ਕੇਂਦਰ ਸਰਕਾਰ ਵੱਲੋਂ ਬਣਾਏ ਤਿੰਨ ਖੇਤੀ ਕਾਨੂੰਨਾਂ ਖਿਲਾਫ ਦਿੱਲੀ ਬਾਰਡਰ 'ਤੇ ਚੱਲ ਰਹੇ ਕਿਸਾਨ ਧਰਨੇ 'ਚ ਹਰਿਆਣਾ ਦੇ ਇਕ ਕਿਸਾਨ ਵੱਲੋਂ 51 ਲੱਖ ਦੀ ਮੱਝ ਵੇਚ ਕੇ ਲਾਇਆ ਲੰਗਰ ਚਰਚਾ 'ਚ ਹੈ। ਚਰਚਾ ਸੀ ਕਿ ਸਰਸਵਤੀ ਨਾਂਅ ਦੀ ਮੱਝ 51 ਲੱਖ ਰੁਪਏ 'ਚ ਵਿਕੀ ਹੈ। ਹੁਣ ਸਮਰਾਲਾ ਦੇ ਕਸਬਾ ਮਾਛੀਵਾੜਾ ਦੇ ਇਕ ਪਸ਼ੂਪਾਲਕ ਕਿਸਾਨ ਪਵਿੱਤਰ ਸਿੰਘ ਨੇ ਹੈਰਾਨੀਜਨਕ ਖੁਲਾਸਾ ਕੀਤਾ ਹੈ।
ਪਵਿੱਤਰ ਸਿੰਘ ਨੇ ਦੱਸਿਆ ਕਿ ਉਸ ਨੇ ਮੋਹਰਾ ਨਸਲ ਦੀ ਸਰਸਵਤੀ ਮੱਝ ਨੂੰ 51 ਲੱਖ 'ਚ ਨਹੀਂ ਖਰੀਦਿਆ ਬਲਕ ਉਸਨੇ 7 ਮੱਝਾਂ ਦੇ ਨਾਲ ਢਾਈ ਲੱਖ ਰੁਪਏ ਨਗਦ ਹਰਿਆਣਾ ਦੇ ਵਪਾਰੀ ਸੁਖਬੀਰ ਟਾਂਡਾ ਨੂੰ ਦਿੱਤੇ ਸਨ। ਪਰ ਇਹ ਜ਼ਰੂਰ ਹੈ ਕਿ ਸੁਖਬੀਰ ਟਾਂਡਾ ਵੱਲੋਂ ਕਿਸਾਨ ਅੰਦੋਲਨ 'ਚ ਲੋਕਾਂ ਦੇ ਸਹਿਯੋਗ ਨਾਲ ਲੰਗਰ ਜ਼ਰੂਰ ਲਾਇਆ ਗਿਆ ਹੈ। ਪਵਿੱਤਰ ਸਿੰਘ ਮੁਤਾਬਕ ਸੋਸ਼ਲ ਮੀਡੀਆ ਤੇ ਲੋਕਾਂ ਨੂੰ ਗਲ ਦੱਸ ਕੇ ਗੁੰਮਰਾਹ ਕੀਤਾ ਜਾ ਰਿਹਾ ਹੈ। ਕਿ ਹਰਿਆਣਾ ਦੇ ਵਪਾਰੀ ਸੁਖਬੀਰ ਟਾਂਡਾ ਨੇ 51 ਲੱਖ ਰੁਪਏ 'ਚ ਮੋਹਰਾ ਨਸਲ ਦੀ ਮੱਝ ਸਰਸਵੀ ਵੇਚ ਕੇ ਦਿੱਲੀ 'ਚ ਚੱਲ ਰਹੇ ਕਿਸਾਨ ਅੰਦੋਲਨ 'ਚ ਲੰਗਰ ਲਾਇਆ ਹੈ।
ਉਨ੍ਹਾਂ ਕਿਹਾ ਇਹ ਜ਼ਰੂਰ ਸੱਚ ਹੈ ਕਿ ਸੁਖਬੀਰ ਟਾਂਡਾ ਨੇ ਅੰਦੋਲਨ 'ਚ ਲੰਗਰ ਲਾਇਆ ਹੈ ਪਰ ਇਹ ਅੰਦੋਲਨ ਲੋਕਾਂ ਦੇ ਸਹਿਯੋਗ ਨਾਲ ਲਾਇਆ ਹੈ ਮੈਂ ਖੁਦ ਵੀ ਇਸ 'ਚ ਸੇਵਾ ਕਰਕੇ ਆਇਆ ਹਾਂ।
ਪਵਿੱਤਰ ਸਿੰਘ ਨੇ ਦੱਸਿਆ ਕਿ ਸਰਸਵਤੀ ਮੱਝ ਸੁਖਬੀਰ ਟਾਂਡਾ ਕੋਲ ਸੀ ਤਾਂ ਉਸ ਵੇਲੇ 33.131 ਕਿਲੋਗ੍ਰਾਮ ਦੁੱਧ ਦੇਣ ਦਾ ਵਿਸ਼ਵ ਰਿਕਾਰਡ ਬਣਾਇਆ ਸੀ। ਜਿਸ ਨੂੰ ਪਾਕਿਸਤਾਨ ਦੀ ਮੱਝ ਨੇ ਤੋੜਦਿਆਂ 33.856 ਕਿਲੋਗ੍ਰਾਮ ਦੁੱਧ ਦੇਕੇ ਨਵਾਂ ਰਿਕਾਰਡ ਬਣਾਇਆ ਹੈ। ਉਨ੍ਹਾਂ ਕਿਹਾ ਇਸ ਵਿਸ਼ਵ ਰਿਕਾਰਡ ਨੂੰ ਮੁੜ ਤੋਂ ਸਰਸਵਤੀ ਦੇ ਨਾਂਅ ਕਰਾਉਣ ਲਈ ਉਹ ਸਰਸਵਤੀ ਨੂੰ ਤਿਆਰ ਕਰ ਰਹੇ ਹਨ। ਜਿਸ ਦੇ ਅੰਤਰਗਤ ਆਉਣ ਵਾਲੀ 19 ਤੇ 20 ਫਰਵਰੀ ਨੂੰ ਸਰਸਵਤੀ ਦੀ ਦੁੱਧ ਚੁਆਈ ਲਾਈਵ ਪਸ਼ੂ ਮਾਹਿਰਾਂ ਦੇ ਸਾਹਮਣੇ ਕਰਵਾਈ ਜਾਵੇਗੀ।
ਪੰਜਾਬੀ 'ਚ ਤਾਜ਼ਾ ਖਬਰਾਂ ਪੜ੍ਹਨ ਲਈ ਏਬੀਪੀ ਸਾਂਝਾ ਦੀ ਐਪ ਹੁਣੇ ਕਰੋ ਡਾਊਨਲੋਡ