Aam Aadmi Party: ਭ੍ਰਿਸ਼ਟਾਚਾਰ ਵਿਰੋਧੀ ਬਿਊਰੋ (ACB) ਆਮ ਆਦਮੀ ਪਾਰਟੀ (AAP) ਦੇ ਆਗੂਆਂ ਵਿਰੁੱਧ ਕਾਨੂੰਨੀ ਕਾਰਵਾਈ ਕਰਨ ਦੀ ਤਿਆਰੀ ਕਰ ਰਿਹਾ ਹੈ। ਇਨ੍ਹਾਂ ਵਿੱਚ ਦਿੱਲੀ ਦੇ ਸਾਬਕਾ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ (Arvind Kejriwal), ਮੁਕੇਸ਼ ਅਹਿਲਾਵਤ ਤੇ ਸੰਜੇ ਸਿੰਘ (Sanjay Singh) ਸ਼ਾਮਲ ਹਨ।
ਸੂਤਰਾਂ ਅਨੁਸਾਰ, ਜੇ ਏਸੀਬੀ ਵੱਲੋਂ ਭੇਜੇ ਗਏ ਨੋਟਿਸ ਦਾ ਕੋਈ ਜਵਾਬ ਨਹੀਂ ਆਉਂਦਾ ਤਾਂ ਇਹ ਕਦਮ ਚੁੱਕਿਆ ਜਾ ਸਕਦਾ ਹੈ। ਜੇ 'ਆਪ' ਵੱਲੋਂ ਕੋਈ ਜਵਾਬ ਨਹੀਂ ਦਿੱਤਾ ਜਾਂਦਾ ਹੈ ਤਾਂ ਏਸੀਬੀ ਦਿੱਲੀ ਪੁਲਿਸ ਨੂੰ ਪੱਤਰ ਲਿਖੇਗੀ ਅਤੇ ਇਨ੍ਹਾਂ ਆਗੂਆਂ ਵਿਰੁੱਧ ਕਾਨੂੰਨੀ ਕਾਰਵਾਈ ਦੀ ਸਿਫ਼ਾਰਸ਼ ਕਰੇਗੀ।
ਇਸ ਤੋਂ ਪਹਿਲਾਂ 7 ਫਰਵਰੀ ਨੂੰ ਏਸੀਬੀ ਦੀ ਟੀਮ ਜਾਂਚ ਲਈ ਅਰਵਿੰਦ ਕੇਜਰੀਵਾਲ, ਸੰਸਦ ਮੈਂਬਰ ਸੰਜੇ ਸਿੰਘ ਅਤੇ ਮੁਕੇਸ਼ ਅਹਲਾਵਤ ਦੇ ਘਰਾਂ 'ਤੇ ਪਹੁੰਚੀ ਸੀ। ਕੇਜਰੀਵਾਲ ਦੇ ਘਰ ਦੀ ਲਗਭਗ ਡੇਢ ਘੰਟੇ ਜਾਂਚ ਕੀਤੀ, ਕਾਨੂੰਨੀ ਨੋਟਿਸ ਦਿੱਤਾ ਤੇ ਚਲੇ ਗਏ।
ਦਿੱਲੀ ਚੋਣ ਨਤੀਜਿਆਂ ਤੋਂ ਇੱਕ ਦਿਨ ਪਹਿਲਾਂ, ਕੇਜਰੀਵਾਲ ਨੇ ਦਾਅਵਾ ਕੀਤਾ ਸੀ ਕਿ ਭਾਜਪਾ ਉਨ੍ਹਾਂ ਦੇ ਵਿਧਾਇਕਾਂ ਅਤੇ ਉਮੀਦਵਾਰਾਂ ਨੂੰ ਫ਼ੋਨ 'ਤੇ 15-15 ਕਰੋੜ ਰੁਪਏ ਦੀ ਪੇਸ਼ਕਸ਼ ਕਰ ਰਹੀ ਹੈ। ਇਸ ਤੋਂ ਬਾਅਦ ਭਾਜਪਾ ਨੇ ਦਿੱਲੀ ਦੇ ਉਪ ਰਾਜਪਾਲ ਵੀਕੇ ਸਕਸੈਨਾ ਨੂੰ ਪੱਤਰ ਲਿਖ ਕੇ ਦੋਸ਼ਾਂ ਦੀ ਜਾਂਚ ਦੀ ਮੰਗ ਕੀਤੀ ਸੀ। LG ਨੇ ਜਾਂਚ ਦੀ ਜ਼ਿੰਮੇਵਾਰੀ ACB ਨੂੰ ਸੌਂਪੀ ਸੀ।
ਨੋਟਿਸ ਵਿੱਚ ਏਸੀਬੀ ਨੇ ਕੇਜਰੀਵਾਲ ਤੋਂ 16 'ਆਪ' ਵਿਧਾਇਕਾਂ ਬਾਰੇ ਵੇਰਵੇ ਮੰਗੇ ਸਨ, ਜਿਨ੍ਹਾਂ ਨੂੰ ਰਿਸ਼ਵਤ ਦੀ ਪੇਸ਼ਕਸ਼ ਕੀਤੇ ਜਾਣ ਦਾ ਦਾਅਵਾ ਕੀਤਾ ਗਿਆ ਸੀ। ਇਸ ਤੋਂ ਇਲਾਵਾ ਇਨ੍ਹਾਂ ਵਿਧਾਇਕਾਂ ਦੀਆਂ ਸੋਸ਼ਲ ਮੀਡੀਆ ਪੋਸਟਾਂ ਤੇ ਰਿਸ਼ਵਤ ਦੀ ਪੇਸ਼ਕਸ਼ ਕਰਨ ਵਾਲਿਆਂ ਦੀ ਪਛਾਣ ਨਾਲ ਸਬੰਧਤ ਜਾਣਕਾਰੀ ਵੀ ਮੰਗੀ ਗਈ ਸੀ। ਏਸੀਬੀ ਨੇ 'ਆਪ' ਆਗੂਆਂ ਤੋਂ ਦੋਸ਼ਾਂ ਨਾਲ ਸਬੰਧਤ ਸਾਰੇ ਸਬੂਤ ਮੰਗੇ ਹਨ।
ਦਿੱਲੀ ਚੋਣ ਨਤੀਜਿਆਂ ਵਿੱਚ ਆਪ ਨੂੰ ਵੱਡਾ ਝਟਕਾ
ਦੱਸ ਦਈਏ ਕਿ ਦਿੱਲੀ ਵਿਧਾਨ ਸਭਾ ਚੋਣਾਂ ਵਿੱਚ ਭਾਜਪਾ ਨੇ ਬਹੁਮਤ ਹਾਸਲ ਕਰ ਲਿਆ ਹੈ। ਭਾਜਪਾ 70 ਵਿੱਚੋਂ 48 ਸੀਟਾਂ ਜਿੱਤ ਕੇ 26 ਸਾਲਾਂ ਬਾਅਦ ਸੱਤਾ ਵਿੱਚ ਵਾਪਸ ਆਈ। ਆਮ ਆਦਮੀ ਪਾਰਟੀ (AAP) 40 ਸੀਟਾਂ ਗੁਆ ਬੈਠੀ ਅਤੇ 22 ਸੀਟਾਂ 'ਤੇ ਸਿਮਟ ਗਈ।
ਇਸ ਵਾਰ ਭਾਜਪਾ ਨੇ 68 ਸੀਟਾਂ 'ਤੇ ਚੋਣ ਲੜੀ ਅਤੇ 48 ਸੀਟਾਂ ਜਿੱਤੀਆਂ। ਇਸਦਾ ਮਤਲਬ ਹੈ ਕਿ, 71% ਦੇ ਸਟ੍ਰਾਈਕ ਰੇਟ ਨਾਲ, ਇਸਦੀਆਂ ਸੀਟਾਂ 40 ਵਧੀਆਂ। ਜਦੋਂ ਕਿ 'ਆਪ' ਦਾ ਸਟ੍ਰਾਈਕ ਰੇਟ 31% ਸੀ ਅਤੇ ਇਸਨੇ 40 ਸੀਟਾਂ ਗੁਆ ਦਿੱਤੀਆਂ।