੇ ਚਾਰ ਸਾਲਾਂ ਵਿੱਚ ਪੰਜਾਬ ਨੂੰ ਬਰਬਾਦ ਕਰ ਦਿੱਤਾ ਹੈ। ਸੁਖਬੀਰ ਬਾਦਲ ਨੇ ਕਿਹਾ ਕਿ ਭਾਜਪਾ ਦੇ ਗਠਜੋੜ ਦੌਰਾਨ ਹਿੱਸੇ ਆਉਂਦੀਆਂ 23 ਸੀਟਾਂ 'ਤੇ ਅਕਾਲੀ ਦਲ ਵੱਲੋਂ ਉਮੀਦਵਾਰ ਉਤਾਰੇ ਜਾਣਗੇ ਤੇ ਅਕਾਲੀ ਦਲ ਵੱਲੋਂ ਇਸ ਦੀ ਪੂਰੀ ਤਿਆਰੀ ਹੈ।