ਮੁੰਬਈ: ਭਾਰਤੀ ਰਿਜ਼ਰਵ ਬੈਂਕ ਦੇ ਸਾਬਕਾ ਗਵਰਨਰ ਰਘੂਰਾਮ ਰਾਜਨ ਨੇ ਕਾਂਗਰਸ ਪ੍ਰਧਾਨ ਰਾਹੁਲ ਗਾਂਧੀ ਦੇ ਘੱਟੋ-ਘੱਟ ਆਮਦਨ ਗਰੰਟੀ ਦੇ ਦਾਅਵਿਆਂ ਦੀ ਪੁਸ਼ਟੀ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਇਹ ਯੋਜਨਾ ਲਾਗੂ ਕਰਨ ਲਾਇਕ ਹੈ। ਬੀਜੇਪੀ ਨੇ ਨਕਦ ਟ੍ਰਾਂਸਫਰ ਤੇ ਕਾਂਗਰਸ ਨੇ ਨਿਆਂ ਯੋਜਨਾ ਦੇ ਵਾਅਦੇ ਜ਼ਰੀਏ ਇਹ ਦਿਖਾਇਆ ਹੈ ਕਿ ਗਰੀਬੀ ਦੂਰ ਕਰਨ ਲਈ ਨਕਦ ਟ੍ਰਾਂਸਫਰ ਹੀ ਬਿਹਤਰ ਮਾਰਗ ਹੈ।
ਦੱਸ ਦੇਈਏ ਕਿ ਰਾਹੁਲ ਗਾਂਧੀ ਨੇ ਜੈਪੁਰ ਵਿੱਚ ਇੱਕ ਚੋਣ ਰੈਲੀ ਨੂੰ ਸੰਬੋਧਨ ਕਰਦਿਆਂ ਕਿਹਾ ਸੀ ਕਿ ਉਨ੍ਹਾਂ ਘੱਟੋ-ਘੱਟ ਆਮਦਨ ਗਰੰਟੀ ਦੇ ਸਬੰਧ ਵਿੱਚ ਸਾਬਕਾ ਗਵਰਨਰ ਰਘੂਰਾਮ ਰਾਜਨ ਸਮੇਤ ਵੱਡੇ ਅਰਥਸ਼ਾਸਤਰੀਆਂ ਨਾਲ 6 ਮਹੀਨੇ ਤਕ ਗੱਲਬਾਤ ਕੀਤੀ ਹੈ। ਇਸ ਦੌਰਾਨ 12 ਹਜ਼ਾਰ ਰੁਪਏ ਪ੍ਰਤੀ ਮਹੀਨਾ ਘੱਟੋ-ਘੱਟ ਆਮਦਨ ਗਰੰਟੀ ਦੀ ਹੱਦ ਤੈਅ ਕਰਨ ਦੀ ਗੱਲ ਸਾਹਮਣੇ ਆਈ ਸੀ।
ਦਰਅਸਲ ਰਘੂਰਾਮ ਰਾਜਨ ਆਪਣੀ ਪੁਸਤਕ 'ਦ ਥਰਡ ਪਿੱਲਰ' ਦੇ ਲੋਕ ਅਰਪਣ ਮੌਕੇ ਪੁੱਜੇ ਸਨ। ਇਸ ਦੌਰਾਨ ਉਨ੍ਹਾਂ ਮੋਦੀ ਸਰਕਾਰ ਦੇ 'ਨਿਊਨਤਮ ਸਰਕਾਰ-ਕਾਰਗਰ ਪ੍ਰਸ਼ਾਸਨ' ਦੇ ਵਾਅਦੇ 'ਤੇ ਸਵਾਲ ਚੁੱਕਿਆ। ਉਨ੍ਹਾਂ ਕਿਹਾ ਕਿ ਮੋਦੀ ਦੇ ਸ਼ਾਸਨ ਵਿੱਚ ਸਰਕਾਰ ਨੇ ਬਿਨਾਂ ਕਿਸੇ ਰੁਕਾਵਟ ਵਧੇਰੇ ਤਾਕਤ ਹਾਸਲ ਕੀਤੀ।