ਨਵੰਬਰ ਮਹੀਨਾ ਚੜ੍ਹ ਗਿਆ ਅਤੇ ਬਸ ਸਾਲ ਨੂੰ ਪੂਰਾ ਹੋਣ 'ਚ ਇੱਕ ਹੀ ਮਹੀਨਾ ਯਾਨੀਕਿ ਦਸੰਬਰ ਹੀ ਬਾਕੀ ਹੈ, ਉਸ ਤੋਂ ਬਾਅਦ 2026 ਦਾ ਸਵਾਗਤ ਕੀਤਾ ਜਾਏਗਾ। ਹਰ ਕਿਸੇ ਨੂੰ ਨਵੇਂ ਸਾਲ ਤੋਂ ਬਹੁਤ ਸਾਰੀਆਂ ਉਮੀਦਾਂ ਹੁੰਦੀਆਂ ਹਨ। ਦੱਸ ਦਈਏ ਪੰਜਾਬ ਸਰਕਾਰ ਨੇ ਸਾਲ 2026 ਲਈ ਸਰਕਾਰੀ ਕਰਮਚਾਰੀਆਂ ਲਈ ਛੁੱਟੀਆਂ ਦਾ ਕੈਲੰਡਰ ਜਾਰੀ ਕਰ ਦਿੱਤਾ ਹੈ। ਇਸ ਵਾਰ ਕਰਮਚਾਰੀਆਂ ਨੂੰ ਪਿਛਲੇ ਸਾਲਾਂ ਦੇ ਮੁਕਾਬਲੇ ਘੱਟ ਛੁੱਟੀਆਂ ਤਾਂ ਮਿਲਣਗੀਆਂ, ਪਰ ਲੰਮੇ ਵੀਕਐਂਡ ਦਾ ਫਾਇਦਾ ਜ਼ਰੂਰ ਮਿਲੇਗਾ। ਨਵੇਂ ਕੈਲੰਡਰ ਵਿੱਚ 31 ਸਰਕਾਰੀ ਤੇ 19 ਹਫਤਾਵਾਰ ਛੁੱਟੀਆਂ ਰੱਖੀਆਂ ਗਈਆਂ ਹਨ, ਜਦਕਿ 2025 ਵਿੱਚ ਇਹ ਗਿਣਤੀ ਕ੍ਰਮਵਾਰ 33 ਤੇ 20 ਸੀ।
ਇਸ ਵਜ੍ਹਾ ਕਰਕੇ ਘੱਟ ਹੋਈਆਂ ਛੁੱਟੀਆਂ
ਅਸਲ ਵਿੱਚ, ਕਈ ਵੱਡੇ ਤਿਉਹਾਰ ਸ਼ਨੀਵਾਰ ਅਤੇ ਐਤਵਾਰ ਨੂੰ ਪੈਣ ਕਰਕੇ ਕੁੱਲ ਛੁੱਟੀਆਂ ਦੀ ਗਿਣਤੀ ਘੱਟ ਹੋ ਗਈ ਹੈ। ਮਹਾਸ਼ਿਵਰਾਤਰੀ, ਪਰਸ਼ੁਰਾਮ ਜਯੰਤੀ, ਦੀਵਾਲੀ, ਨਵਰਾਤਰੀ ਸਥਾਪਨਾ ਅਤੇ ਵਿਸ਼ਵ ਆਦਿਵਾਸੀ ਦਿਵਸ ਵਰਗੇ ਤਿਉਹਾਰ ਐਤਵਾਰ ਨੂੰ ਆ ਰਹੇ ਹਨ, ਜਦਕਿ ਈਦ-ਉਲ-ਫ਼ਿਤਰ ਅਤੇ ਆਜ਼ਾਦੀ ਦਿਵਸ ਸ਼ਨੀਵਾਰ ਨੂੰ ਹੋਣਗੇ। ਇਸ ਕਰਕੇ ਕਰਮਚਾਰੀਆਂ ਨੂੰ ਇਨ੍ਹਾਂ ਦਿਨਾਂ ਲਈ ਵੱਖਰੀ ਛੁੱਟੀ ਨਹੀਂ ਮਿਲੇਗੀ।
ਹਾਲਾਂਕਿ ਛੁੱਟੀਆਂ ਘੱਟ ਹੋਣ ਦੇ ਬਾਵਜੂਦ ਕੈਲੰਡਰ ਵਿੱਚ ਕਈ ਅਜਿਹੇ ਹਫ਼ਤੇ ਹਨ ਜਦੋਂ ਕਰਮਚਾਰੀਆਂ ਨੂੰ ਲਗਾਤਾਰ ਤਿੰਨ ਦਿਨ ਦੀ ਛੁੱਟੀ ਦਾ ਲਾਭ ਮਿਲੇਗਾ। ਸਧਾਰਣ ਪ੍ਰਸ਼ਾਸਨ ਵਿਭਾਗ ਅਨੁਸਾਰ, ਸਾਲ 2026 ਵਿੱਚ ਅਜਿਹੇ 12 ਹਫ਼ਤੇ ਹੋਣਗੇ ਜਦੋਂ ਕਰਮਚਾਰੀਆਂ ਨੂੰ ਤਿੰਨ ਦਿਨ ਦੀ ਲਗਾਤਾਰ ਛੁੱਟੀ ਮਿਲੇਗੀ, ਜਿਨ੍ਹਾਂ ਵਿੱਚੋਂ ਸੱਤ ਹਫ਼ਤੇ ਸ਼ੁੱਕਰਵਾਰ ਤੋਂ ਸ਼ੁਰੂ ਹੋਣਗੇ। ਇਨ੍ਹਾਂ ਲੰਮੇ ਵੀਕਐਂਡਾਂ ਦੌਰਾਨ ਸਰਕਾਰੀ ਦਫ਼ਤਰ ਸਿਰਫ਼ ਚਾਰ ਦਿਨ ਹੀ ਖੁੱਲੇ ਰਹਿਣਗੇ।
ਇਸ ਤੋਂ ਇਲਾਵਾ, 2026 ਵਿੱਚ ਕਈ ਵੱਡੇ ਤਿਉਹਾਰ ਸੋਮਵਾਰ ਨੂੰ ਪੈ ਰਹੇ ਹਨ — ਜਿਵੇਂ 2 ਮਾਰਚ ਨੂੰ ਹੋਲਿਕਾ ਦਹਨ, 19 ਅਕਤੂਬਰ ਨੂੰ ਦੁਰਗਾ ਅਸ਼ਟਮੀ ਅਤੇ 9 ਨਵੰਬਰ ਨੂੰ ਗੋਵਰਧਨ ਪੂਜਾ। ਇਸ ਨਾਲ ਕਰਮਚਾਰੀਆਂ ਨੂੰ ਐਤਵਾਰ ਨਾਲੋਂ ਇਲਾਵਾ ਸੋਮਵਾਰ ਦੀ ਛੁੱਟੀ ਦਾ ਵੀ ਆਨੰਦ ਮਿਲੇਗਾ। ਇਹ ਨਾ ਸਿਰਫ਼ ਕੰਮ ਅਤੇ ਜੀਵਨ ਵਿਚ ਸੰਤੁਲਨ ਬਣਾਈ ਰੱਖਣ ਵਿੱਚ ਮਦਦਗਾਰ ਸਾਬਤ ਹੋਵੇਗਾ, ਬਲਕਿ ਕਰਮਚਾਰੀਆਂ ਨੂੰ ਪਰਿਵਾਰ ਨਾਲ ਸਮਾਂ ਬਿਤਾਉਣ ਅਤੇ ਧਾਰਮਿਕ ਸਮਾਗਮਾਂ ਵਿੱਚ ਹਿੱਸਾ ਲੈਣ ਦਾ ਮੌਕਾ ਵੀ ਪ੍ਰਦਾਨ ਕਰੇਗਾ।
ਕੈਲੰਡਰ ਵਿੱਚ ਜ਼ਿਲ੍ਹਾ ਕਲੈਕਟਰਾਂ ਨੂੰ ਦੋ ਵਾਧੂ ਸਥਾਨਕ ਛੁੱਟੀਆਂ ਐਲਾਨ ਕਰਨ ਦਾ ਅਧਿਕਾਰ ਵੀ ਦਿੱਤਾ ਗਿਆ ਹੈ, ਤਾਂ ਜੋ ਸਥਾਨਕ ਰਿਵਾਜਾਂ ਨਾਲ ਜੁੜੇ ਤਿਉਹਾਰਾਂ — ਜਿਵੇਂ ਹਰਿਆਲੀ ਅਮਾਵਸਿਆ ਜਾਂ ਖੇਤਰੀ ਮੇਲੇ — 'ਤੇ ਛੁੱਟੀ ਦਿੱਤੀ ਜਾ ਸਕੇ। ਪ੍ਰਸ਼ਾਸਕੀ ਸੂਤਰਾਂ ਦੇ ਮੁਤਾਬਕ, ਛੁੱਟੀਆਂ ਦੀ ਗਿਣਤੀ ਘਟਾਉਣ ਦੇ ਪਿੱਛੇ ਮੁੱਖ ਕਾਰਣ ਇਹ ਹੈ ਕਿ ਕਈ ਤਿਉਹਾਰ ਵੀਕਐਂਡ 'ਤੇ ਪੈ ਰਹੇ ਹਨ, ਜਿਸ ਨਾਲ ਸਰਕਾਰੀ ਕੰਮਕਾਜ ਪ੍ਰਭਾਵਿਤ ਨਾ ਹੋਵੇ ਅਤੇ ਸਾਲ ਭਰ ਕਾਰਜ ਦਿਵਸਾਂ ਦਾ ਸੰਤੁਲਨ ਬਣਿਆ ਰਹੇ। ਹਾਲਾਂਕਿ ਇਸ ਵਾਰ ਛੁੱਟੀਆਂ ਘੱਟ ਹੋਈਆਂ ਹਨ, ਪਰ ਲਗਾਤਾਰ ਤਿੰਨ ਦਿਨ ਦੀਆਂ ਛੁੱਟੀਆਂ ਵਾਲੇ 12 ਹਫ਼ਤੇ ਕਰਮਚਾਰੀਆਂ ਲਈ ਰਾਹਤ ਦਾ ਕਾਰਣ ਬਣਨਗੇ।