ਨਵੀਂ ਦਿੱਲੀ: ਕੇਂਦਰ ਸਰਕਾਰ ਨੇ ਮਾਸਕ ਅਤੇ ਹੈਂਡ ਸੈਨੀਟਾਈਜ਼ਰ ਵਰਗੀਆਂ ਚੀਜ਼ਾਂ ਦੀਆਂ ਕੀਮਤਾਂ ਤੈਅ ਕਰਨ ਦਾ ਐਲਾਨ ਕਰਦਿਆਂ ਕਾਲੇ ਮਾਰਕੀਟਿੰਗ 'ਤੇ ਰੋਕ ਲਗਾਈ ਹੈ। ਖਪਤਕਾਰ ਮਾਮਲੇ ਮੰਤਰੀ ਰਾਮ ਵਿਲਾਸ ਪਾਸਵਾਨ ਨੇ ਟਵੀਟ ਕੀਤਾ ਕਿ ਹੈਂਡ ਸੈਨੇਟਾਈਜ਼ਰ ਦੀ 200 ਮਿਲੀਲੀਟਰ ਦੀ ਬੋਤਲ ਦੀ ਪ੍ਰਚੂਨ ਕੀਮਤ 100 ਰੁਪਏ ਤੋਂ ਵੱਧ ਨਹੀਂ ਹੋਵੇਗੀ। ਇਸ ਤੋਂ ਇਲਾਵਾ ਹੋਰ ਅਕਾਰ ਦੀਆਂ ਬੋਤਲਾਂ ਦੀ ਕੀਮਤ ਵੀ ਇਸੇ ਅਨੁਪਾਤ ਮੁਤਾਬਕ ਰਹੇਗੀ। ਇਹ ਕੀਮਤਾਂ 30 ਜੂਨ 2020 ਤੱਕ ਦੇਸ਼ ਭਰ ਵਿੱਚ ਲਾਗੂ ਰਹਿਣਗੀਆਂ। ਮਾਸਕ ਦੀ ਕੀਮਤ 10 ਰੁਪਏ ਰਾਮ ਵਿਲਾਸ ਪਾਸਵਾਨ ਨੇ ਹੈਂਡ ਸੈਨੇਟਾਈਜ਼ਰ ਦੇ ਨਾਲ ਮਾਸਕ ਦੀ ਸਹੀ ਕੀਮਤ ਵੀ ਤੈਅ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ 2 ਪਲਾਈ (ਸਰਜੀਕਲ) ਮਾਸਕ ਦੀ ਕੀਮਤ 8 ਰੁਪਏ ਹੈ ਅਤੇ 3 ਪਲਾਈ (ਸਰਜੀਕਲ) ਮਾਸਕ ਦੀ ਕੀਮਤ 10 ਰੁਪਏ ਹੈ। ਉਪਭੋਗਤਾ ਮਾਮਲਿਆਂ ਦੇ ਮੰਤਰੀ ਨੇ ਇਹ ਵੀ ਸਾਫ ਕੀਤਾ ਕਿ ਕੀਮਤ ਕੈਪ ਨੂੰ ਫੇਸ ਮਾਸਕ ਅਤੇ ਸੈਨੀਟਾਈਜ਼ਰ ਬਣਾਉਣ ‘ਚ ਵਰਤੇ ਜਾਂਦੇ ਕੱਚੇ ਮਾਲ ਦੀਆਂ ਕੀਮਤਾਂ ‘ਚ ਹੋਏ ਤੇਜ਼ ਵਾਧੇ ਨੂੰ ਧਿਆਨ ਵਿਚ ਰੱਖਦੇ ਹੋਏ ਲਾਇਆ ਗਿਆ ਹੈ।
ਇਸ ਮਹੀਨੇ ਦੀ ਸ਼ੁਰੂਆਤ ‘ਚ ਸਰਕਾਰ ਨੇ ਕੋਰੋਨਾ ਕਾਰਨ ਮਾਸਕ ਅਤੇ ਸੈਨੇਟਾਈਜ਼ਰ ਦੀ ਘਾਟ ‘ਤੇ ਕਾਲੇ ਬਾਜ਼ਾਰ ਦੇ ਮੱਦੇਨਜ਼ਰ ਇਨ੍ਹਾਂ ਦੋਵਾਂ ਚੀਜ਼ਾਂ ਨੂੰ ਜ਼ਰੂਰੀ ਚੀਜ਼ਾਂ ਵਜੋਂ ਐਲਾਨਿਆ ਸੀ। 19 ਮਾਰਚ ਨੂੰ ਸਰਕਾਰ ਨੇ ਸੈਨੇਟਾਈਜ਼ਰ ਬਣਾਉਣ ਲਈ ਵਰਤੀ ਜਾਂਦੀ ਸ਼ਰਾਬ ਦੀ ਕੀਮਤ ‘ਤੇ ਸੀਮਾ ਲਗਾ ਦਿੱਤੀ ਸੀ।